RUNAKUNAM ninku runa wañuptinqa alman hinalla huk lawpi kawsasqanta. Huk law nacionpi kaq runakunañataqmi ninku, runapa almanqa huk cuerpopiña nacesqanta. Wakinñataqmi ninku, runaqa wañuruspan manaña maypipas kawsasqanta.

¿Qamqa ima niwaqtaq wañukuptinchik ima pasawasqanchikmanta? ¿Yachayta atichwanchu wañukuptinchik imapuni pasawasqanchikmanta?

Unay watañam Diosmanta yachachiq tukuqkuna ninku runaqa almayuq kasqanta, hinaspa chay almaqa mana wañuq kasqanta. Catolico religion, hinduismo, judaismo hinaspa islam nisqanku religionkunam yachachinku runaqa mana wañuq almayuq kasqanta, ninkutaqmi chay almaqa huk lawpi hinalla kawsasqanta. Budismo religionpi kaqkunañataqmi ninku runapa almanqa huk cuerpokunapi achka kutikama naceruspanña, chayraq kusisqa kawsakuyta haypasqanmanta, chaytam sutichanku nirvana nispa.

Tukuy chayna yachachisqankuraykum, yaqa lliw runakuna ninku wañuspanchikqa hinalla huk lawpi kawsasqanchikta. Paykunapaqqa, kay pachapi huk tiempollata kawsanapaqsi Diosqa unanchawasqanchik. Ichaqa, ¿ima nintaq bibliaqa? Chaymantam qatiqnin yachachikuypi yachasunchik.