Cuerponchiktam Diosqa unancharqa heridakuruptinchikqa kikillan sanoyananpaq. Imawanpas qunqayllamanta makinchikta kuchukuruptinchikqa utaq imawanpas heridakuruptinchikqa ‘cuerponchikmi tukuyta ruwan chay heridata sanoyachinanpaq’ (Johns Hopkins Medicine). Kuchukuruptinchik yawar lluqsiyta qallaykuptinpas chayllam cuerponchikqa tukuyta ruwan yawarta sayachinanpaq.

KAYPI YUYAYMANAY: Diosninchikmi unanchawarqanchik cuerponchik kikillan sanoyananpaq, hinaptinqa ¿manachum payqa sunqunchikpi llakinchikkunatapas hampiykuwanchikman? Salmos qillqaqqa manam iskayrayarqachu Diosqa llakisqa sunqunta hampiykunanmanta (Salmo 147:3). Ichapas, qampapas sunquykiqa llakisqa kachkan imapas pasasusqaykirayku, ¿imaynatam yachawaq qampa sunquykitapas Diosqa hampiykunanmanta?

Diosmi nin: ‘Amayá manchakuychikchu, qamkunawanmi kachkani, amayá hukmanyaychikchu, ñuqam Diosnikichik kani, kallpanchaspaymi yanapasqaykichik’, nispa (Isaias 41:10). Jehova Dios kuyawasqanchikmanta yachayqa sunqunchiktam hawkayachin, hinaspapas kallpanchasqam tarikunchik ima sasachakuytapas atipanapaq. Apostol Pablom nirqa: “Diospa hawkayayninmi sunquykichiktawan yuyaynikichikta [...] waqaychanqa”, nispa. Nirqataqmi: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:4-7, 9, 13).

Bibliam iñiyninchikta kallpanchan runakunapaq tukuy imata Dios ruwananmanta mana iskayrayanapaq. Bibliapi Apocalipsis 21:4, 5 niwanchik imata Dios ruwananmanta hinaspa imanasqa chaymanta mana iskayrayanapaq.

• “Diosmi llapa runakunapa wiqinta pichanqa”. Jehova Diosqa tukuy ima llakichiwaqninchikta hinaspa ñakarichiwaqninchiktam chinkachinqa.

• “Kamachinanpaq tiyananpi” tukuy atiyniyuq hinaspa llapallanpa hawanpi kamachiq Diosqa, manam saqinqañachu imapas kaqmanta ñakarichiwananchiktaqa, aswanmi yanapawasunchik.

• Jehova Diosmi niwanchik: “Nisqaykunaqa mana iskayrayanapaqmi hinaspapas manam llullachu”, nispa. Huk rimaypiqa, Jehova Diosllam imayna riqsisqa kasqanta servichikun rimasqankunaqa mana llulla kasqanta yachanapaq.

“Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam. Kamachinanpaq tiyananpi tiyaqñataqmi nirqa: ‘Ñuqam tukuy imata musuqyachichkani’, nispa. Nirqataqmi: ‘Kayta qillqay nisqaykunaqa mana iskayrayanapaqmi hinaspapas manam llullachu’”, nispa (Apocalipsis 21:4, 5).

Tukuy ima unanchasqakuna hinaspa bibliam yanapawanchik Diosta riqsinanchikpaq. Unanchasqakunata qawaspapas Diosmantaqa yachachwanmi, chaymantapas bibliam niwanchik: “Diosman asuykuptikichikqa paypas asuykusunkichikmi”, nispa (Santiago 4:8). Hechos 17:27 nintaqmi: “Payqariki manam llumpay karupichu ñuqanchikmantaqa kachkan”, nispa.

Sichum astawan tiempochakunki Diosta riqsinaykipaq hinaspaqa, astawanmi mana iskayrayankichu Dios yuyasusqaykimantaqa (1 Pedro 5:7). ¿Imaynam tarikunki Jehova Diospi hapipakuspaykiqa?

Chaypaq Japon nacionniyuq Yuri sutiyuq runamanta yachaykusunchik. Paytaqa taksachanmantam mamanqa uywarqa Diospa ñanninpi, ichaqa yakuza sutichasqa mana allin runakunawanmi hukllawakururqa. Yurim willakun: “Dios chiqniwasqantam piensarqani. Kaypi-chaypim wañusqa runakunata rikurqani, wakinpiqa amistadniykunapa wañusqantaraq. Chayta qawachiwaspan Dios castigawasqantam piensarqani”, nispa. Paymi nirqa wañuchinakuyta qawasqanrayku “rumi sunqu hinaspa mana llakipayakuq runa” ñawpaqta kasqanmanta. Hinallam willakun: “Ñuqamantapas aswan  atiyniyuqta wañurachispa jovenlla wañuytam munarqani, chaynapi riqsisqa kanaypaq”, nispa.

Ichaqa, Yuriwan warmichanqa biblia estudiaytam qallaykurqaku, hinaptinmi biblia estudiaynin Yuritaqa yanaparqa mana allin kawsaypi purisqanta saqinanpaq hinaspa allin runaña kananpaq. Warmichanmi willakun: “Manam piensarqanichu qusay allin runayanantaqa”, nispa. Qusanmi nin: “Diosqa kanmi, payqa sapakamatam yuyawanchik. Diosqa manam munanchu pipas wañunantaqa, aswanqa wanakuqkuna pampachaytam munachkan. Tukuytam Diosmanqa willakuchwan, runakuna mana entiendiwaptinchikpas payqa entiendiwanchikmi. Jehova Diosqa ñam chinkachinqaña tukuy ñakarichiwaqninchikkunataqa. Ichaqa kunanpas yanapawachkanchikmi. Payqa yuyawanchikmi, llakisqa kaptinchikpas sunqunchiktam tiyaykachin”, nispa (Salmo 136:23).

Imapas ñakarichiwaqninchikta manapas unaymanta Dios chinkachinanmantaña yachayqa sunqunchiktam hawkayachin, chayqa yanapawanchiktaqmi kusisqa kawsakunapaq. Arí, kay sasachakuy tiempopipas Jehova Diosqa yanapasunkimanmi.