Juliapa amistadninqa kallpanchayta munaspanmi chaynata nirqa. Juliam ichaqa taytanta kuyasqanrayku amistadninpa chayna nisqanwanqa astawan hukmanyarurqa, chaymi sapa kuti tapukuq: “¿Imaynamá Diospaqqa allinqa kanman taytaypa wañukusqanqa?”, nispa. Pasaq watakunapim Juliaqa qillqasqan libronpi amistadninpa nisqanta qillqarqa, chayna qillqasqanmi qawachin watakuna pasaytapas taytanmantaqa hinallaraq llakikusqanta.

Juliata ima pasasqanmi qawachin pipapas ayllun wañukuptinqa unay tiempo llakikusqanta. Anchata llakichiwasqanchikraykum wañuytaqa bibliapi sutichan ‘enemigo’ nispa (1 Corintios 15:26). Ayllunchik utaq pipas kuyasqanchik wañukuptinqa qunqayllamantam muspaypi hina rikurirunchik chaymi mana ima ruwaytapas atinchikchu. Manamá pipas wañuymantaqa librakunmanchu.

Ayllunchik utaq pi kuyasqanchikpas wañukuptinqa ichapas tapukunchikman: “¿Haykapikamataq llakisqalla kasaq? ¿Imatam ruwayman sunquyta tiyaykachinaypaq? ¿Imaynatam yanapayman wañukuqpa ayllunkunata? ¿Yaqachu wañukuq aylluywan kaqmanta tupaykuyman?”, nispa.