QARANPI KAQ YACHACHIKUY | BIBLIATAQA MANAM CHINKACHIYTA ATIRQAKUCHU
Mawkayaspanpas manam chinkarqachu
IMA PASASQAN. Bibliata qillqaqkunawan imam kaqta copiaqkunaqa bibliatam ruwarqaku qalaskunapi hinaspa papiro nisqakunapi (2 Timoteo 4:13). * ¿Imaynanpitaq kaynakunapi qillqasqa kasqanrayku bibliaqa yaqalla chinkarurqa?
Papiroqa mawkayaruspanmi ñuturikurun, colorninpas kutirunmi. Richard Parkinson hinaspa Stephen Quirke runakunam ninku: “Tiempopa risqanman hinam ñutupakurun hinaspa allpayarun. Allichasqa kachkaspanpas chay papelqa quqararunmanmi hinaspapas ismurunmanmi, allpapi pampasqa kaptinpas urukunam mikurunman, aswanraqmi yuraq sisiqa”, nispa. Wakin tarisqanku qillqakunatam rupayman churarurqaku chaymi chaylla pumpururqa.
Qalasñataqmi papiromantaqa aswan allin, ichaqa sumaqllata mana servichikuspa nisyu rupaypi saqirusqaqa mawkayarunmi. * Qalastaqa urukunapas mikurunmantaqmi. Chaymi huk qillqa nin: “Ñawpaq qillqakunaqa waki-wakillanmi hina kaqlla kanku”, nispa. Sichu bibliawanpas chayna kanman karqa hinaptinqa manañachiki ima yachachikuyninpas kanmanchu karqa.
BIBLIAQA MANAM CHINKARQACHU. Diosmi israelitakunata kamachirqa lliw kamachiqninkuna sacerdotekunapa hatallisqan librota Genesismanta Deuteronomiokama kikinkupaq qillqanankupaq (Deuteronomio 17:18). Chaymantapas bibliata imam kaqta copiaqkunaqa achkatam copiarurqaku, chaymi Israel nacionpi chaynataq Macedonia lawpipas huñunakunapaq wasikunapi biblia copiasqankuqa karqa (Lucas 4:16, 17; Hechos 17:11). ¿Imaynanpitaq chay qillqakunaqa mana chinkarqachu?
Kachi quchapi tarisqanku wankusqa qillqakunaqa una-unay watakunam hina kaqlla karqa, usyanan lawpi kaq machaykunapi allpa mankapi waqaychasqa
Musuq testamentomanta yachaq Philip Comfort sutiyuq runam nin: “Judiokunaqa bibliamanta wankusqa qillqakunatam mana imanakunanpaq allpa mankakunapi waqaychaqku”, nispa. Jesucristopa qatiqninkunapas hina chaynallatam ruwarqaku. Chayraykum bibliamanta wakin qillqakunataqa allpa mankakunapi, tutayaq wasikunapi, chaki machaykunapi waqaychasqata tarirqaku.
IMAPIM TUKURQA. Bibliamanta parte-partellan tarisqanku achkallaña uchuy qillqachakunam kunan tiempokama hinallaraq kachkan, wakinqa iskay waranqa wata ñawpaqmantaraqmi. Manam ni ima qillqapas chayna wata ñawpaqmantaraqqa kanchu.
