1-3. (1) ¿Imapaqmi lliw mozo-sipaskunaqa tanteakunanku kanqa, imawanmi chayta tupachichwan? (Qaway kay paginapi fotota). (2) ¿Ima ruwayninkum yanapanqa Diosta serviq mozo-sipaskunata allinta tanteakunankupaq?

HUK law llaqtaman illananchik kaptinqa agenciamanmi rinchik. Agenciapiqa runakunaqa hinaspa carrokunaqa achkallañam. Puntamantaraq may llaqtaman illanapaq tanteasqanchikraykum yachanchikña ima carrowan riyta. Manamriki mana illananchik llaqtaman riq carromanchu siqarunchikqa ¿aw?

² Mozo-sipaskunapas huk law llaqtaman illachkanmankupas hinam tanteakunanku qipa punchawta imayna kawsakunankupaq. Wakinkuqa ñam tanteakurunkuña imayna kawsakunankupaq, wakinkum ichaqa manaraq, chaymi hukmanyanku. Chaymi imata ruwanankupaq puntamantaraq tanteakuyninku allin kanqa.

³ Kay yachachikuymi llapa mozo-sipaskunata kallpanchanqa Jehova Dioswan astawan kuyachikunankupaq imakunata  ruwanankumanta. Chaypaqqa, Diostam kasukunanku imata estudianankupaq, imapi llamkanankupaq hinaspa tukuy imapipas. Kallpanchakunankutaqmi Jehova Diosta astawan servinankupaqpas. Chayna ruwaq mozo-sipaskunataqa Jehova Diosmi bendecinqa, hinaspapas tukuy ima ruwasqankum allin qispinqa (qaway Proverbios 16:3).

4. ¿Imamantam kay yachachikuypi yachasunchik?

⁴ Jehova Diosta astawan servinapaq tanteakuyqa allinninchikpaqmi. Kay yachachikuypim qawasunchik chay ruwayqa imanasqa ancha allin kasqanmanta. Yachasunmi Jehova Diosta mozo-sipaskuna astawan serviptinkuqa payqa astawan kuyananmanta, hinaspa mozo-sipasllaraq kachkaspa Diosta astawan servinankupaq tanteakuyninkuqa allinninkupaq kasqanmantapas.

5. ¿Imanasqataq Jehova Diosta astawan servinaykipaq tanteakunayki?

⁵ Mozo-sipas, Jehova Diosta astawan servinaykipaq tanteakuspaykiqa paytam qawachinki kuyasuspayki tukuy ima qususqaykimanta agradecekusqaykita. Ñawpaqpi Jehova Diosta serviq huk runam nirqa: ‘Dios taytalláy ¡mayna sumaqmi qanman gracias quyqa!’, nispa. Nirqataqmi: ‘Dios taytalláy, ruwasqaykikunawanmi ñuqallayta kusichiwarqanki. Ruwasqaykikunamantam kusikuywan takichiwanki’, nispa (Sal. 92:1, 4, Chuya Qellqa 1987). Mozo-sipas, Jehova Diosqa kawsaytam qusurqanki, payta riqsinaykipaqmi hinaspa chuya yachachikuyninta yachanaykipaqmi yanapasurqanki. Chaymantapas palabrantam quwarqanchik, iñiqmasinchikkunam ayllunchik hina kanku, hinaspapas hamuq punchawpim allin kawsayta Diosqa quwasunchik. Jehova Diosta astawan servispaykiqa pay agradecekusqaykitam qawachinki, hinaspapas paypa ancha kuyasqanmi kanki.

6. (1) Diosta astawan servinaykipaq tanteakuspaykiqa, ¿imaynam Dioswan kanki? (2) ¿Imakunata ruwanankupaqmi warmachakunapas tanteakunmanku?

⁶ Chaymantapas, Jehova Diosta astawan servinaykipaq tanteakuspaykiqa paypa munasqan ruwaykunatam ruwanki. Hinaptinmi payqa aswan kuyasunki. Apostol Pablom nirqa: “Diosqa manam mana allin ruwaqchu llamkasqaykichikta hinaspa sutin kuyasqaykichikrayku runankunata servisqaykichikta qunqarunanpaqqa”, nispa (Heb. 6:10). Warmachakunapas atinmankum Jehova Dioswan aswan kuyachikunapaq imapas ruwaytaqa. Cristinmi 10 watachayuqllaraq kachkaspan tanteakururqa qillqanchikkunapi lluqsimuq Diosman sunqu testigokunapa vidanmanta ñawinchananpaq. Tobiñataqmi 12 watayuqllaraq kachkaspan tanteakururqa manaraq bautizakuchkaspan enteron bibliata ñawinchananpaq. Maximom 11 watachayuqllaraq bautizakurqa, panichan Noemiyñataqmi 10 watayuq. Paykunam tanteakururqaku hatunyaspanku betelpi yanapakunankupaq, chaymi chay umalla kanankupaq wasinkupa pirqanpi laqarurqaku betelman yaykuqkunapaq papelta. Qamqa, ¿imakunatam ruwawaq Diosta astawan servinaykipaq? ¿Imatam chaypaq kunanmantapacha ruwawaq? (qaway Filipenses 1:10, 11).

7, 8. (1) ¿Imanasqataq nichwan puntamantaraq imata ruwanaykipaq yachaynikiqa allinta tanteakunaykipaq yanapasusqaykita? (2) ¿Imanasqataq Damarisqa sipasllaraq kachkaspan universidadpi mana estudiananpaq tantearurqa?

 ⁷ Mozo-sipasllaraq kachkaspa Diosta astawan servinaykipaq tanteakuynikiqa allinnikipaqtaqmi. Mozo-sipasllaraq kaspaykiqa tanteakunkim imata estudianaykipaq, imapi llamkanaykipaq chaynataq imapaqpas. Imapaqpas tanteakuytaqa tupachichwanmi pallqaq ñanman chayaruyman. Ichaqa may rinanchikta yachasqanchikraykum yachanchikña mayqin ñan riyta. Yaqa chaynam imata ruwanapaq tanteakuyninchikwanpas, sichum puntamantaraq yachasunña imata ruwanapaq hinaspaqa manam sasachakusunchu imapaq tanteakunapaqpas. Proverbios 21:5 nin allinta tantearispa imapas ruwasqaqa allin qispisqanmanta. Sichum kunanmantapacha imatapas ruwanaykipaq tanteakuspaykiqa manapas unaymantam munasqaykikunata haypanki. Chaynam karqa Damaris iñiqmasinchikwan, paymi sipasllaraq kachkaspan allinta tanteakurqa imata ruwananmanta.

⁸ Damaris iñiqmasinchikqa allin estudiaqmi karqa, chaymi colegionta tukuruptin nirqaku mana qullqillapaq abogada kananpaq universidadpi estudiananpaq. Ichaqa payqa ñam tanteakururqaña chawpi punchawlla llamkaspa precursora kananpaq, paymi nin: “Ñuqaqa warmachaymantam precursora kayta munarqani. Chaymi chawpi punchawllapaq llamkayta tarinay karqa. Abogada kaspayqa ichapas qullqisapa kachkayman, ichaqa manam precursora kaytaqa atiymanchu karqa”, nispa. Damaris iñiqmasinchikqa 20 wata masninñam precursora, payqa manam ñakakunchu sipasllaraq kachkaspan tanteakusqanmantaqa. Paymi nin: “Llamkasqaypiqa achka abogadokunatam riqsini, paykunaqa manam kusisqachu llamkayninkuwanqa kanku. Abogada kaspayqa ñuqapas chaynach kachkayman. Ñuqam ichaqa kusisqa kawsakuni Jehova Diosta precursora kaspay servisqayrayku”, nispa.

9. ¿Imanasqataq mozo-sipaskunataqa alabaykunanchik?

⁹ Wara-waranqantin mozo-sipaskunam enteron pachapi Jehova Diosta servichkanku, kallpanchakuchkankum imam tanteakusqankuta ruwanankupaq, chay ruwasqankumantam alabaykunanchik. Imakunawan kusirikuytapas yachankutaqmi. Ichaqa Jehova Diostam kasukunku estudiaspankupas, llamkaspankupas hinaspa ayllunkupipas. Kamachiq Salomonmi nirqa tukuy sunqunchikwan Jehova Diospi hapipakunapaq. Nirqataqmi: ‘Tukuy ima ruwasqaykipipas tayta Diospi yuyaymanay, hinaptinqa paymi munasqanman hina kawsachisunki’, nispa (Prov. 3:5, 6). Jehova Diosqa anchatam kuyan mozo-sipaskunataqa, chayraykum mana allinkunamanta harkan, alli ñanninta pusaspam bendicen.

10. (1) ¿Imanasqataq Diosmanta willakunaykipaq anchata kallpanchakunayki? (2) ¿Ima ruwaynikitaq yanapasunki Diosmanta allinta willakunaykipaq?

¹⁰ Sichum huk mozo-sipas Jehova Diospa kuyasqan kayta munaspanqa Diosmanta willakunanpaqmi kallpanchakunan. Jesucristom niwarqanchik chayqa ancha allin kasqanmanta, nirqam: “Puntataqa llapallan nacionkunapim sumaq  willakuyraq willakusqa kanan”, nispa (Mar. 13:10). Qawasqanchikman hinam, Diosmanta willakunaykipaq imamantapas puntataqa kallpanchakunayki. ¿Haykapipas piensarqankichu Diosmanta astawan willakunaykipaq utaq precursor kanaykipaq? Ichaqa, ¿imatam ruwawaq Diosmanta willakuy mana gustasuptikiqa? ¿Ima ruwaynikim yanapasunkiman Diosmanta allinta willakunaykipaq? Kaykunatam ruwawaq: Imayna willakunaykipaq allinta estudiay hinaspa willakuy ima yachasqaykikunata. Chayna ruwaynikiqa yanapasunkim kusisqa willakunaykipaq.

11, 12. (1) ¿Imatam mozo-sipaskuna ruwanmanku mana manchakuspa Diosmanta allinta willakunankupaq? (2) ¿Imatam huk mozocha ruwarqa salonninpi religionmanta rimayta qallaykuptinku?

¹¹ Qallariwaqmi estudiaqmasikikunapa tapususqaykimanta estudianaykipaq, estudiawaqmi imanasqa Diospi iñisqaykimanta chaynapi allinta willakunaykipaq. Jw.org nisqapim kachkan sumaq yachachikuykuna aswan allinta Diosmanta willakunaykipaq. Imanasqa Diospi iñisqaykimanta willakunaykipaqmi yanapasunki “¿Imakunapas qunqayllamantachu rikuriramurqa?” niq yachachikuy, chayqa kachkan Mozo-sipaskunapa 10 tapukuykuna ruwakusqankumanta niq qillqapim (qaway 1 Pedro 3:15).

¹² Estudiaqmasikikunatam niwaq internetpi jw.org nisqanman yaykunankupaq. Chaytam ruwarqa Lucas mozocha salonninpi religionmanta rimaptinku. Musyarurqam profesoranpa servichikusqan qillqa Jehova Diospa testigonkunamanta yanqakunata willakusqanta. Manchapakuspanpas profesorantam nirqa imanasqa chay qillqaqa mana imam kaqtachu willakusqanmanta. Ñawpaqman lluqsiykuspanmi imam kaqta willakurqa testigokunamanta, hinaspapas  jw.org nisqatam qawachirqa. Chaymantañataqmi, profesoran lliwta kamachirqa ¿Imaynatam mana kutipakuspalla asikusuqnikimanta asurikuwaq? niq videota qawanankupaq. Lucasqa kusisqam tarikurqa Jehova Diosmanta willakusqanrayku.

13. ¿Imanasqataq mana hukmanyanaykichu sasachakuykunapi tarikuspaykipas?

¹³ Ama hukmanyaychu imam tanteakusqaykita sasachakuykunarayku mana ruwayta atispaykiqa, aswanqa hinalla kallpanchakuy (2 Tim. 4:2). Chaytam ruwarqa Katerina. 17 watanpi kachkaspanmi tanteakururqa lliw llamkaqmasinkunaman Diosmanta willananpaq, chaytam ruwarqa. Ichaqa huk llamkaqmasinmi kamiparurqa, chaywanpas payqa manam hukmanyarqachu. Chaytam qawarqa Hans sutiyuq llamkaqmasin. Chaymi qillqanchikkuna qawayta qallaykurqa, chaymantaqa huk iñiqmasinchikwanñam bibliata estudiarqa, hinaspam bautizakururqa. Katerinaqa manam yacharqachu chay pasakusqantaqa huk lawman ripukusqanrayku. 13 wata pasaytam Katerinaqa ayllunwan huñunakuypi kachkarqa, hinaptinmi ñawpaqta qawariykuptinqa Hans yachachimunanpaq siqachkasqa. Katerina lliw llamkaqmasinkunaman Diosmanta mana manchakuspan willakusqanraykum Hansqa testigoña rikurirurqa.

14, 15. (1) ¿Imatam yuyarinayki hukkuna hikutasuptikiqa? (2) ¿Imakunatam ruwawaq hukkunapa hikutasusqaykita atipanaykipaq?

¹⁴ Kaykamaqa, kay yachachikuyqa kallpanchasuchkanki Jehova Dioswan kuyachikunaykipaq imata ruwanaykipaqmi hinaspa payta astawan servinaykipaq tanteakunaykipaqmi. Wiñaymasikikunaqa ichapas kusirikuykunallapi purichkanku, qamtapas nisunkichá paykuna hina kanaykipaq. Ichaqa qawachinaykim kanqa imam tanteakusqaykita ruway munasqaykita. Amayá hukkuna hikutasusqaykiraykuqa ruway munasqaykitaqa saqiychu. Yuyariy agenciapi runakuna may riy munasqankuta. Paykunaqa manamriki ima carromanpas siqarunkuchu chaypi runakuna kusirikusqankuraykullachu ¿aw?

¹⁵ Kaykunatam ruwawaq utaq kaykunaman rikchakuqta wiñaymasikikunapa hikutasusqaykita atipanaykipaq. Sasachakuypi tarikunaykimanta musyakuspaykiqa karunchakuy (Prov. 22:3). Yuyaymanay mana allinta ruwaruspaykiqa imayna tarikunaykimanta (Gal. 6:7). Riqsikunaykitaqmi hukkunapa yanapaykunan necesitasqaykitapas. Mana hatun tukuq kaspaykiqa uyarikunkim tayta-mamaykipa utaq yuyayniyuq iñiqmasinchikkunapa rimapayasusqaykita (qaway 1 Pedro 5:5, 6).

16. ¿Imanasqataq mana hatun tukuq kayqa ancha allin? Rimarimuy iñiqmasinchik Cristofermanta.

¹⁶ Cristofermi mana hatun tukuq kasqanrayku rimapayasqankuta uyarikurqa. Bautizakurusqan qipallamanmi kallpa hapinapaq wasiman riyta qallaykurqa. Chaypim mana Diosta serviq amistadninkuna nirqaku paykunawan kuska pukllanankupaq. Hinaptinmi payqa punta apaqman willakurqa, chaymi chay punta apaqqa nirqa paykunawan pukllaspanqa atipanakuqllaña rikurirunanmanta. Chaywanpas Cristoferqa paykunawanmi pukllarqa. Ichaqa qawarqam chay pukllaypiqa atipanakusqankuta hinaspa maqanakusqankutapas. Chaymi yapamanta punta apaqkunawan rimarqa,  hinaptinmi bibliapa nisqanman hina rimapayarqaku. Cristofermi nin: “Jehova Diosmi iñiqmasiykunata servichikurqa sumaqta rimapayawanankupaq. Qallariyllanpiqa manam uyarikurqanichu, chaymantam ichaqa uyarikurqaniña”, nispa. Qamqa ¿chayllachu uyarikunki pipas rimapayasuptiki?

17, 18. (1) ¿Mozo-sipaskuna imayna kawsakunankutam Jehova Diosqa munan? (2) Mozo-sipas ¿imapaqmi kunanmantapacha tanteakunayki yuyayniyuq kaspaykipas mana ñakakunaykipaq? Rimarimuy iñiqmasinchik Mirjanamanta.

¹⁷ Mozo-sipas, Jehova Diosmi nisunki: ‘Joven kaynikipi kusikuy, sunquykipas warma kaynikipi anchata kusikuchun’, nispa (Ecl. 11:9). Diosqa munachkanmi kusisqa kawsakunaykita. Kay yachachikuypim yacharamunchik kusisqa kawsakunaykipaqqa Jehova Diosta astawan servinaykipaq tanteakuyniki hinaspa paypa munasqanman hina kawsakuyniki yanapasunaykimanta. Sichum kunanmantapacha chaynata ruwanaykipaq tanteakuspaykiqa qawankim Jehova Diosqa allin ñanninta pusasusqaykita, mana allinmanta harkasusqaykita hinaspa bendecisusqaykita. Yuyariy, bibliapi yachachikuykunaqa allinnikipaqmi, bibliapa kayna nisqanta kasukuy: “Jovenllaraq kaynikipiyá unanchaqnikimanta yuyariy”, niqta (Ecl. 12:1).

¹⁸ Mozo-sipaslla kayqa manam wiñaypaqchu. Watakunaqa chayllam pasarun, hinaptinmi yuyayniyuqña rikurirunki. Achka yuyayniyuqkunam ñakakunku mozo-sipas kachkaspanku mana allinta tanteasqankurayku utaq mana imatapas ruwasqankurayku. Ichaqa kunanmantapacha Jehova Diosta astawan servinankupaq tanteakuqkunaqa yuyayniyuq kaspankupas kusisqam kanqaku. Mirjana iñiqmasinchikmi chayna kusisqa kawsakuchkan. Payqa sipaschallaraq kaspanqa allin pukllaqmi karqa, chaymi huk law nacionpi pukllananpaq nirqaku, chaypiqa lliw nacionmanta allin pukllaq riqkunam atipanakuqku. Ichaqa manam rirqachu, aswanmi Jehova Diosta tukuy tiemponwan servinanpaq tanteakururqa. 30 wata masninñam qusanwan kuska tukuy tiemponkuwan Jehova Diosta servichkanku. Paymi nin: “Ancha riqsisqa kayqa hinaspa achka qullqiyuq kayqa tukuruqllam, yanqapaqmi. Aswan allinqa Diosta serviymi hinaspa runakunata Diosta riqsinankupaq atisqanchikman hina yanapakuymi”, nispa.

19. Mozo-sipas ¿imaynam kawsakunki Jehova Diosta astawan servinaykipaq tanteakuspaykiqa?

¹⁹ Diosta astawan serviq mozo-sipaskunataqa alabaykunanchikmi, sasachakuykunatapas atipaspanku hinalla Diosta servisqankurayku. Kallpanchakuchkankum Diosta astawan servinankupaq, paymanta willakunankupaq hinaspa kay pachapi tukuy rikchaq munaykunawan mana intuchikunankupaq. Mozo-sipas, kallpanchakusqaykiqa manam yanqapaqchu, lliw iñiqmasikikunam kuyaykiku hinaspapas yanapasqaykikum. Sichum Jehova Diospa makinman churanki tukuy ima tanteasqaykitapas hinaspaqa kusisqam kawsakunki.