Jesusmi niwarqanchik “Diospa munaychakuynin kayllapiña kasqanta” imaynata yachanamanta (Lucas 21:31). Niwarqanchikmi hatun guerrakunata, terremotokunata, muchuykunata hinaspa tukuy rikchaq unquykunata qawaspaqa, kamachinan tiempo chayamunantaña yachananchikmanta. Arí, chaykunamá kunanqa qawakuchkan (Lucas 21:10-17).

Bibliaqa nirqataqmi kay tukupay punchawkunapiqa mana allin ruwaqllaña runakunaqa kanankumanta. Chaytam nin 2 Timoteo 3:1-5 nisqan. Mana allin ruwaq runakunaqa kanchá yachasqayki lawpipas ¿aw?

Arí, bibliapa nisqanman hinamá pasakuchkan. Chaymi qawachin manapas unaymanta Jesusña kay pachata kamachinanmanta, hinaptinmi allinña kawsakusunchik (Lucas 21:36). Bibliapim taytanchik Dios niwanchik allin kaqkunata ruwapuwananchikmanta. Chaymantayá yachaykusun.

DANIEL 7:14 nin: ‘[Jesusmanmi Diosqa] atiyta, ancha riqsisqa kayta, munaychakuyta qurqa, chaynapi llaqtakuna, nacionkuna, rikchaqmana rimayniyuqkuna payta servinankupaq. Paypa munaychakuyninqa wiña-wiñaypaq mana tukuqmi’, nispa.

Huk rimaypiqa, Diosmi churin Jesusta churarun enteron pachata kamachinanpaq, hinaptinmi kusisqa kawsakusunchik.

ISAIAS 33:24 nin: “Manañam mayqannikichikpas ninkichikñachu: ‘Unquchkanim’ nispaqa”.

Manañam pipas imawanpas unqusunchu. Wiña-wiñaypaqmi kawsakusunchik.

SALMO 46:9 nin: “Paymi guerrakunata kay pachapi kuchun-kuchun chinkarachin”, nispa.

Manañam guerrakunaqa kanqachu, hinaptinmi hawkaña wiña-wiñaypaq kawsakusunchik.

SALMO 37:10, 11 nin: ‘Mana allin ruwaqkunaqa chayllam chinkarunqaku. [...] Llampu sunquyuqkunam ichaqa herenciankupaq allpata chaskinqaku’, nispa.

Manañam kanqachu mana allin runakunaqa, aswanqa Diosta kasukuq runakunallañam.

ISAIAS 65:21, 22 nin: “Wasikunatam hatarichinqaku hinaspam chaypi yachanqaku, uvaskunatam plantanqaku hinaspam rurunta mikunqaku”, nispa.

Enteron allpa pachanchikmi sumaq huerta kanqa. Diospa munasqanmá ‘kay pachapi’ ruwakunqa (Mateo 6:10).