1, 2. (1) ¿Imaynatam Yoshiko iñiqmasinchikta Isaias 41:10 nisqanqa yanapaykurqa? (2) Isaias 41:10 nisqanqa, ¿pikunatawanraqmi kallpanchanman?

YOSHIKO sutiyuq warmi iñiqmasinchiktam huk doctora llaki willakuyta willarqa. Paytam nirqa unqusqanrayku pisi tiempolla kawsakunanmanta. Chayta uyariruspan, ¿imaynam Yoshiko iñiqmasinchikqa tarikurqa? Payqa Isaias 41:10 nisqantam yuyarirqa (qaway). Hinaspam doctorata nirqa mana manchakusqanmanta, nirqataqmi Jehova Diospi hapipakusqanmanta. * Isaias qillqapi nisqanmi payta yanapaykurqa tukuy sunqunwan Jehova Diospi hapipakunanpaq, chaynataq sunqunpi hawka kananpaqpas. Isaias qillqapi nisqanqa ñuqanchiktapas yanapawasunmi imawanpas ñakarispanchik hawka kananchikpaq. Chaykunamanta allinta yachananchikpaqqa yachasunyá imanasqataq Jehova Diosqa Isaiasta chaynata nisqanmanta.

² Isaias 41:10 nisqantaqa Jehova Diosqa Isaiastam nirqa judiokunata yanapananpaq. Paykunaqariki Babilonia nacionmanmi apasqa kananku karqa. Jehova Diosqa chay nisqankunatam qillqachirqa qipa punchawkunapipas yupaychaqninkunata yanapawananchikpaq (Is. 40:8; Rom. 15:4). Arí, ‘sasallaña punchawkunapim kachkanchik’, chaymi ñuqanchiktapas Isaiaspa qillqasqanqa kallpanchawachwan (2 Tim. 3:1).

3. (1) Isaias 41:10 nisqanpiqa, ¿imatam Jehova Diosqa niwanchik? (2) ¿Imanasqataq Jehova Diospa chay nisqankunapi hapipakunanchik?

³ Kay yachachikuypim yachasunchik Isaias 41:10 Jehova Dios ima nisqanmanta hinaspa iñiyninchikpi imaynata yanapawananchikmanta. Chay textom kay 2019 watapaq akllasqa kachkan. Isaias 41:10 Jehova Diosqa niwanchik ñuqanchikwan kananmanta, Diosninchik kasqanmanta hinaspa yanapawananchikmantapas. ¿Imanasqataq Jehova Diospa  chayna nisqankunapi hapipakunanchik? * Yoshiko iñiqmasinchik hina sasachakuykunapi tarikusqanchikraykum. Chaymantapas Diosmanta willakusqanchikta autoridadkuna harkakusqankuraykum.

4. (1) ¿Jehova Diospa ima niwasqanchikmantam yachasunchik? (Qaway willakuyta). (2) ¿Imatam Jehova Diosqa kuyawaspanchik niwanchik? (3) ¿Imaynam tarikunki Jehova Dios kuyasusqaykita yachaspaqa?

⁴ Jehova Diosqa sunqunchiktam tiyaykachiwanchik kaynata niwaspanchik: “Amayá manchakuychikchu, qamkunawanmi kachkani”, nispa. Payqa ñuqanchikwan kasqantam qawachiwanchik kuyawaspanchik hinaspa mañakusqanchikta uyariwaspanchik. Jehova Diosmi kuyawaspanchik kaynata niwanchik: “Qamtaqa allinpaqmi qawayki ancha kuyasqaymi kanki”, nispa (Is. 43:4). Arí, Jehova Diostaqa manam imapas harkanqachu serviqninkunata hinalla kuyananpaqqa (Is. 54:10). Jehova Dios kuyawasqanchikta yachayqa anchatam kallpanchawanchik. Imaynam payqa Abramta (Abrahamta) waqaycharqa, chaynam kunanpas waqaychawasun. Jehova Diosmi payta nirqa: ‘Abram, ama manchakuychu, ñuqam waqaychasqayki’, nispa (Gen. 15:1). *

5, 6. (1) ¿Imanasqataq ninchik sasachakuyninchikkunapi Jehova Dios yanapayta munawasqanchikta? (2) ¿Imatam yachachwan Yoshiko iñiqmasinchikmanta?

⁵ Jehova Diosqa sasachakuyninchikkunapim yanapayta munawanchik, chaymi niwanchik: ‘Yakunta riptikipas, qanwanmi kasaq, mayuta chimpaptikipas, manam apasunkichu, nina ukunta pasaptikipas, manam rupasunkichu, linwachkaq ninapas manam kañasunkichu’, nispa (Is. 43:2). ¿Ima ninantaq chayqa?

⁶ Jehova Diosqa manam niwanchikchu sasachakuyninchikkunata kunan chinkachinanmantaqa. Ichaqa payqa manam saqinqachu mayu hina sasachakuykuna paymanta karunchawananchiktaqa, nitaq nina hina sasachakuykuna wiñaypaq ñakarichiwananchiktaqa. Jehova Diosqa niwanchikmi chay  sasachakuykunata atipananchikpaq yanapawananchikmanta. Yanapawasuntaqmi hawka tarikunanchikpaq, chaynapi payman sunqu hinalla kananchikpaq wañunanchik kaptinpas (Is. 41:13). Chaynatam yanaparqa qallariypi rimamusqanchik Yoshiko iñiqmasinchikta. Paypa wawanmi nin: “Mamayqa hawkam kachkarqa, Jehova Diosmi payta sunqunpi hawka kananpaq yanaparqa. Wañukusqan punchawpipas payqa hinallam wakin unquqkunamanpas hinaspa enfermerakunamanpas Diosmanta willakurqa”, nispa. ¿Imatam yachachwan Yoshiko iñiqmasinchikmanta? “Qamkunawanmi kachkani” nispa Diospa niwasqanchikpi mana iskayrayaspanchikqa ñuqanchikpas sasachakuykunatam atipasun.

7, 8. (1) ¿Jehova Diospa ima niwasqanchikmantawanmi yachasunchik, hinaspa ima ninantaq ‘hukmanyayqa’? (2) ¿Imanasqataq Jehova Diosqa Babiloniapi tarikuq judiokunata nirqa ama hukmanyanankupaq? (3) Isaias 46:3, 4 nisqanman hinaqa, ¿imatam Jehova Diosqa nirqa yupaychaqninkunata hawkayachinanpaq?

⁷ Jehova Diosqa niwanchiktaqmi: ‘Amayá hukmanyaychikchu, ñuqam Diosnikichik kani’, nispa. Hebreo rimaypi ‘hukmanyay’ nisqanqa piensachiwanchikmi “imapas utaq pipas imanaruwananchikmanta manchakuspa qipanchikta qawarikuy” utaq “mancharisqallaña tukuy lawta qawarikuy”.

⁸ ¿Imanasqataq Jehova Diosqa Babilonia nacionman apasqa judiokunata nirqa ama hukmanyanankupaq? Jehova Diosqa yacharqam Medopersia tropankuna Babilonia llaqtata munaychakuptinku chaypi yachaq runakunaqa mancharisqallaña kanankumanta. Chayqa kanan karqa judiokuna Babiloniaman apasqa kasqankumanta 70 wata pasaytam. Chay tropakunatam Jehova Diosqa servichikunan karqa llaqtanta librananpaq (Is. 41:2-4). Medopersia tropakuna hichpallapiña kasqanta yacharuspankum Babilonia llaqtayuq runakunaqa hinaspa wakin runakunapas kikinkupura ninakurqaku: ‘¡Kallpanchakusunyá!’, nispa. Chaymantapas astawanmi taytacha-mamachakunata ruwarqaku paykunata libraykunanta piensaspanku (Is. 41:5-7). Jehova Diosmi ichaqa yupaychaqninkunataqa hawkayachirqaña kaynata nispan: ‘Serviqniy Israelpa mirayninkuna [...] ñuqam Diosnikichik kani’, nispa (Is. 41:8-10). ‘Ñuqam Diosnikichik kani’ nispanqa, Jehova Diosqa payman sunquyuq judiokunatam nichkarqa paykunata mana qunqasqanmanta hinaspa hinalla llaqtan kasqankumanta. Nirqataqmi lluptinankupaq yanapananmantapas. Chayqa judiokunataqa anchatachá kallpancharqa (qaway Isaias 46:3, 4).

9, 10. ¿Imanasqataq mana hukmanyananchikchu? Willarimuy huk rikchanachiywan.

⁹ Kay tiempopiqa runakunaqa aswan hukmanyasqam tarikunku kay pachapi tukuy mana allinkunata qawaspanku. Chayqa ñuqanchiktapas hukmanyachiwanchikmanmi. Ichaqa manam hukmanyananchikchu, Jehova Diosmi niwanchik: ‘Ñuqam Diosnikichik kani’, nispa. Chayna niwasqanchikqa sunqunchiktam tiyaykachin, ¿imanasqa?

¹⁰ Chayta entiendenanchikpaq kaypi piensarisun. Juanwan Brunom avionwan illachkanmanku. Hinaptinmi avionqa kaywan-wakman kuyukachayta qallaykunman. Chaymantañataq huk runa nimunman: “Runamasillaykuna, ñuqam kani avionta manejaq. Llumpay wayra kasqanraykum avionqa kuyukachachkan. Tiyanaykichikpi kaq cinturonwan wiqawnikichikta watakuychik. Ama llakikuychikchu. Allinllam imapas kanqa”, nispa. Juanñataq mancharisqallaña kachkanman. Brunoñataq hawka tarikuchkanman, chaymi Juanqa Brunota nin: “¿Imaynamá hawkallaqa kachkanki?”,  nispa. Brunoñataq asirispa nin: “Allintam riqsini avionta manejaq runata, payqa taytaymi. Willasqaykiyá pay imayna kasqanmanta hinaspa avionkunata allin manejaq kasqanmanta, hinaptinqa qampas hawkallachá tarikunki”, nispa.

11. ¿Imatam yachachwan avionpi riq iskay runakunamanta rikchanachiymantaqa?

¹¹ ¿Imatam kay rikchanachiymanta yachachwan? Bruno hinam ñuqanchikpas hawka tarikunchik Jehova Dios taytanchikta allinta riqsisqanchikrayku. Yachanchikmi kay tukupay punchawkunapi sasachakuykunata atipananchikpaq pay yanapawananchikmanta (Is. 35:4). Runakuna mancharisqallaña kaptinkupas ñuqanchikqa hawkam tarikunchik Jehova Diospi hapipakusqanchikrayku (Is. 30:15). Hinaspapas Bruno hinam runakunaman willanchik imanasqa Jehova Diospi hapipakusqanchikmanta. Hinaptinmi paykunapas manaña iskayrayanqakuchu paykunata Jehova Dios yanapananmanta ima sasachakuykunapiña tarikuptinkupas.

12. (1) ¿Jehova Diospa imata niwasqanchikmantaraqmi yachasunchik? (2) Jehova Diosqa “atiyninwanmi tukuy imapi munaychakuchkan” bibliapa chayna nisqanqa, ¿imatam yuyarichiwanchik?

¹² Jehova Diosqa niwanchiktaqmi: “Kallpanchaspaymi yanapasqaykichik”, nispa. Isaiasqa nirqañam Jehova Dios imaynata yupaychaqninkunata yanapananmanta, nirqam: “[Jehova] Diosqa atiywanmi hamuchkan, atiyninwanmi tukuy imapi munaychakuchkan”, nispa (Is. 40:10). “Atiyninwanmi tukuy imapi munaychakuchkan” nispa nisqanqa yuyarichiwanchikmi Jehova Diosqa tukuy atiyniyuq kamachiq kasqanmanta. Ñawpaqtaqa Jehova Diosqa atiyninwanmi llaqtanta librarqa hinaspa yanaparqa. Kunanpas  paypi hapipakuqkunataqa Jehova Diosqa yanapanmi, hinaspapas mana allinkunamantam harkan (Deut. 1:30, 31; Is. 43:10).

13. (1) ¿Ima kaptinmi Jehova Diosqa astawanraq yanapawanchik? (2) ¿Jehova Diospa ima niwasqanchikmi anchata kallpanchawanchik?

¹³ Jehova Diosqa anchatam yanapawanchik, astawanraqmi runakuna chiqniwaspanchik ñakarichiwaptinchik. Wakin nacionkunapim tukuyta ruwaspanku Diosmanta willakusqanchikta harkakunku. Ichaqa imapas ruwasqankuqa manam llumpaytaqa hukmanyachiwanchikchu. Jehova Diospa niwasqanchikmi anchata kallpanchawanchik, paymi nin: “Contraykipi armakuna ruwasqankupas manam imanasunkichu”, nispa (Is. 54:17). Chay niwasqanchikqa, ¿imatam yuyarichiwanchik?

14. ¿Imakunata yachasqanchikraykum mana llumpaytaqa hukmanyanchikchu chiqniwaqninchikkuna ñakarichiwaptinchikpas?

¹⁴ Puntataqa ñuqanchikqa yachanchikmi chiqnisqa kananchikmanta (Mat. 10:22). Jesusqa nirqam qatiqninkunaqa tukupay punchawkunapi astawan qatikachasqa kanankumanta (Mat. 24:9; Juan 15:20). Chaymantapas yachanchikmi Isaiaspa nisqanta, payqa nirqam chiqniwaqninchikkuna tukuy imawan ñakarichiwananchikmanta. Ichapas paykunaqa llulla rimasqankuta chiqappaq hina qawachinmanku, yanqakunamanta tumpawanchikman chaynataq ñakarichisqa kananchikpaqpas qatikachawanchikman (Mat. 5:11). Jehova Diosqa manam harkanqachu chiqniwaqninchikkuna chaynakunata ruwanankupaqqa (Efes. 6:12; Apoc. 12:17). Ichaqa manam paykunataqa manchakunanchikchu. ¿Imanasqa?

15, 16. (1) ¿Jehova Diospa ima nisqantaraqmi yachanchik, hinaspa imatam chaymanta nin Isaias 25:4, 5? (2) ¿Chiqniwaqninchikkuna imapi tukunankumantam Isaias 41:11, 12 niwanchik?

¹⁵ Yachanchiktaqmi Jehova Diospa kayna nisqanmanta: “Contraykipi armakuna ruwasqankupas manam imanasunkichu”, niqta. Imaynam pirqapas harkawanchik llumpa-llumpayta wayramuptin, chaynam  Jehova Diospas ‘mana llakipayakuq runakunamanta’ harkawanchik (qaway Isaias 25:4, 5). Chiqniwaqninchikkunaqa manam wiñaypaqchu ñakarichiwasun (Is. 65:17).

¹⁶ Jehova Diosmi paypi astawanraq hapipakunanchikpaq niwanchik contranchikpi ‘piñakuqkuna’ imapi tukunankumanta (qaway Isaias 41:11, 12). Chiqniwaqninchikkuna tukuy imataña ruwaspankupas utaq Diospa contranpi imataña ruwaspankupas paykunaqa “pasaypaq chinkachisqam kanqaku”.

17, 18. (1) ¿Imanasqataq bibliata ñawinchasqanchikqa yanapawanchik Jehova Diospi astawan hapipakunanchikpaq? Rimarimuy huk rikchanachiywan. (2) ¿Imanasqataq yuyaymanananchik 2019 watapaq akllasqa textopi?

¹⁷ Jehova Diosta allinta riqsispaqa astawanmi paypi hapipakusun. Diosta riqsinanchikpaqqa bibliatam ñawinchananchik, hinaspa tiempochakuspam chaypi yuyaymanananchik. Bibliapiqa willawanchikmi ñawpaq tiempopi Jehova Dios imaynata llaqtanta chiqniqninkunamanta harkasqanmanta, chayqa yachachiwanchikmi kay tiempokunapipas ñuqanchikta harkawananchikmanta.

¹⁸ Jehova Dios imaynata harkawasqanchikmanta musyakunanchikpaqmi, Isaiasqa Diosta tupachirqa ovejakunata michiq runawan. Paymi nin: “Ovejankunata michinanpaqmi hamunqa, uñachankunatam marqayninpi apanqa”, nispa (Is. 40:11). Jehova Diospa marqayninpi kachkachwan hina musyakuspam hawka hinaspa waqaychasqa tarikunchik. Diospa llaqtanpi punta apaqkunaqa sasachakuykunapi kaspapas hawka tarikunanchikpaqmi 2019 watapaq Isaias 41:10 nisqanta akllarunku. Chaypim nin: ‘Amayá hukmanyaychikchu, ñuqam Diosnikichik kani’, nispa. Kay nisqanpiyá yuyaymanasun. Chayqa allintam kallpanchawasun hichpallapiña kaq sasachakuykunata atipananchikpaq.