Taytaymi 1949 watapi Alemania nacionmanta astakurqa Australia nacionman minapi llamkayta maskaspan. Chay nacionpim mamaywan casarakurqa, chaymi 1953 watapi nacerqani.

Mamaymi warmachallaraq kachkaptiy Jehova Diospa testigonkunawan biblia estudiayta qallaykurqa, chaymi bibliapa yachachikuyninkunataqa warmacha kasqaymantapacha yachani. Ichaqa taytaymi ima religionmanpas yaykunaykuta mana munaspan llumpayta piñakuq. Mamaymi puramintita manchakuq, ichaqa pakallapim bibliata estudiaq, yachasqankunawanmi anchata kusikuq. Taytay mana kanankamam paniytawan ñuqata bibliamanta yachachiwaqku. Niwaqkum enteron pacha sumaq huerta kananmanta hinaspa bibliapa yachachisqanta kasukuspaykuqa kusisqa kanaykumanta (Salmo 37:10, 29; Isaias 48:17).

Taytay llumpay maqakuqllaña kasqanraykum 18 wataypi kachkaspay wasiymanta ripukurqani. Bibliamanta yachaspaypas manam kasukurqanichu. Minapim llamkayta qallaykurqani hinaspam 20 wataypi casarakurqani. Kimsa watamantam punta kaq warmachay nacerurqa, chaywanmi yuyaymanarqani vidaypi imam aswan allin kasqanmanta. Yacharqanim aylluyta bibliapa yachachikuyninkuna yanapananmanta, chaymi testigokunawan biblia estudiayta qallaykurqani. Warmiymi ichaqa testigokunataqa ni rikuytapas munarqachu. Huk kutipim huñunakuymanta kutiramuptiy niykuwarqa biblia estudiayta mana saqispayqa wasiymanta pasakunaypaq. Warmiyta manchakuspaymi biblia estudiayta saqirurqani. Chaymantañam ñakakurqani chay ruwasqaymanta.

Huk kutipim llamkaqmasiykuna millakuypaq qalalla kaqkunata qawachiwarqaku. Millakuypaq kaspanpas sumaqmi rikchakapuwarqa, ichaqa chaykuna qawasqaymantam sunquypi ñakakurqani. Bibliapa yachachikuyninta yuyarispaymi musyakurqani Diosqa chaykunamanta castigawananta. Ichaqa chay millakuypaq kaqkunata sapa kuti qawasqayraykum allinpaqña hapirqani, chaymi sapa kutillaña qawaq kani.

Bibliamanta mamaypa yachachiwasqankunata saqiruspaymi 20 watapuni mana allinkunapi purirqani. Mana allinkuna qawasqaymi imayna kasqaypi qawakurqa. Rimayniypas qacham  karqa. Piensarqanim warmikunaqa qariwan puñunallanpaq kasqanta, chaymi huk warmikunawan kakuq kani. Manam kikiyta kuyakuqchu kani aswanqa chiqnipakuytam qallaykurqani.

Warmiywanpas rakinakururqanim. Vidayqa manam allinchu karqa. Chaymi Jehova Diosta tukuy sunquywan mañakurqani. 20 wataña pasaruptinpas kaqllam biblia estudiayta qallaykurqani. Chay tiempopaqqa taytayqa wañukurqañam, mamayñataqmi Jehova Diospa testigonña karqa.

Imayna kawsakuyniyqa manam bibliapa yachachikuyninkunawanqa tupaqchu. Ichaqa tantearurqanim bibliapa nisqanman hinaña kawsakunaypaq, qacha rimayniykunata hinaspa chaylla piñakuq kayniyta saqinaypaqpas. Saqirurqanitaqmi huk warmikunawan huchapakuyta, qullqillapaq pukllayta, sinkakuq kasqayta hinaspa llamkayniypi suwakuytapas.

Llamkaqmasiykunaqa manam entiendeqkuchu imanasqa chaykuna saqiy munasqayta. Kimsa watapunim hinalla hikutawaqku chay mana allinkunata ruwanaypaq. Sichum ima mana allintapas ruwaruptiyqa utaq ima qachatapas rimaruptiyqa kusikuspankuraqmi niqku: “¡Kayqaya kikin Josef kawsarirun!”, nispa. Chaynata niwasqankum puramintita sunquyta nanachiq.

Llamkayniypiqa millakuypaq qalalla kaqkunatam llamkaqmasiykuna sapa kuti qawaqku papelpi utaq computadorapi, ñuqapas ñawpaqtaqa chaytam ruwaq kani. Manaña qawanaypaq kallpanchakuptiypas hinallam hikutawaqku. Chaymi bibliata estudiachiwaqniy testigoman yanapaykuwananpaq willakurqani, payñataqmi sumaqta uyariykuwarqa. Bibliapa textonkunata leepuwaspanmi imayna atipanaypaq niwarqa. Kallpanchawarqataqmi Jehova Diosta sapa kuti mañakunaypaqpas (Salmo 119:37).

Huk punchawmi llamkaqmasiykunata huñuruspay nirqani tragollaman qukuruq iskay llamkaqmasiykunaman iskay botella tragota qunankupaq, hinaptinmi qaqchawaspanku niwarqaku: “¡Imaynamá quykusunqa, paykunaqa kallpanchakuchkankum trago tomayta saqinankupaq!”, nispa. Hinaptinmi nirqani: “Ñuqapas paykuna hinam kallpanchakuchkani”, nispay. Chaymi manaña hikutawaqkuñachu qalalla kaqkunata qawanaypaqqa nitaq mana allinkunata ruwanaypaqpas.

Tiempopa risqanman hinam chaynataq Jehova Diospa yanapakuyninwanmi chay millakuypaq kaqkuna qawayta saqirurqani. 1999 watapiñataqmi Jehova Diospa testigonña kanaypaq bautizakurqani. Ancha kusisqam tarikuni allin kawsakunaypaq yanapakuyta tarirusqaymanta.

Kunanmi yacharuni imanasqa Jehova Diosqa ñawpaq mana allinkuna ruwasqayta chiqnisqanta. Kuyakuq tayta hinam millakuypaq qalalla kaqkunamanta waqaychawananpaq yachachiwarqa. Chiqapmi Proverbios 3:5, 6 nisqanqa, ninmi: ‘Tayta Diosllapiyá confiakuy tukuy sunquykiwan. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy tayta Diosta. Paymi munasqanman hina kawsachisunki qamta’, nispa. Bibliapa yachachikuyninkunata kasukuspanchikqa allinmi kawsakusunchik (Salmo 1:1-3).

Ñawpaqtaqa kikillaymi chiqnipakururqani, kunanqa sunquypipas hawkañam tarikuni. Diospa munasqanman hinañam kawsakuni, manataqmi iskayrayanichu huchaykunata pampachawaspa yanapawasqanmantapas. 2000 watapiñataqmi sumaq sunqu Karolin sutiyuq iñiqmasiywan casarakurqani. Paypas ñuqa hinam Diosta kuyan, hawkam kawsakuniku. Ancha kusisqam tarikuniku Diospa chuya llaqtanpi kasqaykumanta.