DIOSQA munanmi iñiqmasinchikkunawan hawkalla kananchikta. Chaypaq kallpanchakuspaqa kusisqam kasun, runakunapas hawkalla kasqanchikta qawaspankum Diosman asuykunqaku.

Madagascar nacionmanta layqa runam testigokuna hawkalla kasqankuta qawaspan sunqullanpi nirqa: “Mayqan religionmanpas yaykuspayqa testigokunapamanmi yaykukusaq”, nispa. Chay runam bibliamanta yacharuspan layqa kayta saqirurqa, hinaspam bibliapa yachachikuyninman hinaña ayllunwanpas kawsakurqa, chaymantam bautizakurqa.

Chay layqa runa hinam waranqantin runakuna Diospa llaqtanman yaykuspanku hawkayayta tarinku. Ichaqa bibliapa nisqanman hinam wakinpiqa iñiqmasinchikkunawan piñanakuruchwan (Sant. 3:14-16). Chaymi bibliaqa yachachiwanchik piwanpas piñanakuruspa imaynata allinyanakunapaq. Yachaykusunyá bibliapa chayna yachachikuyninkunata iñiqmasinchikkuna kasukusqankumanta.

Cris sutiyuq iñiqmasinchikmi nin: “Llamkasqaypim huk iñiqmasiywan mana allinchu karqani. Huk punchawmi liryachkaqta iskay runakuna tariramuwarqaku”, nispa.

Yanetpas ninmi: “Diosmanta willakuypi puriqmasiymi qunqayllamanta manaña ñuqawan puriyta munarqachu nitaq rimapayawarqañachu, manamá yacharqanichu imanasqa chayna kasqanmantaqa”, nispa.

Michael iñiqmasinchikñataqmi nin: “Telefonontakamam iskay iñiqmasiywan rimachkarqani, hinaptinmi hukninqa ‘paqarinkama’ nispa niykuwarqaku, chaymi telefononta apagarusqanta piensaspay huknin iñiqmasiyman mana allinkunata paymanta rimarqani. Ichaqa manamá apagasqachu, chaymi tukuy ima rimasqayta uyariramusqa”, nispa.

Gary sutiyuq iñiqmasinchikpas ninmi: “Iskay precursorakunam piñanakururqaku, hukninmi sapa kuti hukninta qaqcharqa, chaymi wakin iñiqmasinchikkunapas hukmanyarurqaku”, nispa.

Chayna sasachakuykunaqa piñanakuruqkunatawan wakin iñiqmasinchikkunatapas hukmanyachinmanmi. Rimamusqanchik iñiqmasinchikkunaqa bibliapa nisqanta kasukuspankum allinyanakurqaku. Yachasunyá bibliapa mayqan yachachikuyninkuna yanapasqanmanta.

“Amam ñanpi piñanakunkichikchu” (Gen. 45:24). Chaynatam Jacobpa churin Josey wawqinkunata nirqa taytankupata manaraq kutichkaptinku. Chayna nisqanqa allinpunim, ¿imanasqa? Pipas chaylla piñakuruq kaspanqa hukkunatapas piñachinmanmi. Cris iñiqmasinchikpas musyakurqam hatun tukuq hinaspa mana uyarikuq kasqanta, chayna kayta mana munaspanmi liryarusqan  iñiqmasinta pampachaykunanpaq nirqa, hinaspam kallpanchakurqa genionta controlananpaq. Chayta qawaspanmi Criswan liryaruq iñiqmasinpas kallpanchakurqa mana chaylla piñakuq kananpaq. Chaymi kunanqa huk sunqullaña Diosta kusisqa servichkanku.

‘Imataña ruway munasqapas, mana tapurikuspa ruwasqaqa manam allinqa lluqsinchu’ (Prov. 15:22, Chuya Qellqa 2012). Yuyaymanaspanmi Yanet iñiqmasinchikpas bibliapa chayna nisqanman hina ñañanta tapurqa imanasqa piñakurusqanmanta. Qallariypi piñasqa kaspankupas sumaqllata rimaspankum hawkayarurqaku. Rimaruptinkum Yanetwan piñakuruq iñiqmasinchikqa musyakururqa yanqamanta piñakurusqanta, chaymi Yanetta nirqa pampachaykunanpaq. Kunanqa kaqllamantam Diosmanta kuskanku willakunku.

“Ofrendaykita altarman apachkaspa wawqiki qampaq imamantapas piñasqa kasqanta chaypi yuyariruspaqa, ofrendaykita altarpa ñawpaqninpi saqiykuspa puntataqa wawqikiwan allinyanakamuy” (Mat. 5:23, 24). Michaelmi Jesuspa chayna nisqanta yuyarispan iñiqmasinwan allinyanakuyta munarqa. Payqa hukmanyasqam tarikurqa iñiqmasinmanta mana allinkunata rimarusqanmanta. Chaymi mana hatun tukuspan iñiqmasinwan rimaq rirqa pampachaykunanpaq. Hinaptinmi iñiqmasinqa sunqumanta pampachaykurqa. Kunanqa kaqllamantam kuyanakunku.

“Piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik” (Col. 3:12-14). Bibliapa chayna nisqantamá rimamusqanchik iskay precursorakunapas kasukurqaku. Iñiqkunapi punta apaqmi paykunawan rimarqa, chaymi musyakururqaku imayna kasqankuwan iñiqmasinkuta hukmanyachisqankuta. Chay punta apaq iñiqmasinchikqa kallpancharqataqmi pacienciakunankupaq, chaynapi wakin iñiqmasinkunapas hawkalla kanankupaq. Paykunaqa kasukurqakum, chaymi allinyanakuruspanku Diosmanta iskayninku willakunku.

Colosenses 3:12-14 nisqanqa ñuqanchiktapas yanapawachwanmi pipas piñarachiwaptinchik. Mana hatun tukuq kaspanchikqa chaylla pampachakuqmi kasun, manataqmi yuyarayasunchu mana allin ruwaruwasqanchiktaqa. Pampachaykuyta utaq mana allin ruwaruwasqanchikta qunqaruyta mana atispaqa Mateo 18:15 nisqanman hinam huchallikuruwaqninchikta sapallanpi rimapayananchik. Mateo 18:15 nisqanqa rimachkan hatun huchata ruwarusqanrayku iñiqmasinchik piñarachiwasqanchikmantam. Ichaqa yanapawanchiktaqmi imachallamantapas piñanakuruptinchik allinyanakunapaqpas. Chaymi allinyanakunanchikpaqqa mana hatun tukuspa hinaspa llampu similla iñiqmasinchikwan rimananchik.

Bibliapiqa tarinchikmá allinyanakunapaq tukuy yachachikuykunataraq. Chay yachachikuykunawan  yanapachikunapaqqa chuya espiritupa kawsachisqanman hinam ‘kuyakuqlla, kusisqalla, hawkalla, pacienciakuq, sumaq sunquyuq, kuyapayakuq, iñiyniyuq, llampu sunqulla hinaspa controlakuq’ kananchik (Gal. 5:22, 23). Chayna kasqanchikqa rikchakunmanmi maquinakunapaq aceiteman, imaynam maquinakunapas aceitechawan allinta servikunku, chaynam chuya espirituman hina kawsaspanchikpas hukkunawan allinlla kawsakusunchik.

Manamá llapallanchikchu chaynalla kanchik, nitaq chaynallatachu piensanchik hinaspa rimanchik. Mana chaynalla kasqanchikqa hukkunawan amistad ruwanapaqmi yanapawanchikman ichaqa sasachakuykunatapas rikurichinmanmi. Chaymi iñiqkunapi punta apaq nirqa: “Mana ancha rimaq iñiqmasinchik libreta rimaq iñiqmasinchikwan kuska kaspanqa wakinpim sasachakuypi tarikunman”, nispa. Chaynaqa ¿yaqachu allin amistad kanmanku mana chaynalla kaq iñiqmasinchikkuna? Arí. Chaynam karqa Jesuspa qatiqnin Pedrowan hinaspa Juanwan. Bibliapa nisqanman hinaqa Pedroqa chayllam imatapas rimaruq hinaspa imatapas ruwaruq. Juanmi ichaqa llampu sunqu hinaspa tantearispa imapas ruwaq karqa. Chayna kaspankupas iskayninkum huk sunqulla Diospaq llamkarqaku (Hech. 8:14; Gal. 2:9). Ñuqanchikpas mana chaynalla kaspanchikpas atichwanmi huk sunqulla Diospaq llamkaytaqa.

Ichapas huk kaqnin iñiqmasinchik rimasqanwan utaq ruwasqanwan piñachiwachwan. Chayna kaptinpas señorninchik Jesus payrayku wañusqanta yuyarispanchikmi kuyananchikpaq kallpanchakunanchik (Juan 13:34, 35; Rom. 5:6-8). Chaymi paymanta karunchakunanchikmantaqa  utaq “manam paypa amistadninqa kaymanchu” ninamantaqa kaynata tapukunanchik: “¿Bibliapi kamachikuykunata mana kasukuspanchu mana allinkunata ruwachkan? ¿Hukmanyachiwaytachu munachkan? Icha ¿ñuqa hina mana kasqanraykullachu piñakuchkani? ¿Imakunatam yachayman imayna kasqanmanta?”, nispa.

Ñuqanchik hina mana kaptinpas iñiqmasinchikkunataqa qatipakuchwanmi. Kaypi yuyaymanasun: Iñiqmasinchik libre rimakuq kanman, ñuqanchikñataq pinqapakuq kachwan, chayna kaptinqa yuyaymanananchikmi iñiqmasinchik Diosmanta willakuspan runakunawan mana sasachakuspalla rimasqanpi. Diosmanta willakuq rinanchikpaq nispanchikmi paymanta yachanapaq kallpanchakuchwan. Iñiqmasinchik qukuykuqllaña kaptinpas pay hinam kallpanchakuchwan yuyaqkunata, unquqkunata hinaspa wakchakunata yanapanapaq. Iñiqmasinchikkunawan mana chaynalla kaspanchikpas allin ruwasqankunapi yuyaymanaspaqa atichwanmi paykunawan huk sunqulla kayta. Allin amistadninchik mana rikuriruspankupas allin ruwasqankunapi yuyaymanaptinchikqa llapallanchikmi hawkalla, allinlla hinaspa kusisqalla kasunchik.

Rimasun Apostolkunapa tiemponpi kawsaq Evodia hinaspa Sintique sutiyuq iñiqkunamanta. Paykunaqa manam chaynallachu karqaku, chaywanpas Pablom paykunata nirqa “hukllata piensanankupaq” (Filip. 4:2). Ñuqanchikpas kallpanchakunanchikmi hukllata piensananchikpaq chaynapi iñiqmasinchikkunawan hawkalla kananchikpaq.

Imaynam quraqa tarpukusqanchikta iquyarachinman, chaynam pipaqpas piñasqalla kayqa iquyachichkaq hina iñiqmasinchikkunata sasachanman, chaymi qurata chutachkaq hina piñasqalla kayta sunqunchikmanta chinkachinanchik.  Manachayqa hinallam qura hina wiñanqa. Diosninchiktawan iñiqmasinchikkunata kuyasqanchikraykum kallpanchakunanchik hawkalla kasqanchikta imawanpas mana yanqacharunapaq.

Iñiqmasinchikkunawan hawkalla kananchikpaq kallpanchakusqanchikqa manam yanqapaqchu kanqa. Chaynam karqa huk iñiqmasinchikwan, paymi nin: “Warmachata hinam huknin iñiqmasinchik qawawarqa. Chaywanmi llumpayta piñakururqani, chaymi nanay simiwanña rimapayarqani hinaspam sunqullaypi nirqani: ‘Mana respetawasqanraykum ñuqapas mana respetasaqchu’”, nispa.

Chaymantam piñakuq iñiqmasinchikqa kikin imayna kasqanpi yuyaymanaspan nirqa: “Imayna kasqaywanmi llakikurqani. Cuentatam qukurqani piensasqayta ñuqa cambianaymanta, chaymi Diosta mañakurqani yanapawananpaq hinaspam ñañaypaq regalochata rantirapuspay qillqarqani pampachaykuwananpaq. Chaymantam abrazanakuykuspa allinyanakurqaniku. Manañam piñachinakunikuñachu”, nispa.

Runakunaqa manamá hawka kawsakuytaqa tarinkuchu. Hatun tukuq kasqankurayku utaq pipas imanarunankuta manchakusqankuraykum piñakuqllaña kanku. Chaynam kanku Diosta mana riqsiq runakunaqa, Diosta yupaychaqkunam ichaqa kallpanchakunanchik hawkalla hinaspa huk sunqulla kananchikpaq. Diospa yanapakuyninwanmi Pablo nirqa: ‘Ruegakamuykichikmi akllasqa kasqaykichikman hina allinta kawsakunaykichikpaq. Kawsakuychikqa: Humillakuspa, llampu sunqu kaspa, pacienciakuspa, kuyakuywan aguantanakuspa, hawkalla kaspa hinaspa chuya espiritupa yanapakuyninwan huk sunqulla kanaykichikpaq anchata kallpanchakuspayá’, nispa (Efes. 4:1-3). Iñiqmasinchikkunawan huk sunqulla kayqa ancha allinmi. Chayraykuyá kallpanchakusun piñanarachikuspapas iñiqmasinchikkunawan allinyanakunapaq, chaynapi hawkalla kawsakunanchikpaq.