Yaqa lliw runam yachanku ima ruway allin utaq mana allin kasqanmanta. Yachankum abusayqa, runa wañuchiyqa chaynataq warmachakuna abusayqa mana allin kasqanta. Chaymi alabanku kuyakuqllaña runataqa, llakipayakuqtaqa chaynataq justicia kaptinqa. Ichaqa warmi-qari puñuymantaqa, mana llullakuymantaqa utaq warmakuna imayna uywanamantaqa sapa runam mana chaynallatachu piensan. Chaymi sapa runa allinpaq rikchakusqanta ruwanku utaq hukkunapa piensasqanman hina. Ichaqa chayman hina tantiakuyqa ¿llapanpichu allin kanman?

Ima ruwaytapas munaptinchikqa conciencianchikmi niwanchik “chayqa manam allinchu, utaq allinmi”, nispa. Chaymi yaqa lliw conciencianchikta kasukunchik (Romanos 2:​14, 15). Warmachakunapas cuentatam qukunku ima ruwaykuna mana allin kasqanta, chaymi chayta ruwaruspaqa hukman sientekunku. Ichaqa wiñasqanchikman hinam familianchikpa, compañeronchikkunapa, profesorninchikpa, llaqtamasinchikkunapa, religionninchikpa utaq costumbrenchikman hinaña imapaqpas tantiakunchik. Chaymi imapaqpas tantiaruptinchikqa conciencianchik niwanchik paykunapa yachachiwasqanchikman hina allin utaq mana allin kasqanta.

Conciencianchikqa yanapawachwanmi runamasinchik imayna tarikusqanta entiendenapaq, agradecekunapaq, allin runa kanapaq utaq llakipayakuq kanapaq. Musyachiwachwantaqmi imapas ruwasqanchikwan pitapas sientechinamanta, utaq imapas ruwasqanchikwan kikinchikpas pinqaypi qipanamanta utaq ñakapakunamanta.

¿Imam allin kasqanta piensasqanchikqa llapanpichu allin kanman? Garrickmi joven kaspan munasqanman hina kawsakurqa, piensarqam chayna kawsakuynin allin kasqanta. Ichaqa tiempopa pasasqanman hinam cuentata qukururqa piensasqanman hina kawsakusqanrayku sasachakuypi tarikusqanta. Payqa huchapakuypim purirqa, drogakurqa, llumpayta tomakurqa chaynataq peleollapiña purirqa.

Conciencianchikpa nisqanta kasukuspapas wakin kutipiqa hukkunapa imayna piensasqankuman hinam tantiakunchik mana hukmanta qawawananchikta munaspa. Chayqa wakinpiqa allinmi hukkunapa yachayninmanta hinaspa experienciankumanta yachanapaq. Familianchikpa, amistadninchikkunapa utaq llaqtanchikpa costumbrenman hina imatapas ruwaspanchikqa paykunapa respetasqanmi kanchik.

¿Llapanpichu allin kanman runakunapa piensasqanman hina ruway? Priscilam sipaschallaraq kaspan amigachankuna hina paypas hukwan-hukwan kakurqa manaraq casarakuchkaspan, amigachankunaqa manam hukmantachu qawarqa hukwan-hukwan kakuytaqa. Ichaqa, cuentatam qukururqa hukkunapa imayna piensasqanta qatipakusqanrayku mana kusisqa tarikusqanmanta. Paymi nin: “Hukkunapa ruwasqanta qatipakuspayqa manam allinchu tarikurqani, yanqakunatam ruwarqani, hinaspam sasachakuypi tarikurqani”, nispa.

Imapas allin kasqantaqa piensanchik conciencianchikman hinam utaq hukkuna chaymanta ima piensasqankuta yuyarispam. Ichaqa, kikinchikpa piensasqanchikman hina utaq hukkunapa piensasqanman hina tantiakuspaqa wakinpiqa sasachakuypim tarikunchik. Manamá wakinpiqa yachayta atinchikchu tantiakusqanchikwan qipakunaman kikinchikpas utaq hukkunapas allin utaq mana allin kananchikmantaqa (Proverbios 14:12). Chaymantapas, imayna piensasqanchikqa utaq hukkunapa imayna piensasqankuqa wakinpiqa manam allinchu kanman. Hinaspapas imam allin kasqanmanta piensasqanchikqa tiempopa pasasqanman hinam cambian. Runakunaqariki ñawpaqpi mana allin qawasqankutaqa kunanqa allinpaqñam hapinku, ñawpaqta allinpaq hapisqankutañataq mana allinpaqña.

Chaynaqa, ¿imataq yanapawachwan imam allin ruway utaq mana allin ruway kasqanta sumaqta yachanapaq? Qipakunata mana ñakapakunapaqqa, ¿imakunata yachaymi yanapawachwan allinta tantiakunapaq?

Arí, kachkanmi allinta tantiakunapaq yanapawaqninchik kaqkunaqa, chayqa yanapawasunmi warmaña, yuyayniyuqña utaq may llaqtayuqña kaptinchikpas. Qatiqninpim chaymanta yachasun.