1, 2. (1) ¿Imatam wakin tayta-mamakuna tapukunku warmanku bautizakuyta munaptinku? (2) ¿Imanasqam bautizakuyta munaqkunata tapunku sichu Jehova Diosta yupaychanankupaq tanteakusqankumanta? (Qaway kay paginapi fotota).

MARIA sutiyuq warmacham hatun huñunakuypi bautizakuyta munaqkunawan kuska sayarqa. Tayta-mamanñataqmi kusisqa qawarqaku iskay tapukuykunata “arí” niptin. Chaymantam sipaschaqa bautizakururqa.

² Tayta-mamanqa kusisqam tarikurqaku warmanku Jehova Diosllapaqña kawsananpaq tanteakuruspa bautizakusqanmanta. Ichaqa manaraq bautizakuchkaptinmi mamanqa kaynata tapukurqa: “¿Warmallaraqchu kachkan bautizakunanpaq? ¿Entiendenchu bautizakuyqa mana pukllay hinalla kasqanta? ¿Suyachaykunmanraqchu bautizakunanpaq?”, nispa. Achka tayta-mamakunam  chaynata tapukunku warmanku bautizakuyta munaptinku (Ecl. 5:5). Chayna tapukuyninkuqa allinmi, Jehova Diosta yupaychanapaq tanteakuspa bautizakuyqa mana pukllay hinalla kasqanrayku (qaway “¿Tanteakurunkiñachu Jehova Diosllapaqña kawsakunaykipaq?” niq yachachikuyta).

3, 4. (1) ¿Imawanmi Pedroqa bautizakuyta tupachirqa? (2) ¿Imanasqam bautizakuyta Pedro tupachin Noeypa buque ruwasqanwan?

³ Apostol Pedrom bautizakuyta tupachirqa Noeypa buque ruwasqanwan, hinaspam nirqa: “Chayna pasakusqanmi rikchakun bautizakuyman, [...] bautizakuspaykichikmi salvasqa kachkankichik”, nispa (qaway 1 Pedro 3:20, 21). Chay buqueqa sutillatam runakunaman qawachirqa Noeyqa Diospa munayninta ruwasqanta. Noeyqa Diospi iñispanmi kamachisqanta ruwarqa. Chayta ruwasqanraykum payqa hinaspa ayllunpas sinchi parapi mana wañurqakuchu. ¿Imatam Pedroqa kaywan yachachiyta munarqa?

⁴ Buqueta qawaspankum runakunaqa Noey Diospi iñisqanta yacharqaku. Chaynallataqmi pipapas bautizakusqanta runakuna qawaspankuqa, yachanku Jesuspa qatiqnin kasqanta hinaspa Jesuspa wañukusqanpi iñisqanrayku Jehova Diosta yupaychananpaq tanteakurusqantapas. Noey hinam, bautizakuqkunaqa Diospa kamachisqanta kasukunku. Jehova Diosqa Noeytam salvaykurqa sinchi para chayamuptin. Chaynallataqmi Diosqa payman sunqu bautizakuqkunata salvanqa piñakuynin punchawpi  (Mar. 13:10; Apoc. 7:9, 10). Chaynaqa, ancha allinmi Jehova Diosta yupaychanapaq tanteakuspa bautizakuyqa. Pipas bautizakuyta mana munaspanqa manam wiñay kawsaytaqa chaskinqachu.

5. ¿Imamantam kay yachachikuypi yachasunchik?

⁵ Bautizakuyqa manam pukllay hinallachu, chaymi kay tapukuykunamanta yachananchik: ¿Imatam biblia yachachin bautizakuymanta? ¿Imakunatam ruwana manaraq bautizakuchkaspa? Hinaspa pimanpas utaq churi-wawanchikmanpas bibliamanta yachachispaqa, ¿imanasqam yuyarinanchik bautizakuyqa ancha allin kasqanta?

6, 7. (1) ¿Imapaqtaq Juanwan bautizachikuqku? (2) ¿Imanasqam Jesusqa bautizakurqa?

⁶ Bibliapi bautizakuymanta rimaspanqa puntatam bautizaq Juanmanta riman (Mat. 3:1-6). Bautizachikunankupaq Juanman riqkunaqa huchankumanta wanakusqankutam qawachiqku, chay runakunaqa Moisespa kamachikuyninta mana kasukuspankum sunqumanta wanakurqaku. Ichaqa manam paykunallatachu Juanqa bautizarqa, aswanqa Diospa churin Jesustapas bautizarqam (Mat. 3:13-17). Jesusqa mana pantaqmi karqa, chaymi mana imamantapas wanakunanchu karqa (1 Ped. 2:22). Chaynaqa, ¿imanasqataq Jesusqa bautizakurqa? Diospa munayninta ruwananpaq listo kasqanta qawachinanpaqmi (Heb. 10:7).

⁷ Diosmanta willakuyta Jesus qallaykusqan qipatam, qatiqninkunapas huk runakunata bautizarqaku (Juan 3:22; 4:1, 2). ¿Imapaqtaq bautizakusqankuqa yanaparqa? Juanpa bautizasqan runakuna hina huchankumanta wanakusqankuta qawachinankupaqmi. Ichaqa Jesuspa wañukusqan hinaspa kawsarimusqan qipataqa manam chaynañachu karqa.

8. (1) ¿Imatam Jesusqa qatiqninkunaman kamachirqa? (2) ¿Imanasqataq Jesuspa qatiqnin kayta munaqkunaqa bautizakunanku?

⁸ Jesusmi kawsariramuspan 33 kaq watapi pichqa pachak masnin qarikunaman, warmikunaman hinaspa yaqachusmi warmachakunamanpas rikuriykurqa. Chaypichusmi kaynata kamachirqa: “Chaynaqa llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik hanaq pacha taytapa, churinpa hinaspa chuya espiritupa sutinpi. Yachachimuychikyá tukuy ima kamachisqaykunata kasukunankupaq”, nispa (Mat. 28:19, 20; 1 Cor. 15:6). Jesusqa yaqachusmi chaypi qatiqninkunata kamachirqa runakunaman yachachimunankupaq. Chaymantapas nirqam pipas qatiqnin kayta munaspanqa bautizakunanmanta (Mat. 11:29, 30). Pipas Diospa munasqanman hina yupaychayta munaspanqa, riqsikunanmi karqa munayninta ruwananpaq Jesusta Dios servichikusqanmanta. Chayta ruwaspanqa bautizakunmanñam karqa. Chayta ruwaspa bautizakuqkunallatam Diosqa chaskin. Bibliaqa sutillatam qawachin Jesuspa qatiqninkuna imapaq  bautizakusqankuta allinta entiendesqankuta. Manam piensarqakuchu suyaspanku qipa punchawkunataña bautizakunankumantaqa (Hech. 2:41; 9:18; 16:14, 15, 32, 33).

9, 10. ¿Imatam yachanchik Etiopia nacionniyuq runapa hinaspa apostol Pablopa bautizakusqankumanta?

⁹ (Qaway Hechos 8:35, 36). Rimarisun Etiopia nacionniyuq runamanta, paymi Jerusalen llaqtapi Diosta yupaychasqanmanta llaqtanman kutichkarqa. Hinaptinmi, Diospa angelninqa Felipeta kamachirqa Jesusmanta sumaq willakuyta chay runaman willakunanpaq. ¿Imatam Etiopia nacionniyuq runaqa ruwarqa? Jesuspa qatiqnin kananmanta yacharuspan hinaspa Diospa munayninta ruwayta munaspanmi chaylla bautizakuyta munarqa.

¹⁰ Kunanñataq rimarisun Saulo runamanta. Payqa judiom karqa, judiokunaqa ñawpaqtam Diospa akllasqan runakuna karqaku, ichaqa mana kasukusqankuraykum Jehova Diosqa paykunata qipancharurqa. Sauloqa piensarqam judiokunaqa hinalla Diospa chaskisqan runakuna kasqankumanta, chaymi Jesuspa qatiqninkunata qatikacharqa. Ichaqa huk punchawmi Jesus hanaq pachamanta rimapayarqa. ¿Imatam Sauloqa chaymanta ruwarqa? Jesuspa qatiqnin Ananiaswanmi yanapachikurqa, hinaspam “bautizachikurqa” (Hech. 9:17, 18; Gal. 1:14). Chaymanta qipatam paytaqa riqsirqaku apostol Pablowan. Sauloqa Jehova Dios munayninta ruwananpaq Jesus akllasqa kasqanta yacharuspanmi chaylla bautizakururqa (qaway Hechos 22:12-16).

11. (1) ¿Imanasqataq biblia estudiaqkunaqa bautizakuyta munanku? (2) ¿Imaynam tarikunchik Diosllapaqña kawsakuyta munaspanku bautizakusqankuta qawaspanchik?

¹¹ Kay punchawkunapas biblia estudiaqkunam mozo kaq utaq yuyaq kaqpas, bibliapa yachachikuyninkunata kuyasqankurayku hinaspa iñiyniyuq kasqankurayku Diosllapaqña kawsakuyta munaspanku bautizakuyta munanku. Chaymi hatun huñunakuykunapiqa bautizakuqkunapaq sumaq yachachikuy kan. Jehova Diospa testigonkunaqa ancha kusisqam tarikunchik estudiachisqanchik runa Diospaq kawsakuyta munaspan bautizakuptinkuqa. Tayta-mamakunapas ancha kusisqam tarikunku churi-wawanku bautizakuptinku. 2017 watapim Diospaqña kawsakuyta munasqankurayku 284.000 runakuna bautizakurqaku (Hech. 13:48). Paykunaqa yacharqakum Diosta yupaychanankupaqqa bautizakunankumanta. Ichaqa, ¿imatam ruwananku karqa bautizakunankupaq?

12. ¿Imakunatam biblia estudiaqkunaqa ruwananku bautizakunankupaq?

¹² Biblia estudiaqkuna bautizakunankupaqqa yachanankum: Diosmanta imam kaqta, runakunapaq hinaspa kay pachapaq Diospa munaynin ima kasqanta, hinaspa huchanchikkunamanta librawananchikpaq Dios ima ruwasqanmantapas (1 Tim. 2:3-6).  Chaykunata yachaymi yanapanqa allin iñiyniyuq kanankupaq, allin iñiyniyuq kasqankuñataqmi yanapanqa Diospa kamachikuyninkunata kasukunankupaq hinaspa mana allinkunata manaña ruwanankupaqpas (Hech. 3:19). Mana allinkunata hinalla ruwaptinkuqa manam Jehova Diosqa chaskinqachu (1 Cor. 6:9, 10). Chaymantapas bautizakuy munaqkunaqa huñunakuykunamanmi rinanku, wasin-wasinmi Diosmanta willakunanku hinaspa runakunaman Diosmanta yachachinanku. Jesusqa nirqam qatiqninkuna chayta ruwanankumanta (Hech. 1:8). Biblia estudiaqkunaqa tukuy kaykunata ruwaruspankuñam Diosllapaqña kawsanankupaq tanteakusqankuta sapallankupi Jehova Diosta ninanku, hinaspam bautizakunmanku.

13. Bibliamanta yachachispanchikqa, ¿imanasqataq yuyarinanchik pipas Jesuspa qatiqnin kayta munaspanqa bautizakunanmanta?

¹³ Churi-wawakunata hinaspa bibliamanta yachachisqanchik runakunata hinalla Diosta riqsinankupaq yanapaspaqa, yuyarinanchikmi Jesuspa qatiqnin kayta munaspanqa bautizakunankumanta. Chayna kaptinqa sapa kutim rimapayasun Diosllapaqña kawsananpaq tanteakuyqa hinaspa bautizakuyqa ancha allin kasqanta. Llapallanchikmi munanchik kallpanchakuspanku chayta ruwanankuta.

14. ¿Imanasqataq pitapas mana hikutanchikchu bautizakunanpaq?

¹⁴ Biblia estudiaqtaqa manam pipas hikutananchu bautizakunanpaqqa,  tayta-mamanña utaq yachachiqninña kaspanpas nitaq huk kaqnin iñiqmasinchikpas. Manam kikin Jehova Diospas chaytaqa ruwanchu (1 Juan 4:8). Bautizakunanpaq hikutanamantaqa, bibliamanta yachachispam kallpanchana Dioswan kuyachikunanpaq. Bibliamanta hinaspa Diosmanta imam kaqta yachasqanmi hinaspa Jesusta qatipakuy munasqanmi kallpanchanan bautizakunanpaq (2 Cor. 5:14, 15).

15, 16. (1) ¿Hayka watanpitaq pipas bautizakunman? (2) Biblia estudiaq huk religionpi bautizasqaña kaspanpas, ¿imanasqataq Jehova Diospa testigon kananpaq bautizakunan?

¹⁵ ¿Hayka watanpitaq pipas bautizakunman? Manam nichwanchu hayka watanpi pipas bautizakunanmantaqa, runakuna mana chaynalla kasqanchikrayku. Achkam mozo-sipas kaspanku bautizakunku, chaywanpas hinallam Diosman sunqu kanku. Wakinñataqmi yuyaqña kaspanku Diosmanta imam kaqta yacharuspanku bautizakunku, wakinkuqa 100 masnin watankupiñam bautizakunku.

¹⁶ Huk warmim 80 watanpi kachkaspan bibliamanta yachayta qallaykurqa, ichaqa payqa ñawpaqtam achka religionkunapi bautizakurqa. Chaymi yachachiqninta tapurqa: “¿Huktawanchu bautizakunay?”, nispa. Yachachiqninñataqmi bibliapa ima nisqanta qawachirqa. Bautizakuymanta bibliapa ima nisqanta yacharuspanmi chay warmiqa bautizakururqa. ¿Imatam kaymanta yachanchik? Munaynin ima kasqanta allinta yachaptillanchikmi Jehova Diosqa bautizakusqanchikta chaskinqa. Ñawpaqpi huk religionpi bautizasqa kaspapas Jehova Diospa testigon kananchikpaqmi bautizakunanchik, ñawpaqpi bibliamanta mana imam kaq yachasqanchikrayku (qaway Hechos 19:3-5).

17. ¿Imapim pipas yuyaymananam bautizakusqan punchawpiqa?

¹⁷ Pipapas bautizakusqan punchawqa ancha kusikunapaqmi. Ichaqa yuyaymananantaqmi Diosllapaqña kawsakunanpaq tanteakusqanpi hinaspa tanteakusqanman hina imata ruwananmantapas. Jesusta qatiqkunaqa ‘manañam kikillanchikpaqñachu kawsanchik aswanqa wañupuwaqninchik’ Jesuspaqñam kawsanchik (2 Cor. 5:15; Mat. 16:24).

18. ¿Imakunamantam yachachkasun qatiqnin yachachikuypi?

¹⁸ Kay yachachikuypim yacharunchik chiqaptapuni Jesusta qatikuyqa mana pukllay hinalla kasqanmanta. Chayraykum Mariapa mamanqa qallariypi yachamusqanchikman hina tapukuykunata ruwakurqa. Churiyuq utaq wawayuq kaspaykiqa yaqapaschá tapukurqanki: “¿Ñachu churiy utaq waway bautizakunmanña? ¿Allintañachu bibliamanta hinaspa Diosmanta yacharun chaynapi bautizakusqanta Dios chaskinanpaq? ¿Allin educacionniyuqraqchu utaq allin llamkaytaraqchu tarinan bautizakunanpaq? ¿Bautizakusqan qipata huchallikuruptinqa?”, nispa. Kaykunamantam qatiqnin yachachikuypi yachachkasun. Chaymantapas yachachkasunmi bautizakuyta tayta-mamakuna imaynata qawanankumanta.