1, 2. ¿Imanasqam musuq iñiqmasinchikkunata yachachinanchik astawan yanapakunankupaq?

JESUSQA anchatam kallpanchakurqa Diospa munayninta ruwananpaq. Chaymantapas tiempochakurqam qatiqninkunata yachachinanpaq. Yachachirqataqmi Diospa llaqtanta qatiqninkuna imayna yachachinankupaq hinaspa ovejakunata michiq hina Dios yupaychaqkunata waqaychanankupaq (Mat. 10:5-7). Felipepas anchatam kallpanchakurqa Diosmanta willakunanpaq. Warmi churinkunamanpas chay ruwaytam yachachirqa (Hech. 21:8, 9). Kunanpas iñiqmasinchikkunatam yachachinanchik. ¿Imanasqa?

² Enteron pachapim achka runakuna Diospa llaqtanman hamuchkanku, ichaqa manaraqmi bautizakunkuraqchu. Paykunataqa astawanraqmi yachachinanchik kikinkumanta bibliata ñawinchayninku hinaspa estudiayninku imanasqa ancha allin kasqanmanta. Yachachinanchiktaqmi Diosmanta imayna willakunankupaq hinaspa bibliamanta yachachinankupaqpas. Chayllaraq bautizakuq qari iñiqmasinchikkunaqa yachachisqam kananku tiempopa risqanman hina iñiqkunapi punta apaqkunapa  yanapaqnin kanankupaq chaymantañataq iñiqkunapi punta apaqkuna kanankupaq. Llapanchikmi atichwan musuq iñiqmasinchikkuna yanapaytaqa (Prov. 4:2).

3, 4. (1) Pablopa nisqanman hinaqa, ¿imanasqam Diosmanta allinta willakunapaq bibliata estudiananchik? (2) Yachachisqanchik runakuna kikinku bibliata estudianankupaq manaraq nichkaspanchik, ¿imatam kikinchikraq ruwananchik?

³ Jehova Diosta yupaychaqkunaqa sapakamam bibliata ñawinchananchik hinaspa estudiananchik, chaynapi Diospa munayninta yachananchikpaq. Apostol Pablom Colosas llaqtapi iñiqmasinkunata kaynata nirqa: ‘Ñuqaykuqa qamkunapaq Dios mañakuytam mana saqirqanikuchu, tukuy tiempotaqmi mañakurqaniku Diospa munayninmanta imam kaqta llapallanta yachanaykichikpaq’, nispa. ¿Imanasqam paykunapaq ancha allin karqa bibliata ñawinchayninku hinaspa estudiayninku? Pablopa nisqanman hinaqa chaymi yanapanman karqa yachayniyuq kanankupaq hinaspa ‘Jehova Diospa munasqanman hina kawsaspa tukuy ima ruwasqankuwan kusichinankupaq’. Yanaparqataqmi Diospa munasqanman hina ‘tukuy allinkunata ruwanankupaq’, astawanraqmi Diosmanta willakuypiqa (Col. 1:9, 10). Pimanpas bibliamanta yachachispanchikqa entiendechinanchikmi bibliata sapa punchaw ñawinchayqa hinaspa estudiayqa allinninkupaq kasqanta, chayta ruwasqankum Jehova Diosta yupaychanankupaq yanapanqa.

⁴ Ñuqanchik bibliata mana estudiaspanchikqa manam yanapasunchu bibliamanta yachachisqanchik runakuna chay ruwayta chaninchanankupaqqa. Bibliata sapa punchaw ñawinchasqanchikqa hinaspa chaypi yuyaymanasqanchikqa yanapawasunmi kawsakuyninchikpi hinaspa Diosmanta willakuyninchikpipas. Pipas sasa tapukuyta ruwawaptinchikqa chayllam bibliawan kutichisun. Chaymantapas Jesusmanta, Pablomanta hinaspa wakin qarinchakuq runakunamanta ñawinchasqanchikmi kallpanchawasun sasachakuypi tarikuspapas Diosmanta hinalla willakunanchikpaq. Bibliapi yachasqanchikkunamanta hukkunaman willaspanchikqa, paykunatapas kallpanchasunmi astawan estudiaspanku yanapachikunankupaq.

5. Willarimuy imaynatam bibliamanta yachachisqanchik runakunata yanapachwan kikinkumanta sapa kuti bibliata estudianankupaq.

⁵ Ichapas tapukuchkanki: “¿Imaynatam bibliamanta yachachisqay runata yanapayman kikinmanta sapa kuti bibliata estudiananpaq?”, nispa. Chaypaqqa ichapas manaraq estudiachkaspanchik preparakunanpaq yachachichwan.  Nichwantaqmi hawan semanapaq ¿Imatapunim Bibliaqa yachachin? niq libropa sapaq yachachikuyninkunamanta mayqanta ñawinchananpaq hinaspa chaypi bibliapa textonkunata maskananpaqpas. Chaymantañataqmi huñunakuypi rimarinanpaq paywan kuska preparakunanchik. Kallpanchananchiktaqmi Willakuq hinaspa ¡Rikchariy! qillqakunata ñawinchananpaq hinaspa bibliamanta tapukuyninkunata maskananpaq, chaypaqqa ichapas servichikunman Watchtower Library utaq internetpi LEENAPAQ QILLQAKUNA niqta. Kay yanapakuykunawan kikinmanta bibliata estudiaspanqa, astawanmi yachayta munanqa hinaspapas kusisqam tarikunqa.

6. (1) ¿Imaynatam bibliamanta yachachisqayki runata yanapawaq bibliata chaninchananpaq? (2) ¿Imatam ruwanqa bibliata chaninchaspanqa?

⁶ Pimanpas bibliamanta yachachispanchikqa, Jehova Diosta allinta riqsinanpaq yanapasqanraykum, bibliata chaninchananpaq yanapananchik. Bibliata estudiananpaq hikutanamantaqa yachachinanchikmi imaynata estudiananpaq, chaynapim kusisqa tarikunqa. Bibliamanta astawan yachaspanqa salmo qillqaq hinam tarikunqa, paymi nirqa: ‘Ñuqapaqqa Diosman asuykuymi llumpay allinqa, ñuqallayqa Diosllapim hapipakuni’, nispa (Sal. 73:28, Chuya Qellqa 2012). Jehova Diospa chuya espiritunmi yanapanqa pipas payman asuykuqtaqa.

7. ¿Imaynatam Jesusqa qatiqninkunata yanaparqa Diosmanta willakunankupaq? (Qaway 21 kaq paginapi fotota).

⁷ Qatiqninkunata Jesuspa imayna yachachisqanmantaqa anchatam yachachwan. Jesusqa qatiqninkunawan kuskam Diosmanta willakuq rirqa, paykunañataqmi qawaqku runakunaman imayna yachachisqanta. Yachachirqataqmi Diosmanta willakuspanku imakunata ruwanankupaqpas (Mat. 10) ^[1] (qaway 26 kaq paginapi willakuyta). Chayllam Jesuspa qatiqninkunaqa paypa yachachisqanman hina chiqap kaqmanta yachachiyta yacharurqaku (Mat. 11:1). Qawasun iskay yanapakuykunata musuq iñiqmasinchikkuna Diosmanta willakuypi yanapakunankupaq.

8, 9. (1) ¿Imaynatam Jesusqa runakunata rimapayarqa? (2) ¿Imaynatam musuq iñiqmasinchikkunata yanapachwan Jesus hina runakunawan rimanankupaq?

⁸ Runakunawan rimasun. Jesusqa manam llapanpichu achka huñunasqa runakunawanqa rimarqa. Payqa sapakamawanpas rimarqam amistadninwan hina. Huk kutipim Samaria llaqtayuq warmiwan unay rimarqaku yakuta hurqunanpaq chay warmi pozoman riptin (Juan 4:5-30). Huk kutipipas impuesto mañaq Mateo Leviy sutiyuq runawanmi rimarqa hinaspam nirqa qatiqnin kananpaq. Mateoqa qatinanpaqmi nirqa hinaspam Jesustawan huk runakunata nirqa wasinpi mikunankupaq. Chaypim Jesusqa achka runakunawan rimarqa (Mat. 9:9; Luc. 5:27-39).

⁹ Nazaret runakunamanta Natanael mana allinta rimachkaptinpas, Jesusqa amistadninta hinam payta rimapayarqa. Chayraykum Natanaelqa manaña ñawpaqta hinañachu Jesusmantaqa piensarqa, Nazaretmanta Jesus kachkaptinpas. Natanaelqa astawanmi Jesusmanta yachayta munarqa (Juan 1:46-51). Jesuspa ruwasqanmi yachachiwanchik runakunawan rimaspanchikqa amistadninchikta hina llampu simillawan rimapayananchikpaq, chaynata ruwaptinchikqa ichapas astawan uyariwayninchikta munanqaku. ^[2] [Qaway 26 kaq paginapi willakuyta].  Kaynata willakunankupaq hukkunata yachachiptinchikqa, paykunapas aswan kusisqam Diosmanta willakunqaku.

10-12. (1) ¿Imaynatam Jesusqa yanaparqa astawan yachay munaqkunata? (2) ¿Imaynatam musuq iñiqmasinchikkunata yanapachwan bibliamanta allin yachachiq kanankupaq?

¹⁰ Uyariy munaqkunamanyá yachachisun. Jesusqa achka ruwayniyuqmi karqa. Chayna kaspanpas tiempochakurqam uyariy munaqkunata yachachinanpaq. Huk punchawmi achka runakuna lamar quchapa patanpi Jesusta uyarinankupaq huñunakururqaku. Hinaptinmi Jesusqa Pedrowan kuska boteman qispiruspan chaymanta yachachimurqa. Chaymantam Jesusqa Pedromanpas yachachiyta munarqa. Chaypaqmi milagrota ruwarqa, achkallay-achka challwakunatam rikurirachirqa Pedro challwananpaq. Hinaspam Pedrota nirqa: “Kunanmantapacham runakunataña challwanki”, nispa. Chayllam Pedrowan wakin runakunapas “botekunata quchapa patanman kutichirqaku, hinaspam tukuy imankuta saqispanku Jesusta qatirqaku” (Luc. 5:1-11).

¹¹ Nicodemo sutiyuq runapas astawanmi Jesusmanta yachayta munarqa. Ichaqa judiokunapa hatun cortenpi juez kasqanraykum manchakurqa Jesuswan rimaptin runakuna rikurunankumanta. Chaymi Jesustaqa tutallan watukuq. Jesusqa manam qarqurqachu, aswanmi paywan rimananpaq hinaspa chiqapmanta yachachinanpaq tiempochakurqa (Juan 3:1, 2). Jesusqa haykapipas tiempochakurqam runakunata chiqapmanta yachachinanpaq hinaspa iñiyninkuta kallpanchananpaq. Chaynallataqmi ñuqanchikpas tiempochakunanchik runakunapa tiemponku kasqanman hina watukunanchikpaq, hinaspapas bibliata entiendenankupaqmi yanapananchik.

¹² Musuq iñiqmasinchikkunawan Diosmanta willakuq rispanchikqa, yachachinanchikmi astawan yachay munaq runakunata kaqmanta watukunankupaq. Nichwantaqmi ñuqanchikwan kuska runakunata kaqmanta watukunanpaq hinaspa bibliamanta yachachinanpaqpas. Chaynapim paykunapas yachanqaku hukkunaman imayna yachachiyta hinaspam Jehova Diosta riqsinankupaq hukkunata yanapaspanku kusisqa tarikunqaku. Chaynapim musuq iñiqmasinchikkunaqa runakunaman kaqmanta watukuyta hinaspa bibliamanta yachachiyta astawan munanqaku. Yachanqakutaqmi pacienciakuq kaytapas hinaspa runakunata wasinkupi mana tarispankupas hinalla watukuyta (Gal. 5:22; qaway “ Manam saqirurqachu” niq yachachikuyta).

13, 14. (1) ¿Imatam yachachiwanchik ñawpaq tiempopi Diosta yupaychaqkuna hukkunata yanapanankupaq kallpanchakusqanku? (2) ¿Imaynatam musuq iñiqmasinchikkunatawan mozo-sipaskunata yanapawaq iñiqmasinchikkuna kuyasqankuta qawachinankupaq?

¹³ Jehova Diosqa munanmi yupaychaqninkuna wawqi-panintin hina utaq turi-ñañantin hina kuyanakuspa yanapanakunanchikta (leey Lucas 22:24-27; 1 Pedro 1:22). Bibliam niwanchik hukkunata yanapananpaq Jesus tukuy imata ruwasqanmanta hinaspa vidantapas qusqanmanta (Mat. 20:28). Dorcas sutiyuq warmipas ‘tukuy allinkunatam ruwaq hinaspapas wakchakunatam yanapaq’ (Hech. 9:36, 39). Mariapas ‘anchatam llamkarqa’ Roma nacionpi turi-ñañankunata yanapananpaq (Rom. 16:6). ¿Imaynatam musuq iñiqmasinchikkunata yachachichwan paykunapas iñiqmasinchikkunata yanapanankupaq?

¹⁴ Yuyaqkunata utaq unqusqakunata watukuspanchikqa, musuq iñiqmasinchikkunatam nichwan riysiwananchikpaq. Tayta-mamakunapas  paykunata watukuspankuqa, warmankutapas pusanmankum. Iñiqkunapi punta apaqkunaqa mozo-sipaskunatam utaq musuq iñiqmasinchikkunatam ninmanku yuyaqña iñiqmasinchikkunapaq mikuyta rantiypi utaq wasinkuta allichaypi yanapanankupaq. Imayna yanapanakusqanchikta qawaspankum mozo-sipaskunapas chaynataq musuq iñiqmasinchikkunapas yachanqaku chay ruwayta. Karu llaqtachapi Diosmanta willakuchkaspanmi punta apaq iñiqmasinchik, chaypi yachaq iñiqmasinchikkunata sapa kuti watukuq imayna kasqankuta yachananpaq. Huk mozopas paywan sapa kuti risqanraykum, yacharqa iñiqmasinchikkunata imayna yanapananpaq piensayta (Rom. 12:10).

15. ¿Imanasqataq iñiqkunapi punta apaqkunaqa qarikunata yanapananku Diospa llaqtanpi allin yachachiq kanankupaq?

¹⁵ Jehova Diosqa qarikunatam kamachirqa huñunakuykunapi palabranmanta yachachinankupaq. Chayraykum qarikunaqa kallpanchakunanku huñunakuykunapi allin yachachiq kanankupaq. Iñiqkunapi punta apaq kaspaykiqa, ichapas iñiqkunapi punta apaqkunapa yanapaqninta uyariwaq imayna yachachinanpaq preparakamusqanta hinaspa yanapaykuwaq aswan allinta ruwananpaq (Neh. 8:8). ^[3] (Qaway 26 kaq paginapi willakuyta).

16, 17. (1) ¿Imaynatam Pabloqa qawachirqa Timoteo allin yachachisqa kananpaq munasqanta? (2) ¿Imaynatam iñiqkunapi punta apaqkunaqa qarikunata yanapanmanku allin michiq kanankupaq?

¹⁶ Diospa llaqtanpi astawan yapakusqanchikraykum, achka qarikuna yachachisqa kananku allin michiq kanankupaq. Pablom Timoteota yachachirqa hinaspam nirqa huk qarikunatapas yachachinanpaq. Hinaspam kaynataraq nirqa: “Diosqa ancha kuyakuynintam qun Cristo Jesuswan huklla kaqkunaman, chay kuyakuy qusqanwanyá hinalla kallpanchasqa kay. Chaymantapas, achka runakunapa qayllanpi ñuqamanta uyarisqaykikunatayá confiana runakunaman yachachiy, chaynapi paykunapas hukkunaman yachachinankupaq allin preparasqa kanankupaq”, nispa (2 Tim. 2:1, 2). Timoteoqa Pablopa ruwasqankunatam allinta qatipakurqa. Pabloqa iñiqkunapi punta apaq chaynataq Jesuspa apostolninmi karqa. Timoteoqa paymantam yacharqa Diosmanta aswan allinta willakunanpaq hinaspa iñiqmasinkunatapas imayna yanapananpaq (2 Tim. 3:10-12).

¹⁷ Pabloqa munarqam Timoteo allin preparasqa kananta. Chaypaqmi anchata tiempochakurqa payman allinta yachachinanpaq (Hech. 16:1-5). ¿Imaynatam iñiqkunapi punta apaqkunaqa Pablota qatipakunmanku? Iñiqmasinchikkunata kallpanchanankupaq  yanapaqninkunawan watukuq rispankum. Chaynapim iñiqkunapi punta apaqkunapa yanapaqninkunaqa yachanqaku hukkunata imayna yachachinanpaq chaynataq pacienciakuq hinaspa kuyapayakuq kaytapas. Yachanqakutaqmi Jehova Diospa yanapakuynin maskaytapas, chaynapi iñiqmasinchikkunata allinta yanapanankupaq (1 Ped. 5:2).

18. ¿Imanasqam Jehova Diospa munayninta ruwanankupaq hukkunata yachachiyqa ancha allin?

¹⁸ Kay tukupay punchawkunapim achka musuq iñiqmasinchikkunaqa yachachisqa kananku Diosmanta allinta willakunankupaq. Chaymantapas, achka qarikunapas yachachisqam kananku iñiqkunapi punta apaq kanankupaq. Jehova Diosqa munanmi llapallan yupaychaqninkuna allin yachachisqa kananchikta hinaspa musuq iñiqmasinchikkunata yanapananchiktapas. Chayraykum Pablotawan Jesusta qatipakuspa kallpanchakunanchik hukkunata yachachinanchikpaq. Diospa piñakuynin punchaw chayamunankamaqa, astawanmi runakunaman willakunanchik. Chaypaqqa atisqanchikman hinam llapallan iñiqmasinchikkunata yanapananchik allin yachachiq kanankupaq.

19. ¿Imanasqam mana iskayrayankichu hukkunata yachachinaykipaq kallpanchakusqayki allinpi tukunanmanta?

¹⁹ Musuq iñiqmasinchikkunata yachachinapaqqa tiempochakunam hinaspapas kallpanchakunam. Ichaqa paykunata yanapanapaq Jehova Dioswan Jesus yanapawananchikmantaqa manam iskayrayananchikchu. Kusisqam tarikusun Diospa llaqtanpi yanapakunankupaq hinaspa Diosmanta willakunankupaq kallpanchakusqankuta qawaspanchikqa (1 Tim. 4:10). Paykuna hinam ñuqanchikpas hinalla kallpanchakunanchik iñiyninchikpi ñawparinanchikpaq, imayna kayninchikta sumaqyachinapaq hinaspa Jehova Diospa allin amistadnin kananchikpaq.