¿IMA punchawtaq qampaq mana qunqanapaq hina karqa? ¿Casarakusqayki punchaw? ¿Piwi churi-wawaykipa nacesqan punchaw? Icha ¿bautizakusqayki punchawchu? Bautizakuspaykiqa kusisqachá tarikurqanki hinaspapas Diosta tukuy sunquykiwan, tukuy vidaykiwan, tukuy yuyaynikiwan hinaspa tukuy kallpaykiwan kuyasqaykita qawaqkunapas kusisqataqchá tarikurqaku (Mar. 12:30).

Jehova Diosta servispaqa kusisqam tarikunchik. Wakin iñiqmasinchikkunam ichaqa watakunapa pasasqanman hina manaña ñawpaqpi hinañachu Diosta kusikuywan servinku. ¿Imanasqa? ¿Imakunaraykum Diosta kusikuywan hinalla servinanchik?

Kay pachapi mana allinkunata Jehova Dios chinkachinanmanta yachasqanchik hinaspa sumaq huertapi kawsananchikta yachasqanchikmi kusichiwanchik. Yachanchiktaqmi chaykunaqa kayllapiña kasqanta, Sofonias 1:14 nin: ‘Diospa hatun punchawninqa hichpallapiñam kachkan’, nispa. Chay punchaw mana chayamunanta piensaspaqa kusikuyninchiktam chinkarachichwan hinaspam manaña ñawpaqpi hinañachu Diostapas servichwan (Prov. 13:12).

Diospa chuya llaqtanpi kaypas kusichiwanchikmi. Yaqapaschá Diospa serviqninkunapa allin kawsakusqankurayku Diospa llaqtanpi kachkanchik (1 Ped. 2:12). Ichaqa, ¿imaynam tarikuchwan huk iñiqmasinchik huchallikuruspan Diospa llaqtanmanta qarqurachikuptin? Wakin iñiqmasinchiktaqa yaqapaschá chayqa hukmanyarachinman hinaspapas kusikuynintam chinkarachinman.

Satanaspa munaychakusqan kay pachaqa piensachiwachwanmi kusisqa kanapaqqa tukuy imayuqraq kanamanta, chayqa Diosta kusisqa serviyninchiktam chinkarachinman. Chaymi Jesuspa kayna nisqanta yuyarinanchik: ‘Manam pipas servinmanchu iskay patrontaqa, huknintach chiqninman, huknintañataqchá kuyanman, hukninman ratakuruspachá huknintañataq desprecianman. Manam serviwaqchikchu Diostawan qullqitaqa’, nispa (Mat. 6:24). Manam atichwanchu Jehova Diostawan kay pachapi kaqkunata kuyaytaqa.

Jehova Diosta kuyaq runakunapaqqa manam llumpay sasachu Diospa munayninta ruwayqa (1 Juan 5:3). Jesuspa nisqanman hinaqa paypa qatiqnin kayqa kusichiwanchikmi hinaspapas kallpanchawanchikmi. Nirqam: ‘Hamuychik ñuqaman llapallan pisipasqakuna hinaspa qipichkaq hina ñakariqkuna, ñuqam samachisqaykichik. Llasawaqniy yugoyta apaspayá ñuqamanta yachaychik, ñuqaqa kani llampu sunqu humillakuqmi, chaynata ruwaspaqa tarinkichikmi samayta. Yugoyqa facil apayllam, qipiypas sampallataqmi’, nispa (Mat. 11:28-30). ¿Imanasqam nichwan Jehova Diosta  yupaychayqa kusichiwanchikmi nispa? Chaypaq qawasun qatiqninpi kaqkunata (Hab. 3:18).

Kusisqa Jehova Diosmi kawsakuyta quwanchik (Hech. 17:28; 1 Tim. 1:11, NM). Unay wataña bautizasqa kaspanchikpas hinallam Jehova Diosta kusikuywan yupaychanchik kawsakuyta quwasqanchikrayku.

Qawasun Héctor sutiyuq iñiqmasinchikta ima pasasqanmanta. Payqa 40 watam congregacionkunata watukuq anciano karqa. Payqa yuyaqña kaspanpas hinaspa señoran unqusqanrayku ñawpaq hina manaña ruwaspanpas, hinallam Jehova Diosta kusikuywan yupaychachkan (Sal. 92:12-14). Paymi willakun: “Señoray unqusqanrayku pisi-pisimanta aswanyaptinpas, hinallam Jehova Diosta kusikuywan yupaychani. Kawsakuyta Jehova Dios quwasqanmanta hinaspa kusisqa kawsananchikpaq unanchawasqanchikta yachasqaymi kallpanchawan kuyanaypaq hinaspa tukuy sunquywan yupaychanaypaq. Hinalla kusisqa kanaypaqmi Diosmanta willakuq sapa kuti lluqsini, piensanitaqmi hamuq tiempopi imakunata ñuqanchikpaq ruwananpipas”, nispa.

Jehova Diosmi huchamantawan wañuymanta librawarqanchik. Bibliam nin: ‘Diosqa ancha-anchatam kuyarqa runakunata, chaymi sapallan churinta qumurqa pipas paypi iñiqqa manaña puchukaspa wiñaypaqña kawsananpaq’, nispa (Juan 3:16). Kaypi nisqanman hina Jesuspa wañukusqanpi iñispanchikqa, huchanchikmantam pampachasqa kasunchik hinaspapas wiñay kawsaytam haypasunchik. Kaykunapi yuyaymanaspam Diosta agradecekuspa kusisqa yupaychasunchik.

México nacionpi Jesús sutiyuq iñiqmasinchikmi llumpayta llamkayman qukururqa. Paymi nin: “Achka qullqiyuq kayta munaspaymi tuta-punchaw llamkarqani. Ichaqa bibliata estudiaspaymi yacharurqani Jehova Dios churinta ñuqanchikrayku kachamusqanmanta. Chayta yachasqaymi Jehova Diosta yupaychanaypaq kallpanchawarqa, chayraykum payta servinaypaq tanteakururqani. 28 wataña hina kaq llamkayllapi llamkaspaymi, tantearurqani chay llamkayta saqiruspay Diosmanta willakunaypaqña astawan tiempochakunaypaq. Achka watakunaña pasaruptinpas hinallam Jehova Diospaq kusisqa llamkachkani”, nispa.

Diospa munasqanman hina kawsakuyqa kusichiwanchikmi. ¿Yuyachkankichu Jehova Diosta manaraq riqsichkaspayki imayna kawsakusqaykita? Apostol Pablom Roma nacionpi iñiqmasinkunaman yuyarichirqa ‘huchapa munaychakusqan’ kasqankumanta, ichaqa paykunam allin kaqkuna ruwaymanña qukurqaku. ¿Imapim chay ruwasqanku tukunqa? Diospa munasqanman hina kawsakusqankuraykum wiñay kawsakuyta haypanqaku (Rom. 6:17-22). Ñuqanchikpas Diospa munasqanman hinam  kawsanchik, chaymi yanapawanchik huchapakuyman hinaspa maqanakuyman mana wichiykunapaq. ¿Manachu kayqa kusikunapaq?

Rimasuntaq Jaime sutiyuq iñiqmasinchikmanta, payqa manam Diospi nitaq imapas unanchasqa kasqanpiqa iñirqachu hinaspapas peleaq runam karqa. Huñunakuykunaman riyta qallaykuspanmi kuyanakusqanchikta qawaspan admirakurqa. Ichaqa Diospim iñinan karqa paykuna hina kawsakuyta munaspanqa. Chaymi allin iñiyniyuq kananpaq Diosta mañakurqa. Paymi nin: “As-asmantam qawarqani Diosqa kuyakuq hinaspa llakipayakuq tayta hina kasqanta. Diospi mana iñispayqa wakin llamkaqmasiykuna hinach wañuruymanña karqa. Jehova Diosta yupaychasqay watakunam aswan kusisqa tarikuni”, nispa.

¿Imaynam Diospa piñakuynin punchawta suyananchik? Chuya espirituman hina tarpuspaqa cosechachkaq hinam wiñay kawsayta chaskisunchik. ‘Chaynaqa amayá amirusunchu imapas allin ruwaytaqa, mana amiruspaqa tiempo chayaramuptinmi cosechata hina premiota chaskisunchik’ (Gal. 6:8, 9). Amayá saqisunchu imapas hukmanyachiwananchiktaqa, Jehova Diosqa yanapawasunmi. Kallpanchakusuntaq allin sunquyuq runakuna kanapaq, chaynapi llumpa-llumpay ñakariy punchawpi mana wañunanchikpaq hinaspapas hinallayá Diosta kusikuywan yupaychasunchik (Apoc. 7:9, 13, 14; Sant. 1:2-4).

Manam iskayrayananchikchu kallpanchakusqanchikrayku achka bendicionkunata Jehova Dios quwananchikmantaqa. Payqa yachanmi kallpanchakusqanchikta hinaspa paytawan sutinta kuyasqanchiktapas. Sichu hinallayá Diosta kusikuywan yupaychaspanchikqa David hinam nisunchik: ‘Tukuy tiempom tayta Diosqa ñuqawan kachkan, sichum alliqniypi pay kaptinqa manam imapas urmachiwanqachu. Chayraykum sunquypas, almaypas anchata kusikunqa, cuerpoypas hawkallañam samakunqa’, nispa (Sal. 16:8, 9, CQ12).