Tukuy ima ñakariyninchikpaq Dios mana huchayuq kaptinqa, ¿pitaq huchayuq? ¿Imanasqataq kay pachapiqa waranqantin runakuna yarqaymanta wañuchkanku utaq yarqayta pasachkanku? ¿Imanasqataq guerrakuna, unquykuna hinaspa hatun sasachakuykuna pasakun? Bibliam willawanchik imakunarayku ñakarisqanchikmanta:

1. Kikillanchikpaq munay, imatapas llumpayta munapayay hinaspa chiqninakuy. Bibliam nin runaqa runamasinta munaychakuspan ñakarichisqanmanta (Eclesiastes 8:9). Achka runakunam runamasinta ñakarichinku kikillankupaq munaq kasqankurayku.

2. Qunqaymantam ima sasachakuypas qatiruwanchik. Bibliaqa nintaqmi ‘qunqaymanta ima sasachakuypas’ qatiwasqanchikrayku ñakarisqanchikmanta (Eclesiastes 9:12). Wakinpiqa imapas pasawanchik mana allin sitiopi utaq qunqaymanta imapas pasawasqanchikraykum, mana cuidakusqanchikrayku utaq imatapas llutanpi ruwarusqanchikraykum.

3. Satanasmi kay pachataqa munaychakuchkan. Bibliam nin kay pachataqa satanas munaychakusqanta (1 Juan 5:19). Qallariyllanpiqa satanasqa allin angelmi karqa, ichaqa manam ‘chiqap kaqpiqa takyarqachu’ (Juan 8:44). Wakin angelkunapas mana allin munasqankuraykum satanaswan Diospa contranpi hukllawakururqaku. Chaynapim demoniokunaña rikurirurqaku (Genesis 6:1-5). Chaymantapacham satanaswan demoniokunaqa runakunata ñakarichiwachkanchik, kunan tiempoqa aswanraqmi. Satanasqa piñasqallañam kachkan, chaymi “kay pachapi llapallan runakunata pantachichkan”. Bibliam nin: “¡Ay imaynaraq kanqa kay pachawan lamar quchaqa!”, nispa (Apocalipsis 12:9, 12). Satanasqa mana allin ruwayta kuyaqmi, kusikunmi ñakarisqanchikta qawaspan. Paymi huchayuqqa ñakarisqanchikmantaqa, manam Dioschu.

KAYPI YUYAYMANAY: Rumi sunqu, paqway mana allin ruwaqllam allin runakunataqa ñakarichinman. Bibliam ichaqa nin ‘Diosqa kuyakuqllaña’ kasqanta (1 Juan 4:8). Chayraykum Diosqa, manapuni haykapipas mana allintaqa ruwanmanchu (Job 34:10).

Chaynaqa tapukunkipaschá: “¿Haykapitaq Diosqa satanasta chinkachinqa?”, nispa. Yachamusqanchikman hinam, Diosqariki chiqnin mana allin ruwaytaqa, chaymi payqa ñakarisqanchikta qawamuspanqa anchata llakikun. Chaymantapas, bibliam kallpanchawanchik tukuy llakinchikta Diosman willakunapaq (1 Pedro 5:7). Qatiqninpim yachachkasunchik Diosqa anchata kuyawasqanchikta imakunawan qawachiwasqanchikmanta hinaspa tukuy ñakarichiwaqninchikkunata chinkachinanpaq atiyniyuq kasqanmanta. *