PASAQ watapim achka qari iñiqmasinchikkuna iñiqkunapi punta apaq hinaspa punta apaqkunapa yanapaqninkuna kanankupaq akllasqa karqaku. Paykunamanta huk kaqnin kaspaykiqa kusisqachá tarikunki.

Chaywanpas tumpa mancharisqachá tarikunki. Mozo kaq Yeyson iñiqmasinchikmi nin: “Punta apaq kanaypaq niwaptinkum piensarqani mana atinaymanta”, nispa. Moiseswan Jeremiaspas piensarqakum Diospa kamachisqantaqa mana ruway atinankumanta (Ex. 4:10; Jer. 1:6). ¿Qampas chaynachu sientekunki? ¿Imatam ruwawaq chaynata manaña sientekunaykipaq hinaspa astawan ñawparinaykipaq? Timoteomantayá yachaykusun (Hech. 16:1-3).

Timoteoqa yaqapaschá 20 watanpi kachkarqa illaysinanpaq Pablo niptin. Payqa piensarqachá hukkunata yachachinanpaq utaq rimapayananpaq mozollaraq kasqanrayku mana atinanmanta (1 Tim. 4:11, 12; 2 Tim. 1:1, 2, 7). Ichaqa chunka wata pasaruptinmi Pabloqa Filipos llaqtapi iñiqmasinkunata nirqa: “Señorninchik Jesus munaptinqa manapas unaymantam Timoteota kachamusqaykichik [...]. Manam pipas pay hinaqa kanchu”, nispa (Filip. 2:19, 20).

¿Imatam Timoteoqa ruwarqa allin punta apaq kananpaq?

1. Iñiqmasinkunatam sunqumanta kuyarqa. Pabloqa Filipos llaqtapi iñiqkunatam nirqa Timoteoqa tukuy sunqunwan paykunamanta llakikusqanmanta (Filip. 2:20). Timoteoqa iñiqmasinkunatam kuyarqa, chaymi paykunata yanaparqa Diosta astawan kuyanankupaq.

William iñiqmasinchikmi 20 masnin watakunaña punta apaq, paymi chayllaraq kaq punta apaqkunata nin: “Iñiqmasinchikkunata kuyay, yanapay, ama ruwaynikikunallapiqa kaychu”, nispa. Chaynaqa, amayá apurawman carrokunata manejaq hinaqa kaychu, paykunaqa mayman risqankuta chayayta munaspankum runakunata llutanta apanku.

2. Diospa kaqkunatam puntata ruwarqa. Pablom nirqa: “Wakinqa kikinkupa allinnillantam maskachkanku manam Jesucristopa allinnintachu”, nispa (Filip. 2:21). Chaytam qillqarqa Roma llaqtapi kachkaspan, chaypi iñiqkunaqa ruwayninkunallapim afanakuqku, manam kallpanchakuqkuchu Diospaq astawan ruwanankupaqa. Timoteoqa manam chaynachu karqa. Diospaq imapas ruwana kaptinqa payqa Isaias hinam karqa, Isaiasmi nirqa: ‘Kayqaya ñuqa kaypi kachkani, ñuqatayá kachaway’, nispa (Is. 6:8).

Diospaq kaqkunata hinaspa imapas ruwaynikikunata allinta ruwanaykipaqqa, Pablopa nisqanman hinam puntataqa ‘imakuna aswan allin kasqanmanta yachanayki’ (Filip. 1:10). Chaynaqa, Diospa kaqkunata puntata ruway. Chaymantapas, ama yanqakunapiqa tiempoykita usuchiychu. Pablom Timoteota nirqa: “Ayqikuyá mozo-sipaskunapa munapayasqankunamanta, hinaspayá kallpanchakuy allin ruwaq, iñiyniyuq hinaspa kuyakuyniyuq kanaykipaq, hawkallataqyá kawsakuypas”, nispa (2 Tim. 2:22).

3. Jehova Diospaqmi anchata llamkarqa. Pablom Timoteomanta nirqa: “Imaynam churipas taytanta yanapan, chaynam payqa sumaq willakuy aswan willakusqa kananpaq tukuy imata ruwaspan ñuqawan llamkarqa”, nispa (Filip. 2:22). Timoteoqa manam qillachu karqa, Pablowanmi anchata Diospaq llamkarqa, chaymi paykunaqa allin amistad karqaku.

 Diospa llaqtanpiqa achka ruwaykunam kachkan, chaykunata ruwaspaykiqa kusisqa hinaspa iñiqmasinchikkunawanmi huk sunqulla kanki. Kallpanchakuy ‘señorninchikpa ruwayninpi tukuy tiempo astawan llamkanaykipaq’ (1 Cor. 15:58).

4. Yachasqantam ruwayman churarqa. Pablom Timoteoman qillqarqa: “Qanmi ichaqa allinta hapipakuchkanki yachachisqaykunaman, allintataqmi qatipakuchkanki imayna kawsasqayta, imam munasqayta, iñiyniyta, pacienciakuq kasqayta, sasachakuykunata atipasqayta hinaspa kuyakuq kasqaytapas”, nispa (2 Tim. 3:10). Yachasqanta ruwayman churasqanraykum Timoteoqa Diospa llaqtanpi aswan ruwayniyuq karqa (1 Cor. 4:17).

Unayña punta apaq pi iñiqmasinchiktapas niwaqmi yanapasunaykipaq. Tom iñiqmasinchikmi nin: “Chayllaraq punta apaq kaspaymi, unay watakunaña punta apaq huk iñiqmasinchik yanapaykuwarqa. Sapa kutim payta tapukuq kani, hinaspam niwasqanta ruwayman churaq kani. Chayqa anchatam yanapawarqa”, nispa.

5. Kallpanchakurqam Diosman sunqu kananpaq. Pablom Timoteota nirqa: “Anchatayá kallpanchakuy tukuy sunquwan Diosta servinaykipaq”, nispa (1 Tim. 4:7). Kallpaqkunapa yachachiqninku kaptinpas kikinkum kallpanchakunanku allin kallpaq kanankupaq. Chaymi Pablo Timoteota nirqa: “Hinalla kallpanchakuy hukkunapa qayllanpi leenaykipaq, hukkunata kallpanchanaykipaq hinaspa yachachinaykipaq [...]. Tukuy chaykunapiyá yuyaymanay, chaykuna ruwaymanyá anchata qukuy, chaynapi iñiynikipi ñawparisqaykita llapallan runakuna sutilla qawanankupaq”, nispa (1 Tim. 4:13-15).

Qampas kallpanchakuy aswan allin punta apaq kanaykipaq. Bibliamanta hinaspa Diospa llaqtanpi kamachikuykunata allinta yachay. Ama piensaychu unayña punta apaq kasqaykirayku imatapas allintaña yachasqaykitaqa, imatapas tanteanaykipaqqa tiempochakuspam chaymanta allinta yachanayki. Timoteo hinam imayna kawsasqaykita hinaspa imayna yachachisqaykita sapa kuti allinta qawarikunayki (1 Tim. 4:16).

6. Diospa espiritunwanmi yanapachikurqa. Pablom Timoteota nirqa Diospaq llamkayninta ‘chuya espiritupa yanapakuyninwan allinta waqaychananpaq’ (2 Tim. 1:14). Timoteoqa Diospa espiritunwanmi yanapachikunan karqa.

Unayña punta apaq Donald iñiqmasinchikmi nin: “Punta apaq hinaspa yanapaqninkuna kanankupaq akllasqakunaqa, kallpanchakunankum Diosta astawan kuyanankupaq, chaynapi kallpata hapinankupaq. Diospa chuya espiritunta mañakuspankuqa hinaspa chayman hina kawsakuspankuqa allintam iñiqmasinkunata yanapanqaku”, nispa (Sal. 84:7; 1 Ped. 4:11).

Kusikunikum qam hina achka iñiqmasinchikkuna Diospa llaqtanpi astawan llamkasqankuta qawaspayku. Qallariypi rimasqanchik Yeyson iñiqmasinchikmi nin: “Punta apaq kanaypaq niwasqankumanta kunankamaqa allintam yacharuni, manañam manchakuniñachu. Kusikuywanmi ruwasqaykunataqa ruwani, kay ruwasqayqa suma-sumaqmi”, nispa.

¿Qampas Diospaq ruwaynikipichu ñawparinki? Timoteota qatipakuspaykiqa iñiqmasinchikkunatam anchata yanapanki.