Jesusqa hanaq pachapi kachkaspanmi taytanmanta yacharqa hukkunata yanapay ancha allin kasqanta. Chaymi payqa kay allpa pachapi kaspanpas yanapaqninkunapa qatipakunankupaq karqa. ¿Imatam ñuqanchikpas Jesusmanta yachachwan? Kaypim yachasun iñiqmasinchikkunawan yanapanakunapaq hinaspa huk sunqulla kanapaq imakuna yanapawananchikmanta.

Hukkunata yanapaq runaqa humildem, llamkaqmasinkunatam respetan hinaspapas mana hatun tukuqmi. Jesuspas taytan chayna kasqantam qawarqa. Jehova Dioslla tukuy imata unanchaq kasqanta biblia niptinpas churin yanapasqantam riqsikurqa. Chayna kasqantam kikinpa nisqanwan yachanchik. Diosmi nirqa: ‘Runata ruwasun ñuqanchikman rikchakuqta’, nispa (Gen. 1:26). Chayna nisqanwanmi Jesusqa yacharqa taytan mana hatun tukuq kasqanta (Sal. 18:35).

Kay pachapi kaspanpas Jesusqa humildem karqa. Runakuna alabaptinkupas taytan Jehova Diosta alabanankupaqmi nirqa (Mar. 10:17, 18; Juan 7:15, 16). Chaymantapas, Jesusqa qatiqninkunawan huk sunqulla kananpaqmi kallpanchakurqa. Qatiqninkunaqa karqa amistadninkunam manam sirvientenkunachu (Juan 15:15). Humilde kanankupaq yachachispanmi chakinkutapas mayllarqa (Juan 13:5, 12-14). Jesus hinam  ñuqanchikpas iñiqmasinchikkunawan huk sunqulla kananchikpaq kallpanchakunanchik. Piwanpas respetanakuptinchikqa hinaspa mana hatun tukuptinchikqa ima ruwasqanchikpas allinmi lluqsinqa (Rom. 12:10).

Humilde runaqa yachantaqmi ‘achka consejaqkunapa’ yanapakuyninwan imapas qispisqanta (Prov. 15:22). Amayá qunqasunchu: Imataña ruwaspanchikpas utaq imataña yachaspanchikpas manam lliwtaqa yachachwanchu. Jesuspas mana lliwta yachasqantam riqsikurqa (Mat. 24:36). Chaymantapas, qatiqninkunapa ima rimarisqankutam uyariykuyta munaq pantaq kachkaptinkupas (Mat. 16:13-16). Chaymi qatiqninkunaqa paywan kayta munarqaku. Chaynam ñuqanchikpas humilde kaspanchikqa, mana lliw yachasqanchikta riqsikuspanchikqa hinaspa hukkunapa ima rimarisqankuta uyarispanchikqa llapanwan hawkalla kawsakusun. Allintaqmi qispinqa ima ruwasqanchikpas.

Iñiqkunapi punta apaqkunaqa astawanraqmi Jesusta qatipakuspanku humilde kananku punta apaqmasinkuwan imatapas ruwaspankuqa. Yuyarinankutaqmi mayqan punta apaqtapas chuya espiritunwan Jehova Dios yanapaykuptin imatapas allinta tantianankuta. Huñunakusqankupi punta apaqkuna hawkalla kaptinkuqa imapas tantiasqankuqa lliw iñiqmasinkupa allinninpaqmi kanqa.

Hukkunawan llamkaq allin runaqa pitapas entiendeqmi, chayraykum mana kikillanpaq munaqchu. Jesuspas taytan chayna kasqantam qawarqa. Chaytam yachanchik llapanchikrayku wañunanpaq churin Jesusta kachamusqanwan (Juan 3:16).

Jesuspas entiendeq runam karqa. Jehova Diosqa paytaqa kachamurqa Israel runakunallata yanapananpaqmi. Chaywanpas Jesusqa Fenicia lawmanta warmitam yanapaykurqa (Mat. 15:22-28). Chaymantapas, payqa manam qatiqninkunataqa hikutarqachu mana ruway atisqanku ruwanankupaqqa. Apostol Pedrotapas pampachaykurqam achka runakunapa qayllanpi negachkaptinpas. Hinaspapas chaymanta qipatam nirqa iñiqmasinkunamanta nanachikunanpaq (Luc. 22:32; Juan 21:17; Hech. 2:14; 8:14-17; 10:44, 45). Jesuspa imayna kasqanwanmi yachanchik mana kikillanchikpaq munaq kananchikta, chaynapi entiendeq runa  kasqanchikta llapallanku yachanankupaq (Filip. 4:5).

Entiendeq runa kaspanchikqa lliw runamasinchikkunawantaqmi hawkalla llamkasun. Lliw runakunawan allinlla kasqanraykum Jesustapas chiqniqninkuna nirqaku: “Impuesto mañaqkunapa hinaspa huchasapakunapa amistadnin”, nispanku (Mat. 11:19). Jesusta qatipakuspanchikmi ñuqanchikpas lliw runakunawan hawkalla llamkananchik. Louismi iñiqmasinchikkunata watukuq, betelpi yanapakuq hinaspa huklaw llaqtayuq iñiqmasinchikkunawan llamkaq. Paymi nin: “Sapa grupo iñiqmasinchikkunam hatunwan-uchuywan ruwasqa rumimanta pirqa hina kanku. Chayna rumikunata allinta tiyachiptinchikqa allin pirqam lluqsinqa. Ñuqapas hukkunawan allin kanaypaqmi kallpanchakurqani, chaynapi imapas ruwasqayku allin lluqsinanpaq”, nispa. Chayna ruwasqanqa ancha allinmi karqa.

¿Imaynatam iñiqmasinchikkunawan entiendeq runa kachwan? Yaqapaschá Diosmanta willakuqmasinchikkunaqa kanku sullkanchikpas, mayorninchikpas utaq familiayuqpas. Paykunawan Diosmanta willakuspaqa, ¿yaqachu paykunapa atisqankuman hinalla willakuchwan?

Allin runakunaqa ‘sunqumanta qukuykuqllañam’ utaq ima yachasqankutapas yachaykachikuqllañam kanku (1 Tim. 6:18). Jesusqa taytanwan llamkaspanqa cuentatam qukurqa taytanqa mana kikillanpaq munaq kasqanta. Jehova Dios cielokunata unanchaptinqa Jesusqa chaypim karqa, hinaspanmi taytanmanta tukuy imata yacharqa (Prov. 8:27). Kay allpa pachapi kaspanpas Jesusqa taytanmanta tukuy ima uyarisqankunatam qatiqninkunaman yachachirqa (Juan 15:15). Ñuqanchikpas Jehova Diosta qatipakuspam imapas yachasqanchikkunata iñiqmasinchikkunaman yachachinanchik. Chaynaqa, pipapas allin llamkaqmasinqa manam imatapas kikillanpaq munaqchu, aswanqa hukkunaman yachaykachiyta munaqmi.

Iñiqmasinchikkunata kallpanchaspanchikpas mana kikillanchikpaq munaq kasqanchiktam qawachichkanchik. Llapallanchikmi kusikunchik imapas ruwasqanchikmanta pipas kallpanchaykuwaptinchikqa. Chaynam Jesuspas tiempochakurqa allin ruwasqankumanta qatiqninkunata kallpanchananpaq (tupachiy Mateo 25:19-23; Luc. 10:17-20 nisqanwan). Nirqataqmi paypa ruwasqanmantapas aswan mastaraq ruwanankumanta (Juan 14:12). Wañukunanpaq huk tutallaña faltachkaptinpas apostolninkunatam kaynata kallpancharqa: “Qamkunam sasachakuykunapi kaptiypas tukuy tiempo ñuqawan karqankichik”, nispa (Luc. 22:28). Chayna nisqanwanqa apostolninkunaqa ancha kallpanchasqachá tarikurqaku. Ñuqanchikpas iñiqmasinchikkunata kallpanchaptinchikqa aswan kusisqam kanqaku, hinaspapas astawanmi allin kaqkunata ruwanqaku.

Kayode sutiyuq iñiqmasinchikmi nin: “Manam mana pantaqraqchu kanayki pipapas llamkaqmasin kanaykipaqqa. Atiwaqmi hukkunata kusirichiytaqa hinaspa hawkalla llamkanankupaq yanapaytaqa”, nispa. ¿Qampas chayna runachu kanki? Chaypaqqa huk iñiqmasinchikkunatam tapuwaq sichu pipapas allin llamkaqmasin kasqaykita yachanaykipaq. Jesuspa apostolninkunam paywan kaspanku hawka hinaspa kusisqa tarikuqku. ¿Chaynachu llamkaqmasikikunapas qanwan kaspa tarikunku? Chayna kaptinqa apostol Pablo hinam niwaq, paymi nirqa: “Kusisqa kanaykichikpaq yanapakuqllam [kaniku]”, nispa (2 Cor. 1:24).