VIDANMANTA
Dioswanpas, mamaywanpas hawkañam kawsakuni
HUK kutipim mamay niwarqa: “¿Imanasqataq abuelonchikkuna yupaychaytaqa manaña munankiñachu? ¡Paykunaraykum kawsachkanchik! ¿Manachu yachanki? ¿Manachu musyakunki costumbrenchikkuna qipanchasqaykita? Mana yupaychaspaykiqa religionninchiktam pinqayman churachkanki”, nispa. Hinaspam waqayta qallaykurqa.
Puntataqa mamaymi testigokunawan bibliata estudiachkarqa, hinaptinmi manaña munaspan nirqa ñuqataña yachachiwananpaq, chaynapim biblia estudiayta qallaykurqani. Jehova Diosmanta yachasqayman hinaqa, pay kasukuyta munaspaymi aylluykunapa costumbrekuna ruwaytaqa manaña munarqanichu. Chayraykum mamayqa llumpayta piñakururqa. Ichaqa Jehova Diosmi yanapawarqa.
JEHOVA DIOSTA IMAYNA RIQSISQAYMANTA
Japón nacionpi achka runakuna hinam ñuqapas, budista religionniyuq karqani. Ichaqa testigokuna iskay killaña bibliamanta yachachiwachkaptinmi, musyakururqani bibliaqa Diospa palabran kasqanta. Chaymi hanaq pachapi taytanchik Jehova Dios riqsiyta munarqani. Qallariyllanpiqa testigokuna yachachiwasqankumantam mamayman kusisqallaña willaq kani. Hinaspam huñunakuykunamanpas domingonkuna riyta qallaykurqani. Ichaqa Diosmanta yachasqayman hinam mamaytaqa nirqani, budismo religionpa costumbrenkunataqa manaña ruwanaypaq. Hinaptinmi payqa piñakuspan niwarqa: “Abuelonchikkunata mana respetaspaykiqa pinqaymanmi churawachkankiku”, nispa. Hinaspam harkawarqa biblia estudianaytawan huñunakuykunaman rinayta.
Taytaypas piñakururqam. Efesios 6 capitulopim nichkan churi-wawakunaqa tayta-mamankuta kasukunankumanta. Chaymi tayta-mamaywan hawka kawsakuyta munaspay sunqullaypi nirqani: “Niwasqankuta ruwaptiyqa manañachiki harkawanqañachu” nispay. Chaymi escueylaypi examenkuna kasqanrayku huñunakuykunaman riytaqa kimsa killa saqirurqani. Ichaqa Jehova Diostam nirqani chay kimsa killa tukuyllata huñunakuyman kaqlla kutinaypaq.
Chayna tanteasqayqa manamá allinpaqchu karqa. Jehova Dioswan amistadniymi chiriyayta qallaykurqa. Tayta-mamaypas astawanraqmi hikutawarqa Jehova Diosmanta karunchakunaypaq.
SASACHAKUYKUNA YAPAKUSQANMANTA
Huñunakuykunaman risqaypiqa ñuqa hina sasachakuywan ñakariq testigokunatam riqsirqani. Paykunam kallpanchawaspan niwarqa, Diosman sunqu hinalla takyaspayqa tayta-mamaytapas yanapanaymanta (Mat. 10:34-37). Chaymi Jehova Diospi hapipakuspay tukuy sunquywan mañakurqani yanapawananpaq.
Tukuytamá tayta-mamayqa ruwarqaku. Wasillapi kanaypaqmi imatañapas ruwachiwaq. Wakinpiñataqmi hawapi wichqaruwaspan mikuytapas mana quwaqchu. Sapa kutim mamayqa pitukuykuspan mañakuwaq bibliata amaña estudianaypaq, ñuqaqa upallallam uyariq kani. Manachayqa lirianakuqmi kaniku. Chayraqmi kunan musyakuni chay ruwanaymantaqa imayna piensasqankuta uyarispa respetanay kasqanmanta. Chaynapiqa manach llumpaytaqa piñakunmankuchu karqa.
Diosmanta karunchawananpaqmi mamayqa huk runakunatapas valekurqa. Profesorniyman willaptinmi payqa mana mayqanniykumanpas sayapakurqachu. Chaymantapas llamkayninman pusawaspanmi patronninta mañakurqa budismo religionlla chiqap kasqanmanta niwananpaq. Hinaspapas aylluykunamanmi waqaspan willakurqa. Chaykuna ruwasqanmi llumpayta llakichiwaq. Ichaqa ancianokunam huñunakuypi kallpanchawaspan yuyarichiwarqa chaykunata mamay ruwaspanqa Diosmanta willakusqanta.
Tayta-mamayqa imallapas kanayta munaspankum universidadpi estudianayta munarqaku. Chayraykum sapa kuti piñachinakuq kaniku. Chaymi qillqaspayña niq kani imakuna ruway munasqayta. Huk punchawmi taytay llumpayta piñakuruspan niwarqa: “Llamkayta paqarinlla mana tariruspaykiqa wasimantam ripuwanki”, nispa.
Jehova Diostam yanapawananpaq mañakurqani. Paqarintillantam Diosmanta willakuq lluqsisqaypi iskay iñiqmasinchikkuna niwarqa warmankunata yachachinaypaq. Kusikunanmantaqa astawanmi taytayqa mana kaqpaqpas hapiwaqchu. Mamaypas niwarqam testigo kanaymantaqa mana allin runa kayniyraq aswan allin kananmanta.Jehova Diosqa tayta-mamaywan allinta kawsakunaypaq chaynataq imatapas allinta tanteanaypaqmi yanapawarqa
Chaykunaraykum sunqullaypi yuyaymanaq kani: “¿Ichapas Diospa qawasqanman hinaqa mana allinta ruwachkani?”, nispay. Hinaspam Diosta mañakuspay yuyaymanarqani bibliapi Diospa kuyakuyninmanta rimasqankunapi. Chay ruwasqaymi yanapawarqa manaña hukmanyanaypaq hinaspa tayta-mamayqa allinniyta munaspanku imatapas niwasqanta entiendenaypaq. Jehova Diosqa tayta-mamaywan allinta kawsakunaypaq hinaspa imatapas allinta tanteanaypaqmi yanapawarqa. Chaymi kusisqallaña Diosmanta willakuspay astawan chay ruwayta munarqani.
PRECURSORA KASQAYMANTA
Precursora kay munasqayta wakin iñiqmasinchikkuna yacharuspankum niwarqa, tayta-mamaypa sunqun tiyaykuptinña precursora kanaypaq. Chaymi Jehova Diosta mañakuspay qillqanchikkunata estudiarqani hinaspam imanasqa precursora kay munasqaypi yuyaymanarqani. Chaymantapas yuyayniyuq iñiqmasiykunapa yanapakuynintam maskarqani. Hinaspam tantearurqani precursora kaspay Jehova Diosta kusichinaypaq. Sunqunkuraq tiyananta suyaspayqa ichapas yanqa suyayman karqa.
Colegioyta manaraq tukuchkaspaymi precursora kayta qallaykurqani. Chaymantam testigokunapa mana ancha kasqan llaqtakunaman Diosmanta willakuq riyta munarqani. Ichaqa manam tayta-mamayqa munarqachu, chaymi suyarqani 20 wataypi kanaykama. Chayñam Japón nacionpi betel wasiman qillqarqani wakin aylluypa kasqan llaqtachaman kachawananpaq, chaynapi mamaypas mana ima niwananpaq.
Chay risqay llaqtapim achka runakunata yanaparqani Jehova Diospa testigon kanankupaq. Chaymantapas inglés rimaytam yacharqani Diosmanta astawan willakunaypaq. Chay risqay llaqtapiqa karqam tukuy tiemponkuwan Diosmanta willakuq iskay qarikunapas. Paykunaqa anchatam kallpanchakuqku runamasinkuta yanapanankupaq. Chayta qawaspaymi ñuqapas paykuna hina kayta munarqani. Ichaqa mamay chay kutikunapi unquruptinmi wasiyman kutirqani paywan kanaypaq. Chaymi mamayqa chay ruwasqaywan anchata kusikurqa, hinaspam manaña anchataqa harkawaqñachu.
JEHOVA DIOSQA KUYAKUQMI
Qanchis watamantam chay iskay qarikunamanta huk kaqnin cartata apachimuwarqa. Chay cartapim Atsushi sutiyuq iñiqmasinchik niwarqa ñuqawan casarakuy munasqanta. Ñuqaqa manam paywan casarakuytaqa piensarqanichu, chaymi killa pasaytaña nirqani puntataqa riqsinakunaykupaqraq. Hinaptinmi chay riqsinakusqaykupi qawarqaniku, iskayniykupas tukuy tiempoykuwan Diospaq llamkay munasqaykuta. Chaymi casarakururqaniku. Chay punchawqa tayta-mamaywan aylluykunapas chaypim karqaku, chaymi astawan kusichiwarqa.
Nepal
Qusaypiwanmi precursor karqaniku. Chaynapim betel wasimanta niwarqaku wakin kutikunapi huk law llaqtachakunapi iñiqmasiykuta watukunaykupaq. Chaymantam precursor especial kanaykupaq kamachiwarqaku. Tiempo pasasqanman hinam qusay Atsushiqa congregacionkunata watukuq anciano kayta qallaykurqa. Hinaptinmi huk kutillataraq iñiqmasiykuta watukuchkaptiyku,
betel wasimanta tapuwarqaku Nepal nacionpi kaq iñiqmasiykutapas watukunaykupaq.Achka nacionkunapi Diospaq llamkasqaymi yanapawarqa Diospa imayna kasqanmanta astawan yachanaypaq
Llakikurqanim karu-karuman astakunaymanta tayta-mamay yacharuspanku ima ninankumanta. Ichaqa taytayta qayaykuptiymi payqa niwarqa: “Chay nacionqa suma-sumaqmi”, nispa. Chaynataqa niwarqa huk amistadnin Nepal nacion imayna kasqanmanta huk librota quykusqanraykum. Chayta qawaspanmi piensarqa chay nacionqa purikunapaq kuyayllapaq kasqanta.
Chay nacionpi runakunaqa kuyakuqllañam kanku. Chaypi kachkaptiykum betel wasimanta niwarqaku Bangladesh naciontapas watukunaykupaq. Nepalwan Bangladesh nacionkunapi runakunaqa manam chaynallachu karqaku kawsakuyninkupiqa. Chaymi chay nacionkunapiqa, imayna kasqankuman hina Diosmanta willakurqaniku. Pichqa wata pasaytañataqmi Japón nacionman kutinaykupaqña niwarqaku. Kunanqa hinallam Japonpi iñiqmasiykuta watukuchkaniku.
Japón, Nepal hinaspa Bangladesh nacionkunapi Diospaq llamkasqaymi yanapawarqa Diospa imayna kasqanmanta astawan yachanaypaq. Paykunaqa imayna kayninkupiwan costumbrenkupipas manam chaynallachu kanku. Chayna kaptinkupas Jehova Diosqa lliw runatam yanapan, waqaychan hinaspa llaqtanpipas chaskin.
Jehova Diostam agradecekullani llaqtanman pusamuwasqanmanta, paymanta willakunaypaq yanapawasqanmanta, allin qusata quwasqanmanta chaynataq kawsakuyniypi allin yuyaywan imatapas tanteakunaypaq yanapawasqanmanta. Kunanqa aylluykunawanpas allintañam apanakuniku. Anchatam agradecekuni Dioswanpas chaynataq mamaywanpas hawkaña kawsakusqaymanta.
Kusikunikum iñiqmasinchikkunata watukuspayku