1, 2. (1) ¿Kay tiempopi imakuna kananmantam Jehova Diosqa willakurqaña? (2) ¿Ima tapukuykunamantam kaypi yachasunchik? (Qaway kay paginapi kaq dibujota).

JEHOVA DIOSMI kay tiempokunamanta rimaspan nirqa: ‘Chay punchawkunapim tukuy rikchaq rimayniyuq huk law nacionkunamanta chunka runakuna Juda nacionniyuq runata capanmanta hapipakuruspa ninqaku: “Qamkunawan riytam munaniku, qamkunawan Dios kasqantam uyariruniku”, nispanku’ (Zac. 8:23). “Juda nacionniyuq runa”, nispaqa rimachkan hanaq pachapaq akllasqakunamantam. Paykunatataqmi bibliapiqa sutichan “Diospa Israelnin”, nispa (Gal. 6:16). “Chunka runakuna” nispanñataqmi rimachkan kay pachapi wiñaypaq kawsakuy suyaqkunamanta. ¿Imanasqataq paykunaqa hanaq pachapaq akllasqakunawan riyta munanku? Yachankum Jehova Diosqa paykunapa ruwasqankuta allinpaq qawasqanta hinaspa paykunawan kuska Dios yupaychay sumaq kasqantapas.

² Zacariaspa nisqanman hinam Jesuspas yachachirqa Jehova  Diosta yupaychaqkunaqa huk llaqta hinalla kanankumanta. Paymi hanaq pachapaq akllasqakunata suticharqa “aslla” ovejakuna, nispa. Kay pachapi kawsakuy suyaqkunatañataqmi ‘sapaq ovejakuna’, nispa. Hinaspam nirqa llapanku huk kanchallapi ovejakuna hina kanankumanta hinaspa payllata michiqninta hina qatikunankumantapas (Luc. 12:32; Juan 10:16). Ichapas chayrayku tapukunchik: ¿Yachananchikchu kay tiempopi lliw akllasqakunapa sutinkuta? ¿Imaynataq hanaq pachapaq akllasqakunaqa kananku? Pipas Jesuspa wañukusqanta yuyarinapaq huñunakuypi tantata mikuptin hinaspa vinota tomaptinqa, ¿imaynatam qawananchik? ¿Hukmanyananchikchu “hanaq pachapaq akllasqam kani”, niqkunata yupasqanchik astawan yapakuptin? Kaypim chaykunamanta yachasunchik.

3. ¿Imanasqataq mana atichwanchu yachayta pikuna hanaq pachaman rinankumantaqa?

³ Kay tiempopi akllasqakunapa sutinku yachaytaqa manam maskananchikchu. ¿Imanasqa? Manamá yachakunraqchu hanaq pachaman rinanku utaq mana rinankupas ^[1] (qaway 25 kaq paginapi willakuyta). Jehova Diosqa hanaq pachaman rinankupaqmi akllaykun, ichaqa payman sunqu kaspallankum hanaq pachamanqa rinqaku. Chaytam satanasqa yachan, chaymi “Diosmanta willakuq tukuq” runakunata valekuspan akllasqakunatapas Diosmanta karunchayta munan (Mat. 24:24). Akllasqakunaqa Jehova Dios chaskiykuptinñam hanaq pachaman rinankutaqa yachanqaku. Jehova Diosqa, manaraq wañukuchkaptinku utaq hatu-hatun ñakariy punchaw qallaykunanpaq kachkaptinñam chaskiykusqantaqa willan (Apoc. 2:10; 7:3, 14).

4. Kay pachapi wiñaypaq kawsakuy suyaqkuna, hanaq pachapaq akllasqakunapa sutinkuta mana yachaspankuqa, ¿imaynataq ninmanku: “Qamkunawan riytam munaniku”, nispankuqa?

⁴ Kay pachapi wiñaypaq kawsakuy suyaqkuna, hanaq pachapaq akllasqakunapa sutinkuta mana yachaspankuqa, ¿imaynataq ninmanku: “Qamkunawan riytam munaniku”, nispankuqa? Bibliapim nin: ‘Chunka runakunam Juda nacionniyuq runata capanmanta hapipakuruspa ninqaku: “Qamkunawan riytam munaniku, qamkunawan Dios kasqantam uyariruniku”, nispanku’. Kaypiqa rimachkan Juda nacionniyuq runamantam chaymantañataqmi nichkan qamkunawan nispa. Chay Juda nacionniyuq runaqa manam huk runallachu, aswanqa hanaq pachaman rinankupaq llapallan akllasqakunam. Kay pachapi kawsakuy suyaqkunaqa chaytam yachanku, chaymi hanaq pachapaq akllasqakunawan kuska Jehova Diosta yupaychanku. Manam sapakamapa sutinku yachaytaraqchu munanku. Bibliapiqa manam paykunata qatipakunanchikpaqchu niwanchik aswanqa Jesusllata qatipakunapaqmi (Mat. 23:10).

5. ¿Imapim hanaq pachapaq akllasqakunaqa allinta yuyaymanananku?, ¿imanasqa?

⁵ Hanaq pachapaq akllasqakuna Jesucristopa wañukusqanta yuyarinapaq huñunakuypi tantata mikuspanku chaynataq vinota tomaspankuqa 1 Corintios 11:27-29 (leey), nisqanpim allinta yuyaymanananku. ¿Imanasqa? Mayqanninkupas Dioswan amistadninpi mana allin tarikuchkaspan chayta  ruwaspanqa huchallikuchkanmi (Heb. 6:4-6; 10:26-29). Kayna nisqanqa manam yanqallachu. Hanaq pachapaq akllasqa kachkaspanpas iñiyninpi mana allinta takyaspanqa, manam ‘Diospa qayasqan premiotaqa chaskinqachu’ (Filip. 3:13-16).

6. ¿Imaynam hanaq pachapaq akllasqakunaqa kananku?

⁶ Hanaq pachapaq akllasqakunatam apostol Pablo nirqa: ‘Ruegakamuykichikmi allinta kawsanaykichikpaq, chaypaqmi Diosqa qayasurqankichik’, nispa. ¿Imaynatam chayta ruwananku karqa? Pablom nirqa: ‘Humillakuspayá llampu sunqulla hinaspa pacienciakuq kaychik, imamanta faltanakuruspapas kuyakuywanyá aguantanakuychik’, nispa. Chaymantapas kallpancharqam huk sunqulla hinaspa hawkalla kawsakunankupaq (Efes. 4:1-3). Jehova Diospa chuya espiritunmi pay yupaychaqkunataqa yanapawanchik mana hatun tukuspa llampu sunqulla kanapaq (Col. 3:12). Chaymi hanaq pachapaq akllasqakunaqa mana hatun tukunkuchu. Manam piensankuchu akllasqa kasqankurayku wakiqninmanta astawan chuya espirituyuq kasqankutaqa, nitaq bibliatapas wakiqninmanta astawan entiendesqankutapas. Manataqmi pitapas hikutankuchu tantata mikunankupaq hinaspa vinota tomanankupaqqa. Mana hatun tukuq kasqankuraykum yachanku hanaq pachaman rinapaqqa Jehova Dioslla akllasqanta.

7, 8. (1) ¿Imakunatam hanaq pachapaq akllasqakunaqa mana ruwankuchu? (2) ¿Imanasqataq chaykunataqa mana ruwankuchu?

⁷ Hanaq pachaman rinankupaq akllasqa kasqanku sumaq kasqanta yachaspankupas paykunaqa manam munankuchu ancha riqsisqa runakunata hina iñiqmasinkuna qawanankutaqa (Efes. 1:18, 19; leey Filipenses 2:2, 3). Jehova Diosqa manam lliw runakunapa qayllanpichu hanaq pachaman rinankupaqqa akllarqa. Chaymi chayllaraq akllasqa kaspankuqa musquyninkupipas kachkanman hina tarikunku. Bibliapim willawanchik, sichum pipas “Diosmi kayta utaq wakta ruwanaypaq akllaykuwan” niqkunataqa mana chaylla kasunapaq (Apoc. 2:2). Pitapas chayllaraq riqsispankuqa manam willakunkuchu hanaq pachaman rinankupaq akllasqa kasqankumantaqa. ¿Imanasqa? Manamá munankuchu ancha riqsisqa runata hina qawanankutaqa. Ichapas wakinkuqa mana pimanpas willakunkumanchu. Manataqmi hanaq pachapi imakuna ruwanankumantapas alabakunkuchu (1 Cor. 1:28, 29; leey 1 Corintios 4:6-8).

⁸ Hanaq pachapaq akllasqakunaqa manam munankuchu akllasqamasinkunallawan hukllawakuytaqa. Manataqmi paykunapuralla huñunakuytaqa maskankuchu bibliata estudianankupaqpas nitaq yachasqankumanta rimanankupaqpas (Gal. 1:15-17). Kaykunata ruwaspankuqa Diospa llaqtanpi huk sunqulla kawsakusqanchiktam yanqachachkanmanku. Chaynaqa Diospa chuya espirituntach qipanchachkanmanku (leey Romanos 16:17, 18).

9. ¿Imatam mana ruwananchikchu hanaq pachapaq kaqkunata?, ¿imanasqa? (Qaway “Kuyakuqqa ‘manam pinqaypaq ruwaqchu’” niq yachachikuyta).

⁹ Jesusmi qatiqninkunata nirqa: ‘Qamkunaqa wawqintillanmi kankichik. [...] Pipas hatunchakuqqa humillasqam kanqa, pipas humillakuqñataqmi hatunchasqa kanqa’, nispa (Mat. 23:8-12). Chaynaqa pitapas hatunchayqa manam allinchu kanman, hanaq  pachapaq akllasqa kaptinpas manam chaytaqa ruwanachu. Bibliapim niwanchik ancianokunapa iñiyninkuta qatipakunanchikpaq, ichaqa manam niwanchikchu pi runatapas qatipakunapaqqa (Heb. 13:7, CQ12). Bibliapiqa niwanchiktaqmi Diosmanta willakuypi hinaspa yachachiypi kallpanchakuqkunataqa ‘allinpaq hapinanchikta’, ichaqa manam hanaq pachapaq akllasqa kasqankuraykuchu (1 Tim. 5:17). Hanaq pachapaq akllasqakunata hatunchaspaqa utaq riqsisqa runakunata hina qawaspaqa pinqarachichwanmi. Utaqmi hatun tukuq kananpaq kallpanchachkachwan (Rom. 12:3). Manamá ima ruwasqanchikwanpas huchallichiytaqa munanchikchu (Luc. 17:2).

10. ¿Imakunatam mana ruwananchikchu hanaq pachapaq akllasqakunata kuyaspanchikqa?

¹⁰ ¿Imakunatam mana ruwananchikchu hanaq pachapaq akllasqa iñiqmasinchikkunata kuyaspaqa? Manam tapunanchikchu imayna akllasqa kasqankumantaqa, chayqa paykunapa vidanmi (1 Tes. 4:11; 2 Tes. 3:11). Manataqmi piensanchikchu qusanpas, warminpas, tayta-mamanpas nitaq pi ayllunkunapas hanaq pachapaq akllasqa kasqankumantaqa. Diosqa manam lliw aylluntintachu akllan (1 Tes. 2:12). Hanaq pachapaq akllasqa iñiqmasinchikpa warminqa ichapas mana akllasqachu kanman. Chaynaqa manam hukmanchinapaq hinaqa tapupayananchikchu, kay allpa huertayachisqa kaptin sapallan kaspan imayna tarikunanmantaqa. Jehova Diosqa imapas munasqanchiktamá quykullawasun (Sal. 145:16).

11. ¿Imanasqataq pi runatapas llumpaytaqa mana alabanachu?

¹¹ Hanaq pachapaq akllasqakunata wakin iñiqmasinchikkunata hina qawayqa allinninchikpaqmi kanqa. ¿Imanasqa? Bibliapim willawanchik ñuqanchikwan kuska ‘iñiqmasinchik tukuqkuna’ kananmanta, paykunaqa ninmankuraqmi hanaq pachapaq akllasqa kasqankutapas (Gal. 2:4, 5; 1 Juan 2:19). Hanaq pachapaq akllasqa kachkaspankupas wakinkuqa Jehova Diostam qipancharunmanku (Mat. 25:10-12; 2 Ped. 2:20, 21). Judasmi bibliata qillqaspan nirqa, runakunata llumpay alabayqa mana allin kasqanmanta. Huk rimaypiqa nichkarqa, hanaq pachapaq akllasqa kaptinkupas, riqsisqa kaptinkupas utaq unay watakunaña Jehova Diosta yupaychaptinkupas paykunataqa mana qatikunamantam. Chaynapim Jehova Diosta qipancharuptinkupas, ñuqanchikqa iñiyninchikpi hinalla takyasunchik (Jud. 16).

12, 13. ¿Imanasqataq mana hukmanyananchikchu Jesuspa wañukusqan huñunakuypi tanta mikuqkunawan vino tomaqkuna achkayasqankuwanqa?

¹² Unay watakunañam Jesuspa wañukusqanta yuyarinapaq huñunakuypi tantata mikuq hinaspa vinota tomaqkunaqa asllayachkarqakuña. Ichaqa kay pasaq watakunallapim astawan achkayachkanku. ¿Chayraykuchu hukmanyananchik? Manam. ¿Imanasqa?

¹³ Jehova Diosqa ‘riqsinmi paypa kaqkunataqa’ (2 Tim. 2:19, CQ12). Payqa yachanmi pim hanaq pachapaq akllasqa utaq mana akllasqa kasqantapas. Ichaqa Jesuspa wañukusqanta yuyarinapaq huñunakuypi tanta mikuqkunata hinaspa vino tomaqkunata yupaq iñiqmasinchikkunaqa manam yachankuchu. Chaymi yupasqankupiqa kachkan mana akllasqa kachkaspankupas akllasqa kasqankuta piensaqkunapiwan. Wakinkum puntataqa tantata mikuqku hinaspa  vinota tomaqku, pasaq watakunapiñataqmi chay ruwaytaqa saqirurqaku. Wakinkuñataqmi chayta ruwanmanku umanku mana allin kaptin utaq mana kaqkunata piensasqankurayku. Chaymi allillaqa mana yachanchikchu hanaq pachaman rinankupaq akllasqakunamanta haykaraq kay pachapi kasqankutaqa.

14. Hanaq pachapaq akllasqakunamantaqa, ¿haykaraqtaq kay pachapi puchunqaku Diospa piñakuynin punchaw qallariptinqa?

¹⁴ Manam huk hawaqllapichu hanaq pachapaq akllasqakunaqa kanqaku Jesucristo pusananpaq hamuptinqa. Jesusmi nin: “Angelniykunatam kamachisaq trompetata nisyuta tocastin akllasqaykunata lliw nacionkunamanta hinaspa tukuy hinastinmanta huñumunankupaq”, nispa (Mat. 24:31). Bibliapim willawanchik hanaq pachapaq akllasqakunaqa tukupay punchawkunapi asllaña kay pachapi puchunankumanta (Apoc. 12:17). Ichaqa manam ninchu Diospa piñakuynin punchawpi hayka kanankumantaqa.

15, 16. ¿Imakunatawanmi hanaq pachapaq akllasqakunamantaqa yachananchik?

¹⁵ Jehova Diosllam yachan hanaq pachapaq kaqkunata haykapi akllaytaqa (Rom. 8:28-30). Jesuspa kawsarimusqan qipallatam Jehova Diosqa hanaq pachapaq kaqkunata akllayta qallaykurqa. Chay watakunapiqa Jesuspa qatiqninkunaqa yaqa lliwchusmi hanaq pachapi kawsakunankupaq akllasqa karqaku. Chaymanta pasaq watakunamanqa unay watakunam Jesuspa qatiqnin tukuspanku niqku: Hanaq pachapaq akllasqam kani, nispanku. Paykunaqa yaqa llapankum mana akllasqachu karqaku. Chayna kaptinpas karqam chuya espiritunwan hanaq  pachapaq Diospa akllasqan runakunaqa. Paykunaqa Jesuspa nisqanman hina, mana allin qurakunapa chawpinpi wiñaq trigo hinam karqaku (Mat. 13:24-30). Kay tukupay punchawkunapipas Jehova Diosqa hinallam akllachkan hanaq pachapi kawsakunankupaq kaqkunataqa. ^[2] Jehova Diospa piñakuynin punchaw hichpaykamusqanpi pitapas hanaq pachapaq akllaptinqa, allinpaqmi qawana Diospa ruwasqantaqa (Is. 45:9; Dan. 4:35; leey Romanos 9:11, 16). ^[3] Manam Jesuspa tupachisqan mana allin runakuna hina kaytaqa munanchikchu. Paykunaqa patronninkumantam mana allinta rimarqaku inti siqaykuytaña huk llamkaqkuna chaskisqanmanta (leey Mateo 20:8-15).

¹⁶ Hanaq pachapaq akllasqakunaqa manam llapankuchu ‘yuyayniyuq confianza sirvientepa’ partenqa kanku (Mat. 24:45-47). Apostolkunapa tiemponpi hinam kunanpas Jehova Dioswan Jesusqa as runakunallata servichikunku achka runakunaman Diosmanta yachachinankupaq. Chay tiempokunapiqa hanaq pachapaq akllasqakunamanta wakillankum griego rimaypi bibliapa partentaqa qillqarqaku. Kay tiempopipas hanaq pachapaq akllasqakunamantaqa wakillankum kamachisqa kanku ‘horallanpi mikuchichkaq’ hina Diosmanta yachachikuykunata quwananchikpaq.

17. ¿Imamantam kay yachachikuypi yacharunchik?

¹⁷ ¿Imakunamantam kay yachachikuypi yacharunchik? Jehova Diosmi tantearun payta yupaychaq runakunaqa yaqa llapanku kay pachapi wiñaypaq kawsakunankupaq, Jesuswan kuska kamachiqkunatañataq hanaq pachapi kawsanankupaq. Jehova Diosqa lliw yupaychaqninkunamanmi hatun kuyakuyninta qunqa. Payqa munan hanaq pachapaq akllasqakunapas chaynataq kay pachapi wiñaypaq kawsakuy suyaqkunapas kamachikuyninkuna kasukunankuta hinaspa payman sunqu kanankutam. Iskayninkum Jehova Diostaqa huk sunqulla yupaychananku. Iskayninkutaqmi Diospa llaqtanpiqa hawkalla kawsakunankupaqpas kallpanchakunanku. Jehova Diospa piñakuynin punchaw chayamunankamaqa hinallayá Jehova Diosta yupaychasunchik hinaspa Jesusta qatipakusun huk kanchallapi ovejakuna hina.