TUKUPAY tiempopi kawsasqanchikraykum llumpay sasachakuyllapiña kawsanchik, chaymi Diosta serviqkunaqa aswan pacienciayuq kananchik (2 Tim. 3:1-5). Runakunam kanku kikillankupi piensaqkuna, acuerdoman mana yaykuqkuna hinaspa mana controlakuqkuna. Kayna runakunaqa mana pacienciakuqmi kanku. Chaymi tapukunanchik: “¿Paykuna hinachu ñuqapas mana pacienciakuq kachkani? ¿Imaynataq pacienciakuq runaqa? ¿Imataq yanapawanman pacienciakuq kanaypaq?”, nispa.

Bibliam nin pacienciakuq runaqa ima sasachakuyña kaptinpas hinalla aguantasqanmanta. Aguantanqa ima suyasqanta yuyarispanmi. Pacienciakuq runa kaspaqa manam munasqallanchiktachu maskasunchikqa, aswanqa runamasinchikkunapa munasqankutapasmi, chiqniwaqninchik kaptinñapas. Chaymi tukuyta ruwanchik runamasinchikwan allinlla kanapaq. Chayraykum Diospa palabranqa nin pipas kuyakuqqa pacienciakuq kasqanta (1 Cor. 13:4). * Nintaqmi Diospa chuya espiritunqa runakunata pacienciakuqta kawsachisqanmanta (Gal. 5:22, 23). Hinaptinqa, ¿imataq yanapawasun pacienciakuq kanapaq?

Pacienciakuq kanapaqqa Jehova Diostam mañakunanchik chuya espiritunta quwananchikpaq, payqa haykam hapipakuqninkunamanqa qunmi (Luc. 11:13). Diospa chuya espiritunqa ancha atiyniyuqmi, chaywanpas mañakusqanchikman hinam ruwananchik (Sal. 86:10, 11). Huk simipiqa, sapa kutim kallpanchakunanchik pacienciakuq kanapaq, chaynapi pacienciakuy sunqunchikpi qipananpaq. ¿Imakunatawanraqmi ruwananchik pacienciakuq kanapaq?

Pacienciakuq kaytaqa yachachwantaqmi Jesuspa imayna kasqanta qatipakuspa. “Musuq runaña” kananchikmanta apostol Pablo rimaspanmi ‘pacienciakuq’ kaymantapas rimarqa, hinaspam iñiqmasinkunata nirqa: “Cristopa hawkayayninyá sunquykichikpi munaychakuchun”, nispa (Col. 3:10, 12, 15). Jesuspa hawkayaynin sunqunchikpi kananpaqqa, pay hinam mana iskayrayananchikchu llakichiwaqninchik kaqkunata Dios allichananmanta. Jesusta qatipakuspanchikqa imaña kaptinpas pacienciakusunmi (Juan 14:27; 16:33).

Ñuqanchikqa munanchikmi musuq pachapi kawsakuytaña, chaywanpas pacienciakuq kaytam yachachwan Diospa imayna pacienciakusqanpi yuyaymanaspanchik. Bibliam nin: “Jehova Diosqa manam runakunapa piensasqanman hinachu unamun prometesqankunata cumplinanpaqqa.  Aswanqa qamkunawanmi pacienciakuchkan pipas chinkarunanta mana munaspan, payqa munachkan llapallan runakuna huchankumanta wanakunankutam”, nispa (2 Ped. 3:9). Chaynaqa, ¿manachum Diospa imayna pacienciakusqanpi yuyaymanayninchikqa kallpanchawanchik, hukkunawanpas pacienciakuq kananchikpaq? (Rom. 2:4). Chaymi kunan yachasunchik imakuna kaptin pacienciakunanchikmanta.

Sapa punchawmi pacienciakunapaq kallpanchakunanchik. Ichapas rimariyta munanchik, chaywanpas suyananchikmi wakinku rimayta tukunankutaraq, chaynapi chayraq rimarinanchikpaq (Sant. 1:19). Pacienciakunataqmi kanqa iñiqmasinchikkunapa imayna kasqanku hukmanyachiwaptinchikpas. Chaylla piñakurunamantaqa, yuyarinanchikmi Jehova Dioswan Jesusqa pantaptinchikpas pacienciakuwasqanchikta. Paykunaqa manam pantasqallanchiktachu qawanku, aswanqa allin ruwasqanchikkunatam qawanku (1 Tim. 1:16; 1 Ped. 3:12).

Chaymantapas, chayllam piñakuruchwan pipas mana ruwasqanchikmanta utaq mana rimasqanchikmanta yanqa tumpawaptinchikqa. Ichaqa, Diospa palabranmi niwanchik: “Hatun tukuq kaymantaqa pacienciakuymi aswan allinqa. Amayá chayllaqa piñakuruychu, chaylla piñakuruyqa mana yachayniyuqkunapa ruwayninmi”, nispa (Ecl. 7:8, 9). Chaymi pipas yanqapuni imatapas niwaptinchikqa yuyaymanana allin tanteowan rimarinapaq. Jesuspas chaynatam ruwarqa yanqamanta tumpaptinku (Mat. 11:19).

Tayta-mamakunapas, warmankuwanqa pacienciakunankum kanqa rimapayaptinku mana chaylla uyarikuptinkuqa. Europa lawpi kaq betel wasipi llamkaq Matiasmanta rimarisunchik. Colegiopi kaptinmi estudiaqmasinkuna asikuqku Diospi iñisqanmanta. Manam chay pasasqantaqa tayta-mamanqa yachaqkuchu. Ichaqa cuentatam qukururqaku warmanku Matias iñisqanmanta iskayrayayta qallaykusqanmanta. Taytanmi willakun: “Anchatam warmaykuwan pacienciakurqaniku. Payqa tapuwaqkum: ‘¿Kanchu Dios? ¿Bibliaqa Diospa palabranchu? ¿Tukuy chay kamachikuyqa Diosmantachu hamun? ¿Imaynatam chayta yachanchik?’, nispa. Churiyqa niwaqraqmi: ‘¿Imanasqamá mana qamkuna hina creeptiyqa mana allinpaqqa qawawankichik?’”, nispa.

 Taytanmi hinalla willakun: “Warmaykuqa piñasqallañam wakinpiqa rimapayawaqku. Piñakuqqa manam ñuqaykupaqchu aswanqa piñakuqmi Diosta kasukusqanrayku ñakarisqanmanta”, nispa. ¿Imatam taytanqa ruwarqa? Paymi nin: “Achka kutipim churiywan tiyaykuspa unaysu parlaq kaniku. Uyariqmi kani tukuy ima niwasqanta, wakinpiqa tapuqmi kani ima piensasqanta hinaspa imayna tarikusqanta entiendenaypaq. Chaymantapas, saqirqanim nisqaykunapi huk utaq iskay punchaw yuyaymanananpaq, hinaptinñam kaqllamanta parlaq kaniku. Huk kutikunapiqa, nirqanim imapas niwasqanpi huk utaq iskay punchaw allinta yuyaymanaykunaypaq. Chayna parlasqaykum churiyta yanaparqa Jesucristoqa ñuqanchikrayku wañusqanmanta, Dioslla allin kamachiq kasqanmanta hinaspa Diosqa kuyakuq kasqanmanta entiendenanpaq. Manam chayllachu entienderqa, unay tiempom pasarqa. Wakinpiqa sasachakurqanikum. Ichaqa tiempopa risqanman hinam Jehova Diosta kuyayta qallaykurqa. Kusisqam tarikuniku pacienciakuspa warmaykuta yanapasqaykumanta”, nispa.

Matiaspa tayta-mamanqa manam iskayrayarqakuchu Jehova Dios yanapananmantaqa. Taytanmi willakun: “Achka kutipim, warmayku Matiasta mamanpiwan nirqaniku anchata kuyasqaykumanta, chaymi entiendeykachinanpaq Jehova Diosta mañakusqaykumanta nirqaniku”, nispa. Paykunaqa kusisqam tarikunku warmankuta pacienciakuspa uywasqankuqa mana yanqapaq kasqanmanta.

Jehova Diosta serviqkunaqa pacienciakunankutaqmi unquq ayllunkuta utaq amistadninkunata atiendispankuqa. Rimarisun Elena * iñiqmasinchikmanta, paypas Europa lawpim yachan.

Pusaq wata ñawpaqtam, Elenapa qusanpa umanpi unquy rikurirurqa, chaymi qusanqa qiparurqa mana sano runa hinaña, mana asiriqña, mana llakikuqña. Chayraykum Elenaqa sasachakuypi tarikullan. Paymi nin: “Pacienciakunaypaqmi kallpanchakuni, hinaspapas Jehova Diostam sapa kuti mañakuni. Filipenses 4:13 nisqanmi anchata kallpanchawan, chaypim nin: ‘Dios kallpata quwaptinmi tukuy imata ruwanaypaq kallpayuq kani’”, nispa. Arí, Jehova Dios kallpata quptinmi Elenaqa pacienciakuspan hinalla qusanta atiendichkan (Sal. 62:5, 6).

Manam pipas kanchu Jehova Dios hina pacienciakuqqa (2 Ped. 3:15). Bibliam willawanchik, achka kutipi Jehova Diosqa runakunawan pacienciakuwasqanchikmanta (Neh. 9:30; Is. 30:18). Huk kutipim, Jehova Diosqa Abrahanman willarqa Sodoma llaqtata purmachinanmanta, chaymi Abrahanqa imanasqa chay ruwananmanta tapurqa. Hinaptinmi Jehova Diosqa Abrahanta sumaqta uyarirqa. Chaymantañataqmi Diosqa Abrahanpa rimarisqanta yapamanta rimarqa, chaywanmi qawachichkarqa uyarisqanta. Hinaspam Abrahanta Diosqa nirqa, sichum 10 allin ruwaq runakunata Sodoma llaqtapi tariruspanqa chay llaqtata mana purmachinanmanta (Gen. 18:22-33). ¡Mayna sumaqmi Jehova Diospa chayna pacienciakusqanqa!

Arí, Jehova Diosta serviqkunaqa pacienciakuq runakunam kananchik. Chayna kanapaq kallpanchakuspanchikqa pacienciakuq hinaspa kuyakuq Jehova Diostam hatunchasunchik. Pacienciakuq kaspaqa ‘iñiywan hinaspa pacienciawan promesakuna chaskiqkunawan’ kuskam kasunchik (Heb. 6:10-12).