KAY mana allinllaña tiempopiqa sasam hawkalla kawsakuyqa. Wakinpi hawkalla kachkaspapas sasachakuykunawanqa hukmanyanchikmi. ¿Bibliapi ima yachachikuykunataq yanapawachwan hawkalla kawsakunapaq? ¿Imaynatam hukkunatapas yanapachwan hawkalla kawsakunankupaq?

Imaña kaptinpas chiqaptapuni hawkalla kanapaqqa Jehova Dioswanmi kuyachikunanchik, chaymantapas allintam pikunawan hukllawakuyta yachananchik. ¿Imatam Jehova Dioswan kuyachikunapaqqa ruwana?

Bibliapi yachachikuykunatam kasukunanchik. Chayta ruwaspaqa Diospi hapipakusqanchikta hinaspa paywan hawkalla kay munasqanchiktam qawachisun (Jer. 17:7, 8; Sant. 2:22, 23). Hinaptinqa Jehova Diosmi asuykamuwasun hinaspa hawkayayta quwasun. Isaias 32:17 nin: ‘Allinkuna ruwaymi hawkayaytawan, hawka samakuyta hinaspa hawka kawsakuyta, wiña-wiñaypaq apamun’, nispa. Jehova Diosta tukuy sunquwan kasukuspaqa hawkam kasunchik (Is. 48:18, 19).

Haykapipas hawkalla kanapaqqa Jehova Diospa chuya espiritunpas yanapawanchikmi (Hech. 9:31).

Apostol Pablom nirqa “chuya espirituqa” runakunata hawkallata kawsachisqanmanta (Gal. 5:22, 23). Chaymi hawkalla kawsakunapaqqa chuya espiritupa yanapasqan kananchik. Chayna yanapasqa kanapaq imakuna ruwananchikmantayá yachaykusun.

 Puntataqa sapa punchawmi bibliata ñawinchananchik (Sal. 1:2, 3). Hinaspam chaypi yuyaymanananchik, chaynapim chuya espiritu yanapawasun Diospa imayna kasqanta aswan allinta yachanapaq. Yachasunmi Diosqa imakuna karuptinpas hawkalla kananpaq imata ruwasqanmanta hinaspa imanasqa hawkalla kayqa paypaq ancha allin kasqanmantapas. Bibliapa nisqanta kasukuspaqa hawkam kawsakusun (Prov. 3:1, 2).

Chaymantapas Jehova Diostam mañakunanchik chuya espiritunta quwananchikpaq (Luc. 11:13). Diospa yanapakuyninta maskaqkunatam biblia nin: “Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi”, nispa (Filip. 4:6, 7). Chuya espiritunta sapa kuti mañakuptinchikqa Diosqa hawkayaytam quwasun (Rom. 15:13).

Bibliaqa achka runakunatam yanaparqa mana allinkunata saqinankupaq, chaynataq Jehova Dioswan hinaspa hukkunawanpas hawka kanankupaq. Chayna kasqanmantayá yachaykusun.

Kunan tiempopi achka iñiqkunamantam wakinkuqa chaylla piñakuruq karqaku. Kunanmi ichaqa kanku pacienciakuq, hawka, kuyakuq hinaspa sumaq sunqu * (Prov. 29:22). Yachaykusunyá iskay iñiqmasinchikkuna imayna kayninkuta saqispanku hukkunawan hawkalla kawsakunankupaq ima ruwasqankumanta.

Davidmi manaraq testigo kachkaspan hukkunamanta mana allinta rimaq, aylluntapas nanay simiwanmi rimapayaq. Chayna kayninta saqinanmantam huk punchaw musyakururqa. Hinaptinqa, ¿imataq yanaparqa hawkaña kawsakunanpaq?  Paymi nin: “Bibliapa yachachikuyninkunatam kasukuyta qallaykurqani. Chaymantaqa hawkañam aylluywanqa kawsakurqaniku”, nispa.

Rachelñataqmi nin: “Sapa punchaw peleayllapi kawsaq ayllupi wiñasqayraykum ukuypi piñasqa kayniytaqa manaraq qunqayta atinichu”, nispa. Paytaqa, ¿imataq yanaparqa hawkaña kawsakunanpaq? Ninmi: “Jehova Diospa yanapakuynintam haykapipas mañakuni”, nispa.

Paykunapa nisqankum qawachiwanchik bibliapa nisqanta kasukuyqa hinaspa Jehova Diospa yanapakuyninta mañakuyqa hawkalla kanapaq yanapawasqanchikmanta. Arí, tukuy mana allinkunapa chawpinpipas atichwanmi hawka kaytaqa. Atichwantaqmi ayllunchikwan hinaspa iñiqmasinchikkunawan huk sunqulla kawsakuytapas. Diosqa munanmi llapallan runakunawan hawkalla kananchikta (Rom. 12:18). ¿Imaynatam chayna kayta atichwan? ¿Imapaqmi yanapawasun chayna hawkalla kanapaq kallpanchakuyqa?

Runakunamanqa Diospa munaychakuyninmantam willakunchik (Is. 9:6, 7; Mat. 24:14). Chaymi anchata kusikunchik uyarispa kasukuptinkuqa. Chayta ruwaspankuqa tukuy mana allinpa chawpinpi kaspankupas hawkañam kawsakunku. Hinaspapas kusikuywanñam hamuq punchawta suyanku, kasukunkutaqmi hawkayayta maskanankupaq bibliapa kamachisqantapas (Sal. 34:14).

Ichaqa manam lliw runakunachu Diosmanta willakusqanchiktaqa kusikuywan uyarinku, wakinqa qipakunamanñam chayraq uyarinku (Juan 3:19). Chayna kaptinpas Diospa chuya espiritunmi yanapawanchik kuyakuywan paykunawan rimanapaq. Chayta ruwaspam Jesuspa kamachisqanta kasukunchik. Nirqam: “Wasiman yaykuspaykichikqa rimakuykuychikyá. Wasiyuq chaskisuptikichikqa munasqaykichik hawkayayyá paypaq kachun, mana chayqa hawkayaynikichikyá qamkunawan qipakuchun”, nispa (Mat. 10:11-13). Chayta kasukuspaqa kunan mana uyariwaptinchikpas hawkam wasinchikmanqa kutikunchik.

Jehova Dios yupaychaqkunaqa autoridadkunawanpas respetowanmi rimanchik Diospa contranpiña wakin kaptinkupas, chayta ruwaspam hawkayayta maskanchik. Chaynam karqa Africa lawpi autoridadkunawan. Paykunaqa harkakuqkum Diosta yupaychanapaq wasikunata llaqtankupi ruwananchikta. Chaymi Africa lawpi ñawpaqta Diosmanta willakuq huk law nacionmanta kaq iñiqmasinchikta Inglaterra nacionman kacharqaku, chaynapi Inglaterrapi kaq Africa lawmanta autoridadwan rimananpaq.

Iñiqmasinchikmi nirqa: “Chaskiq warmita rikuruspaymi imayna pachasqa kasqanwan musyarurqani Africa lawmanta kasqanta hinaspa rimaynintapas yachasqaymanta. Chaymi rimayninpi rimakuykuptiy allinta qawaykuwaspan tapuwarqa imapaq chaypi kasqaymanta. Ñuqañataqmi respetowan nirqani Africa lawmanta autoridadwan rimaykuy munasqayta. Chaynapim telefonowan qayaykuptin chay autoridadqa lluqsiramuspan rimayninpi rimaykuwarqa, hinaspam Jehova Diospa testigonkunamanta willasqayta sumaqta uyarirqa”, nispa.

Chayna respetowan iñiqmasinchikpa rimasqanwanmi chay autoridadqa Jehova Diospa testigonkunata allinpaqña hapirqa. Chaymantaqa manañam Africa lawpi kaq autoridadkunaqa harkakurqakuñachu huñunakuna wasita ruwananchiktaqa. ¡Anchatam iñiqmasinchikkunaqa kusikurqaku! Chaymi autoridadkunawanpas respetowan rimayqa ancha allin, chayqa hawka kawsakunapaqmi yanapawasun.

Kunanqa bibliamanta yachasqanchikkunawanmi Jehova Dios yupaychaqkunaqa kusisqa hawkayaypi kawsakunchik. Chaytayá aswan sutillata qawachisun imapipas hawkayayta maskaspanchik. Jehova Diosmi bendeciwasun, hamuq punchawkunapipas wiñaypaqmi hawka kawsakusun (2 Ped. 3:13, 14).