IMA PASASQAN. Religionpi punta apaqkunawan politicokunam biblia mana allinkunata yachachisqanta nispanku contranpi hatarirqaku. Kamachikuq kasqankuman hapipakuspankum harkakurqaku runakuna biblia leenankuta hinaspa huk rimaykunapi bibliata qillqanankutapas. Chayta qawasun:

• Yaqapas 167 watapim Jesuspa tiemponmanta ñawpaqtaraq kamachiq Antíoco Epífanes sutiyuq runa kamachirqa hebreo rimaypi Diospa palabranta chinkachinankupaq, chaytaqa ruwarqa judiokuna Grecia nacionpi taytachakunata yupaychanankupaqmi. Heinrich Graetz runam nin: “Runankunam Diospa palabranta wankusqa qillqakunapi tariruspanku kañarurqaku hinaspam leeqkunatapas wañuchirqaku”, nispa.

• Yaqapas 800 wata ñawpaqtaraqmi religionkunapi wakin punta apaqkunaqa piñakurqaku iñiqkuna bibliapa nisqanta willakuptinku. Chay iñiqkunapa makinpi Diospa palabran kaptinqa religionpa yachachisqanpa contranpi kasqankutam niqku. Latin rimaypi Salmos librollata leenankutam sacerdotekunaqa saqirqaku. Sacerdotekunam nirqaku sapa iglesiapi kaq wakin runakuna, wasin-wasin rispa iglesiapa mana yachachisqankunata yachachiqkunata maskanankupaq hinaspa wasinta purmachinankupaq.

Bibliapa contranpi kaqkuna bibliata chinkarachiptinkuqa, yachachikuyninqa chinkarunmanchá karqa.

BIBLIAQA MANAM CHINKARQACHU. Kamachiq Antíoco runam Israel nacionpi kaq iñiqkunapa contranpi hatarirqa. Judiokunam ichaqa huk law nacionkunapipas yacharqakuña. Chayna kasqantam yachaysapa runakuna ninku. Yupaychananku wasikunapipas bibliamanta copiasqanku qillqakunatam waqaycharqaku, chay qillqakunatam servichikurqaku qipa miraykuna hinaspa Jesuspa qatiqninkunapas (Hechos 15:21).

Chay 800 watakunapiqa qatikachasqa kachkaspankupas, hinallam bibliataqa huk rimaykunapi qillqarqaku hinaspa copiarqaku. Yaqapas 1450 watapaqqa manaraq qillqakunata ruwana maquina kachkaptinmi bibliataqa qillqarurqakuña yaqa 33 rimaykunapi. Chaymantapacham bibliataqa achkanpiña ruwarqaku.

IMAPIM TUKURQA. Kamachikuqkuna hinaspa religionpi punta apaqkuna bibliata chinkachinankupaq tukuyta ruwaptinkupas, bibliaqa ima libromantapas achka rimaykunapi qillqasqa hinaspa aypusqam kachkan. Tukuy hinastinpim achkallaña runakunata bibliaqa yanaparqa rimayninkupi kasqanrayku.