Kay yachachikuykunapim yacharunchik tayta Diosqa imayna kasqanmanta. Yacharqanchiktaqmi Diospa sutinqa Jehova kasqanta hinaspa kuyakuqllaña kasqanmantapas. Yacharunchiktaqmi kuyawasqanchikrayku imakunata ruwasqanmanta hinaspa hamuq tiempopi imakuna ruwananmantapas. Chaywanpas Diosmantaqa astawanraqmi yachachwan.

“Diosta maskaspaykiqa tarinkim” (1 Cronicas 28:9). Paymanta astawan yachananchikpaq kallpanchakuspaqa kuyachikusunmi (Salmo 25:14). ¿Imaynatam yanapawasun paywan kuyachikusqanchikqa?

Kusisqam kasun. Bibliam nin Jehova Diosqa kusisqa Dios kasqanmanta (1 Timoteo 1:11). Chaymi payman asuykuspa hinaspa munasqanman hina kawsaspaqa ñuqanchikpas kusisqa kasun (Salmo 33:12). Diosta kasukuspaqa mana allin ruwayninchikkunatam saqisun, runamasinchikkunawanpas hawkallam kawsakusun. Arí, “mayna sumaqmi Diospa ñawpaqninpi kayqa” (Salmo 73:28).

Diosqa sapakamatam yanapawasun. Jehova Diosmi niwanchik: ‘Yachachispaymi maymi purinaykita riqsichisqayki’, nispa (Salmo 32:8). Bibliapi chayna nisqanmi yachachiwanchik Jehova Diosqa sapakamata riqsiwasqanchikrayku imapipas yanapawananchikmanta (Salmo 139:1, 2). Payman astawan asuykuptinchikqa yanapaykuwasunmi.

Wiñaypaqmi kusisqa kawsakusun. Diosqa munachkanmi hamuq tiempopi kusisqa kawsakunanchikta (Isaias 48:17, 18). Chaymi biblia nin: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa (Juan 17:3). Chay yachasqanchikqa yanapawanchikmi kay tiempopi sasachakuykunawan llumpayta mana hukmayarunapaq (Hebreos 6:19).

Kay yachachikuykunapim yacharunchik Jehova Diosmanta yachayqa imaynata yanapawasqanchikmanta, hinalla yachayta munaptikiqa kallpanchaykikum Jehova Diospa testigonkunata maskanaykipaq, yaykuwaqtaqmi internetpi www.pr418.com/quy niqmanpas.