1. ¿Imamanta yachasqanchikraykum kusikunchik?

KUSIKUNCHIKMI Jehova Diospa llaqtan astawan wiñasqanmanta yachaspanchik. Kaymi qawachin Diosta serviqkunaqa achki hina kancharisqanchikta. Qayna watam 10 millon masnin runakunaman bibliamanta yachachirqanchik. Chaymantapas millonnintin runakunam Jesuspa wañukusqanta yuyarinapaq huñunakuyman rirqaku, chaypim yacharqaku Diosqa kuyawaspanchik churinta librawananchikpaq kachamusqanmanta (1 Juan 4:9).

2, 3. (1) ¿Imataq mana harkawanchikchu achki hina kancharinapaqqa? (2) ¿Imamantam kunanqa yachasunchik?

² Diospa llaqtanpi runakunaqa tukuy rikchaq rimayniyuqmi kanchik. Chaywanpas, huk sunqullam hanaq pachapi kaq taytanchikta hatunchanchik (Apoc. 7:9). Arí, manamá ima rimayniyuqña utaq may lawmantaña kasqanchikpas harkawanchikchu ‘runakunapa kasqanpi kancharinataqa’ (Filip. 2:15).

 ³ Diospa llaqtanpi astawan achkayasqanchik, huk sunqulla kasqanchik hinaspa qawan-qawanlla kasqanchikmi Jehova Diosta hatunchan, runakunapas chayta qawaspankum Diosmanta yachayta munanku. Kunanmi yachasunchik, imakunata ruwaspa chaykunapi achki hina kancharinamanta (qaway Mateo 5:14-16).

4, 5. (1) Diosmanta willakuspanchikpas, ¿imawanraqtaq Jehova Diosta hatunchanchik? (2) Sumaq simiwan runakunata rimakuykuptinchikqa, ¿imaynam runakunaqa tarikunqaku? (Qaway 21 kaq paginapi fotota).

⁴ 1925 watapi 1 junio killapi, ingles rimaypi lluqsimuq Willakuq qillqam, “Luz en la oscuridad”, niq yachachikuyninpi nirqa: “Kay tukupay tiempokunaqa, manam pipas señorman sunquqa kanmanchu [...], sunquqa kanqa achki hina kancharispallanmi”, nispa. Nirqataqmi: “Achki hinaqa kancharinqa Diosmanta sumaq willakuykunata kay pachapi runakunaman apaspallanmi hinaspa Diospa munasqanman hina kawsakuspallanmi”, nispa. Arí, Diosmanta willakuspa hinaspa runakunata Jesuspa qatiqninkuna kanankupaq yachachispam achki hina kancharinchik (Mat. 28:19, 20). Chaymantapas ruwayninchikkunawanmi Jehova Diosta hatunchanchik. Diosmanta willakuptinchikqa runakunam qawawachkanchik, chaymi asirispa rimakuykuptinchikqa ñuqanchiktapas chaynataq Diosninchiktapas allinpaq hapinqaku.

⁵ Jesusmi qatiqninkunata nirqa: “Wasiman yaykuspaykichikqa rimakuykuychikyá”, nispa (Mat. 10:12). Jesuspa willakusqan llaqtakunapiqa, mana riqsisqanku runakunatapas wasinkumanqa yaykuykachiqkum. Ichaqa manapaschá yachasqanchik lawpiqa chaynachu runakunaqa kanku. Wakinqa mana riqsisqanku runa punkunta takaykuptinqa piñakunkum utaq mancharikunkum. Ichaqa sumaq simiwan rimakuykuptinchikqa ichapas wakinqa hawka tarikunqaku, aswanraqmi asirispa rimakuykuptinchikqa. Chayqa allintaqmi kanqa carretachakunawan achka runakunapa kasqanpi Diosmanta willakuypipas. Chayna willakuqkunaqa qawarqakuchá runakunata asirispa rimakuykuptinchikqa allinpaq qawawasqanchikmanta. Wakinqa asuykamuspankum ima qillqanchiktapas akllakunku hinaspa ñuqanchikwanpas parlarinku.

6. ¿Imatam warmi-qari yuyaq iñiqmasinchikkuna ruwanku achki hina hinalla kancharinankupaq?

⁶ Inglaterra nacionpi kaq warmi-qari yuyaq iñiqmasinchikkunam, unqusqankurayku manaña atinkuchu wasin-wasin Diosmanta willakuyta. Ichaqa, achki hina hinalla kanchariyta munasqankuraykum wasinku punkuchallapiña willakunku. Chaypaqmi escuelamanta warmanku kutichiq tayta-mamakuna purisqanku hora, mesachapi qillqanchikkunata churarunku. Achka tayta-mamakunam qawaykuq asuykuspanku Los jóvenes preguntan niq qillqata hinaspa huk qillqanchikkunatapas apakunku. Huk precursoram chay yuyaq iñiqmasinchikkunawan kuska chaypi willakuyta qallaykurqa. Chay precursora sumaq simiyuq kasqanrayku hinaspa chay yuyaq iñiqmasinchikkuna kallpanchakusqankuraykum, huk tayta bibliamanta estudiayta qallaykun.

7. ¿Imaynatam nacionninkumanta ayqikamuq runakunata yanapachwan?

⁷ Kay watakunapim achka runakuna nacionninkupi sasachakuy kasqanrayku huk law nacionkunaman ayqikuchkanku. ¿Imaynatam paykunaman Jehova Diosmanta hinaspa munayninmanta yachachichwan? Chaypaqqa  ichapas JW Language nisqanwan yanapachikuspa rimayninkupi rimakuykuyta yachachwan. Chaymantapas yachachwanmi rimayninpi iskay-kimsa rimayllatapas, chaynapi jw.org nisqanta servichikuspa videokunata hinaspa qillqakunata rimayninkupi qawachinapaq (Deut. 10:19).

8, 9. (1) ¿Imapaqmi Diospa munayninta ruwananchikpaq huñunakuyqa yanapawanchik? (2) ¿Imaynatam tayta-mamakunaqa warmankuta yanapanmanku huñunakuypi rimarinankupaq?

⁸ Diospa munayninta ruwananchikpaq huñunakuyqa yanapawanchikmi Diosmanta allin willakuqkuna kananchikpaq. Chay huñunakuypi imaynata aswan allinta willakunamanta yachachiwasqanchikmi yanapawanchik runakunata watukuspa bibliamanta allinta yachachinapaq.

⁹ Huñunakuyninchikman hamuq runakunam admirakunku warmachakunapas huñunakuypi rimarisqankuwan. Arí, warmanku sunqunkumanta rimarinankupaq tayta-mamakunapa yachachisqankuqa allinmi, chaynapi warmankupas achki hina kancharinankupaq. Sunqumanta warmakunapa rimarisqankuta uyarispankum wakin runakunaqa cuentata qukunku chiqap religionta tarirusqankumanta (1 Cor. 14:25).

10. ¿Imam ayllukunata yanapanqa huk sunqulla kanankupaq?

¹⁰ Iñiqmasinchikkunawan hinaspa ayllunchikwan huk sunqulla kanapaq kallpanchakuspanchikpas achki hinam kancharisunchik.  Chaypaqqa tayta-mamakunam kallpanchakunanku sapa semana ayllunkuwan Diosta yupaychanankupaq. Achka tayta-mamakunam sapa killapaq JW Broadcasting nisqan videota chaypi qawanku. Qawaruspankuqa llapankum rimarinmanku chay yachasqankuta imaynata ruwayman churanankupaq. Chay huñunakuy ruwaq tayta-mamaqa yuyarinanmi warmachakunaqa hinaspa mozo-sipaschakunaqa mana chaynalla yachachina kasqankuta. Chayraykum tayta-mamaqa allinninkupaq kaq yachachikuyta llapankupaq maskanan (Sal. 148:12, 13).

11-13. (1) ¿Imaynatam llapallanchik yanapakuchwan iñiqmasinchikkunawan huk sunqulla kanapaq? (2) ¿Imaynatam wakin iñiqmasinchikkunatapas yanapachwan achki hina hinalla kancharinankupaq?

¹¹ Yuyayniyuqkunapas, mozo-sipaskunapas llapanchikmi yanapakuyta atichwan iñiqmasinchikkunawan huk sunqulla kanapaqqa, chaynapi iñiqmasinchikkunapas kallpanchasqa tarikuspanku achki hina hinalla kancharinankupaq. Mozo-sipaskunaqa kallpanchakunmankum yuyaq iñiqmasinchikkunata astawan riqsinankupaq. Tapunmankum Diosta servisqankupi imakuna pasasqankumanta willanankupaq. Chay ruwayninkuqa kallpanchanqam yuyaq iñiqmasinchikkunatapas hinaspa kikin mozo-sipaskunatapas hinalla tukuy sunqunkuwan Diosta servinankupaq. Chaymantapas, llapallanchikmi kallpanchakuchwan huñunakuyman hamuq runakunata kusikuyllawanña chaskiykunapaq. Yanapachwantaqmi maypi tiyananpaq maskaspanchik, hinaspapas iñiqmasinchikkunatam riqsichichwan. Chaynata chaskiykuptinchikqa wasinkupi hinam hawka tarikunqaku.

¹² Diosmanta willakuq lluqsinapaq huñunakuy ruwaqkunapas yanapakunmankum yuyaq iñiqmasinchikkuna achki hina hinalla kancharinankupaq. Chaypaqqa yuyaqkunatam mana sasachakuspalla willakunanku lawman kachananku. Wakin kutipiqa, huk mozo-sipastam ninmanku yuyaq iñiqmasinchikwan kuska willakunanpaq, chaynapi yanapaykunanpaq. Entiendenankutaqmi wakin iñiqmasinchikkuna unqusqankurayku utaq imawanpas sasachakusqankurayku mana llumpayta willakuptinkuqa. Llakipayakuq kaspankuqa yanapanqakum mozo-sipaskunata, yuyaqkunata, chayllaraq utaq unay wataña kaq testigokunatapas kusisqa willakunankupaq (Lev. 19:32).

¹³ Huk kaqnin Salmos qillqaqmi nirqa: ‘¡Mayna sumaqmi, mayna munayllapaqmi, wawqi-panikunapa huk sunqulla kawsakuyninkuqa!’, nispa (qaway Salmo 133:1, 2). Israel runakunapaqqa allinninkupaqmi karqa huk sunqulla Jehova Diosta yupaychayninkuqa. Chayna kasqankutam chay Salmos qillqaqqa tupachirqa miski asnaq aceitewan. Ñuqanchikpas chay miski asnaq aceite hinam kachwan iñiqmasinchikkunawan kuyakuq hinaspa llampu sunqu kaspanchikqa, chayna kaspanchikqa iñiqmasinchikkunawan huk sunqulla kanapaqmi yanapakuchkanchik. Chayna kanapaq ña yanapakuspaqa alabanapaq hinam kanchik. Chaywanpas, ¿kallpanchakuchwanraqchu iñiqmasinchikkunaman sunqunchikta kicharinapaq hinaspa aswan riqsinakunapaq? (2 Cor. 6:11-13).

14. ¿Imatam ruwachwan kawsakuyninchikwan maymi yachasqanchik lawpi achki hina kancharinapaq?

¹⁴ ¿Yaqachum astawanraq kallpanchakuchwan bibliapa nisqanman hina kawsakusqanchikwan maymi yachasqanchik lawpipas achki hina kancharinapaq? Kuyakuqllaña runakuna kaptinchikqa, ichapas vecinonchikkunaqa Jehova Diosmanta yachayta munanqaku. Tapukusun: “¿Imayna runa kasqaytataq vecinoykuna  nin? ¿Wasiyqa hinaspa tukuy imayqa sumaq allichasqachu hinaspa limpiochu? ¿Sumaqyachinchu maypi yachasqayta? ¿Pitapas yanapaykuq runachu kani?”, nispa. Iñiqmasinchikkunawan rimaspanchikqa tapuchwanmi allin runa kasqankurayku paykunamanta vecinonku, ayllunku, estudiaqmasinku utaq llamkaqmasinkupas ima nisqankuta. Willawasunchá kallpanchawananchikpaq hina willakuykunata (Efes. 5:9).

15. ¿Imanasqataq kallpanchakunanchik qawan-qawanlla kanapaq?

¹⁵ Sichum munanchik achki hina hinalla aswan kanchariyta hinaspaqa, yuyarinanchikmi tukupay tiempopiña kawsasqanchikta. Jesusmi qatiqninkunata achka kutipi kaynata nirqa: “Qawan-qawanllayá kaychik”, nispa (Mat. 24:42; 25:13; 26:41). Ichaqa “llumpa-llumpay ñakariy punchawkuna” unay wata qipakunataña kananta utaq manaña rikunanchikta piensaspaqa, manam kallpanchakusunchu Diosmanta willakunapaqqa (Mat. 24:21). Hinaptinmi achki hina kanchayninchikqa manaña llumpayta kanchaspan wañurunman.

16, 17. ¿Imatam ruwachwan qawan-qawanlla kananchikpaq?

¹⁶ Kay tiempopi astawan sasachakuykuna  yapakuptinqa aswan qawan-qawanllam kananchik. Diosninchikqa imay punchaw piensasqanpim piñakuynintaqa apamunqa, chaymantaqa manamá iskayrayanchikchu (Mat. 24:42-44). Chaykamaqa, mana amispa hinaspa qawan-qawanllam suyananchik. Chaymantapas, Diospa palabrantam sapa punchaw ñawinchananchik chaynataq ‘tukuy tiempo Diosta mañakunanchik’ (1 Ped. 4:7). Yanapawasuntaqmi qawan-qawanlla hinaspa achki hina kanchariq iñiqmasinchikkunapa vidanmanta yachayninchikpas. 2012 watapi abril killapi 15 punchawninpi lluqsimuq Willakuq qillqapa 18-21 paginanpim kachkan Leonard Smith iñiqmasinchikpa vidanmanta willakuy, “Qanchis chunka watam Juda casta runamanta hapipakurqani” niqpi.

¹⁷ Hinallayá Diosta tukuy sunqunchikwan servisunchik, hukkunapaq allin kaqkunata ruwasunchik, chaynataq iñiqmasinchikkunawan aswan kuskanchakusunchik. Chaynata ruwaspanchikqa kusisqam kasunchik, manataqmi musyasunchu tiempo pasasqantapas (Efes. 5:16). Pachak wata ñawpaqtam, iñiqmasinchikkuna Diosninchikpaq anchata llamkarqaku. Kunanpas Jehova Diospa yanapakuyninwanmi aswanraq paypaq tukuyta ruwachkanchik. Arí, kunanqa astawanmi achki hina kancharichkanchik.

18, 19. ¿Imaynatam punta apaqkunaqa yanapawanchikman qawan-qawanlla kanapaq hinaspa Diosta hinalla servinapaqpas? Rimarimuy warmi-qari iñiqmasinchikkunamanta.

¹⁸ Pantaq runakuna kaptinchikpas, Jehova Diosqa hinallam saqiwanchik servinanchikpaq. Qawan-qawanlla kanapaq hinaspa payta hinalla servinapaqmi quwanchik “regalo hina” kaq iñiqkunapi punta apaqkunata (qaway Efesios 4:8, 11, 12). Chayraykum haykapipas punta apaq watukamuwaptinchikqa sumaq yachachikuykuna niwasqanchikta sumaqta uyarinanchik.

¹⁹ Inglaterra nacionpi yachaq warmi-qari iñiqmasinchikkunam mana allinta kawsakuspanku punta apaqkunapa yanapakuyninta mañakurqaku. Paninchikmi nirqa Diosta yupaychayninkupi qusan mana ancha kallpanchakusqanmanta. Qusanñataqmi riqsikurqa mana allin yachachiq kasqanmanta chaynataq sapa semana ayllunwan Diosta yupaychayta mana ruwasqanmanta. Hinaptinmi punta apaqkunaqa, qatiqninkunata Jesus imayna waqaychasqanmanta hinaspa entiendesqanmanta rimapayarqaku. Qari iñiqmasinchiktam nirqaku Jesus hina ruwananpaq, warmichantañataqmi nirqaku Jesus hina pacienciayuq kananpaq. Nirqakutaqmi imata ruwaspanku iskay warmankuwan kuska ayllunwan sapa semana Diosta yupaychanankupaq (Efes. 5:21-29). Manapas unaymantam qari iñiqmasinchikta alabarqaku allinta kallpanchakusqanmanta. Punta apaqkunapa kuyakuywan yanapasqankuraykum warmi-qari iñiqmasinchikkunaqa achki hina kancharichkanku.

20. ¿Imapim tukunqa achki hina kanchariyninchikqa?

²⁰ Salmo 128:1 nin: ‘¡Mayna kusisqam kanqa tayta Diosta kasukuspa paypa ñanninpi puriqkunaqa!’, nispa. Kunanmi yacharunchik kaykunata ruwaspa achki hina kancharinanchikmanta: Jehova Diosta servinankupaq runakunata yanapaspa, huk sunqulla kanapaq kallpanchakuspa hinaspa qawan-qawanlla kaspa. Chaykunata ruwaspanchikqa aswan kusisqam kasun, hukkunapas qawanqakum allin ruwayninchikkunata, chayta qawaspankum runakunapas hanaq pachapi taytanchikta hatunchayta munanqaku (Mat. 5:16).