14 KAQ YACHACHIKUY
Jehova Diosmanta allinta willakunapaqyá kallpanchakusun
“Sumaq willakuymanta willakuy hinaspa Diospa kamachisusqayki llamkayta allintapuni ruway” (2 TIM. 4:5).
57 KAQ TAKI Llapankumanyá Diosmanta willakusun
¿IMAMANTAM YACHASUNCHIK? *
Kawsariramusqan qipatam Jesusqa qatiqninkunawan huñunakurqa, hinaspam paykunata kamachirqa runakunaman paymanta yachachimunankupaq (qaway 14 kaq yachachikuypa 1 kaq parrafonta).
1. ¿Imatam Diosta yupaychaqkunaqa ruwayta munanchik, hinaspa imanasqa? (Qaway qaranpi kaq dibujota).
JESUSMI qatiqninkunata kamachirqa kaynata nispan: “Llapallan nacionpi runakunaman rispayá yachachimuychik qatiqniykunaña kanankupaq”, nispa (Mat. 28:19). Diosta yupaychaqkunaqa Jesuspa chayna nisqantam allintapuni ruwayta munanchik (2 Tim. 4:5). ¿Imanasqa? Imakunamantapas ancha allin kasqanraykum hinaspapas chaylla willakuna kasqanraykum. Chayna kaptinpas wakinpiqa sasachakuchwanmi Diosmanta astawan willakunanchikpaq.
2. ¿Imakunam sasachawachwan Diosmanta astawan willakunapaq?
2 Ayllunchikpaq llamkasqanchikrayku utaq yuyaqña kaq ayllunchikta yanapasqanchikraykum, manaña tiempoyuq hinaspa mana kallpayuq hina tarikuchwan. Chaynaqa tarikuchwantaqmi unqusqanchikrayku utaq yuyaqña kasqanchikrayku. ¿Imatam ruwachwan ima sasachakuypi tarikuspapas Diosmanta astawan willakunanchikpaq?
3. Mateo 13:23 nisqanman hinaqa, ¿Jesusqa imatam nirqa?
3 Wakiqninchikqa sasachakuyniyuq kasqanchikraykum mana anchatachu Diosmanta willakunchik. Chayna tarikuspaqa amayá hukmanyarusunchu. Jesusqa nirqam Diosmanta willakuyta mana chaynallata llapanchik atinanchikmanta (qaway Mateo 13:23). Taytanchik Jehova Diosqa manam qunqanqachu tukuy sunqunchikwan paymanta willakusqanchiktaqa (Heb. 6:10-12). Ichapas wakinpiqa musyakunchik Diospaq astawan llamkay atinanchikmanta. Chayraykum kunan yachasun imata ruwaspa Diosmanta willakuyta puntapi churanamanta, kapuqllanchikwan kawsakunamanta, imaynata Diosmanta allin willakuq kanamanta hinaspa allin yachachiq kanamanta. Chaykunamanta manaraq yachachkaspa puntata yachaykusun Diosmanta willakuyta puntapi churay ima ninan kasqanmanta.
4. ¿Ima ninantaq Diosmanta willakuyta puntapi churayqa?
4 ¿Ima ninantaq Diosmanta willakuyta puntapi churayqa? Paymanta willakunapaq hinaspa runakunaman yachachinapaq tukuyta ruwaymi. Jehova Diosqa manam hayka tiempo paymanta willakusqallanchiktachu qawachkan, aswanqa imanasqa chayta ruwasqanchiktam. Jehova Diostawan runamasinchikta kuyasqanchikrayku willakuspaqa kallpanchakusunmi tukuy sunqumanta Diospaq llamkananchikpaq * (Mar. 12:30, 31; Col. 3:23). Chaypaqqa allintam kallpanchakunanchik. Chaymantapas sichum Diosmanta willakuyta chaninchaspanchikqa tukuytachá ruwasun llapallan runakunaman Diosmanta willakunanchikpaq.
5, 6. Tukuy ima ruwayniyuq kaspanchikpas, ¿imaynatataq Diosmanta willakuyninchikta puntapi churachwan? Huk rikchanachiywan willarimuy.
5 Rimarisun guitarranta waqachiy munaq musumanta. Tiempon kaptinqa guitarrantam waqachichkan. Payqa sabadonkunapi hinaspa domingonkunapim guitarranta waqachispan llamkan. Ichaqa qullqichan mana haypasqanraykum lunesmanta vierneskama tiendapi llamkan. Chay tiendapi sapa punchaw llamkaspanpas aswan kusisqaqa tarikun guitarranta waqachispanmi. Payqa munantaqmi guitarranta suma-sumaqta waqachiyta hinaspa chaypi hichu-hichu kaytapas. Chaymi tiempochan kaptinqa anchata kallpanchakun guitarranta suma-sumaqta waqachinanpaq.
6 Yaqa chaynam ñuqanchikwanpas pasan. Wakiqninchikqa manam tukuy tiemponchikwan Diosmanta willakuytaqa atinchikchu, ichaqa Diosmanta willakuyta munasqanchikraykum, kallpanchakunchik llapallan runakunaman yachachinanchikpaq. Tukuy ima ruwayninchikwan sasachakusqanchikraykum wakiqninpiqa kaynata tapukuchwan: “¿Imaynatataq Diosmanta willakuyta puntapi churayman?”, nispa.
¿IMAYNATAM DIOSMANTA WILLAKUYNINCHIKTA PUNTAPI CHURACHWAN?
7, 8. ¿Imaynatam Jesusta qatipakuchwan?
7 Chaypaqqa Jesusmi qatipakunapaq hina. Payqa imamantapas puntapim churarqa Diosmanta willakuyta (Juan 4:34, 35). Karullay-karutataqmi rirqa achka runakunaman Diosmanta willakunanpaq. Payqa haykam tupasqan runakunamanmi Diosmanta willarqa maypiña tarikuptinkupas. Wañukunankamam taytanmanta willakurqa.
8 Jesustam qatipakuchwan maypiñapas llapallan runaman Diosmanta willakuspa. Hinaspapas kapuqllanchikwan kawsakuytam munanchik astawan Diosmanta willakunapaq (Mar. 6:31-34; 1 Ped. 2:21). Wakiqninchikqa yaqapaschá Diosmanta willakuchwan 130 horata, wakiqninchikñataq 70 utaq 50 horata. Wakiqninchikqa huk rimayta yacharuspanchikmi huk law llaqtachakunaman astakurqanchik chaypi astawan Diosmanta willakunanchikpaq. Wakin iñiqmasinchikkunapas anchatam kallpanchakunku atisqankuman hina Diosmanta willakunankupaq. Jehova Diosqa manam mañawanchikchu mana atisqanchiktaqa. Payqa munanmi kusikuywan ‘kusikuq Diosmanta willakunanchikta’ (1 Tim. 1:11; Deut. 30:11).
9. (1) ¿Llamkachkaspanpas Pabloqa imaynatam Diosmanta willakuyninta puntapi churarqa? (2) Hechos 28:16, 30, 31, ¿imatam willawanchik Pablomanta?
9 Apostol Pablopas qatipakunapaqmi. Iskay kaq illayninpi Corinto llaqtapi tarikuchkaspanmi, llamkapakurqa carpakunata ruwaypi qullqichan pisirusqanrayku. Llamkapakurqaqa pisipuqnin kaqkunata rantichakuykunanpaqmi, chaynapi Corinto llaqtapi willasqan runakunamanta imatapas mana mañakunanpaq (2 Cor. 11:7). Payqa llamkanan kachkaptinpas puntapim churarqa Diosmanta willakuyninta. Chaymi sapa sabado Diosmanta willakuq. Chaymanta qipaman qullqichayuqña kaspanqa astawanmi Diosmanta willakurqa. ‘Pabloqa mana samaykuspam Diospa palabranta yachachiyllapiña karqa, judiokunaman willakuspanmi qawachirqa Jesusqa Cristo kasqanta’ (Hech. 18:3-5; 2 Cor. 11:9). Chaymantapas Roma nacionpi arriendasqan wasipi iskay watantin preso kaspanmi, watukuqninkunaman willakurqa hinaspa cartakunatapas qillqarqa (qaway Hechos 28:16, 30, 31). Payqa manam harkachikurqachu imawanpas, chaymi qillqarqa: “Diosmi llakipayawaspanku kay ruwayta quwarqaku, chaymi qipamanqa mana kutinikuchu”, nispa (2 Cor. 4:1). Chaynaqa, Pablo hinam ñuqanchikpas Diosmanta willakuyninchikta ima ruwayninchikmantapas puntapi churananchik.
Diosmanta astawan willakunapaqqa tukuytam ruwachwan. (Qaway 10, 11 kaq parrafokunata).
10, 11. ¿Imaynatam Diosmanta willakuyta atichwan unquqña kaspapas?
10 ¿Imatam ruwachwan yuyaqyasqaña hinaspa unquq kaspaqa? Chayna tarikuspanchikpas atichwanmi Diosmanta willakuytaqa. Ñawpaq tiempopi iñiqkunapas haykam tarisqanku runamanmi willakurqaku. Maypiñapas willakuqkum runata tarispankuqa, wasin-wasin rispa, plazakunapi utaq maypipas runawan tupaspaqa (Hech. 17:17; 20:20). Mana puriy atiqña kaspaqa, ¿imatam ruwachwan? Tiyaykuspam willakuchwan ñawpaqninchikta utaq waqtanchikta pasaq runakunaman. Willakuchwantaqmi telefonowan, cartawan utaq imaynatapas atisqanchikman hina. Achka unquq iñiqmasinchikkunam ancha kusisqa tarikunku chaynata willakuspanku.
11 Chaynaqa, willakuytaqa atichwanmi unquqña kaspapas. Kaqmanta yuyarisun apostol Pablota. Paymi nirqa: “Dios kallpata quwaptinmi tukuy imata ruwanaypaq kallpayuq kani”, nispa (Filip. 4:13). Illasqanpi unquruptinqa Dioschá kallpata qurqa. Chayraykuchá Galacia llaqtayuqkunata kaynata nirqa: “Qamkunaqa yachankichikmi unqusqayrayku sumaq willakuymanta punta kutipi qamkunaman willasqayta”, nispa (Gal. 4:13). Yaqa chaynam ñuqanchikpas unquruspaqa Diosmanta willakuyta atichwan hospitalpi hampiqninchik runakunaman. Paykunataqa yaqa llapankutam wasinkupiqa mana tarinchikchu llamkasqankurayku.
KAPUQLLANCHIKWAN KAWSAKUSUN
12. “Ñawiki huk hawaqllata qawaptinqa, enteron cuerpoykim kancharinqa” nisqanwanqa, ¿ima niytataq Jesusqa munachkarqa?
12 Jesusmi nirqa: “Cuerpopa achkiyninqa ñawim. Chaymi ñawiki huk hawaqllata qawaptinqa, enteron cuerpoyki kancharinqa”, nispa (Mat. 6:22). ¿Ima nichkarqataq kaywanqa? Kapuqllanchikwan kawsakunapaqmi nichkarqa, huk rimaypiqa, Diosmanta willakuyninchikta imamantapas puntapi churanamantam rimachkarqa. Jesusmi chayta ruwarqa imamantapas kikin hinaspa qatiqninkunamanpas Diosmanta willakuyta puntapi churanankupaq yachachispan. Jesustam ñuqanchikpas qatipakuchkanchik kawsakuyninchikpi ‘puntata Diospa munaychakuynintawan paypa munasqan allin ruwayta maskaspaqa’ (Mat. 6:33).
13. ¿Imataq yanapawasun Diosmanta willakuyninchikta puntapi churananchikpaq?
13 Diosmanta willakuyninchikta imamantapas puntapi churanapaqqa kapuqllanchikwanmi kawsakuna, chaynapi aswan tiempoyuq kaspa achka runakunaman Jehova Diosmanta yachachiptinchik paykunapas Diostaña kuyanankupaq. * ¿Sapa punchaw llamkanamantaqa yaqachu iskay-kimsa punchawkunallaña llamkaspa Jehova Diosmanta astawan willakuchwan? Chaymantapas, ¿kallpanchakuchwanchu tiemponchikta mana usuchinapaq hinaspa kusirikuykunallapi mana ancha kanapaq?
14. ¿Imatam casarasqa iñiqmasinchikkuna ruwarqaku Diosmanta astawan willakunankupaq?
14 Yachasunyá imatam ruwarqaku punta apaq iñiqmasinchik Eliaswan warmichan. Eliasmi nin: “Precursor kaytaqa manam atiqchu kaniku, ichaqa warmichaywanmi ninakurqaniku kallpanchakunaykupaq. Chaymi tantiakurqaniku manaña ñawpaqpi hina imatapas rantinaykupaq. Tantiakurqanikutaqmi kusirikuykunapi tiempoykuta manaña ancha usuchinaykupaq. Chaymantapas manañam sapa punchawchu llamkaq kaniku. Chaykunata ruwasqaykuraykum kunanqa tardenkunapas lluqsiniku Diosmanta willakunaykupaq hinaspa bibliamanta runakunaman yachachinaykupaq. Kunanqa ñawpaq killakunamantaqa astawanmi Diosmanta willakuchkaniku. Kaywanqa ancha kusisqam tarikuniku”, nispa.
¿IMAYNATAM ALLIN YACHACHIQ KACHWAN?
Huñunakuykunapi imaynata willakunapaq yachachiwasqanchikta ruwayman churaspanchikqa allin yachachiqmi kasunchik. (Qaway 15, 16 kaq parrafokunata). *
15, 16. 1 Timoteo 4:13, 15 nisqanman hinaqa, ¿imataq yanapawasun Diosmanta allinta willakunapaq hinaspa yachachinapaq? (Qawaytaq “ ¿Imakunatam ruwananchik Diosmanta allinta willakunapaq hinaspa yachachinapaq?” niq yachachikuyta).
15 Jehova Diosmanta allinta willakunanchikpaqqa allin yachachiqmi kananchik. Educacionniyuq runakunapas sapa kutim yachachkanku astawan yachanankupaq chaynapi allinta llamkanankupaq. Chaynam ñuqanchikpas sapa kuti kallpanchakunanchik allin yachachiq kanapaq (Prov. 1:5; qaway 1 Timoteo 4:13, 15).
16 Chaynaqa, ¿imataq yanapawasun allin yachachiq kanapaq? Yanapawasunmi Diospa munayninta ruwananchikpaq huñunakuypi sapa yachachisqankuta allinta uyariyninchik. Chaypim yachachiwanchik allinta Diosmanta willakunanchikpaq. Chaypitaqmi huk kaqnin punta apaq iñiqmasinchik ñawpaqman lluqsiqkunata imayna ruwasqankuman hina rimapayan. Chaytaqa allintapunim uyarinanchik, chaynapi ñuqanchikpas willakuq lluqsispa uyarisqanchikman hina ruwananchikpaq. Allin yachachiq kanapaqqa willakunapaq gruponchikpi cuentallikuq iñiqmasinchiktam nichwan kuska willakunapaq. Yanapaykuwananchikpaqtaqmi nichwan achka wataña Diosmanta willakuq hinaspa llaqtan-llaqtan watukuq iñiqmasinchikkunatapas. Kaykuna ruwasqanchikqa yanapawasunmi bibliamanta yachachinapaq yanapakuykunata allinta servichikunapaq. Arí, kay yanapakuykunawan yanapachikuspaqa kusisqam Diosmanta willakusun hinaspa runakunaman yachachisun.
17. ¿Imaynam tarikunchik Diosmanta willakuyninchikta imamantapas puntapi churaspaqa?
17 Mayna kusikunapaqmi ‘Diospa llamkaqmasin’ kayqa (1 Cor. 3:9). Diosmanta willakuyninchikta imamantapas puntapi churaspaqa taytanchik Jehova Diostam “kusikuywan” servisunchik (Filip. 1:10; Sal. 100:2). Diosta yupaychaqkunaqa manam iskayrayanchikchu hina kikin Diosninchik paymanta willakunanchikpaq yanapawananchikmantaqa (2 Cor. 4:1, 7; 6:4). Diosmanta tukuy tiemponchikwan willakuspa utaq iskay-kimsa horallata willakuspapas sunqumanta willakusqanchikraykum anchata kusikunchik (Gal. 6:4). Chaymantapas, Diosmanta willakuyninchikta imamantapas puntapi churayninchikqa qawachinmi paytawan runamasinchikta ancha kuyasqanchikta. Chayna kallpanchakusqanchikqa, ¿imapim tukunqa? Bibliam niwanchik: “Chaynata ruwaspam kikikipas salvakunki chaynataq uyarisuqnikikunatapas salvanki”, nispa (1 Tim. 4:16).
58 KAQ TAKI Maskamusunchik llampu sunqukunata
^ par. 5 Jesusmi kamachiwarqanchik Diospa munaychakuyninmanta allin willakuykunata willakunanchikpaq. Kamachiwarqanchiktaqmi paypa qatiqninña kanankupaq runakunata yachachinanchikpaqpas. Kay yachachikuypim yachachkasunchik kamachiwasqanchikta ima sasachakuypi tarikuspapas allintapuni ruwanamanta. Yachachkasuntaqmi Diosmanta yachachispa allin yachachiq kanapaq hinaspa imaynata ancha kusisqa willakunamantapas.
^ par. 4 ASTAWAN YACHANAPAQ: Diospaq llamkaymanta rimaspaqa, rimachkanchikmi runakunaman willakuymanta, yachachiymanta, yupaychanapaq wasikuna ruwaymanta, allichaymanta hinaspa llumpay sasachakuypi kaqkunata yanapaymantapas (Hech. 11:29; 2 Cor. 5:18, 19).
^ par. 13 Qawaytaq “¿Imaynatam mana llumpayta afanakuspalla kawsakuchwan?” niq yachachikuyta Willakuq qillqanchikpi, 2016 watapa julio killanpi 8 kaq paginapi recuadrota.
^ par. 62 DIBUJOKUNAMANTAWAN FOTOKUNAMANTA WILLAKUYKUNA: Huk kaqnin huñunakuypim huk iñiqmasinchik ñawpaqman lluqsispan kaqmanta watukunapaq niqta ruwachkan. Chaymantañataqmi Allin ñawinchaq hinaspa allin yachachiq kanapaq niq qillqanchikpi imapi kallpanchakunanpaq punta apaq iñiqmasinchikpa nisqanta qillqachkan. Willakuq lluqsispanñataqmi yachasqanta ruwayman churachkan.
