Wachakuruq warmiqa chayllas wawanta kuyanan. Mana chayta ruwaspanqa sasatas kuyayta atinman, hinaptinsi wawanpas mana allinchu wiñanman. *

¿Imanasqataq wachakuruq warmiqa chaylla wawanta sumaqta atiendin? Jeannette Crenshaw sutiyuq profesoram nin: ‘Wachakuruq warmipiqa oxitocina nisqanku hormonam cuerponkupi astawan kan, chayqa wawachankuta kuyaspa sumaqta uywanankupaqmi kallpanchan. Ichaqa kallpanchanqa wawanta kuyaspa marqakuptinllanmi hinaspa ñuñuptillanmi. Chaymantapas, hina chay horallam cuerponkuqa chayna kallpanchaqnin huk hormonatapas rikurichin, chaypas yanapanmi wawankuta astawan kuyanankupaq’, nispa (The Journal of Perinatal Education). ¿Imatam kaymanta yachachwan?

Wachakuq warmi wawanta chaynata kuyananpaqmi Jehova * Diosqa unancharqa. Diosta serviq Davidmi Diosman graciasta qurqa mamanpa wiksanmanta hurqusqanmanta hinaspa mamanpa marqayninpi hawkallata uywakusqanmanta. Riqsikurqam nacesqanmantapacha Jehova Diosqa waqaychasqanta. Chaymi Diosta nirqa: “Qamqa mamaypa wiksanmantapuni Diosniymi kanki”, nispa (Salmo 22:9, 10).

KAYPI YUYAYMANAY: Diosqariki warmitam unancharqa wawanta kuyakuywan uywananpaq hinaspa imamantapas waqaychananpaq. Chaynaqa ¿manachum Diosqa sapakamata yuyawanchik churinkuna kasqanchikrayku? (Hechos 17:29).

Jesusmi kaynata nirqa: “¿Manachu iskay pichinkuchakunatapas mana ancha valorniyuq qullqichallapaq rantikunku? Chayna kaptinpas, manam mayqinpas pampamanqa tiyaykunchu hanaq pacha taytaykichikpa mana yachasqanqa. Qamkunapaqqa umaykichikpi chukchaykichikpas llapallanmi yupasqa kachkan. Chaynaqa amayá manchakuychikchu, qamkunaqa achka pichinkuchakunamantapas aswan valeqmi kankichik”, nispa (Mateo 10:29-31).

Yaqa lliw runam pichinkuchakunataqa mana kaqpaqpas hapinkuchu, manataqmi yachankuchu hayka wañusqankutapas. Hanaq pachapi taytanchikmi ichaqa sapa pichinkuchakunata yuyan. Chaywanpas, Diospaqqa waranqantin pichinkuchakunamantapas aswan chaninniyuqmi runakunaqa kanchik. Chaymi mana iskayrayachwanchu Diosqa sapakamata yuyawasqanchikmanta.

 Bibliam nin:

• ‘Tayta Diosqa kay pachapi tukuy ima pasakusqantam qawamuchkan, chaynapi paypa qayllanpi allin sunquyuqkunaman atiyninta qawachinanpaq’ (2 CRONICAS 16:9).

• ‘Tayta Diosqa allin ruwaq runakunatam qawamuchkan, paykunapa qayakuynintam uyarichkan’ (SALMO 34:15).

• “Kuyakuynikim llumpayta kusichiwan, qanmi ñakarisqayta rikuwarqanki, qanmi sasachakuyniykunatapas yachanki” (SALMO 31:7).

Dios kuyawasqanchikmanta hinaspa waqaychawasqanchikmanta yachayqa ¿yanapawanchikchu? Arí. Inglaterra nacionmanta Anam * nin:

“Achka kutipim piensarqani Jehova Diosqa mana kuyawasqanta, piensarqanim mana ancha iñiyniyuq kasqayrayku mañakusqaytapas mana uyariwasqanmanta. Mana kaqpaqpas hapiwasqantam utaq ñakarichiwasqantam piensarqani”, nispa.

Kunanmi ichaqa Anaqa manaña iskayrayanchu Jehova Dios kuyasqanmantaqa. ¿Imanasqa? Paymi nin: “Achka wata ñawpaqtam sumaq yachachikuyta uyarirqani, chaypim yacharurqani kuyawasqanchikrayku Jehova Diosqa churin Jesusta ñuqanchikrayku wañunanpaq kachamusqanmanta. Chaymantapas, cuentatam qukururqani kuyawasqanrayku Jehova Diosqa mañakusqayta uyariwasqanmanta, uyariwasqanmanta musyakuspaymi wakinpiqa waqaqraq kani. Hinaspapas, Diosmanta yachanaypaq huñunakuyman risqaymi hinaspa bibliata ñawinchayniymi yanaparuwan Dios kuyawasqanmanta manaña iskayrayanaypaq”, nispa.

¡Ima sumaqmi chayna rimasqanqa! ¿aw? Qatiqninpim yachasunchik imayna tarikusqanchiktapas Diosqa sumaqta yachasqanmanta.