Jesuspa qatiqninkunaqa bibliapa nisqantam kasukunchik suwakunamanta utaq mana allin runakunamanta defiendekuspapas. Bibliapa yachachisqanman hinaqa manamá allinchu kanman pipas mana imanaruwananchikpaq pistolata utaq ima armatapas servichikuyqa. Bibliapa chay yachachikuyninkunamantayá yachaykusun.

Jehova Diosmi kawsay quwaqninchikqa. Diosta yupaychaq Davidmi nirqa ‘tukuy kawsakuyqa Diosllamanta hamusqanta’ (Sal. 36:9). Chayraykum Dios yupaychaqkunaqa hukkuna suwawaptinchikpas utaq imanawaptinchikñapas runamasinchiktaqa mana wañuchinanchikchu (Deut. 22:8; Sal. 51:14).

Runakunaqa imawanñapas wañunarachinakunmankum. Pistola utaq ima armapas makillanpi kaptinqa astawanraqmi mana munachkaspankupas chaylla wañunarachikunmanku. * Armayuq kasqanchikpi yuyaymanasun, armayuqta suwawaqninchik runa rikuruwaspanchikqa mancharikuspanmi imanaruwachwanpas, ñuqanchikpas balearuchwanmi.

Manaraq wañukuchkaspanmi Jesusqa qatiqninkunata nirqa ‘espadata rantinankupaq’, ichaqa manam runakunata tuksinankupaqchu (Luc. 22:36, 38). Hinaptinqa, ¿imanasqataq chaynata nirqa? Chaynataqa nirqa ancha allin yachachikuyta qatiqninkunaman yachachinanpaqmi. Espadawanña runakuna hamuptinkupas paykunaqa manam espadawanqa kutipakunankuchu karqa (Luc. 22:52). ¿Imaynatam chayta yachachirqa? Sacerdotekunapa kamachiqninpa sirviententa espadawan Pedro rinrinta qururuptinmi Jesusqa nirqa: “Espadaykita maymi kasqanman kutiykachiy”, nispa. Chaymantam, Jesusqa qatiqninkuna mana haykapipas qunqanankupaq nirqa: “Espadata hapiqkunaqa espadawanmi wañuchisqa kanqaku”, nispa (Mat. 26:51, 52). Chayna yachachisqanqa kunanpas yanapawanchikmi.

Miqueas 4:3 nisqanman hinam Jesuspa qatiqninkunaqa ‘espadankutapas rejakunamanña tikrarunku’. Jesuspa qatiqninkunaqa hawkallam piwanpas kawsakunchik, kasukunchikmi apostol Pablopa nisqanta, paymi kaynata qillqarqa: ‘Pipas mana allinta ruwasuptikichikqa amayá mana allinwanqa kutichiychikchu [...]. Kallpanchakuychikyá llapallan runakunawan hawkalla kanaykichikpaq’, nispa (Rom. 12:17, 18). Pabloqa ‘peligrokunapim karqa’, wakinpiqa suwakunamantam cuidakunan karqa (2 Cor. 11:26). Ichaqa manam suwaqnin runataqa ima mana allintapas ruwarqachu. Aswanmi Diospi hapipakuspan bibliapa nisqanta kasukurqa, bibliapi yachachikuykunaqariki ‘guerrapaq armakunamantapas aswan allinraqmi’ (Ecl. 9:18).

Ñuqanchikpaqqa vidanchikmi imamantapas aswan chaninniyuqqa. Jesuspa nisqanman hinaqa ‘runapa vidanqa tukuy imayuq kaptinpas manam kapuqninkunamantachu kanqa’ (Luc. 12:15). Chaymi pipas pistolawan utaq ima armawanpas suwawaptinchikqa qasillalla utaq hawkalla kaspa rimapayananchik. Mana uyariwaptinchikqa Jesuspa, “amayá mana allin runapa contranpiqa churakuychikchu” nisqantam kasukunanchik. Chaynaqa wakinpiqa imanchiktapas apakunankutam saqikunanchik kanqa (Mat. 5:39, 40; Luc. 6:29). *  Mana suwachikunapaqqa qawan-qawanllam kananchik. Chaymi imanchiktapas apananchik lliw runakuna mana qawanankupaq hina, allintaqmi kanman llaqtamasinchikkunawan pim kasqanchikta riqsichikuyninchikqa, yachanankum Jehova Diospa testigon kasqanchikrayku pitapas mana imanasqanchikta (Prov. 18:10; 1 Juan 2:16).

Manam munanchikchu hukkunata hukmanyachiytaqa (Rom. 14:21). Suwakunata manchachinapaq armayuq kasqanchikta iñiqmasinchikkuna yacharuspankuqa hukmanyarunmankum. Autoridadkuna armayuq kananchikta saqiwaptinchikpas iñiqmasinchikkunata kuyasqanchikraykum ima armatapas mana apaykachananchikchu (1 Cor. 10:32, 33; 13:4, 5).

Hukkunapa qatipakunanpaq hina kaytam munanchik (2 Cor. 4:2; 1 Ped. 5:2, 3). Suwakunata manchachinanpaq huk iñiqmasinchikpa arman kaptinqa, rimapayanqakum armata amaña apaykachananpaq, mana kasukuspanqa manam hukkunapa qatipakunanpaq hinachu kanman. Chaymi payqa iñiqkunamantaqa mana nanachikunmanchu nitaq Diospa llaqtanpi ima llamkaypipas mana yanapakunmanchu. Chaynallam kanman llamkayninrayku armata apaykachaq iñiqmasinchikwanpas. Chayna kaptinqa, allinmi kanman huk llamkaytaña maskakuynin. *

Chaynaqa, sapakamam tanteananchik vidanchikta, ayllunchikta hinaspa imanchiktapas imaynata cuidananchikpaq, sapakamataqmi tanteananchik imapi llamkananchikpaqpas. Ichaqa allinta tanteananchikpaqqa bibliapa yachachikuyninkunatam kasukunanchik. Yachayniyuq Diosninchikmi chay yachachikuykunata quwanchik kuyawasqanchikrayku. Allin yuyayniyuq iñiqmasinchikkunaqa bibliapa yachachikuyninkunata kasukuspankum pipas mana imanarunanpaqqa ima armatapas mana apaykachankuchu. Diospi hapipakuspanku bibliapa yachachikuyninkunata kasukuspankuqa wiñaypaqmi hawkalla hinaspa mana pipa imanasqan kawsakunqaku (Sal. 97:10; Prov. 1:33; 2:6, 7).