1. ¿Imakunapaqmi Jesuspa wañukusqanqa yanapakun?

JESUSQA ñuqanchikraykum wañurqa, chaymi allin kaqkunata ruwaq Adanpa mirayninkunaqa Diospa churinkuna kayta atisunchik. Atisuntaqmi wiñaypaq kusisqa kawsakuytapas. Ichaqa manam chayllapaqchu Jesuspa wañukusqanqa yanapakun. Yanapakuntaqmi kay pachapipas hinaspa hanaq pachapipas Diospa sutin chuyanchasqa kananpaq (Heb. 1:8, 9).

2. (1) Diosta mañakunapaq Jesus yachachispanqa, ¿hanaq pachapiwan kay pachapi imakuna ruwakunanpaqmi nirqa? (Qaway kay paginapi kaq dibujota). (2) ¿Imamantam kay yachachikuypi yachasunchik?

² Iskay watallaña wañukunanpaq kachkaptinmi, Jesusqa qatiqninkunata yachachirqa Diosta kaynata mañakunankupaq: “Hanaq pachapi taytayku sutiki chuyanchasqa kachun. Munaychakuynikiyá hamuchun. Munasqaykiyá ruwasqa kachun kay pachapipas hanaq pachapi hina”, nispa (Mat. 6:9, 10). Kay yachachikuypim yachasunchik Jesuspa wañukusqanwan 1) Jehova Diospa sutin chuyanchasqa kananmanta, 2) Diospa munaychakuynin hamunanmanta hinaspa 3) Diospa munaynin ruwakunanmanta.

3. (1) ¿Imayna Dios kasqantam sutinqa qawachin? (2) ¿Imaynatam satanasqa Diospa sutinta yanqacharurqa?

³ Taytanta mañakuspanmi Jesusqa puntata nirqa Diospa sutin chuyanchasqa kananpaq. Jehova sutiqa imayna Dios kasqantam qawachiwanchik. Payqa pimantapas aswan tukuy atiyniyuqmi hinaspa allin ruwaqmi. Chaymi Jesusqa Jehova Diosta nirqa: “Qamqa chuyam kanki taytalláy”, nispa (Juan 17:11). Jehova Dios chuya kasqanraykum, imapas ruwasqanqa hinaspa kamachikuyninkunaqa mana pantayniyuq. Ichaqa Eden huertapim satanas nirqa runakunapaq Diospa kamachikuy qusqanqa mana allinninkupaq kasqanta. Jehova Diosmanta llullakunata nispanmi suntinta yanqacharurqa (Gen. 3:1-5).

4. ¿Imaynatam Jesusqa Diospa sutinta chuyancharqa?

⁴ Jesusqa manam satanas hinachu karqa, Jesusqa Jehova Diospa sutintam kuyarqa. Chaymi tukuyta ruwarqa chuyanchananpaq (Juan 17:25, 26). ¿Imaynatam chuyancharqa? Ruwasqanwan hinaspa yachachisqanwanmi. Chay ruwasqanwanmi Jesusqa yachachiwanchik Jehova Diospa kamachikuynin hinaspa imapas niwasqanchik allinninchikpaq kasqanta (qaway Salmo 40:8-10). Satanaspa huchanpim Jesusqa ñakarispan wañurqa, chaywanpas Diosman sunqum karqa. Payqa Jehova Diosta kasukuspanmi mana huchayuq runa tukuypi Diosta kasukuy atisqanta qawachirqa.

5. ¿Imaynatam Diospa sutinta hatunchachwan?

⁵ ¿Imaynatam ñuqanchikpas qawachichwan Diospa sutin kuyasqanchikta? Imapas ruwasqanchikwanmi. Jehova Diosqa munanmi chuya kananchikta (qaway 1 Pedro 1:15, 16). Chayraykum payllata yupaychananchik hinaspa tukuy sunqunchikwan kasukunanchik. Runakuna ñakarichiwaptinchikpas, Jehova Diospa yachachiwasqanchikman hina kawsananchikpaqmi kallpanchakunanchik. Diospa kamachiwasqanchikta kasukuspanchikmi, paypa sutinta hatunchanchik (Mat. 5:14-16). Chaymantapas, Jehova Diospa kamachikuyninkuna allin kasqanta hinaspa satanas llulla kasqantam qawachinchik. Ichaqa pantaq runakunam kanchik. Chaymi imapipas pantaruspanchikqa wanakunanchik hinaspa kallpanchakunanchik chay mana allin ruwasqanchikta saqinanchikpaq, chaynapi Diospa sutinta pinqaypi mana saqinapaq (Sal. 79:9).

6. ¿Imanasqataq Diosqa mana huchayuqtaña qawawanchik pantaq runakuna kaptinchikpas?

⁶ Hanaq pachapi utaq kay pachapi kawsakuyta suyaptinchikpas, Jehova Diosqa huchanchiktam pampachanqa Jesuspa wañukusqanpi iñiptinchikqa. Payqa hanaq pachapaq akllasqakunatam mana huchayuqpaqña chaskin hinaspa churinkunata hinaña qawan. Kay allpa pachapi kawsakuyta suyaqkunatapas mana huchayuqta hinañam qawan hinaspapas amistadninkunata hinañam chaskin (Juan 10:16; Rom. 5:1, 2; Sant. 2:21-25). Ñuqanchikrayku Jesus wañusqanraykum, kunanpas Dioswan allin amistad kanchik hinaspa sutintapas chuyanchayta atinchik.

7. Jesus wañukusqanrayku, ¿imakunatam Diospa munaychakuynin ruwanqa?

⁷ Diosta mañakunankupaq yachachispanmi Jesus nirqa: “Munaychakuynikiyá hamuchun”, nispa. ¿Imaynatam Jesuspa wañukusqanqa Diospa munaychakuyninta yanapan? Yachasqanchikman hinam Diospa munaychakuyninpi Jesus hinaspa 144.000 runakuna kamachimunqaku. Jesus wañukusqanraykum  paykunaqa kawsarinqaku hanaq pachapi kawsanankupaq (Apoc. 5:9, 10; 14:1). Chaypim paykunaqa kamachiqkuna hinaspa sacerdotekuna kanqaku hinaspam kay pachata Jesuswan kuska waranqa wata kamachimunqaku. Chay watakunapim, kay allpa pachata sumaqta huertayachinqaku hinaspa runakunata yanapanqaku mana pantaqña kanankupaq. Chaypim ichaqa Diospa lliw yupaychaqninkunaqa churinkunaña kasunchik (Apoc. 5:13; 20:6). Jesusqa satanastawan tukuy ima sasachakuytam chinkachinqa (Gen. 3:15).

8. (1) ¿Imaynatam Jesusqa qatiqninkunata yachachirqa Diospa munaychakuyninta puntapi churanankupaq? (2) ¿Imaynatam qawachinchik Dios kamachimunantaña munasqanchikta?

⁸ Jesusmi qatiqninkunata yachachirqa Diospa munaychakuyninta imamantapas puntapi churanankupaq. Paypas, bautizakusqan qipallatam ‘Diospa munaychakuyninmanta sumaq willakuyta’ maypipas willakurqa (Luc. 4:43). Chaymantapas qatiqninkunatam nirqa “kay pachapa cantonkama” paymanta willakamunankupaq (Hech. 1:6-8). Enteron pachapi kay willakuy apakusqanraykum runakunaqa yachanmanku Jesuspa wañukusqanmanta hinaspa Diospa munaychakuyninmanta. Hanaq pachapaq akllasqa iñiqmasinchikkunata Diosmanta willakuypi yanapaspanchikmi, Diosña kamachimunanta munasqanchikta qawachinchik (Mat. 24:14; 25:40).

9. ¿Imanasqam mana iskayrayanchikchu runakunapaq Diospa munaynin ruwakunanmanta?

⁹ Jesusqa nirqataqmi: “Munasqaykiyá ruwasqa kachun”, nispa. Kaywanqa nichkarqam Jehova Diospa rimasqanqa mana yanqa kasqanmanta, aswanqa nisqanpunim ruwakun (Is. 55:11). Manam satanaspas harkayta atinmanchu Jehova Dios munayninta ruwanantaqa. ¿Imatam Diosqa kay allpa pachapaq munarqa? Munarqam Adanpawan Evapa mana pantaq mirayninkuna kay allpa pachaman huntanankuta (Gen. 1:28). Adanwan Eva mana churi-wawayuq wañuruptinkuqa, manam kay pachata churi-wawankuwan huntanankupaq nisqanqa ruwakunmanchu karqa. Chaymi Jehova Diosqa Adantawan Evata saqirqa churi-wawayuq kanankupaq. Jesuspa wañukusqanpi llapallan iñiqkunam mana pantaq kanqaku hinaspa wiñaypaq kawsanqaku. Jehova Diosqa kuyawanchikmi, chaymi munan qallariypi munasqanman hina kusisqa kawsakunanchikta.

10. Jesuspa wañukusqanqa, ¿imaynatam wañuqkunata yanapanqa?

¹⁰ Wara-waranqantin runakunam manaraq Jehova Diosmanta yachachkaspanku wañukurqaku. Paykunatam Diosqa kawsarichinqa. Jesus wañusqanraykum runakunaqa kawsariyta atinqaku. Kawsarimuspankum paykunaqa Jehova Diosmanta yachayta hinaspa wiñaypaq kawsakuyta atinqaku (Hech. 24:15). Llapallan wañuqkunata Jehova Dios kawsarichisqanraykum, paykunapa taytan kanqa (Sal. 36:9). Chaychá Jesusqa Diosta mañakuspan nirqa: “Hanaq pachapi taytayku”, nispan (Mat. 6:9). Jehova Diosmi wañuqkunata kawsarichinanpaq Jesusman atiyta qurqa. Chaymi Jesusqa nirqa: “Ñuqam kani kawsarichiqpas hinaspa kawsay quqpas”, nispa (Juan 6:40, 44; 11:25).

11. ¿Imatam Jehova Diosqa ‘achkallay-achka runakunapaq’ munan?

¹¹ Jesusqa nirqataqmi: “Pipas Diospa munasqanta ruwaqmi wawqiyqa, paniyqa hinaspa mamayqa”, nispa (Mar. 3:35). Diosqa munanmi tukuy rikchaq runakuna yupaychanankuta. Bibliam nin paykunaqa ‘mana pipa yupay atinan achkallay-achka runakuna’ kasqankuta.  Paykunaqa Jesuspa wañukusqanpim iñinku hinaspapas Diostam kasukunku. Alabaspataqmi ninku: “Salvasqaqa kanchik kamachinapaq tiyanapi tiyaq Diosninchikpa hinaspa malta carneropa yanapawasqanchikwanmi”, nispa (Apoc. 7:9, 10).

12. Jesuspa Diosta mañakusqanqa, ¿imatam yachachiwanchik?

¹² Jesuspa Diosta mañakusqanqa, anchatam yachachiwanchik Jehova Diosmanta hinaspa runakunapaq ima munasqanmanta. Yachachiwanchikmi Diospa sutinta chuyanchanapaq hinaspa hatunchanapaq kallpanchakunamanta (Is. 8:13). Jesus wañusqanraykum librakuyta atinchik, hatunchantaqmi Diospa sutintapas. Jesuspa sutinqa “Salvaqninchikqa Jehova Diosmi” ninanmi. Yachachiwanchikmi kasukuq runakuna Jehova Diospa munaychakuyninpi tukuy imata chaskinanchikmanta. Yachachiwanchiktaqmi Jehova Diospa munaynin ruwakunanpaq imapas mana harkay atisqanmanta (Sal. 135:6; Is. 46:9, 10).

13. ¿Imanasqam bautizakurqanchik?

¹³ Jesuspa wañukusqantaqa agradecekunchik Diosta yupaychananchikpaq tanteakuspanchikmi hinaspa bautizakuspanchikmi. Chayta ruwaspam Jesuspa wañukusqanpi iñisqanchikta hinaspa ‘Jehova Diospaqña kasqanchikta’ qawachinchik (Rom. 14:8). Bautizakuspanchikmi Jehova Diosta mañakurqanchik ‘allin concienciayuq kananchikpaq’ (1 Ped. 3:21). Diosñataqmi uyariykuwaspanchik saqiwarqanchik amistadnin kananchikpaq. Chaymi mana iskayrayanchikchu imapas niwasqanchikta quwananchikmantaqa (Rom. 8:32).

14. ¿Imanasqam Jehova Diosqa kamachiwanchik runamasinchikta kuyananchikpaq?

¹⁴ Jehova Diosqa tukuy imatam ruwan kuyawasqanchikrayku. Payqa munanmi qatipakuspanchik kuyanakunanchikta (1 Juan 4:8-11). Runakunata kuyaspanchikqa, sutillatam qawachinchik Jehova Diospa churinkuna kayta munasqanchikta (Mat. 5:43-48). Bibliapim kan iskay hatun kamachikuykuna. Punta kaqmi Jehova Diosta kuyay. Iskay kaqñataqmi runamasinchikta kuyay (Mat. 22:37-40). Runamasinchik kuyasqanchiktam qawachinchik Diospa munaychakuyninmanta sumaq willakuyta apaspanchik. Runamasinchikta kuyanapaq kamachiyta kasukuspaqa, astawanmi Diosta kuyasun (1 Juan 4:12, 20).

15. (1) ¿Imatam Jesus wañusqanrayku kunan chaskinchik? (2) ¿Imakunatam hamuq tiempopi chaskisunchik?

¹⁵ Jehova Diosmi niwanchik Jesuspa wañusqanpi iñiptinchik huchanchikta pampachawananchikmanta (qaway Hechos 3:19-21). Yachamusqanchikman hinam, Jesuspa wañukusqanwan Jehova Diosqa wakin runakunata akllarqa hanaq pachapi churinkuna hina kanankupaq. Paykunaqa hanaq pachapaq suyakuyniyuqkunam kanku (Rom. 8:15-17). Jehova Diosqa munantaqmi kay allpa pachapi kawsanankupaq suyakuyniyuqkunapas churinkuna kanankuta. Paykunaqa Diosman sunqum kananku waranqa wata tukunankama. Chaynapim Diospa churinkunaña kanqaku (Rom. 8:20, 21; Apoc. 20:7-9). Jehova Diosqa wiñaypaqmi lliw churinkunata kuyawasun. Jesus wañusqanraykum tukuy imata Jehova Diosmanta chaskisun (Heb. 9:12). Paymi kay sumaq regalota quwanchik, manam pipas qichuwachwanchu.

16. ¿Imakunamantam Jesuspa wañukusqanqa librawanchik?

¹⁶ Huchanchikmanta wanakuptinchikqa, diabloqa manam Diospa churinkuna kananchikpaq harkakuytaqa atinqachu. Jesusqa ‘huk kutillatam’ wañurqa huchanchikmanta pampachawananchikpaq (Heb. 9:24-26). Adanmantam wañuyta chaskinchik, ichaqa Jesus wañusqanraykum wiñaypaq kawsayta atisunchik. Manañam satanaspa munaychakusqanchu kasunchik nitaq wañuytapas manchakusunñachu (Heb. 2:14, 15).

17. ¿Imaynam tarikunchik Jehova Dios kuyawasqanchikta yachaspa?

¹⁷ Manam iskayrayanchikchu imapas nisqankunata Jehova Dios ruwananmantaqa. Imaynam unanchasqankunapas kamachisqanta kasukuspanku hina kaqllata ruwanku, chaynam Jehova Diospas hina kaqlla haykapipas kanqa (Mal. 3:6). Jehova Diosqa manam kawsakuyllanchiktachu quwanchik, aswanqa kuyawanchikmi. Bibliam nin: ‘Ñuqanchikqa allintam yachanchik Dios kuyawasqanchikta, manamá chaymantaqa iskayrayanchikchu. Diosqa kuyakuymi’, nispa (1 Juan 4:16). Jehova Diosqa nisqanman hinam ruwan, chaymi kay allpa pachata sumaq huertata ruwanqa. Llapanchikmi Jehova Diosta qatipakuspa kuyanakusunchik. Hinaptinmi Diospa llapallan yupaychaqninkuna nisunchik: “Diosllayku qamyá wiña-wiñaypaq alabasqa kay, hatunchasqa kay, yachayniyuq kay, respetasqa kay, atiyniyuq kay hinaspa kallpayuq kay. Llapallankuyá qamtaqa wiña-wiñaypaq agradecekusunki. Amen”, nispa (Apoc. 7:12).