1, 2. ¿Imaynatam Jehova Diosqa qukuykuq kasqanta qawachin?

JEHOVA DIOSQA qukuykuqmi. Tukuy imapas chaskisqanchikqa paymantam hamun. Jehova Diospam kay pachapi llapallan quri-qullqiqa hinaspa tukuy imapas, hinaspapas tukuy imatam quwanchik kawsananchikpaq (Sal. 104:13-15; Hag. 2:8). Bibliam nin tukuy chaykunata achka kutipi yupaychaqninkunaman qusqanmanta.

² Chaytam ruwarqa Israel runakunapaq, Jehova Diosmi “maná” sutiyuq mikuyta hinaspa yakuta qurqa tawa chunka watapuni chunniqpi kaptinku (Ex. 16:35). ‘Manam imatapas paykunapaqqa pisichirqachu’ (Neh. 9:20, 21). Jehova Diosqa Eliseomanpas atiytam qurqa milagrota ruwananpaq, chaymi Diosman sunqu viudapa aceitenta achkayachirqa.  Chayraykum chay viudaqa manukusqanta pagayta atirqa, hinaspapas qullqinqa puchurqaraqmi wawankunata uywananpaq (2 Rey. 4:1-7). Chaymantapas Jehova Diosqa Jesusmanmi atiyta qurqa milagrokunata ruwananpaq, chaymi tantatawan challwata achkayachirqa runakuna mikunankupaq hinaspa huk kutipi qullqitapas rikurichirqa (Mat. 15:35-38; 17:27).

3. ¿Imamantam kay yachachikuypi yachasunchik?

³ Jehova Diosqa atinmanmi kay pachapi imapas unanchasqankunata servichikuspan munaynin ruwayta. Chayna kaptinpas, munanmi yupaychaqninkuna imapas kapuqninchikwan yanapakunanchikta (Ex. 36:3-7; qaway Proverbios 3:9). ¿Imanasqam Jehova Diosqa munan imapas quwasqanchikta payman qunanchikta? ¿Imaynatam ñawpaq tiempopi Diosta yupaychaqkuna imapas kapuqninkuwan yanapakurqaku Diospa munaynin ruwakunanpaq? ¿Imaynatam Diospa llaqtanqa qullqi qusqanchikta servichikun? Kay yachachikuypim yachasunchik kay tapukuykunamanta.

4. ¿Imaraykutaq Jehova Diosman kapuqninchikkunata qunchik?

⁴ Jehova Diosmanqa kapuqninchikkunatam qunchik payta kuyasqanchikrayku hinaspa imapas quwasqanchikmanta agradecekusqanchikrayku. Payqa tukuy imatam quwanchik, chaypi yuyaymanaspam ancha agradecesqa tarikunchik. David hinam tarikunchik, templota hatarichinankupaq kachkaptinkum payqa nirqa tukuy imatapas Diosmanta chaskisqanchikta, hinaspa payman qusqanchikkunapas Diosmanta chaskisqanchik kaqkunalla kasqanta (qaway 1 Cronicas 29:11-14).

5. ¿Imaynatam bibliaqa qawachiwanchik kapuqninchikkunata quspa Diosta yupaychasqanchikta?

⁵ Chaymantapas, Jehova Diosmanmi kapuqninchikkunata qunchik chaywan payta yupaychasqanchikrayku. Juanmi musquyninpi hina qawarqa hanaq pachapi Diosta yupaychaqkuna kaynata nispa Diosta hatunchasqankuta: “Tukuy atiyniyuq Jehova Diosllayku, tukuy imata unanchasqaykiraykum qamlla kanki llapallanpa hatunchanan hinaspa yupaychanan, munaptikim tukuy imakunapas kachkan, munaptikitaqmi unanchasqapas karqa”, nispa (Apoc. 4:11). Jehova Dioslla hatunchana kasqanraykum kapuqninchikkunamanta allinnin kaqta qunanchik. Jehova Diosmi ñawpaq Israel runakunata kamachirqa watapi kimsa kutikama huñunakunankupaq. Chaymantapas, kay kamachikuytam kasukunanku karqa: “Amataqmi [Jehova] Diosmanqa pipas rinqachu mana imatapas apaspaqa”, niqta (Deut. 16:16). Israel runakunaqa kapuqninkuta Diosman quspankum Diosta yupaychachkarqaku. Kay tiempopipas kapuqninchikkunata Diosman quspanchikmi payta yupaychachkanchik. Chay ruwasqanchikwanmi qawachinchik Diospa llaqtanpa tukuy ima ruwasqanta anchata chaninchasqanchikta.

6. ¿Imanasqataq kapuqninchikkunata Diosman quyqa allinninchikpaq? (Qaway 15 kaq paginapi fotota).

⁶ Sunqumanta kapuqninchikkunata quyninchikmi ancha allinqa imatapas chaskinallanchikmantaqa (qaway Proverbios 29:21). Kaypi yuyaymanasun: Huk warmacha tayta-mamanmanta qullqi chaskikusqanwan  paykunapaq imatapas rantiykapuptinqa, tayta-mamanqa anchatam kusikunku hinaspa agradecekunku ¿aw? Yuyaymanasuntaq tayta-mamanwan yachaq mozo kaq precursorpi, payqa qullqichanwanmi ayllunta yanapakun. Chay qullqita tayta-maman mana mañakuspankupas chaskikunkum, ¿imanasqa? Yachankum chay ruwasqanwan warmanku agradecekuq kasqanta qawachisqanta. Hina chaynallataqmi Jehova Diospas yachan kapuqninchikkunata paypaq quyqa allinninchikpaq kasqanta.

7, 8. (1) Ñawpaqpiqa, ¿imaynatam Diosman sunqu runakuna yanapakurqaku? (2) ¿Imakunata ruwaspataq Diosman sunqu runakunaqa yanapakurqaku Diosllapaq llamkaqkunata?

⁷ Bibliam willawanchik ñawpaqpi Jehova Diosta yupaychaqkuna imapas kapuqninkunata qusqankumanta. Wakinpiqa yacharqakum qusqanku imapaq kasqanta. Moisesmi Israel runakunata kallpancharqa kapuqninkuta quspanku Diospa carpanta ruwanankupaq, Davidpas chaytam ruwarqa Diospa templonta ruwachinanpaq (Ex. 35:5; 1 Cron. 29:5-9). Kamachiq Joaspa tiemponpim, sacerdotekuna llaqtapa qusqan qullqiwan Diospa wasinta allicharqaku (2 Rey. 12:4, 5). Apostolkunapa tiemponpipas, iñiqkunam kapuqninkuwan yanaparqaku Judea llaqtapi iñiqmasinkunata muchuypi kaptinku. Bibliapa nisqanman hinaqa sapakamam atisqankuman hina qurqaku (Hech. 11:27-30).

⁸ Wakinpim Diosman sunqu runakunaqa imapas kapuqninkuta qurqaku Diosllapaq llamkaqkunata yanapanankupaq. Moisespa chaskisqan kamachikuyman hinaqa Leviy casta runakunaqa manam herenciapi allpataqa chaskiqkuchu wakin ayllunkuna hinaqa. Chayna kaptinmi wakin ayllukunaqa paykunapaq diezmota quqku imapas cosechasqankumanta. Chayna qusqankuwanmi Leviy castakunaqa atirqaku astawan Jehova Diospa carpanpi llamkayta (Num. 18:21). Chaymantapas, Jesustawan apostolninkunatam qukuykuq warmikuna ‘kapuqninkuwan yanaparqaku’ (Luc. 8:1-3).

9. Ñawpaq tiempopiqa, ¿imaynatam Diosta yupaychaqkunaqa qullqita huñuqku Diosman qunankupaq?

⁹ Diosta yupaychaqkunaqa tukuytam ruwarqaku imapas kapuqninkuta Diosman qunankupaq. Chunniqpi Diospa carpanta ruwanankupaq Israel runakunapa tukuy ima qusqankuqa, wakinmi karqa Egipto nacionmanta apakamusqanku (Ex. 3:21, 22; 35:22-24). Apostolkunapa tiempopipas, Diosta wakin yupaychaqkunaqa chakrankuta utaq wasinkutam rantikuruspanku apostolkunaman chay qullqita qurqaku. Apostolkunañataqmi huñusqanku qullqita wakcha iñiqmasinkuman qurqaku (Hech. 4:34, 35). Wakinkuñataqmi qullqinkuta sapaqchaqku Diosta yupaychaypi yanapakunankupaq (1 Cor. 16:2). Chaynaqa, apu kaq hinaspa wakcha kaqpas lliw iñiqkunam atisqankuman hina kapuqninkunata quqku (Luc. 21:1-4).

10, 11. (1) ¿Imaynatam ñawpaq tiempopi Diosta yupaychaqkunapa qukuykuq kasqankuta qatipakuchwan? (2) ¿Imaynam tarikunki Diospa munaynin ruwakunanpaq yanapakuspayki?

¹⁰ Kunanpas kapuqninchikkunawanmi  yanapakuchwan. Ichapas iñiqmasinchikkuna tanteachkanku huñunakunanchik wasita allichanankupaq utaq musuqmanta hatarichinankupaq. Utaq niwanchikman betel wasita sumaqyachinankupaq, hatun huñunakuyninchik apakunanpaq utaq imapas sasachakuy karuptin iñiqmasinchikkunata yanapananchikpaq qullqi necesitakusqanta, chaypaqmi qullqichanchikta qunanchik kanqa. Qullqi qusqanchikwantaqmi yanapanchik misionerokunata, precursor especialkunata, llaqtan-llaqtan watukuq iñiqmasinchikkunata hinaspa enteron pachapi betel wasipi llamkaqkunata. Chaymantapas sapa killam qullqichanchikta betel wasiman apachinchik huñunakunanchik wasikunata hatarichinankupaq, chayqa enteron pachapi iñiqmasinchikkunatam yanapan.

¹¹ Llapanchikmi yanapakuchwan kay tukupay tiempopi Jehova Diospa munaynin ruwakunanpaq. Qullqi qusqanchiktaqa manam pimanpas willanchikchu, chaytaqa qunchik sunqunchikpa nisqanman hinam huñunakunanchik wasipi cajachakunaman churaspa, utaq internetpi jw.org nisqantakama apachispa. Ichapas wakinpiqa piensachwan qullqi qusqanchikwan mana ancha yanapakusqanchikta. Ichaqa pisillatapas llapanchik qusqanchikwanmi qullqi huñusqanchikqa achkayan. Llapan iñiqmasinchikmi aslla qullqiyuq kaspankupas ñawpaq tiempopi Macedonia llaqtayuq iñiqkunata qatipakunku. Paykunaqa “llumpay wakcha” kaspankupas, kapuqninkuwan yanapakuytam munarqaku hinaspam tukuy sunqunkuwan qurqaku (2 Cor. 8:1-4).

12. ¿Imatam Diospa llaqtanqa ruwan qullqi qusqanchikta allinta servichikunankupaq?

¹² Diospa llaqtanpi punta apaqkunaqa kallpanchakunkum qullqi qusqanchikta allin yuyaywan servichikunankupaq (Mat. 24:45). Kay iñiqmasinchikkunaqa Diostam mañakunku hinaspa allinta tanteanku qullqita imayna servichikunankupaq (Luc. 14:28). Ñawpaq tiempopiqa, Diosman sunqu runakunam qullqitaqa waqaycharqaku. Chay qullqitaqa servichikuqku Jehova Diosta yupaychanallankupaqmi. Huk kutipim Persia nacionta kamachiq, quri-qullqita hinaspa huk kapuqninkunatapas Esdrasman qurqa, chayqa kay tiemponchikpim kanman 300 millon masnin soles qullqi, chayta apaspanmi Esdrasqa Jerusalen llaqtaman kutirqa. Chay tukuy ima chaskisqantaqa Jehova Diospata hinam Esdrasqa qawarqa, chaymi kamachirqa mana suwachikuspallanku apanankupaq (Esd. 8:24-34). Achka watakuna qipatapas, Judea llaqtapi iñiqmasinkunata yanapananpaqmi apostol Pablo qullqita huñurqa hinaspam kamachirqa “Jehova Diospa qayllanpipas chaynataq runakunapa qayllanpipas” allin sunquyuq runakuna aypunankupaq (qaway 2 Corintios 8:18-21). Kunanpas Diospa llaqtanpiqa Esdrasta hinaspa Pablotam qatipakunku. Chaymi qullqi qusqanchikta allinta servichikunku.

13. ¿Imatam Diospa llaqtanqa pasaq watakunallapi tantearurqa?

¹³ Wakinpim, wakin ayllukunaqa allinta tanteananku qullqi chaskisqankumanta astawan mana gastanankupaq. Utaq Jehova Diospa munayninta astawan ruwanankupaq huk ruwaykunata saqinku. Jehova Diospa llaqtanpipas yaqa chaynam pasakun.  Kay pasaq watakunapim, Diospa llaqtan tukuy imata ruwarqa. Chayraykum qullqi qusqanchikmantapas astawanraq gastarqaku. Chaymi Diospa llaqtanqa tantearurqa wakin ruwaykunapi qullqita manaña anchata gastananpaq. Chaynapi qullqi qusqanchikta allinta servichikunapaq.

14-16. (1) ¿Imakuna ruwakunanpaqmi qullqi qusqanchikqa yanapakun? (2) ¿Imaynatam Diospa llaqtanpa tukuy ima quwasqanchikkuna yanapasurqanki?

¹⁴ Unay watakuna Diosta yupaychaqkunam ninku, kay watakunapi Diospa llaqtan sumaq kaqkunata ruwasqanmanta. Kunanqa kapuwachkanchikmi internetpi jw.org direccionninchik hinaspa JW Broadcasting niqpas. Chaymantapas Musuq pachapi kawsaqkunapaq Diospa palabran biblianchikpas achka rimaykunapiñam kachkan. 2014 hinaspa 2015 watakunapim 14 llaqtakunapi enteron pachapi “Puntatayá Diospa Gobiernonta maskasunchik” niq hatun huñunakuy huk law nacionkunapaqwan apakurqa. Chay huñunakuyman riqkunaqa ancha kusisqam tarikurqaku.

¹⁵ Achka iñiqmasinchikkunam ancha agradecesqa tarikunku Diospa llaqtan tukuy ima ruwasqanmanta. Asia lawpi taksa llaqtachapi yachaq casarasqa iñiqmasinchikkunam nirqaku: “Karu llaqtachapi yachasqaykuraykum wakinpiqa sapallayku kachkaymankupas hina tarikuniku, hinaspa Diospa llaqtan wiñasqantapas mana musyakunikuchu. Ichaqa JW Broadcasting nisqata qawaspaykum chaylla musyakuniku enteron pachapi iñiqmasinchikkuna kasqanta. Kay llaqtapi yachaq iñiqmasiykunaqa ancha kusisqam kachkanku JW Broadcasting nisqawan. Paykunam ninku chayta qawaspanku Diospa llaqtanpi punta apaqkunawan kuska kachkanmankupas hina tarikusqankuta. Ancha kusisqam  tarikuniku Diospa llaqtanpi kasqaykumanta”, nispa.

¹⁶ Enteron allpa pachapim Diosta yupaychanapaq 2.500 huñunakuna wasikunata hatarichichkanku utaq allichachkanku. Honduras nacionpi iñiqmasinchikkunam kaynata qillqarqaku huñunakusqanku wasi hatarichisqa kaptin: “Ancha kusisqam tarikuniku Diospa llaqtanpi kasqaykumanta hinaspa enteron pachapi iñiqmasinchikkuna kasqanmanta. Chaymi kunanqa kapuwachkankuña huñunakunaykupaq wasiyku”, nispa. Achka iñiqmasinchikkunam chayna kusisqa tarikunku bibliata hinaspa huk qillqanchikkunatapas rimayninkupi chaskispanku, imapas sasachakuykuna kaptin yanapasqa kaspanku, utaq llaqtankupi carretachakunawan Diosmanta willakuspa llampu sunquyuq runakunata tarispanku.

17. ¿Imaynatam yachanchik llaqtanta Jehova Dios kunan yanapasqanta?

¹⁷ Sunqumanta qullqi qusqallanchikwan Diospa llaqtan tukuy ima ruwasqanmanta qawaspankum, Diosta mana yupaychaq runakunaqa mana ima niytapas atinkuchu. Hatun fabricapi nanachikuq runam qillqanchikkunata ruwanapaq wasita watukurqa. Hinaspam chaypi llamkaqkuna mana qullqillapaq llamkasqankuta yachaspan, sunqumanta qullqi qusqanchikwan kasqanta yachaspan, hinaspa qullqita huñunapaq mana imatapas ruwasqanchikta yachaspan, nirqa wamaq chayta rikusqanmanta. Nirqataqmi chayta ruwayqa sasa kasqanmanta. Ichaqa yachanchikmi Diospa yanapakuynillanwan tukuy imapas atikusqanta (Job 42:2).

18. (1) ¿Ima bendicionkunatam chaskinchik Diospa munaynin ruwakunanpaq qullqichanchikwan yanapakuspanchikqa? (2) ¿Imaynatam warmakunaman hinaspa biblia estudiaqkunaman yachachichwan sunqumanta qullqichankuta qunankupaq?

¹⁸ Jehova Diosqa munanmi munaynin ruwakunanpaq kay tiemponchikpi yanapakunanchikta. Payqa niwanchikmi chayta ruwaspaqa ancha bendecisqa kananchikmanta (Mal. 3:10). Niwanchiktaqmi sunqumanta qukuqqa allin kaqkunata chaskinanmanta (qaway Proverbios 11:24, 25). Chaymantapas bibliam nin: “Imapas quqmi aswan kusisqaqa imapas chaskiqmantaqa”, nispa (Hech. 20:35). Chaymantapas imapas nisqanchikwanmi utaq ruwasqanchikwanmi, warmanchikkunaman hinaspa chayllaraq biblia estudiaqkunaman yachachichwan sunqumanta qullqichankuta qunankupaq, chaynapim achka bendicionkunata chaskinqaku.

19. ¿Imapaqmi kay yachachikuyqa kallpancharusunki?

¹⁹ Tukuy ima kapuwaqninchikqa Jehova Diosmantam hamun. Kapuqninchikkunata payman quspanchikqa qawachisunmi payta kuyasqanchikta hinaspa quwasqanchikkunamanta agradecekusqanchiktapas (1 Cron. 29:17). Ñawpaq tiempopi Diospa templon hatarichisqa kananpaqmi Israel runakuna kapuqninkuta qurqaku, ‘chay qusqankuwanmi llapa runakuna kusikurqaku, tukuy sunqumanta [Jehova] Diosman qusqankurayku’ (1 Cron. 29:9). Ñuqanchikpas hinallayá kusisqa kasun Jehova Diosmanta chaskisqanchikkunata payman quspanchik.