Apostol Pabloqa yacharqam pantarachiwananchikpaq satanaspa imapas ruwasqanmantaqa, ichaqa wakin iñiqkunam mana musyakuqkuchu. Corinto llaqtapi wakin iñiqkunapas kikillankupi hapipakuspankum piensarqaku allin iñiyniyuq kasqankuta hinaspa satanaswan mana pantarachikunankuta (1 Cor. 10:12). Chaymi Pabloqa paykunata nirqa: “Imaynam culebra sacre kaspan Evata pantarachirqa, chaynata qamkunapa yuyaynikichikta pipas pantarachinanmantam manchakuchkani, hinaptinmi manaña chuya sunquchu nitaq chiqap rimaqñachu kawaqchik. Cristopa runanqariki chuya sunqu hinaspa chiqap rimaqmi kanan”, nispa (2 Cor. 11:3).

Pablopa nisqanman hinaqa, runakunapa imapas willakusqankunawan Satanas mana pantarachiwananchikpaqqa qawan-qawanllam kananchik, hinaspapas manam kikillanchikpiqa hapipakunanchikchu.

Runakunaqa yanqa willakuykunatam servichikunku runamasinkuta pantachinankupaq, utaq munasqankuman hina runakuna piensanankupaq hinaspa imatapas ruwanankupaq. Huk qillqapa nisqanman hinaqa runakunapa yanqa willakusqankuqa llumpay mana allinmi. Chayna rimaqkunatam sutichanku “nina qallu”, “yanqa rimaq” hinaspa “nisqanta mana ruwaq”, nispa.

Imaynam mana allin waspiyta mana rikunchikchu nitaq imayna kasqantapas musyanchikchu, chaynam yanqa willakuykunatapas mana musyaylla pisi-pisimanta allinpaqña hapiyta qallaykuchwan. Vance Packard yachaysapa runam nin: ‘Chay willakuykunata creeruspankum runakunaqa imatapas ruwanku’, nispa. Huk yachaysapa runapas ninmi qaripas, warmipas kay willakuykunarayku llumpay  mana allinkunata ruwasqankumanta. Chaysi runakunaqa runamasinta wañuchinku, chiqninakunku, hinaspa qatikachasqa kanku huk casta utaq huk religionniyuq kasqankurayku (Easily Led—A History of Propaganda).

Runakunallapas kay yanqa willakuykunawan pantachiwachkaptinchikqa, astawanraqchiki satanasqa. Payqa unanchasqa kasqanchikmantapacham imayna kasqanchikta yachan. Kay pachapi mana allinkuna makinpi kasqanraykum tukuy imata servichikun llullakunata runakuna creenankupaq (1 Juan 5:19; Juan 8:44). Chaymi satanasmanta biblia nin: “Paymi kay pachapi llapallan runakunata pantachichkan”, nispa (Apoc. 12:9; 2 Cor. 4:4). ¿Imatam ruwananchik ñuqanchiktapas mana pantarachiwananchikpaq?

Jesusmi mana pantarachiwananchikpaq imata ruwananchikmanta nirqa: ‘Chiqapmantam yachankichik, hinaptinmi chay chiqap yachasqaykichik librasunkichik’, nispa (Juan 8:31, 32). Guerrapiqa soldadokunata pantachinankupaqmi enemigonkuqa llullakunata chiqichinku. Chaymi soldadokunaqa mana pantachisqa kanankupaq imam kaqta rimaq runata tapukunanku. Ñuqanchikpas tapukuchkaq hinam bibliata qawarinanchik, bibliapim tarisun satanas mana pantachiwananchikpaq yachachikuykunata (2 Tim. 3:16, 17).

Bibliata ñawinchaptinchikqa satanasqa manam pantarachiwasunchu, chayta yachaspanmi satanasqa runakunata tukuywan harkan bibliata mana ñawinchanankupaq. ¡Amayá saqikusunchu satanas harkawananchiktaqa! (Efes. 6:11). Kallpanchakunanchikmi bibliata ‘alli-allinta entiendenanchikpaq’ (Efes. 3:18). Noam Chomsky yachaysapa runam nirqa: “Manam pipas chiqap kaqtaqa umanchikmanqa churarunqachu, kikinchikmi chiqap kaqmantaqa yachananchik”, nispa. Chaynaqa chiqap kaqmantam kikinchik yachananchik ‘Diospa qillqanta sapa punchaw allintapuni estudiaspanchik’ (Hech. 17:11).

Satanasqa munanmi mana allinta yuyaymanaykuspa imatapas chaylla allinpaq hapirunanchikta. ¿Imanasqa? Huk qillqam nin: ‘Runakunaqa imapas qawasqanku utaq uyarisqanku allin utaq mana allin kasqanpi mana yuyaymanaspankuqa chayllam allinpaq hapirunku’, nispa (Media and Society in the Twentieth Century). Chaynaqa, ¡amayá tukuy ima niwasqanchikkunatachu creerusun! (Prov. 14:15). Diospa quwasqanchik yuyayninchiktayá servichikusun  tukuy yachasqanchikkunamanta mana iskayrayananchikpaq (Prov. 2:10-15; Rom. 12:1, 2).

Guerrapiqa imatapas ruwankum contranpi kaq soldadokuna hukmanyanankupaq, kikinkupura peleanankupaq utaq tropanmanta karunchakurunanpaq. Alemania tropata kamachiqmi willakurqa imanasqa punta kaq hatun guerrapi vencerachikusqankumanta, nirqam: “Contraykupi kaq runakunapa willakusqankum Alemania runakunata pasaypaqta hukmanyarachirqa”, nispa. Chayna willakuykunawanmi satanaspas rakinachiwachwan hinaspa venceruwachwan. Payqa tukuytam ruwan iñiqmasinchikkunawan piñakurunanchikpaq hinaspa llakisqa utaq piñasqa kasqanchikrayku Diospa llaqtanmanta karunchakurunanchikpaq.

¡Amayá pantachiwananchiktaqa saqikusunchu! Aswanqa bibliapa nisqanta kasukusun. Bibliapim niwanchik huñulla kananchikpaq ‘tukuy sunqumanta pampachanakunanchikpaq’ hinaspa chaylla piwanpas allinyanakunanchikpaq (Mat. 5:23, 24; Col. 3:13, 14). Niwanchiktaqmi iñiqmasinchikkunamanta karunchakuspaqa sasachakuypi kananchikmanta (Prov. 18:1). Kallpanchakusun satanas mana pantarachiwananchikpaq. Pipas piñarachiwaptinchikqa yuyaymanachwanmi imata ruwananchikmanta, sunqullanchikpim tapukuchwan: “¿Wakin runakuna hinachu piñakururqani icha Diospa munasqanman hinachu hawkalla karqani?”, nispa (Gal. 5:16-26; Efes. 2:2, 3).

Capitanninmanta soldadokuna iskayrayaspankuqa manam allintachu peleanqaku. Chayta yachaspanmi enemigokunaqa tukuyta nispanku soldadokunata iskayrayachinku, chaymi capitanninku imallapipas pantaruptinqa ninku: “Capitannikichikqa mana allin runam, payta kasuspaqa wañunkichikmi”, nispa. Enemigonchik satanaspas tukuytam ruwan Diospa akllasqan runankunamanta iskayrayananchikpaq.

¡Amayá pantarachiwananchiktaqa saqikusunchu! Kallpanchakusunyá Diospa llaqtanpi takyananchikpaq hinaspa llaqtanta pusananpaq akllasqan runakunata pantaqña kaptinkupas yanapananchikpaq (1 Tes. 5:12, 13). Amayá allinpaqqa hapisunchu Diospa llaqtanmanta karunchakuqkunapa hinaspa chiqniwaqninchikkunapa imapas nisqankutaqa (2 Tes.  2:2; Tito 1:10). Timoteo hinayá ama qunqasunchu yachasqanchikkunataqa, yuyarisuntaq pikunamanta yachasqanchiktapas (2 Tim. 3:14, 15). Allin ruwaq yuyayniyuq sirvientewanmi Diosqa yaqa pachak wataña imam kaqta yachachiwachkanchik, manam paykunamantaqa iskayrayachwanchu (Mat. 24:45-47; Heb. 13:7, 17).

Satanasqa manchachiwaspanchikpas hukmanyachiwachwanmi. Yachaysapa runakunapa nisqanman hinaqa ñawpaqmantaraqmi runakunaqa runamasinta manchachispanku hukmanyachinku (Easily Led—A History of Propaganda). Filip Taylor yachaysapa runapa nisqanman hinaqa Asiria tropakunas tukuywan manchachispanku enemigonkuta venceqku. Satanaspas munanmi ñakariyta, wañuyta utaq imatapas manchakuspanchik Diosmanta karunchakurunanchikta (Is. 8:12; Jer. 42:11; Heb. 2:15).

Manam saqikunanchikchu imawanpas satanas manchachiwaspanchik Diosmanta karunchawananchiktaqa. Jesusmi nirqa: “Kuyasqay amistadllaykuna, amayá manchakuychikchu cuerpoykichik wañuchiqkunataqa, paykunaqa chay ruwayllatam atinmanku”, nispa (Luc. 12:4). Amayá imaniraqllatapas iskayrayasunchu taytanchik Jehova Dios yanapawananchikmantaqa nitaq ‘runakunapa mana haypay atisqan hatu-hatun atiyta quwananchikmantaqa’, payqa yanapawasunmi mana manchakuq kanapaq hinaspa payman sunqu kanapaqpas (2 Cor. 4:7-9; 1 Ped. 3:14).

Chaywanpas, wakinpiqa mancharisqa utaq hukmanyasqam tarikuwaq, chayna tarikuspaykiqa Jehova Diospa kayna nisqantam yuyarinayki, paymi Josueyman nirqa: ‘Amayá manchakuychu nitaq hukmanyaychu, yupaychasqayki ñuqa [Jehova] Diosqa mayta riptikipas qanwanmi kasaq’, nispa (Jos. 1:9). Chaymi hukmanyasqa tarikuspaykiqa chaylla Jehova Diosta mañakunayki hinaspa imakuna llakichisusqaykita willakunayki. Chayta ruwaptinchikqa Diospa hawkayayninmi sunquykichiktawan yuyaynikichikta waqaychanqa, chaynapim satanaspa tuqllanmanqa mana wichiykusunchu (Filip. 4:6, 7, 13).

Asiria nacionpa tropankunata kamachiq runam Diospa llaqtanta manchachinanpaq kaynata nirqa: “Manam imapas harkasunkichikchu Asiria runakunamantaqa. Manam Jehova Diosnikichikpas yanapasunkichikchu”, nispa. Chaymantapas kaynataraqmi nirqa: “Kikin Diosmi kamachimuwarqaku kay llaqtata puchukachinaykupaq”, nispa. Ichaqa Jehova Diosmi Juda nacionta kamachiqta kaynata nispan kallpancharqa: “Asiria nacion reypa serviqninkunapa insultawasqantaqa amayá manchakuychu”, nispa (2 Rey. 18:22-25; 19:6). Chaymantam Diosqa huk angelta kamachirqa 185.000 Asiria soldadokunata huk tutallapi wañuchinanpaq (2 Rey. 19:35).

¿Haykallapipas qawarqankichu televisionpi huk runa llullakuspan pitapas pantachiyta munasqanmanta? Chayna kaptinqa nirqankichá: “Ama chayna nisqantaqa kasuychu”, nispa. Chaynam angelkunapas qawamuwaspanchik niwanchik: “Ama satanaswanqa pantachikuychu”, nispa.

¡Satanas pantachisunaykitaqa amayá saqikuychu! (Prov. 26:24, 25). Jehova Diosta uyariy hinaspa payllapi hapipakuy (Prov. 3:5-7). Paymi nisunki: ‘Churilláy yachayniyuq kaspayá kusiriykachiy sunquyta’, nispa (Prov. 27:11). Chayta ruwaptikiqa satanasqa manam pantachisunkichu.