1. ¿Ima ruwanankupaqmi Diosqa serviqninkunata saqin tukuy atiyniyuq kaspanpas?

JEHOVA DIOSQA tukuy imatam unancharqa. Payqa pimantapas aswan yachayniyuqmi hinaspa tukuy atiyniyuqmi. Huk kutipim Diosta serviq Job sutiyuq runa nirqa Diosqa tukuy imapas nisqankunata ruwasqanta. Diospaqqa makillanpimá imapas ruwananpaqqa kachkan (Job 42:2). Payqa manam necesitanchu pipas yanapanantaqa, chaywanpas serviqninkunatam saqin payta yanapanankupaq. Chayna ruwasqanwanmi Diosqa qawachin kuyakuq kasqanta.

2. ¿Imapi yanapananpaqmi Jehova Diosqa Jesusta saqirqa?

² Jehova Diosqa churintam puntata unancharqa. Chaymantañataqmi churinta nirqa tukuy ima unanchaypi yanapananpaq (Juan 1:1-3, 18). Apostol Pablom nirqa: “Paynintakamam Dios unancharqa cielopi tukuy ima kaqkunatapas,  kay pachapi kaqkunatapas, tukuy ima rikusqanchiktapas chaynataq mana rikuy atisqanchiktapas”, nispa. Nirqataqmi: “Paynintakamam hinaspa paypaqtaqmi tukuy imapas unanchasqa karqa”, nispa (Col. 1:15-17). Jehova Diosqa churin kuyasqantam qawachirqa paywan kuska llamkananpaq saqispan hinaspa runakunaman chayta willaspan.

3. (1) ¿Imapi yanapananpaqmi Jehova Diosqa Adanta saqirqa? (2) ¿Imanasqataq chayta ruwananpaq saqirqa?

³ Jehova Diosqa saqirqataqmi runakuna yanapanantapas. Adantam nirqa lliw animalkunata sutichananpaq (Gen. 2:19, 20). Chay llamkaytaqa kusikuywanchá Adanqa ruwarqa. Animalkunata sutichananpaqqa yaqapaschá imayna kasqankuta allinta qawarqa. Jehova Diospaqa unanchasqanraykum chay ruwayqa mana sasachu kanman karqa. Chayna kaptinpas Adanta ancha kuyasqanraykum nirqa chayta ruwananpaq hinaspa kay allpa pachata sumaq huertaman tikrananpaq (Gen. 1:27, 28). Ichaqa tiempo risqanman hinam Adanqa Diosta qipanchaspan manaña yanapayta munarqañachu. Chaymi paypa miraynin kasqanchikrayku llapallanchik ñakarinchik (Gen. 3:17-19, 23).

4. ¿Pikunam Diospa munaynin ruwakunanpaq anchata llamkarqaku?

⁴ Chaymantapas Jehova Diosqa saqirqam Adanpa mirayninmanta kaqkunapas yanapananta. Noeymi ayllunkunapiwan sinchi paramanta salvakunankupaq buqueta ruwarqaku. Moisesmi Israel casta runakunata Egiptomanta hurqurqa, Josueyñataqmi Diospa prometesqan allpaman Israel casta runakunata yaykuchirqa. Salomonpas Diospa templontam ruwachirqa, Mariañataqmi Jesuspa maman karqa. Paykuna hinaspa Diosman sunqu achka runakunam Jehova Diospa munaynin ruwakunanpaq anchata llamkarqaku.

5. (1) ¿Imapim llapallanchik yanapakuchwan? (2) ¿Necesitanchu Jehova Diosqa runakuna paymanta willakunankuta? (Qaway 27 kaq paginapi dibujota).

⁵ Kunanpas Jehova Diosqa munachkanmi payman sayapakuspa tukuy kallpanchikwan llamkananchiktaqa. Chaypaqqa achka ruwaykunam kachkan. Ichaqa llapanchik mana chay ruwayllapi llamkaspanchikpas atichwanmi Diosmanta willakuytaqa. Jehova Diosqa manam paymanta runakuna willakunankutaraqchu necesitan, munaspanqa hanaq pachamanta rimariykamuspanmi kikinpuni runakunawan riqsichikunman. Huk kutipim Jesuspas nirqa: “Paykuna upallaruptinqa rumikunañach qaparinman”, nispa (Luc. 19:37-40). Chayna kaptinpas Diosqa saqiwanchikmi ‘llamkaqmasinkuna’ kananchikta (1 Cor. 3:9). Apostol Pablom qillqarqa: “Diospa yanapaqninkuna kaspaykum ruegakamuykiku, amayá despreciaychikchu Diospa hatun favornintaqa”, nispa (2 Cor. 6:1). Jehova Dioswan llamkayqa kusichiwanchikmi. ¿Imanasqa? Qatiqninpiyá chaymanta qawasun.

6. ¿Imaynam Jesusqa tarikurqa taytanwan llamkaspan?

⁶ Jehova Diosta yupaychaq runakunaqa kusikuywanmi paypaq llamkanchik. Jesusqa manaraq kay pachaman hamuchkaspanmi  Jehova Diospa ‘ruwaysiqnin maestro hina’ llamkarqa. Payqa yacharqam taytan llumpayta kuyasqanta, chaymi nirqa: “Tukuy tiempom paypa ñawpaqninpi kusikurqani”, nispa (Prov. 8:22, 30). Jesusqa taytanwan kuska llamkasqanmanta hinaspa kuyasqanta yachaspanmi kusisqa tarikurqa. ¿Jesus hinachu ñuqanchikpas kusisqa tarikunchik?

7. ¿Imanasqataq Diosmanta willakuyqa kusichiwanchik?

⁷ Jesusmi nirqa imatapas quspa hinaspa chaskispa kusikusqanchikmanta (Hech. 20:35). Jehova Diosmanta yachachiwaptinchikqa kusisqam tarikurqanchik. Chaynallataqmi ñuqanchikpas Jehova Diosmanta yachachispanchikqa kusikunchik. ¿Imanasqa? Diosmanta yachasqankuwan kusikusqankuta qawaspanchikmi. Kusikunchiktaqmi bibliapa yachachisqanman hina kawsakunankupaq kallpanchakusqankumantapas. Manam iskayrayanchikchu Diospa amistadnin kaspankuqa wiñay kawsayta haypanankumanta (2 Cor. 5:20). Diosmanta willakuymi imamantapas aswan allin llamkayqa hinaspapas chay ruwaymi anchata kusichiwanchik.

8. ¿Ima ninkutaq wakin iñiqmasinchikkuna Dioswan llamkasqankumanta?

⁸ Diospaqqa ancha chaninniyuqmi runakunaman yachachinanchikpaq tukuyta ruwasqanchikqa. Chayqa anchatam kusichiwanchik (leey 1 Corintios 15:58). Italia nacionmanta Marco sutiyuq iñiqmasinchikmi nin: “Anchatam kusikuni Diospaq tukuyta ruwasqaywan, payqa manam qunqanchu chay ruwasqaytaqa”, nispa. Chay nacionmanta Franco sutiyuq iñiqmasinchikpas ninmi: “Sapa punchawmi bibliatawan qillqanchikkunata ñawinchaspay hinaspa huñunakuykunaman rispay musyakuni Dios kuyawasqanchikta. Paypaq tukuy ruwasqanchik pisilla rikchakapuwaptinchikpas paypaqqa ancha  chaninniyuqmi. Chaymi paywan kuska hinalla llamkayta munani”, nispa.

9. (1) ¿Imaynam Jehova Dioswan Jesusqa llamkarqaku? (2) ¿Imanasqataq Jehova Dioswan Jesusqa huklla karqaku?

⁹ Kuyasqanchik runawan llamkaspaqa astawanmi chay runa kuyayta qallaykunchik. ¿Imanasqa? Imayna kasqanta allintaña riqsisqanchikrayku hinaspa imakuna ruway munasqanta yachasqanchikraykum. Chaynam karqaku Jehova Dioswan Jesuspas. Jesusqa manaraq kay pachaman hamuchkaspanmi wara-waranqantin watakuna taytanwan kuska hanaq pachapi llamkarqa, chaynapim allinta riqsinakurqaku. Chaychá nirqa: “Taytaywanqa hukllam kaniku”, nispa (Juan 10:30). Arí, paykunaqa hukllam karqaku kusisqallaña kuska llamkasqankurayku.

10. ¿Imanasqataq Diosmanta willakuyqa paymanwan iñiqmasinchikkunaman asuykachiwanchik?

¹⁰ Jesusqa qatiqninkunata yanapaykunanpaqmi taytanta mañakurqa. ¿Imanasqa? Paykunapas Dioswan Jesus hina “huklla kanankupaq” (Juan 17:11). Jehova Diospa kamachikuyninkunata kasukuspa hinaspa paymanta willakuspaqa imayna kasqantam allinta riqsisun. Chayqa Diospi hapipakunapaq hinaspa payta imapipas kasukunapaqmi yanapawasun. Chayta ruwaspanchikmi payman asuykusun hinaptinmi paypas asuykamuwasun (leey Santiago 4:8). Diosmanta willakuyqa iñiqmasinchikkunamanpas asuykachiwanchikmi. Paykunapas ñuqanchik hinam sasachakuykunata atipachkanku, Diosta kasukunankupaq tukuyta ruwachkanku hinaspa Diosta servispa kusikunku. Tukuy chaykuna ruwasqankunata qawasqanchikmi paykunaman asuykachiwanchik. Gran Bretaña nacionmanta Octavia sutiyuq iñiqmasinchikmi nin: “Jehova Dioswan kuska llamkayqa paymanmi asuykachiwan hinaspa iñiqmasiykunamanpas”, nispa. ¿Imanasqa? Hina kikillanmi nin amistadninkuna Diosta kasukunankupaq tukuyta ruwasqankurayku. ¿Manachu ñuqanchikpas chayna tarikunchik?

11. ¿Imanasqataq musuq pachapiqa Dioswan hinaspa iñiqmasinchikkunawan aswan huk sunqulla kasun?

¹¹ Jehova Diostawan iñiqmasinchikkunataqa kuyanchikmi. Ichaqa kay allpa huertayachisqa kaptinmi astawanraq kuyasun. Chaypiqa kusikuywanmi kawsarimuqkunata chaskiykusun, Diosmanta yachaykachisun hinaspa kay pachata huertayachinapaq llamkasun. Ancha kusikuypaqmi kanqa llapallanchik kuska llamkayqa hinaspa pantaq runa kasqanchikmanta pisi-pisimanta allinyaypas. Diosqa ‘makillanta kicharispam llapallan kawsaqkunaman’ sunqunchikpa munasqanta quykuwasun (Sal. 145:16).

12. ¿Imanasqataq Diosmanta willakuyqa mana allinkunamanta harkawanchik?

¹² Pantaq runakuna kasqanchikrayku hinaspa satanaspa munaychakusqan pachapi kawsasqanchikraykum Diosmanta karunchasqa runakuna hina kawsaytaña qallaykuchwan. Chaymi anchata kallpanchakunanchik  Dioswan amistadninchikta mana yanqacharunapaq. Chayqa, mayu apasuptiki tukuyta ruwaspa wañuymanta lluptichkaq hinam. Diosmanta willakuymi yanapawanchik paywan amistadninchikta mana yanqacharunapaq. ¿Imanasqa? Diosmantawan bibliamanta rimaptinchikqa umanchikpas allin kaqkunallatañam piensan (Filip. 4:8). Yanapawanchiktaqmi bibliapa tukuy ima nisqankunata mana qunqanapaq hinaspa allin runakuna kananchikpaqpas. Tukuy chaykunam kay pachapi mana allinkunamanta harkawanchik (leey Efesios 6:14-17).

13. ¿Imanasqataq Joel sutiyuq iñiqmasinchikqa Diosmanta willakuyta chaninchan?

¹³ Diosmanta willakuy, biblia estudiay hinaspa iñiqmasinchikkunata yanapayqa anchatataqmi yanapawanchik sasachakuyninchikkunallapi ama llumpayta piensanapaq. Australia nacionmanta Joel sutiyuq iñiqmasinchikmi Diosmanta willakuspan musyakun runakunaqa llakikuypaq kasqankuta. Musyakunkutaqmi bibliapa yachachikuyninkuna payta yanapasqantapas. Chaymi nin: “Diosmanta willakuyqa yanapawanmi mana hatun tukuq kanaypaq chaynataq Diosmanta hinaspa iñiqmasiykunamanta mana iskayrayanaypaq”, nispa.

14. ¿Imataq qawachin Diospa chuya espiritun yanapawasqanchikta?

¹⁴ Diosmanta willakusqanchikmi qawachin Diospa chuya espiritun yanapawasqanchikta. Kaypi yuyaymanay: Sichum pipas nisunkiman wasin-wasin tantata aypumunaykipaq, hinaspa qullqikita gastaykusparaq chayta ruwanaykipaq. Hinaptinñataq wasiyuqkuna wischupakuspanku chiqnisunkimanraq mana imallapaq chaykunata ruwachkaptikipas. ¿Hayka unaytaq chayta ruwawaq? Chayllachá amiruwaq ¿aw? Yaqa chaynam Diosmanta willakusqanchikqa, ñuqanchikpas tiemponchiktawan qullqinchikta servichikuspam runakunaman willakuchkanchik, hinachkaptinpas paykunaqa asikuwanchikmi hinaspa chiqnikuwanchikmi. Ichaqa mana amispam hinalla Diosmanta willakuchkanchik. Chaymi qawachin Diospa chuya espiritun yanapawasqanchikta.

15. ¿Imanasqataq Diosmanta willakunchik?

¹⁵ Jehova Diosqa qallariymantapacham munarqa runakuna wiñaypaq kawsakunanchikta, Adanwan Eva huchallikuruptinkupas hinallam munachkan wiñaypaq kawsakunanchiktaqa (Is. 55:11). Chaymi wañuymantawan huchamanta librawananchikpaq churinta kay pachaman kachamurqa ñuqanchikrayku wañunanpaq.  Ichaqa manam lliw runakunachu wiñay kawsaytaqa chaskinqaku aswanqa Diospa kamachikuyninkunata yachaspa kasukuqkunallam. Chaytam Jesusqa yachachirqa, hinaspam qatiqninkunata kamachirqa runamasinkunamanpas yachachinankupaq. Chaymi Diosmanta willakunchik hinaspam runakunata yanapanchik Dioswan amistad kanankupaq. Chayta ruwaspam Jehova Diosta yanapanchik huchamantawan wañuymanta runakunata libraypi.

16. ¿Imatam qawachinchik Diosmanta willakuspaqa?

¹⁶ Jesustam huk fariseo runa tapurqa mayqin kamachikuy aswan hatun kasqanmanta, chaymi Jesusñataq nirqa: “‘[Jehova] Diosnikitam kuyanki tukuy sunquykiwan, tukuy vidaykiwan hinaspa tukuy yuyaynikiwan,’ nispa. Kaymi punta kaq hatun kamachikuy. Qatiqninñataqmi nin: ‘Kuyankim runamasikita kikikita hina’, nispa” (Mat. 22:37-39). Jesuspa kayna nisqantam kasukunchik runakunaman Diosmanta willakuspa chaynapi wiñay kawsayta chaskinankupaq (leey Hechos 10:42). Jehova Diosqa munanmi ‘llapallan runakuna salvakunankuta hinaspa chiqap yachachikuy riqsinankuta’ (1 Tim. 2:4).

17. ¿Ima niwaqtaq Jehova Dioswan kuska llamkaymanta?

¹⁷ Ancha kusikuypaqmi Jehova Dioswan kuska llamkayqa. ¿Imanasqa? Paywan kuska llamkaspaqa paytawan iñiqmasinchikkunatam astawan kuyanchik chaytaqmi kay pachapi mana allinkunamantapas harkawanchik. Llapanchikmi atisqanchikman hina tukuyta ruwaspa Diosmanta willakunapaq kallpanchakuchkanchik, apupas, wakchapas, yuyaqpas, mozo-sipaspas, unquqpas. Francia nacionniyuq iñiqmasinchikmi nin: “Tukuy ima unanchaq hinaspa kusisqa kaq Diosmi niwan: ‘Rispaykiyá tukuy sunquykiwan ñuqamanta willakamuy. Ñuqam yanapasqayki, kallpata hinaspa palabrayta quspay, angelkunatawan qanwan kuska willakuqkunatam kachamusqayki. Imata hinaspa imayna ruwanaykipaqmi yachachisqayki’, nispa. Jehova Diosqa paywan kuska llamkananchiktam munan. ¡Mayna kusikuypaqmi chayqa!”. ¿Manachu ñuqanchikpas pay hina tarikunchik?