JOSUEYMI Diospa akllasqan sumaq allpaman Israel runakunata pusanan karqa tukuy ima sasachakuykunata atipastin. Chaymi Jehova Diosqa kallpancharqa chay sasachakuykunata atipananmanta willaspan, ichaqa kamachirqam atipananpaqqa qillqasqa kamachikuyninkunata sapa punchaw ñawinchananpaq hinaspa kasukunanpaq, chaynapi yachaywan ruwaptin tukuy ima ruwasqan allin qispinanpaq (Jos. 1:7, 8).

Ñuqanchikpas llumpay ‘sasachakuy punchawkunapi’ tarikusqanchikraykum tukuy ima sasachakuykunata atipananchik (2 Tim. 3:1). Chaymi Josueyman Diospa kamachisqanta kasukunanchik. Ñuqanchiktapas sapa punchaw bibliata ñawinchaymi hinaspa kasukuymi yanapawasun sasachakuykunata atipanapaq.

Chayna kaptinpas wakiqninchikqa manam imayna estudiayta yachanchikchu utaq wakiqninchikqa qillapakunchik. Ichaqa bibliata ñawinchay ancha allin kasqanraykum kallpanchakunanchik, chaypaqmi yanapawachwan “ Kaynatam ñawinchawaq” niq yachachikuy. Chaypim nichkan bibliata mana amiruspa hinaspa kusisqa ñawinchanapaq imakunata ruwananchikmanta.

Salmo qillqaqmi nirqa: “Kamachikuynikikunaman hina kawsachikuway, kamachikuynikipim kusikuyta tarini”, nispa (Sal. 119:35). Ñuqanchikpas atichwanmi bibliata kusisqa ñawinchaytaqa. Ñawinchaspaqa tarisunmi sumaq yachachikuykunata.

Manaña Josuey hina Israel nacionta pusaspanchikpas tukuy rikchaq sasachakuykunatam atipananchik. Chayraykuyá Josuey hina kallpanchakusun bibliata ñawinchanapaq hinaspa nisqanta kasukunapaq. Chaynata ruwaspanchikqa yachaywanmi imatapas ruwasun, hinaptinmi tukuy ima ruwasqanchikpas allin qispinqa.