Roboamqa karqa Israel nacionta tawa chunka wata kamachiq Salomonpa churinmi (1 Rey. 11:42). Roboamqa taytan Salomon wañukuptinmi Siquem llaqtaman rirqa kamachiqña kananpaq runakuna churanankupaq, chayqa karqa Jesuspa tiemponmanta ñawpaq 997 watapim (2 Cron. 10:1). ¿Roboamqa hukmanyasqachu tarikunman karqa yachaysapa taytan Salomonpa rantinpiña kamachinanta yachaspanqa? ¿Yaqachu sasachakuykuna kaptinqa imayna allichayta yachanman karqa?

Israel nacionpi Roboam kamachiyta qallaykuptinqa manam runakunaqa hawkachu tarikurqaku. Chaymi paykunapa rantinpi wakin rispanku Roboamta nirqaku: ‘Taytaykiqa llumpaytam ñakarichiwarqaku, chaynaqa kunanyá llumpay llamkay quwasqankutawan sasa cumplina kamachikuykunata menosyachiy’, nispa (2 Cron. 10:3, 4).

Chaynata niptinkuqa Roboamqa manachá ima ruwaytapas atirqachu. Israel runakunapa mañakusqankuta uyariptinqa kikinpas, ayllunkunapas hinaspa paypaq llamkaqkunapas manañam tukuy imayuqchu kanmanku karqa. Mana uyariptinñataqmi runakunaqa paypa contranpi hatarinmanku karqa. ¿Imatam Roboamqa ruwarqa? Puntatam Salomonpa consejaqnin yuyayniyuq runakunapa consejonta mañakurqa, chaymantañataqmi wiñaymasin mozokunapa consejonta. Ichaqa mozokunapa nisqanta kasuspanmi Israel runakunata nirqa: ‘Taytayqa sasa llamkaykunapim llamkachisurqankichik, ñuqam ichaqa astawanraq llamkachisqaykichik. Taytayqa azotellawanmi castigasurqankichik, ñuqam ichaqa fierro puntayuq azotewanraq castigasqaykichik’, nispa (2 Cron. 10:6-14).

¿Imatam yachachwan? Diospa llaqtanpi yuyayniyuq runakunapa imapas niwasqanchikta kasukuyqa ancha allin kasqantam. Paykunaqa yuyayniyuqña kasqankuraykum allinta imatapas niwanchik sasachakuypi mana kanapaq (Job 12:12).

Roboamqa Israel runakuna contranpi hatariptinmi tropankunata huñururqa. Jehova Diosñataqmi Semaiaswan nichirqa: ‘Ama riychikchu nitaq Israelpa mirayninkunamanta aylluykichikkunawanpas peleaychikchu, sapakama wasikichikman kutikuychik, kayqa ñuqapa tanteasqaymi’, nispa (1 Rey. 12:21-24). *

Roboamqa Israel runakunatam nirqa “fierro puntayuq azotewanraq” maqananmanta. Ichaqa Jehova Diospa nisqanta kasukuspanqa pinqaypichiki kanman karqa. Chaywanqa, ¡maynataya hukmanyarqa! (Tupachiy 2 Cronicas 13:7). Chaywanpas Roboamqa runankunawan kuskam “Diospa nisqanta kasukuspanku sapakama wasinkuman ripukurqaku”.

¿Imatam yachachwan? Hukkuna asikuwaptinchikpas Jehova Diosta kasukuy ancha allin kasqantam. Chayta ruwaspaqa Jehova Diospa bendecisqanmi hinaspa ancha kuyasqanmi kasunchik (Deut. 28:2).

Chaytam Roboampas ruwarqa, Jehova Diosta kasukuspanmi contranpi kaq Israel runakunawanqa manaña pelearqachu. Aswanqa Juda hinaspa Benjamin ayllukunapa kasqanku lawpim wakin llaqtakunapa pirqanta allichachirqa hinaspa musuq llaqtakunata rikurichirqa (2 Cron. 11:5-12). Chaykunamantapas allinqa karqa qallariypi Jehova Diosta kasukusqanmi. Chunka ayllupi Jeroboampa kamachisqan wakin runakunam ichaqa taytacha-mamachataña yupaychayta qallaykurqaku, chaymi achka Israel runakuna Jerusalenman riqku Jehova Diosta hinalla yupaychanankupaq (2 Cron. 11:16, 17). Diosta kasukusqanraykum achka Israel runakuna Roboampa kamachisqantaqa allinpaq hapirqaku.

Allintaña kamachichkaspanpas Roboamqa qunqayllamantam Jehova Diosta qipanchaspan taytacha-mamachakunataña yupaychayta qallaykurqa. ¿Imanasqa? Ichapas taytacha-mamacha yupaychaq mamanta qatipakusqanrayku, mamanqa Amon nacionniyuqmi karqa (1 Rey. 14:21). Imayna kaptinpas lliw runakunam Roboam hinaña rikurirurqaku. Chaymi Jehova Diosqa mana harkakurqachu Egipto nacionta kamachiq Sisac Juda nacionpi llaqtakunata munaychakunantapas (1 Rey. 14:22-24; 2 Cron. 12:1-4).

Aswan sasachakuyraqmi rikurirurqa Roboampa kasqan Jerusalenkama Sisac chayaruptinqa. Chayna kachkaptinmi Diosmanta willakuq Semaias Roboanmanwan runankunaman nirqa: ‘Saqiruwasqaykichikraykum ñuqapas rey Sisacpa makinpi saqiruykichik’, nispa. Chaynata Semaias niptin ima ruwasqankumantam biblia nin: ‘Hinaptinmi rey Roboamwan Israelpi kamachikuqkuna uchuychakuspanku nirqaku: Allinpunim tayta Diospa kay ruwasqanqa’, nispa. Chaymi Jehova Diosqa wañuymanta Roboamta harkarqa, manataqmi Jerusalen purmachisqa kanantapas saqirqachu (2 Cron. 12:5-7, 12).

Chaymanta qipamanqa hinallam Roboamqa iskay ayllukunata kamachirqa. Manaraq wañukuchkaspanpas churinkunamanmi imakunatapas qurqa, chaytaqa ichapas ruwarqa rantinpi churin Abias kamachiptin contranpi wawqinkuna mana hatarinankuta munaspan (2 Cron. 11:21-23). Chaytaqa yuyaywanmi ruwarqa.

Wakinpi allin kaqta Roboam ruwaptinpas Jehova Diosqa manam kuyarqachu. Chaymi Roboanmanta biblia nin: ‘Mana allinkunatam ruwarqa’, nispa. ¿Imanasqa? Mana tukuy sunqunwan Jehova Diosta kuyasqanraykum (2 Cron. 12:14).

Wakinpi Diosta kasukuspanpas hinaspa allin kaqkunata ruwaspanpas Roboamqa manam tukuy sunquwanchu imatapas ruwaq. Chayraykum mana allinkunata ruwarqa hinaspa taytacha-mamachakunata yupaycharqa. Yuyaymanasun: ¿Sunqumanta wanakusqanraykuchu Roboamqa Jehova Diosta kasukurqa, icha hukkuna niptillanchu? (2 Cron. 11:3, 4; 12:6). Chaymanta qipakunamanqa Roboamqa kaqllam mana allinkunata ruwarqa.  Manam chaynachu abuelon Davidqa karqa. Davidqa llumpay mana allinkunata wakinpi ruwaspanpas Jehova Diostaqa anchatam kuyarqa, payllatamá yupaycharqa, hinaspapas sunqumantam wanakurqa (1 Rey. 14:8; Sal. 51:1, 17; 63:1).

¿Imatam Roboampa ruwasqankuna yuyarichiwachwan? Ayllunchik uywaymantawan ima haypaymantapas Dios yupaychay aswan allin kasqantam, Diosta puntapi churaspallam kuyasqanqa kasun.

Chaypaqqa Jehova Diostam tukuy sunqunchikwan kuyananchik. Imaynam yantata hinasqaqa ninapas hinalla ratan, chaynam Jehova Diosta hinalla kuyanapaqpas bibliata sapa punchaw estudiana, chaypi yuyaymanana hinaspa Diosta mañakuna (Sal. 1:2; Rom. 12:12). Chaynapim Jehova Diosta kuyasqanchikrayku paypa munasqallanta ruwasun. Imapipas pantaruspaqa sunqumantam wanakusun, manam Roboam hinachu kasun. Aswanqa Jehova Diosman sunqum haykapipas takyasun (Jud. 20, 21).