Wakinpiqa chaynatam nirqanchik, kayqa yaqachusmi tuparqa Hebreos 12:16 nisqanwan. Chaypim nin Esauqa ‘Diospa kaqninkunata despreciasqanmanta’ hinaspa “huk plato mikuyllapaq piwi kayninta” Jacobman rantikurusqanmanta. Jesusqa Jacobpa mirayninmantam hamurqa, chaymi piensarqanchik piwi kayninta Esau Jacobman rantikurusqanrayku chaynaña kasqanmanta (Mat. 1:2, 16; Luc. 3:23, 34).

Ichaqa bibliata ñawinchaspam kayta yachanchik: Manam pipas piwi churiraqchu kanan karqa miraynintakama Jesus hamunanpaqqa. Qawasunyá imanasqa.

Leapa wawan Rubenmi Jacobpa piwi churinqa karqa. Raquelpiñataqmi Jacobpa piwi churin karqa Josey. Ruben huchallikuruptinmi piwi churi kayninpa derechonqa Joseypaqña karqa (Gen. 29:31-35; 30:22-25; 35:22-26; 49:22-26; 1 Cron. 5:1, 2). Chayna kaptinpas Jesusqa manam paykunamantachu nacemurqa aswanqa Juda ayllumantam, Judaqa Jacobpawan Leapa tawa kaq churi-wawankuñam karqa (Gen. 49:10).

Lucas 3:32 versiculopipas willakunmi pichqa runakuna Jesuspa ñawpa abuelonkuna kasqankuta. Llapankum piwi churikuna karqaku. Bibliam willakun Boazpa churin Obed kasqanta, Obedpa churinñataq Jesey kasqanta (Rut 4:17, 20-22; 1 Cron. 2:10-12).

Jesuspa ñawpa abuelonqa karqataqmi Jeseypa churin Davidpas. Ichaqa Davidqa manam Jeseypa piwi churinchu karqa, aswanqa qanchis wawqinkunapa sullkanñam (1 Sam. 16:10, 11; 17:12; Mat. 1:5, 6). Chaynallataqmi karqa Salomonwanpas, paypas manam Davidpa piwi churinchu karqa (2 Sam. 3:2-5).

 Kaywanqa manam nichkanchikchu piwi churi kayqa mana chaninniyuq kasqantachu. Ayllupi piwi churikunaqa respetasqam karqaku hinaspa wasipi taytan mana kaptinqa ayllunmantam nanachikuqku. Chaymantapas aswan hatuntam chakrataqa chaskiq (Gen. 43:33; Deut. 21:17; Jos. 17:1).

Ichaqa piwi churikunapa derechontaqa huk kaqnin churinkumanpas quytaqa atiqkum. Chaynatam Abrahanpas ruwarqa, churin Ismaelta pasakunanpaq kamachiptinmi Isaacña piwi karqa (Gen. 21:14-21; 22:2). Jacobpas churin Rubenpa piwi kayninpa derechontam Joseyman quykurqa.

Kunanñataq qawasun Hebreos 12:16 nisqanta, chaypim nin: “Cuidakuychiktaqyá qamkuna ukupi pipas mana huchapakuq kananpaq hinaspa Esau hina Diospa kaqninkunata despreciaq pipas mana kananpaq, paymi huk plato mikuyllapaq piwi kayninta quykurqa”, nispa. ¿Imatam apostol Pabloqa kaywan yachachiyta munarqa?

Pabloqa manam Jesus pimanta hamusqanmantachu yachachichkarqa. Manaraq chaymanta rimachkaspanmi Pabloqa iñiqmasinkunata nirqa mana allinkunamanta karunchakunankupaq, chaynapi ‘Diospa ancha kuyakuyninta haypanankupaq’. Huchallikuruspankuqa manam chaytaqa haypanmankuchu karqa (Heb. 12:12-16). Esau hinam kanmanku karqa, payqa ‘Diospa kaqninkunata despreciaspam’ munasqallanta ruwarqa.

Chay tiempopi ruwasqankuman hina, ichapas Esauqa ayllunpa rantinpi Jehova Diospaq animalkunata kañarqa (Gen. 8:20, 21; 12:7, 8; Job 1:4, 5). Ichaqa Diospa kaqkunata mana chaninchasqanraykum piwi kayninpa derechonta wischupakururqa lenteja picanteta mikunanrayku. Jehova Diosqa nirqam Abrahanpa miraynin ñakarinanmanta, ichapas chayta mana munaspan Esauqa piwi kayninta rantikururqa (Gen. 15:13). Esauqa Diospa kaqkunataqa manam chanincharqachu chaymi taytacha-mamachakunata yupaychaq iskay warmikunawanpas casarakururqa, chayqa tayta-mamantapas llakichirqam (Gen. 26:34, 35). Payqa manam Jacob hinachu karqa, Jacobqa Diosta yupaychaq warmiwanmi casarakurqa (Gen. 28:6, 7; 29:10-12, 18).

Hinaptinqa, ¿imatam yacharunchik? Jesuspa ñawpa abuelonkunaqa manam llapankuchu piwi churikuna karqaku. Kaytaqa judiokunaqa yacharqakum chaymi mana iskayrayarqakuchu Davidpa mirayninmanta Jesus hamunanmantaqa, Davidqa Jeseypa sullka kaq churinmi karqa (Mat. 22:42).