PIPAS imatapas quykuwaptinchikqa agradecekuq runam kananchik. Jesuspas agradecekuq kayqa ancha allin kasqantam qawachirqa 10 leprayuq runakunata hampirusqan qipata. Allinyachisqan runakunamantam huk runalla Jesusta agradecekuq kutimurqa. Chaymi Jesusñataq chay runata nirqa: “Chunkam sanoyachisqaqa karqankichik. Hinaptinqa, ¿maytaq wakin isqunqa?”, nispa (Lucas 17:12-17). Chay pasasqanmi yuyarichiwanchik wakinpiqa agradecekuq kayta chaylla qunqarunanchikmanta.

Qawamusqanchikman hinam, ñuqanchikrayku Jesuspa wañusqanqa Diospa tukuy ima quwasqanchikmantapas aswan allin. Hinaptinqa, ¿imaynatam Diosta agradecekuchwan chay hatun kuyakuyninmanta?

•  Riqsisun pim quykuwaqninchikta. Ñuqanchikrayku Jesuspa wañusqanqa manam lliw runakunamanchu wiñay kawsaytaqa qunqa, aswanqa Jesuspa nisqanman hina ruwaqkunallam wiñay kawsaytaqa haypanqaku. Jesusmi taytanta nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa (Juan 17:3). Sichum yacharuwaq warmallaraq kachkaptiki huk runa wañuymanta salvasusqaykita hinaspaqa, ¿manachum riqsiykuyta munawaq? Chaynam Jehova Diospas munan lliw runakuna riqsinanchikta. Bibliam niwanchik: “Diosman asuykuptikichikqa paypas asuykusunkichikmi”, nispa (Santiago 4:8).

• Ñuqanchikrayku Jesuspa wañusqanpi iñiy. Bibliam nin: “Churipi iñiqqa wiñay kawsayniyuqmi”, nispa (Juan 3:36). Ichaqa, ¿imaynatam qawachichwan Jesuspa wañusqanpi iñisqanchikta? Ruwayninchikwanmi (Santiago 2:17). Imaynam imatapas chaskikunapaqqa makinchikta haywarinchik, chaynam Jesuspa wañusqanpi iñisqanchiktapas Diosmanta yachaspanchik hinaspa munasqanman hina kawsakuspanchik qawachinanchik. * Diosta mañakuy ima huchaykimantapas pampachasunaykipaq hinaspa hawkayayta qusunaykipaq. Ama iskayrayaychu Jesuspa wañusqanpi iñispaqa hamuq punchawpi allinña kawsakunaykimanta (Hebreos 11:1).

• Jesuspa wañukusqan punchawta yuyarinapaq huñunakuyman riy. Jesuspa wañukusqan punchawta mana qunqarunapaqmi, kikin Jesucristo kamachiwarqanchik: “Hinallayá kayta ruwaychik ñuqata yuyariwaspa”, nispa (Lucas 22:19). Kay watapim, Jehova Diospa testigonkunaqa martes 11 abril killapi Jesuspa wañukusqanta yuyarinaykupaq inti siqaykuyta huñunakusaqku. Chay huñunakuyniykuqa yaqa huk horam kanqa, chaypim yachachinqaku imanasqa Jesuspa wañukusqan ñuqanchikpaq ancha allin kasqanmanta. Qayna watam yaqa 20 millon runakuna enteron pachapi huñunakurqaniku. Chaymi munaniku Diosta churinrayku agradecekunapaq chay huñunakuyman hamunaykita.