Diosmi Adanta nirqa chay ‘sachapa rurunta mikuruspanqa wañunanmantapuni’ (Genesis 2:17). Yuyaqyaspa wañunanta Adan yachaptinqa, Diospa kamachisqanqa yanqach kanman karqa. Adanqa yacharqam chay sachapa rurunta mana mikuspanqa mana haykapipas wañunanmanta.

Adanwan Evaqa manam chay sachapa rurullanta mikuspachu kawsanmanku karqa, aswanqa achka sachakunapa rurunmi mikunankupaqqa karqa (Genesis 2:9). Diospa harkakusqan sachapa rurunta mana mikuspankuqa Diostam kasukuchkanmanku karqa. Kasukuspankuqa qawachinmankum karqa Dioslla imatapas ruwanankupaq niqnin kasqankuta.

Imanasqa Adanwan Eva wañusqankumanta yachanapaqqa, puntatam yachananchik Evata satanas imaynata pantarachisqanmanta. Satanasmi culebrata rimarachirqa Evata llullakunanpaq. Bibliam nin: “Tayta Diospa unanchasqan llapallan purun animalkunamantam maqta uruqa llumpay sakri karqa. Warmitam chay maqta uru nirqa: Chaynaqa, ¿Dioschu nisurqankichik huertapi llapa sachakunapa rurunta amam mikunkichikchu, nispa?” (Genesis 3:1).

Hinaptinmi Eva nirqa: “Huertapi sachakunapa ruruntaqa mikuymankum. Huertapa chawpinpi kaq sachapa rurunmantam ichaqa Dios niwarqaku: ‘Amam mikunkichikchu nitaqmi llachpankichikpaschu, mana chayqa wañurunkichikmi’ nispa. Chaymi warmita maqta uru nirqa: ‘Llullam chayqa, manam wañunkichikchu. Diosqa yachanmi, maypacham mikuruptikichikqa ñawikichik kicharikuruptin kikin Dios hinaña allin kaqtapas mana allin kaqtapas yachaqña rikurirunaykichikta, nispa’”. Huk rimaypiqa, satanasqa nichkarqam Diosqa llulla kasqanta chaynataq churinkunaman allin kaqkunata mana qusqanmanta (Genesis 3:2-5).

Chaymi Evaqa satanaspa nisqanta kasuspan Diospa harkakusqan sachapa rurunta mikururqa. ‘Qusanmanpas quykuptinmi paypas mikururqa’ (Genesis 3:6).

¡Mayna llakisqachá Diosqa tarikurqa kuyasqan churinkuna mana kasukuptinkuqa! Chaywanpas Adantam Diosqa nirqa: “Allpaman kutiykunaykikamam sudornikipa chaninta mikunki. Allpamanta ruwasqam kanki, allpallamantaqmi kutiykunkipas”, nispa (Genesis 3:17-19). Chaymi Adanqa  ‘isqun pachak kimsa chunkan watata kawsaruspan wañukurqa’ (Genesis 5:5). Wañukuspanqa manam hanaq pachamanchu nitaq huk lawmanchu rirqa. Aswanqa Diospa nisqanman hinam allpaman kutiykurqa.

Diosta mana kasukusqankuraykum Adanwan Evaqa huchayuqña rikurirurqaku, chaymi manaña wiñaypaq kawsaytaqa atirqakuchu. Huchallikurusqankuraykum pantaqña hinaspa unquq runaña rikurirurqaku. Manamá paykunallachu huchayuqqa rikurirurqaku, mirayninkupas huchayuqñam nacerqaku. Romanos 5:12 nin: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku”, nispa.

Bibliam nin wañuyqa llaqtakunata hinaspa nacionkunata tapaq tela hina kasqanmanta (Isaias 25:7). Manamá pipas wañuymantaqa librakuchwanchu. Arí, Adanpa huchallikusqanwanmi llapallan runaqa wañuqlla kanchik (1 Corintios 15:22). Chaymi apostol Pablo hina tapukunchik: “¿Piraq wañuyman apaq cuerpoymanta libraykullawanman?”, nispa. ¿Pitaq libraykuwanchikman? (Romanos 7:24).