Pasaq yachachikuypi rimamusqanchik Dianam hukmanyasqa tarikusqanrayku trago tomayta qallaykurqa. Bibliaqa manam huchapaqchu hapin aslla trago tomaytaqa, ichaqa ninmi: “Tomakuq runakunawanqa ama hukllawakuychu”, nispa (Proverbios 23:20, Chuya Qellqa 87). Trago tomayman qukuruqkunaqa unqunkum, casado vidankupas manam allinchu, hinaspapas sapa watam achka wañunku. Ichaqa bibliapa nisqanta runakuna kasukuptinkuqa manachá pipas chayna sasachakuypiqa kanmanchu.

Dianaqa bibliapa nisqantam kasukurqa, paymi nirqa: “Musyakururqanim tragota tomayqa llakiykunata mana allichasqanta. Chaymi Filipenses 4:6, 7 nisqanta kasukurqani, chaypim nin: ‘Amayá imamantapas afanakuychikchu, aswanqa Diosmanyá lliwta willakuychik’, nispa. Sapa tutam Diosta mañakuq kani llakiykuna hukmanyachiwaptin kallpata quwananpaq. Paqarintinñataqmi kallpanchakuq kani llakiykunallapi mana piensanaypaq. Jehova Diosta mañakuyniymi yanapawarqa tukuy ima pasawasqanta manaña sapa kuti yuyarinaypaq. Tanteakururqanim manaña tragota tomanaypaq, munarqanim Jehova Diosta kasukuspay hawkaña kawsakuyta”, nispa.

Huchapakuyqa llakikuytawan ñakariyllatam apamun. Ichaqa bibliapa yachachikuyninkunata kasukuqkunaqa manam chayna llakikunapiqa tarikunkuchu. Bibliam nin hukkunawan asikachay hinaspa qalalla kaqkunata qawayqa mana allin kasqanta. Samuelmi nirqa: “Sipaskunawanmi hukwan-hukwanraq asikachaq kani, wakin sipaskuna mana sunquypaq hina kachkaptinpas. Wakinpiqa manam musyakuqchu kani chay ruwasqayta. Chayna asikachasqayraykum hukmanyasqa tarikurqani, chaymi tantearurqani manaña sipaskunawan asikachanaypaq. Sipaskunawan asikachaspaykiqa kikillaykipaq munaqmi kanki”, nispa.

Samuelmi internetpi jw.org niqpi ñawincharurqa mozokunapaq yachachikuykunata. Yuyaymanarqataqmi Proverbios 20:11 nisqanpipas, chaypim nin: ‘Huk jovenpa allin kawsasqanqa ruwayninkunapim qawakun’, nispa. ¿Imaynatam bibliapa chayna nisqanqa yanaparqa? Samuelmi cuentata qukururqa sipaskunawan asikachayqa mana allin kasqanta. Paymi nirqa: “Cuentatam qukururqani sipaskunawan asikachaspayqa casarakuruspaypas chaynalla kanaymanta, yuyaymanarqanim hukwan asikachachkaqta warmiy rikuruwaspan imayna tarikunanmanta. Chaymi cuentata qukurqani sipaskunawan asikachayqa mana allin kasqanta”, nispa. Sipaskunawan manaña asikachasqanraykum Samuelqa huchapakuyman mana wichiykurqachu.

Antonioñataqmi warminta kuyachkaspanpas huchapakuq qalalla warmikunata sapa kuti qawarqa. Ichaqa manaña qawananpaqmi 1 Pedro 5:8 kayna nisqan yanaparqa, ninmi: “Allin yuyayniyuq hinaspa qawan-qawanllayá kaychik, enemigoykichik diabloqa leon hinam muyuriqnikichikpi ñawrawyaspan purichkan pitapas mikurunanpaq”, nispa. Antoniom nirqa: “Kunanqa tukuy lawpim qalalla warmikunapa retratonqa kachkan, sasatam chay warmikunata qawaruptikiqa umaykimanta chinkan. Ichaqa bibliapa chayna nisqanta yuyariyniymi yanapawarqa satanasmanta chaykunaqa hamusqanta musyanaypaq. Jehova Diosmi yanaparuwan qalalla warmikunata manaña qawanaypaq, chaynataq aylluytapas chaykunamanta waqaychanaypaq”, nispa. Antoniotaqa yanaparqakum huchapakuq qalalla warmikuna qawayninta saqinanpaq, chaymi hatun sasachakuymanqa mana wichiykurqachu.

Qawasqanchikman hinam bibliaqa yanapawachwan sasachakuykunaman mana wichiykunapaq. Ichaqa ¿yaqachum bibliaqa yanapawachwan sasachakuykunapiña tarikuptinchik? Qawasun.