Chayqa tupanmi Jerusalen llaqtata hanaq pachamanta puchukachiq angelkunawan, hina paykunataqmi Diospa piñakuynin punchawpipas satanaspa munaychakuyninta chinkachinqaku. Kay yachachikuyqa musuqmi. Qawasun imanasqam.

Jesuspa tiemponmanta ñawpaqtaraqmi 607 kaq watapi, Jehova Diosqa Ezequielta qawachirqa Jerusalen llaqta manaraq puchukachisqa kachkaptin ima pasakunanmanta. Ezequielqa musquypi hinam qawarqa Jerusalenpi runakuna millakuypaq kaqkuna ruwasqankuta. Chaymantañataqmi qawarqa suqta runakunata sapakamata mazo aptarisqakama hamuchkaqta. Qawarqataqmi huk linomanta pachayuq runata tinterota qillqananpaq apamuchkaqta (Ezeq. 8:6-12; 9:2, 3). Jehova Diosmi chay runata nirqa: “Jerusalen llaqtapa chawpinkunapiyá puririy hinaspayá llaqtapi millakuypaq kaqkunamanta llakillawanña waqaq runakunapa urkunpi churamuy huk señaIta”, nispa. Chay suqta runakunatañataqmi nirqa urkunkupi mana señalasqa runakunata wañuchinankupaq (Ezeq. 9:4-7). ¿Imatam yachachiwanchik chay musquypi hina qawasqanqa? ¿Pitaq tinterota qillqananpaq apamuq runaqa?

Kaytam Ezequielqa willakurqa Jesucristopa tiemponmanta ñawpaqtaraq 612 kaq watapi. Kayqa puntatam cumplikurqa pichqa wata pasayta, Babilonia soldadokuna Jerusalenta puchukachinanpaq Jehova Dios saqiykuptin. Chaynatam Diosqa mana kasukuq llaqtanta corregirqa (Jer. 25:9, 15-18). Ichaqa, ¿imatam Jehova Diosqa ruwarqa payman sunqu llakipi tarikuq judiokunawanqa? Payqa manam saqirqachu paykuna wañuchisqa kanankutaqa.

 Ezequiel musquypi hina qawaspanqa manam pipa urkuntapas señalarqachu nitaq Jerusalen llaqtatapas puchukachirqachu. Aswanmi angelkunapa yanapakuyninwan puchukachirqaku. Kay willakuymi yanapawanchik hanaq pachapi ima pasakusqanta yachananchikpaq. Jehova Diosmi angelninkunata kamachirqa mana allin runakunata puchukachiptinku payman sunqu runakunata waqaychanankupaq. *

Kay willakuyqa hamuq tiempopipas cumplikunqam. Ñawpaqtam yachachirqanchik tinterota qillqananpaq apaq runaqa kay pachapiraq kawsaq hanaq pachapaq suyakuyniyuq iñiqmasinchikkunawan tupasqanta. Yachachirqanchiktaqmi willakusqanchikta uyariq runakuna mana wañunankupaq señalasqa kasqankumanta. Ichaqa kunanmi mana chaynatañachu entiendenchik. ¿Imanasqa? Qaynakunallam Mateo 25:31-33 nisqanta estudiaspanchik yacharqanchik runakunata Jesus juzgananmanta, chaytaqa ruwanqa llumpa-llumpay ñakariy punchawkunapim. Oveja hina kaqkunaqa manam wañunqakuchu, cabra hina kaqkunatam ichaqa Jesus chinkachinqa.

Chaynaqa, ¿imatam yachachiwanchik musquypi hina Ezequielpa qawasqanqa?

1.  Jerusalen llaqta puchukachisqa kananmantam, Jehova Diosqa Ezequielta, Isaiasta hinaspa Jeremiasta runakunaman willachirqa. Kunanpas Jehova Diosqa hanaq pachapaq suyakuyniyuq wakin iñiqmasinchikkunatam servichikun yupaychaqninkunata yachachinanpaq hinaspa runakunaman willakunankupaq manaraq llumpa-llumpay ñakariy punchaw qallarichkaptin. Chay ruwaypiqa Diospa lliw yupaychaqninkunam yanapakunku (Mat. 24:45-47).

2.  Ezequielqa manam haykapipas runakunataqa señalarqachu. Kunanpas Diosta yupaychaqkunaqa manam runakunataqa señalanchikchu. Aswanqa runakunamanmi hamuq tiempomanta willakunchik. Chaytaqa enteron pachapim ruwanchik angelkunapa yanapakuyninwan (Apoc. 14:6).

3.  Ezequielpa tiemponpi mana wañuq runakunaqa manam señalasqachu karqaku. Chaynallataq llumpa-llumpay ñakariy punchawpi mana wañuq runakunaqa mana señalasqam kanqaku. ¿Imatam runakunaqa kunan ruwananku chay punchawpi mana wañunankupaq? Willakuyta uyarispankum Jesusta qatipakunanku, Diosman qukunanku hinaspapas Jesuspa wawqinkunatam yanapananku Diosmanta willakuypi (Mat. 25:35-40). Chay runakunaqa llumpa-llumpay ñakariy punchawpim señalasqa hina kanqaku mana wañunankupaq.

4.  Tinterota qillqananpaq apaq runaqa Jesuswanmi tupan. Llumpa-llumpay ñakariy punchawpim payqa kay pachapi suyakuyniyuqkunata ovejakunata hina juzganqa. Paykunaqa señalasqa hinam kay pachapi wiñaypaq kawsanankupaq akllasqa kanqaku (Mat. 25:34, 46). *

5.  Kunan tiempopi chay suqta runakuna mazo aptarisqakamaqa tupanmi Jesuspa kamachisqan angelkunawan. Paykunam pisi tiempollamantaña tukuy mana allinkunata chinkachinqaku (Ezeq. 10:2, 6, 7; Apoc. 19:11-21).

Kaykunam yachachiwanchik mana allin runakunatawan kuskata Jehova Dios mana chinkarachiwananchikmanta (2 Ped. 2:9; 3:9). Yuyarichiwanchiktaqmi kunan tiempopi lliw runakunaman Diospa piñakuynin punchawmanta willakunanchikpaq, manaraq chay punchaw chayamuchkaptin (Mateo 24:14).