Kay tapukuyman hina Jehova Dios ruwaptinqa, ¿imaynataq tarikuwaq? Chayta entiendenapaq kaypi yuyaymanasun: Huk iñiqmasinchikpa churinmi wañurachikun. Taytanqa llakipa intusqanmi kachkan hinaspam tapukun: “¿Jehova Diosqa yacharqañachu kay pasakunanmanta? ¿Aguantay atinaykuta yachaspanchu ñuqaykupaq kay sasachakuyta akllarqa?”, nispa. Kay tukupay punchawkunapi kawsasqanchikraykum imapas sasachakuykunapi tarikusunchik. Ichaqa, ¿chayraykuchu nichwan imapas pasawananchikta Jehova Dios akllasqanmanta?

1 Corintios 10:13 nisqanta qawaspanchikmi musyakunchik ima sasachakuytapas Jehova Dios ñuqanchikpaq mana akllasqanmanta. Qawasun imanasqam chaynata ninchik.

Jehova Diosqa kikinchik tanteakunapaqmi saqiwanchik. Payqa munanmi kikinchik imatapas tanteakunanchikta (Deut. 30:19, 20; Jos. 24:15). Diospa munasqanman hina imatapas tanteaspaqa, manam iskayrayasunchu yanapawananchikmantaqa (Prov. 16:9). Ichaqa imatapas mana allinta tanteaspaqa ñakarisunmi (Gal. 6:7). Sichu Jehova Dios imapas sasachakuypi kananchikpaq akllaptinqa, ¿nichwanchu kikinchik tanteakuy atisqanchikta?

Jehova Diosqa manam harkawanchikchu ‘qunqayllamanta imapas pasawananchiktaqa’ (Ecl. 9:11, NM). Imapas llakiqa qatiruwachwanmi mana allin tiempopi maypipas kasqanchikrayku. Jesusmi nirqa torre wichiykamuptin 18 runakuna wañurusqankumanta. Chaywanmi sutillata qawachirqa chay runakuna wañunanpaq Dios mana akllasqanmanta (Luc. 13:1-5). Chaynaqa manam nichwanchu pipas wañunanpaq utaq kawsananpaq Dios akllasqanmantaqa.

Sapakamam qawachinanchik Jehova Diosman sunqu kasqanchikta. Satanasmi nirqa imatapas quwaptillanchik Jehova Diosta yupaychasqanchikmanta hinaspa imapas sasachakuypi tarikuspaqa qipancharunanchikmanta (Job 1:9-11; 2:4; Apoc. 12:10). Imapas sasachakuypi mana kananchikpaq Jehova Dios waqaychawaptinchikqa, satanaspa nisqanmi chiqap kanman.

Jehova Diosqa tantearunmi hamuq punchawkunapi imapas pasawananchikta mana yachananpaq. Ichaqa munaspanqa yachanmanmi imapas pasananmanta (Is. 46:10). Bibliam nin imapas pasakunanta Jehova Dios wakinpi mana yachay munasqanta (Gen. 18:20, 21; 22:12). ¿Imanasqa? Kuyakuq hinaspa allin ruwaq kasqanraykum kikinchik imatapas tanteakunanchikta munan (Deut. 32:4; 2 Cor. 3:17).

Hinaptinqa, ¿imatam Pablo niyta munachkarqa: “[Diosqa] manam saqisunkichikchu mana aguantay atinaykichikkama tentasqa kanaykichiktaqa”, nispan? Pabloqa nichkarqam sasachakuypi tarikuptinchik Jehova Dios yanapawasqanchikmanta, manam imapas pasawananchikmanta ñawpaqta imatapas ruwananmantachu *. Jehova Diospi hapipakuptinchikqa, paymi yanapawasun imapas sasachakuyninchikta aguantanapaq (Sal. 55:22). Qawasun imanasqam Pablo nirqa: “[Diosqa] manam saqisunkichikchu mana aguantay atinaykichikkama tentasqa kanaykichiktaqa”, nispan.

Pabloqa kaynatam nirqa imapas sasachakuyninchik wakin runakunapa sasachakuynin hina kasqanrayku. Kaywanqa nichkanmi imapas sasachakuyninchikqa satanaspa munaychakusqan pachapi kawsasqanchikrayku kasqanmanta.  Llapanchikmi imapas sasachakuypi utaq llakipi tarikusunchik. Ichaqa Jehova Diospi hapipakuspanchikqa, imapas sasachakuytaqa aguantasunmi hinaspapas Diosman sunqum kasunchik (1 Ped. 5:8, 9). Pablom 1 Corintios 10:13 versiculopa ñawpaqninpi rimarqa ima sasachakuypi Israel runakuna chunniqpi kasqankumanta (1 Cor. 10:6-11). Jehova Diospi hapipakuq Israel runakunaqa aguantarqakum sasachakuykunata. Diospi mana hapipakuqkunam ichaqa mana kasukurqakuchu.

Pabloqa chaynatam nirqa ‘Diosqa cumpliqpuni’ kasqanrayku. Jehova Dios yupaychaqninkunata haykapipas waqaychasqanpi yuyaymanaspanchikmi, yachanchik payqa ‘kuyaqninkunata chaynataq kamachikuyninkuna kasukuqkunata’ nisqanman hina yanapasqanta (Deut. 7:9). Jehova Diospa nisqanqa manam yanqachu, ruwakunpunim (Jos. 23:14). Chaymi mana iskayrayanchikchu kaymanta: Jehova Diosqa manam saqiwasunchu ima sasachakuytapas mana aguantay atinanchikkamaqa. Payqa yanapawasunchikmi.

Jehova Diosqa yanapawanchikmi paypi hapipakuptinchikqa. Payqa atinmantaqmi imapas sasachakuyninchik chinkachiyta. Ichaqa Pablom nirqa imapas sasachakuyninchikta aguantanapaq Jehova Dios yanapawananchikmanta. Kaymi yachachiwanchik Jehova Diosman sunqu kananchikpaq kallpata quwasqanchikmanta. Paymi tukuypaq kallpanta quwanchik. Wakinmanta yachasunchik.

• Jehova Diosqa ‘tukuy sasachakuyninchikpim sunqunchikta tiyaykachin’ (2 Cor. 1:3, 4). Payqa bibliawan, chuya espirituwan hinaspa allin ruwaq yuyayniyuq sirvientewanmi sunqunchikta hinaspa yuyayninchikta hawkayaykachin (Mat. 24:45; Juan 14:16; Rom. 15:4).

• Jehova Diosqa chuya espiritunwanmi yanapawanchik (Juan 14:26). Chuya espiritunmi yanapawanchik bibliapi huk kaqnin yachachikuyta yuyarispanchik allinta tanteananchikpaq.

• Jehova Diosqa angelninkunawanmi yanapawanchik (Heb. 1:14).

• Jehova Diosqa iñiqmasinchikkunawanpas yanapawanchikmi. Paykunaqa imapas ruwasqankuwan utaq niwasqanchikwanmi kallpanchawanchik (Col. 4:11).

¿Imatam yachachiwanchik 1 Corintios 10:13 versiculopi Pablopa rimasqanqa? Jehova Diosqa manam akllanchu imapas sasachakuypi kananchikpaqqa. Diospi hapipakuspaqa, aguantasunmi imapas sasachakuytaqa. Diosqa yanapawasunmi payman sunqu hinalla kananchikpaq.