1, 2. (1) ¿Imaynatam Diosta kuyasqanchikqa iñiyninchikpi yanapawanchik? (2) ¿Ima tapukuykunamantam yachasunchik?

JEHOVA DIOSQA payman sunqu kaqkunataqa tukuy imapim bendecinqa, chaywanmi ancha kuyawasqanchikta qawachiwanchik. Ñuqanchikñataqmi Diosta kuyanchik puntata pay kuyawasqanchikrayku (1 Juan 4:19). Diosta astawan kuyaspanchikqa, astawanmi paypi iñisun hinaspapas manam iskayrayasunchu kuyaqninkunata Jehova Dios bendecinanmantaqa (leey Hebreos 11:6).

² Jehova Diosqa tukuy sunqunkuwan yupaychaqninkunataqa bendeciytam munachkan. Chaymi iñiyninchikpi allinta takyanapaqqa, bendeciwananchikmantaqa mana iskayrayananchikchu. ¿Imanasqam chaynata ninchik? Bibliam nin: “Iñiyqa suyasqanchikta chiqaptapuni chaskinanchikpaqña suyaymi”, nispa (Heb. 11:1). Arí, iñiyniyuq kaspaqa manam iskayrayasunchu Dios bendeciwananchikmantaqa. ¿Imaynatam  yanapawanchik Jehova Dios bendeciwananchikmanta yachayqa? ¿Imaynatam ñawpaq tiempopi yupaychaqninkunata Dios bendecirqa? ¿Imaynatam kunanpas chayta ruwan? Chaymantayá yachasun.

3. ¿Imatam Malaquias 3:10 niwanchik?

³ Jehova Diosqa nirqam yupaychaqninkunata bendecinanmanta. Tukuy sunqunchikwan paypa munayninta ruwaptinchikqa payqa bendeciwasunmi. Jehova Diosmi kaynata niwanchik: “Kunanyá pruebawaychik”, nispa. Nintaqmi: ‘¿Manachum ñuqaqa cielokunapa ventananta kichaykuspay bendicionniyta qumusqaykichik llimparinankama?’, nispa (Mal. 3:10). Jehova Diospa kayna niwasqanchikman hina ruwaspanchikqa, agradecesqa kasqanchiktam qawachisunchik.

4. ¿Imanasqam mana iskayrayanchikchu Mateo 6:33 nisqanpi Jesuspa nisqanmanta?

⁴ Jesusmi qatiqninkunata nirqa Diospa munayninta puntapi churaptinkuqa tukuy ima pisipuqninkuta Dios qunanmanta (leey Mateo 6:33). Jesusqa yacharqam Diosqa nisqanman hina ruwasqanta, chaymi qatiqninkunaman chaynata nirqa (Is. 55:11). Ñuqanchikpas Jesus hinam mana iskayrayananchikchu. Jehova Diospi tukuy sunqunchikwan iñiptinchikqa, paymi niwanchik: “Manapunim ñuqaqa haykapipas qunqasqaykichu nitaqmi saqisqaykichu”, nispa (Heb. 13:5). Kayna nisqanmi yanapawanchik Mateo 6:33 nisqanpi Jesuspa nisqanmanta mana iskayrayanapaq.

5. ¿Imanasqam llapanchikta kallpanchawanchik Pedroman Jesuspa nisqanqa?

 ⁵ Apostol Pedrom Jesusta tapurqa: “Ñuqaykuqa tukuy imata saqiruspam qamta qatichkaykiku, ¿imataq ñuqaykupaqqa kanqa?”, nispa (Mat. 19:27). Jesusqa manam Pedrotaqa qaqcharqachu chaynata tapusqanmantaqa. Aswanmi Jesusqa qatiqninkunata nirqa imapas saqisqankumantaqa astawanraq chaskinankumanta. Hamuq tiempopim apostolkunawan wakin akllasqa Diosman sunqu runakuna Jesuswan kuska hanaq pachamanta kamachimunqaku. Chayna kaptinpas, Jesusqa nirqam: “Sutiyrayku pipas wasinkunata, wawqi-paninkunata, tayta-mamanta, wawa-churinkunata hinaspa chakrankunata saqiqqa aswan achkataraqmi chaskinqa, chaskinqataqmi wiñay kawsaytapas”, nispa (Mat. 19:29). Kunanpas, iñiqmasinchikkunaqa tayta-mamanchik, churi-wawanchik hinaspa wawqi-paninchik hinam kanku. Chayna kasqanmi aswan chaninniyuqqa Diosrayku imapas saqisqanchikmantaqa.

6. Jehova Dios payman sunqu kaqkunata bendecinanmanta yachayqa, ¿imapaqmi yanapawanchik?

⁶ Jehova Diosqa payman sunqu kaqkunatam bendecinqa, chay yachasqanchikmi yanapawanchik sasachakuykunata atipanapaq. Manam kunanllachu Diosmantaqa tukuy imata chaskisun, hamuq tiempopipas astawanraqmi chaskisunchik (1 Tim. 4:8). Jehova Diosqa ‘tukuy sunqunkuwan maskaqninkunaman pagapuqmi’, chayna kasqanta yachaymi yanapawanchik Diosman sunqu kananchikpaq (Heb. 11:6).

7. ¿Imawanmi rikchakun suyakuyninchik hinaspa imanasqa?

⁷ Ancha riqsisqa yachachikuyninpim Jesus nirqa: “Anchatayá kusikuychik, qamkunapaqmi hanaq pachapi hatun premioykichik kachkan, chaynatam Diosmanta willakuqkunatapas qamkunamanta ñawpaqtaraq ñakarichirqaku”, nispa (Mat. 5:12). Diospa wakin yupaychaqninkunaqa hanaq pachapim kawsanqaku. Wakinkuñataqmi kay pachapi kawsanqaku sumaq huerta kaptin. Paykunapas chayraykum kusisqa tarikunku (Mat. 5:5; Luc. 18:30). Suyakuyninchikqa llapanchikpaqmi ‘yaqa buqueta sayachiq llasaq fierro hina’ (Heb. 6:17-20). Buqueta sayachiq llasaq fierroqa wayra-para buqueta mana kuyuchinanpaqmi takyachin, chaynam suyakuyninchikpas kallpata quwanchik allinta takyananchikpaq.

8. ¿Imaynatam suyakuyninchikqa yanapawanchik llakiwan llumpayta mana intuchikunapaq?

⁸ Suyakuyninchikqa yanapawanchiktaqmi llakiwan llumpayta mana intuchikunapaq. Imaynam balsamo hampi nanayninchikta samaykachin, chaynam hamuq tiempopi imakunata Dios ruwanamanta yachasqanchikpas sunqunchikta hawkayaykachin. Tukuy llakinchikkunata Diospa makinpi saqiykuptinchikqa paymi yanapawasun, chayta yachasqanchikmi sunqunchikta tiyaykachin (1 Ped. 5:7). Jehova Diosqa mañakusqanchikmantapas astawanraqmi quwasunchik (Efes. 3:20).

9. ¿Imatam ruwananchik Jehova Diospa yanapakuyninta chaskinapaq?

⁹ Jehova Diospa yanapakuyninta chaskinapaqqa, paypim iñinanchik hinaspa kasukunanchik. Moisesmi Israel runakunata nirqa: ‘Diosmi bendecisunkichik dueñochakunaykichikpaq qusunaykichik allpapi,  chaynataqa bendecisunkichik yupaychasqanchik Tayta Diosta uyariptikichikmi chaynataq kunan kamachisqankunata kasukuspaykichik cumpliptikichikmi. Yupaychasqanchik Tayta Diosmi bendecisunkichik prometesusqaykichikman hina’, nispa (Deut. 15:4-6). Jehova Diosqa yanapawasunmi payman sunqu hinalla kaptinchikqa, chaymantaqa manam iskayrayananchikchu.

10, 11. ¿Imaynatam Jehova Diosqa Joseyta bendeciykurqa?

¹⁰ Bibliaqa yanapawananchikpaqmi qillqakurqa. Bibliata ñawinchaspam yachanchik ñawpaq tiempopi yupaychaqninkunata Jehova Dios imayna bendecisqanmanta (Rom. 15:4). Rimarisun Joseymanta. Paytaqa wawqinkunam rantikururqaku sirviente kananpaq. Chaymantañataqmi patronninpa warmin yanqamanta tumpaykurqa mana allin ruwasqanmanta, chaymi Joseyqa Egipto nacionpi presochasqa karqa. ¿Chayraykuchu Joseyqa Jehova Diosta qunqarurqa? Manamá. Bibliam nin: ‘[Jehova] Diosmi karqa Joseywan hinaspa favorecerqa’, nispa. Nintaqmi: ‘Joseywanqa [Jehova] Dios kasqanraykum, [...] ruwasqanpi favorecerqa’, nispa (Gen. 39:21, 23). Chayna sasachakuypi tarikuspanpas, Joseyqa hawkallam suyarqa Jehova Dios yanapananta.

¹¹ ¿Imaynatam Jehova Diosqa Joseyta bendecirqa? Iskay-kimsa watakuna pasaruptinmi, Faraonqa carcelmanta Joseyta hurqururqa. Joseyqa sirviente kasqanmantam Egipto nacionpi atiyniyuq runaña rikurirurqa (Gen. 41:1, 37-43). Joseypam karqa iskay churinkuna, punta kaqtam Manaseswan suticharuspan nirqa: “Diosmi qunqaykachiwan tukuy llakiyta chaynataq aylluykunatapas”, nispa. Huknin churintañataqmi Efrainwan sutichaspan nirqa: “Diosmi ñakarisqay nacionpi miraykachiwan”, nispa (Gen. 41:51, 52). Jehova Diosqa Joseytam bendeciykurqa payman sunqu kasqanrayku. Chaymi Joseyqa Israel runakunatawan Egipto runakunata yanaparqa yarqaymanta mana wañunankupaq. Joseyqa yacharqam tukuy chaykunaqa Jehova Diospa bendicionninkuna kasqanta (Gen. 45:5-9).

12. ¿Imataq Jesusta yanaparqa Jehova Diosman sunqu kananpaq?

¹² Señorninchik Jesucristopas Jehova Diostam kasukurqa tukuy ima sasachakuykunawan ñakariptinpas. ¿Imataq Jesusta yanaparqa Jehova Diosman sunqu kananpaq? Bibliam nin: “Kusisqa kananta yachaspanmi pinqaytapas qipanchakuykuspan qirupi ñakarirqa”, nispa (Heb. 12:2). Jesusqa anchatamá kusikurqa Jehova Diospa sutinta hatunchasqanmanta. Chay ruwasqanmantam Jehova Diosqa Jesusta chaskiykurqa hinaspa ‘kamachinanpaq tiyananpa alliq lawninpi tiyaykachirqa’. Bibliaqa nintaqmi ‘Dios llumpa-llumpayta hatuncharuspan llapallanmanta suma-sumaq sutiwan sutichaykusqanmanta’ (Filip. 2:9).

13, 14. ¿Imaynatam Jehova Diosqa qawan paypaq tukuy ima ruwasqanchikta?

¹³ Jehova Diosqa anchatam chaninchan paypaq tukuy ima ruwasqanchiktaqa, chaymantaqa manam iskayrayananchikchu. Payqa yachanmi wakinpi mana kaqpaqpas hapikusqanchikta utaq manchakusqanchikta. Llakipayawanchikmi llamkaywan utaq ayllunchikta uywanapaq sasachakuptinchik. Yachantaqmi llumpay llakisqa kasqanchikrayku utaq unqusqanchikrayku ñawpaqpi hina paypaq manaña ruwasqanchiktapas. Jehova Diosqa manam qunqanchu sasachakuypi kaspanchikpas payman sunqu kasqanchiktaqa (leey Hebreos 6:10, 11).

¹⁴ Chaymantapas Jehova Diosqa “pipapas mañakusqanta uyariykuqmi”. Chaymi mana iskayrayananchikchu mañakusqanchikta uyariwasqanchikmantaqa (Sal. 65:2). ‘Llakipayakuq hinaspa sinchi kallpanchaqninchik taytanchik Jehova Diosmi’ kallpanchasqa kananchikpaq tukuyta ruwanqa. Ichapas huk kaqnin iñiqmasinchiktakama yanapaykuwanchikman (2 Cor. 1:3). Jehova Diosqa anchatam kusikun llakipayakuq kaptinchik hinaspa runamasinchikta yanapaykuptinchik. Bibliam nin: ‘Wakchaman prestaspaqa tayta Diosmanmi prestachkan, chay qusqantaqa tayta Diosmi kutichipunqa’, nispa (Prov. 19:17, Chuya Qellqa 2012; Mat. 6:3, 4). Chaynaqa iñiqmasinchikkunata yanapaspa hinaspa qukuykuq kaspaqa, Jehova Diospaqpas ruwachkachwan hinam rikchakun. Chaymi payqa ruwasqanchikmanta tukuy imata quwasun.

15. ¿Ima bendiciontam suyachkanki? (Qaway 21 kaq paginapi dibujota).

¹⁵ Hanaq pachapaq akllasqa iñiqmasinchikkunaqa ‘allin ruwaq runakunapaq coronatam’ chaskinqaku, chaytaqa señorninchik Jesusmi qunqa (2 Tim. 4:7, 8). Kay pachapi kawsakuyta suyaqkunaqa, ¿imatam chaskinqaku? Wara-waranqantin ‘sapaq ovejakunaqa’ wiñay kawsaytam chaskinqaku kay pacha sumaq huerta kaptin. Chaypim ‘paykunaqa kusikuywan hawkayaypi kawsanqaku’ (Juan 10:16; Sal. 37:11).

16. ¿Imanasqam 1 Juan 3:19, 20 nisqanqa kallpanchawanchik?

¹⁶ Wakinpiqa ichapas piensachwan Jehova Diospaq mana anchata ruwasqanchikta. Utaq tapukunchik: “¿Jehova Diosqa kusikunchu paypaq tukuy ima ruwasqaywan?”, nispa. Wakinpiñataqmi piensachwan Jehova Diosmanta mana imatapas chaskinanchikpaq hina kasqanchikmanta. Ichaqa manam haykapipas qunqananchikchu “ñuqanchikmanta aswan allinta sunqunchikta Diosninchik riqsisqanta, Diosqa lliwtamá yachan” (leey 1 Juan 3:19, 20). Tukuy sunquwan Diosta yupaychaptinchikqa, payqa bendeciwasunmi ruwasqanchik mana ancha chaninniyuq kasqanta piensaptinchikpas (Mar. 12:41-44).

17. ¿Imakunatam kunanpas Diosmanta chaskinchik?

¹⁷ Tukupay punchawkunapi hinaspa satanaspa munaychakusqan pachapim kawsanchik, chayna kaptinpas Jehova Diosqa kunanpas yupaychaqninkunataqa yanapawanchikmi. ¿Imaynata? Jehova Diosqa quwanchikmi palabranmanta yachachikuykunata hinaspa hawkayayta. Chaymantapas,  Jesuspa nisqanman hinam enteron pachapi kapuwanchik kuyawaqninchik iñiqmasinchikkuna (Is. 54:13; Mar. 10:29, 30). Diosqa maskaqninkunamanqa quntaqmi kusikuyta hinaspa hawkayayta (Filip. 4:4-7).

18, 19. ¿Imaynam tarikunchik Diosmanta chaskisqanchik bendicionkunapi yuyaymanaspa?

¹⁸ Taytanchik Jehova Diosqa enteron allpa pachapi iñiqmasinchikkunatam kallpanchakusqankumanta bendecichkan. Alemania nacionniyuq Bianca sutiyuq iñiqmasinchikmi Jehova Dios yanapasqanmanta nin: “Jehova Diostaqa ancha-anchatam agradecekuni sasachakuyniykunapi yanapaykuwasqanmanta hinaspa sapa punchaw kallpanchaykuwasqanmanta. Kay pachapiqa tukuy imaqa mana allinllañam ichaqa Jehova Diospaq llamkaspayqa manam manchakunichu. Jehova Diospaq imapas ruwasqaymantam payqa chaymanta pachaktaraq kutichipuwan”, nispa.

¹⁹ Canadá nacionmanta 70 watayuq Paula sutiyuq iñiqmasinchikpas chaynam tarikun, payqa wasa tullunwan sasachakusqanraykum mana llumpaytaqa imatapas ruwayta atinchu. Ichaqa manam chaywanqa harkachikunchu Diosmanta willakunanpaqqa. Paymi nin: “Diosmantaqa willakunim telefonontakama hinaspa maymanpas risqaypi. Kallpanchakunaypaqmi cuadernochaypi qillqani bibliapi hinaspa qillqanchikkunapi tarisqay yachachikuykunata, chayta qawa-qawarinaypaq. Chay cuadernochaytam sutichani ‘kallpanchawaqniy cuadernochay’, nispa. Jehova Diospa tukuy ima niwasqanchikmanta yuyaymanayqa, llakinchikkunatam chaylla chinkarachin. Jehova Diosqa imaña kaptinpas chaylla yanapaykuwananchikpaqmi kachkan”, nispa. Ichapas sasachakuyninchikkunaqa mana Biancapa hinaspa Paulapa hinachu. Ichaqa yuyachkanchikpaschá imaynatam Jehova Diosqa ñuqanchiktawan ayllunchikta bendeciwasqanchikmanta. Llapallanchikmi kallpanchasqa tarikunchik Dios imayna bendeciwasqanchikpi yuyaymanaspa hinaspa hamuq tiempopi imakunata ñuqanchikpaq ruwananmanta yuyaymanaspapas.

20. ¿Imamantam mana iskayrayasunchu Jehova Diospa munayninta ruwananchikpaq kallpanchakuspanchikqa?

²⁰ Manam haykapipas kaytaqa qunqananchikchu: Jehova Diosqa tukuy sunqunchikwan mañakusqanchiktaqa achkanpim quwasunchik. Manam iskayrayanchikchu ‘Diospa munasqanta ruwaspanchik paypa prometesqankunata chaskinanchikmantaqa’ (Heb. 10:35, 36). Chaynaqa, hinallayá kallpanchakusunchik Jehova Diospa munayninta ruwananchikpaq hinaspa paypi astawan iñinanchikpaqpas. Chayta ruwaspanchikqa, manam iskayrayasunchu Jehova Diospa bendicionninkunata chaskinanchikmantaqa (leey Colosenses 3:23, 24).