Paykunapa kamachisqanman hina Jesuswan qatiqninkuna makinkuta mana mayllakuptinkum anchata piñakuqku. Moisespa chaskisqan kamachikuypim nirqa haykapikama hinaspa imanasqa mana asuykunapaq kaymanta. Chaynam karqaku yawarpakuywan hinaspa qiya ispaywan kaqkuna, leprawan ñakariq runakuna, wañusqa runata utaq animalta llapchaq runakunapas. Kaqmanta chuyanchasqa kanankupaqqa, kamachikuypa nisqanman hinam animalkunata wañuchinanku karqa, mayllakunanku karqa utaq yakuwan challachikunanku karqa (Lev. 11-15; Num. 19).

Huk qillqam nin judiokunapa religionninpi umalliqninkuna pipas mana asuykunapaq hina kananmanta hinaspa imallantapas llapchaykuspan huk runapas pay hinaña kananmanta imaymana kamachikuykunata rikurirachisqankumanta. Nirqakutaqmi imakunata servichikuspa mana asuykunapaq hina kanankumanta. Chaymantapas chuyanchasqa kanankupaqmi kikinkupa kamachikuyninkunata yaparurqaku.

Fariseokunawan escribakunam Jesusta tapurqaku: “¿Imanasqataq qatiqnikikunaqa ñawpaq tiempopi runakunapa costumbrenkunata mana kasukunkuchu hinaspa makinkutapas mana mayllakuspa mikunku?”, nispa (Mar. 7:5). Kaynata nispankuqa manam makinkuta mayllakunallankumantachu rimachkarqaku. Paykunaqa kamachirqakum manaraq mikuchkaspanku yakuta makinkuman imayna tallinankupaq. Kamachirqakutaq imawan yakuta tallinankupaq, ima yakuta servichikunankupaq, yakuta pi tallinanpaq hinaspa makinpi maykama tallinankupaqpas.

¿Imatam Jesusqa nirqa chay kamachikuykuna rikurirachisqankumanta? Nirqam: “Yaw iskay uyakuna, chiqaptapunim Isaias qamkunamanta willakurqa. Qillqasqam kachkan: ‘Kay runakunaqa simillankuwanmi hatunchawan, sunqunkum ichaqa ñuqamanta karupi kachkan. Yanqam yupaychawankupas, paykunaqa runakunapa kamachisqallantam yachachinku’, nispa. Arí, qamkunaqa Diospa kamachikuyninkunata qipanchaspaykichikmi runakunapa costumbrenkunaman hapipakunkichik”, nispa (Mar. 7:6-8).