Armenia nacionpi Diosmanta willakuq Anush sutiyuq warmim manaraq bautizakuchkaspan documentota hinaspa qullqi hurquna tarjetakunata tarikurqa. Chaypa ukunpitaqmi achka qullqipas karqa. Payqa chayllam qusanman willakurqa, qusanpas Diosmanta willakuqmi.

Paykunaqa mana qullqiyuq hinaspa manupi kachkaspankupas, dueñonman kutiykachipunankupaqmi tantearurqaku. Chay documentopi maypi yachasqanta yacharuspankum kutiykachipunankupaq rirqaku. Qullqi wischukuruq runaqa ayllunwanmi llumpayta admirakurqaku. Anushqa qusanwanmi nirqaku bibliamanta yachasqankurayku chayna ruwasqankumanta. Chaymantapas Jehova Diospa testigonkuna imayna kasqankumantam willakurqaku hinaspam wakin qillqakunata saqiykurqaku.

Chay runapa ayllunmi Anush iñiqmasinchikman qullqita qupuyta munarqa, ichaqa iñiqmasinchikqa manam chaskiyta munarqachu. Paqarintinñataqmi chay runapa warmin iñiqmasinchikpa wasinman rirqa. Hinaspam agradecekuq kasqanta qawachinanpaq qurimanta anillonta qurqa.

Chay runapa ayllun hinam achka runakuna admirakunmanmu karqa iñiqmasinchikpawan qusanpa ruwasqanmanta. Ichaqa, ¿Jehova Diosqa admirakurqachu? ¿Imaynatam Diosqa qawarqa mana pakakuykusqankuta? ¿Allinchu karqa chayna ruwayninku?

Kay tapukuykunamanta yachayqa manam llumpay sasachu. ¿Imanasqa? Jehova Diosta yupaychaqkunaqa yachankum Diospa imayna kayninta qatipakuyqa imamantapas aswan chaninniyuq kasqanta. Jehova Diosqa runakunapa mana chaninchasqankutam astawanqa chaninchan (Is. 55:8, 9). Payqa anchatam chaninchan imayna kayninta qatipakunankupaq yupaychaqninkuna kallpanchakuptinkuqa.

Yachayniyuq hinaspa entiendeq runa kaymanta bibliapa nisqanta qawasun. Proverbios 3:13-15 nin: ‘¡Mayna kusisqam yachayta tariq runaqa! ¡Mayna kusisqam allin entiendeq runaqa! Yachay chaskisqanmi mastaqa valen qullqimantapas. Entiendeq kayninmi mastaqa valen qurimantapas. Coral alhaja rumimantapas mastaraqmi valen yachayniyuq kayqa. Kuyayllapaq kaq tukuy imapas manam igualanchu yachayniyuq kaymanqa’, nispa. Kaypim sutillata Jehova Dios qawachiwanchik imayna kayninchikta imamantapas astawan chaninchasqanta.

¿Imatam nichwan mana llullakuq kaymanta?

Bibliam nin Jehova Diosqa “mana llullakuq” kasqanta (Tito 1:2). Paymi apostol Pablota qillqachirqa iñiqmasinkunaman kaynata ninanpaq: ‘Ñuqaykupaqyá Diosta mañakuychik. Tukuy imapi allinta portakuyta munaspaykuqa allin concienciayuqmi kachkaniku’, nispa (Heb. 13:18).

Jesucristopa mana llullakuq kasqanqa qatipakunapaqmi. Huk kutipim sacerdotekunapa jefen Caifas Jesusta nirqa: “Kawsaq Diosraykum tapuyki. Niwayku: ¿Qamchu kanki Diospa churin Cristo?”, nispa. Jesusqa mana llullakuspanmi nirqa Cristo utaq Mesias kasqanmanta. Jesusqa yacharqam juezkuna yanqamanta tumpaykuspanku wañurachinankumanta, chaywanpas manam llullakurqachu (Mat. 26:63-67).

¿Imatam ruwachwan imallapipas llullakuykuspa utaq imallatapas pakaspa achka qullqita chaskinanchik kaptinqa? ¿Hinallachu chiqapta rimasunchik?

Kay tukupay punchawkunapiqa sasam imam kaqta rimayqa utaq allinkunallata ruwayqa. ¿Imanasqa? Runakuna kikillanpaq munaqkuna utaq qullqilla kuyaqkuna kasqanraykum (2 Tim. 3:2). Qullqi utaq llamkay mana kaptinqa, wakin runakunaqa manam manchakunkuchu suwakuyta, llullakuyta utaq ima mana allinkuna ruwaytapas. Runakuna chayna kasqankuraykum wakinkuqa piensanku imatapas mana allinta ruwaspalla qullqita tarinankumanta. Wakin iñiqmasinchikkunapas chayna mana allin ruwaymanmi wichiykurqaku. Chayraykum Diospa llaqtanpiqa manaña hapipakunapaq kanku (1 Tim. 3:8; Tito 1:7).

Ichaqa yaqa llapan iñiqmasinchikkunam Jesusta qatipakuspanku allin kaqkunata ruwanku. Yachankum Jehova Diospa imayna kayninkunata qatipakuyqa imamantapas aswan allin kasqanta. Chaymi Diosta yupaychaq mozo-sipaskunapas mana imatapas ruwankuchu profesorninkuta pantachinankuraykuqa (Prov. 20:23). Manam llapanpichu imatapas chaskikusun Anush iñiqmasinchik hina imatapas allinta ruwasqanchikmantaqa. Chayna kaptinpas Diosqa ninmi  allin kaqkunata ruwanapaq kallpanchakunamanta. Chayta ruwaymi yanapawanchik Jehova Dioswan hawkalla kananchikpaq.

Gari sutiyuq runawan ima pasasqanqa qawachiwanchiktaqmi mana llullakuq kayqa ancha allin kasqanta. Manaraq Jehova Diospa testigon kachkaspanmi payqa allin llamkayniyuq karqa. Impuestota mana pagananpaqmi, patronninqa autoridadkunata llullakuq mana ancha qullqita chaskisqanmanta. Gari llamkaymanta nanachikuq kasqanraykum, impuesto mañaq runaman qullqita quq llullakusqanta pakananpaq. Chayta ruwasqanraykum Gariqa sacre runa kasqanwan riqsichikurqa. Ichaqa bibliamanta yacharuspanmi manaña llullakuyta munarqañachu achka qullqita chaskinan kaptinpas. Chaymi kikinpaqña sapaq negociota kicharurqa. Chaymantapacham autoridadkunapa kamachisqankuman hinaña impuestota pagarqa (2 Cor. 8:21).

Garim willakun ñawpaqpi hina manaña qullqita chaskisqanrayku ayllunta uywananpaq sasachakusqanmanta. Chayna kaptinpas kunanqa kusisqam kawsakun hinaspapas hawkam Jehova Dioswan tarikun. Chayna kasqantam iskay churinkunapas qatipakunku, Diospa llaqtanpipas allintam yanapakun. Impuesto mañaq runakunawan paypaq llamkaq runakunapas mana llullakuq hinaspa allin ruwaq kasqantañam yachanku.

Jehova Diosqa kuyan payta qatipakuspa mana suwakuq hinaspa mana llullakuq runakunatam (Tito 2:10). Payqa yanapawasunmi imayna kayninkunata qatipakuptinchikqa. Jehova Diosmi kamachiq Davidta qillqachirqa yuyaqña kaptinpas, allin ruwaq runataqa mana haykapipas qunqasqanmanta nitaq wawa-churinkunatapas yarqaymanta mana saqisqanmanta (Sal. 37:25).

Chayna kasqantam qawanchik Rutpa kawsakuyninpipas. Payqa manam suegranta saqirqachu yuyaqña kaptinpas. Aswanmi paywan kuska Israel nacionman rirqa, chaypim chiqap Dios yupaychayta atinman karqa (Rut 1:16, 17). Rutqa allin llamkaq warmim karqa, Moisespa kamachikuy chaskisqanpi nisqanman hinam wakchakunapaq chakrapi saqisqankuta pallapakuq. Jehova Diosqa Ruttawan suegrantam haykapipas waqaycharqa, chaynatam kamachiq Davidwanpas ruwarqa (Rut 2:2-18). Diosqa manam Ruttaqa waqaychayllachu-waqaycharqa, aswanmi paypa ayllunmanta kamachiq Davidwan Mesias rikurimurqaku (Rut 4:13-17; Mat. 1:5, 16).

Kunanpas Jehova Diosta yupaychaqkunamanta wakinkum sasachakunku kawsanankupaq qullqi tariyta. Ichaqa manam llullakuspankuchu nitaq mana allinta ruwaspankuchu sasachakuyninkutaqa allichanku. Aswanmi kallpanchakunku allin llamkaq kanankupaq. Chaynata ruwaspankum qawachinku Diospa imayna kayninkunata qatipakuyqa imamantapas aswan allin kasqanta (Prov. 12:24; Efes. 4:28).

Enteron pachapim Jehova Diosta yupaychaqkunaqa Rutta qatipakunku hinaspam mana iskayrayankuchu Jehova Dios waqaychananmanta. Jehova Diospa kayna nisqanpim hapipakunku: ‘Manapunim dejasqaykichu nitaqmi saqisqaykichu’, nispa (Heb. 13:5). Jehova Diosqa yanapanmi haykapipas allinkunalla ruwaq runakunataqa. Nisqanman hinam Diosqa yupaychaqninkunaman qun imapas pisipuqninta (Mat. 6:33).

Runakunaqa anchatam chaninchanku quritawan chayman rikchakuq kaqkunata. Jehova Diosmi ichaqa qurimanta astawan chaninchan mana llullakuq nitaq suwakuq kasqanchikta chaynataq sumaq kayninchikkunatapas.