Wiñaypaq kawsakunanchikpaqmi Diosqa unanchawarqanchik
¿PITAQ mana munanmanchu kusisqa wiñaypaq kawsakuyta? Sumaqmi kanman mana unquspa kusisqa wiñaypaq kawsakuyqa ¿aw? Wiñaypaq kawsakuspaqa ayllunchikkunawanpas hinallam kawsakuchwan, imapas munasqanchiktam ruwayta atichwan chaynataq imamantapas astawanraq yachachwan.
¿Imanasqataq runaqa wiñaypaq kawsakuyta munanchik? Bibliam niwanchik wiñaypaq kawsakuymanta yuyaymananapaq Dios sunqunchikpi churasqanmanta (Eclesiastes 3:11). Diosqa chaynatam unanchawarqanchik kuyakuq kasqanrayku (1 Juan 4:8). Chayna kaptinqa, ¿imaynanpitaq manaqa wiñaypaqchu kawsakunchik?
Manam pipas wañuytaqa munanchikchu, wañuyqa “enemigonchik” hina kasqantam biblia niwanchik (1 Corintios 15:26). Wakiqninchikmi wañunchik warmallaraq, wakiqninchikñataqmi yuyaqña kaspa. Arí, wañuymantaqa manamá pipas lluptichwanchu. Chaymi wakinqa wañuymanta rimaytaqa manchakunku. ¿Yaqachu haykapipas wañuyqa chinkanqa?
WAÑUYQA CHINKANQAM
Diosqa manam munarqachu runa wañunantaqa. Genesis qillqam willawanchik wiñaypaq kawsakunapaq Diosqa unanchawasqanchikmanta. Jehova * Diosmi kay pachata suma-sumaqta unancharqa runakuna kusisqa kawsakunanchikpaq. Chaymi Adanta Eden huertapi churarqa. Diospa tukuy chay ruwasqanqa ‘allinmi’ karqa (Genesis 1:26, 31).
Adanqa Diospa rikchayninman hinam unanchasqa karqa, hinaspapas mana pantaqmi chaynataq mana unquqmi karqa (Deuteronomio 32:4). Warmichan Evapas chaynam karqa. Paykunatam Jehova Dios nirqa: ‘Anchata miraspa kay pachaman huntaychik, hinaspa munaychakuychik challwakunapi, alton pawaq animalkunapi, qasqunpa puriq urukunapi, tukuy rikchaq animalkunapipas’, nispa (Genesis 1:28).
Adanwan Evam mirayninkunawan kay pachaman huntananku karqa. Chaypaqqa una-unay watakunam kawsakunanku karqa, churi-wawankuna kay allpa pachaman huntanankukama (Isaias 45:18). Sichus Adanwan Eva wawankuta hinaspa willkankuta rikuspalla wañukunanku kaptinqa, manach Diosqa kamachinmanchu karqa kay pachata huntanankupaqqa.
Hinaspapas, Adantam Diosqa kamachirqa animalkunata munaychakuspan sapakamaman sutinta churananpaq. Chayta ruwananpaqqa unaytachá kawsakunman karqa (Genesis 2:19). Chaymantapas, animalchakunata sumaqta uywananpaqqa allintach sapakamata riqsinan karqa, chaypaqqa una-unaymi kawsakunan karqa.
Adanwan Evaqa wiñaypaq kawsakunankupaqmi unanchasqa karqaku, chaymi Diosqa kamachirqa mirayninkuwan kay allpa pachata huntanankupaq, hinaspa animalkunata munaychakunankupaq. Adanpa unay wata kawsasqanpas chaytam qawachin.
DIOSQA UNANCHAWARQANCHIK KAY ALLPA PACHANCHIK SUMAQ HUERTA KAPTIN WIÑAYPAQ KAWSAKUNAPAQMI
UNAY WATAM KAWSAKURQAKU
Adanmi kawsarqa 930 wata
Matusalenmi kawsarqa 969 wata
Noeymi kawsarqa 950 wata
Kunanqa kawsanchik 70 utaq 80 watallañam
Bibliam niwanchik llumpa-llumpay para manaraq chayamuchkaptin runakuna unay wata kawsasqankuta. Genesis 5:5 nin: “Adanqa isqun pachak kimsa chunka watanpiñam wañukurqa”, nispa. Chaymantapas, bibliaqa willawanchikmi huk runakunapas isqun pachak wata masnin kawsakusqankumanta. Chay runakunam karqaku: Set, Enos, Cainan, Jared, Matusalen hinaspa Noey (Genesis 5:6-27; 7:6; 9:29). ¿Imanasqataq unaytaqa kawsakurqaku?
Paykunaqa nacerqaku Adanwan Eva huertamanta qarqurachikusqanku qipallatam. Ichapas chayrayku unay wata kawsakurqaku. Chaynaqa, ¿imanasqataq nichwan Adan hina mana pantaq kaspaqa unay wata kawsakunamanta? Chaymantapas ¿imaynatam wañuyqa chinkanqa? Chaykunamanta yachanapaqqa, puntatam yachananchik imanasqa yuyaqyasqanchikmanta hinaspa wañusqanchikmanta.
^ par. 6 Bibliam nin Diospa sutinqa Jehova kasqanta.