1, 2. (1) ¿Imataq Diosta serviqkunata kusichiwanchik? (2) ¿Imatam mozo-sipaskuna entiendenanku tayta-mamankupa hinaspa ancianokuna yanapakuyninwan?

CHRISTOPHER iñiqmasinchikmi 12 watanpi kachkaspallanraq bautizakuyta munarqa. Hinaptinmi huk anciano nirqa: “Ñuqaqa wawacha kasqaykimantam riqsiki. Kusikunim bautizakuyta munasqaykimanta, ichaqa ¿imanasqam bautizakuyta munanki?”, nispa. Ancianopa chayna tapusqanqa allinmi karqa. Diosta yupaychaqkunaqa kusisqam tarikunchik sapa wata waranqantin mozo-sipaskuna bautizakuptinku (Ecl. 12:1). Ichaqa tayta-mamakunawan ancianokunam yachananku mozo-sipaskuna imanasqa bautizakuy munasqankumanta.

² Diospa palabranmi yachachiwanchik Jehova Diosta servinapaq tanteakuruspa bautizakuqqa, Dios serviyta chayllaraq qallaykusqanta. Chayraykum Jehova Diosmanta achka bendicionkunata chaskinqa, ichaqa kanqataqmi  satanaspa achka sasachakuykuna churasqanpas (Prov. 10:22; 1 Ped. 5:8). Chaymi Diosta serviq tayta-mamakunaqa warmankuta entiendechinanku Jesuspa qatiqnin kaspanku imaynaña kawsakunankumanta. Mozo-sipaskunapa tayta-maman Diosta mana serviq kaptinqa, ancianokunam kuyakuywan yanapananku Jehova Diosta servinankupaq tanteakuspanku bautizakuruspankuqa imaynaña kawsakunankumanta (leey Lucas 14:27-30). Pipas wasi hatarichiyta munaspanqa ñawpaqmantaraqmi allinta tanteanan. Chaynallataqmi mozo-sipaskunapas bautizakuyta munaspankuqa allinta tanteananku. Chaynata ruwaspankuqa Jehova Diosman sunqum haykapipas kanqaku (Mat. 24:13). ¿Imataq mozo-sipaskunata yanapanqa Jehova Diosta wiñaypaq servinankupaq?

3. (1) ¿Imatam Jesuswan Pedro nirqaku bautizakuymanta? (Mat. 28:19, 20; 1 Ped. 3:21). (2) ¿Imamantam yachasun kay yachachikuypi? (3) ¿Imanasqam ancha allin kay tapukuykunata ruwakuyqa?

³ Mozo-sipas, ¿bautizakuytachu munachkanki? Chayqa allinmi. Bautizakuspa Jehova Diospa testigon kayqa kusikunapaqmi. Jesusmi nirqa lliw qatiqninkuna bautizakunankupaq. Apostol Pedropas nirqam llumpa-llumpay ñakariy punchawpi mana wañunapaqqa bautizakuy ancha allin kasqanmanta (Mat. 28:19, 20; 1 Ped. 3:21). Kay yachachikuypim yachasunchik bautizakunaykipaq kimsa tapukuykunamanta: “¿Yuyayniyuqñachu kani? ¿Imanasqam bautizakuyta munani? Jehova Diosta servinaypaq tanteakuruspayqa, ¿imaynatam kawsakunay?”, nispa. Kaykunata tapukuyqa ancha allinmi, ¿imanasqa? Bautizakuspaykiqa Jehova Diosta wiñaypaq serviy munasqaykitam qawachinki. Chaymi kay tapukuykuna yanapasunki Diosta wiñaypaq servinaykipaq.

4, 5. (1) ¿Atinmanchu warmachakunapas bautizakuyta? (2) ¿Ima ninantaq allin yuyayniyuq kayqa?

⁴ Diospa palabranqa manam ninchu hayka watanchikpi bautizakunapaqqa. Proverbios 20:11 nin: ‘Ruwasqankunawanmi mozoqa imaynam kasqanta riqsichikun. Diospa munasqanman hina kawsasqantam riqsichikun’, nispa. Warmakunaqa yachankum imam allin utaq mana allin kasqantaqa, hinaspapas yachankum Jehova Diospa munasqanman hina kawsakuyta. Chaymi huk kaqnin warmacha allin yuyayniyuq kaptinqa hinaspa  Jehova Diosta servinanpaq tanteakuruptinqa, allinmi kanman bautizakuynin (Prov. 20:7).

⁵ ¿Ima ninantaq allin yuyayniyuq kayqa? Bibliapa nisqanman hinaqa imam allin hinaspa mana allin kasqanta yachaymi hinaspa allin kaqta sunqumanta ruwaymi, manam achka watayuq kayllachu (Heb. 5:14). Allin yuyayniyuq runaqa satanaspa tuqllanman mana wichinanpaqmi kallpanchakun, manam pipas ninanraqchu allin kaqta ruwananpaqqa. Bautizasqaña kaptikiqa manam pipas iskayrayanqachu allin kaqta ruwanaykimantaqa tayta-mamaykiwan utaq huk runakunawan mana kuska tarikuptikipas (Filip. 2:12).

6, 7. (1) ¿Ima sasachakuykunapim Danielqa Babiloniapi tarikurqa? (2) ¿Imaynatam Danielqa allin yuyayniyuq kasqanta qawachirqa?

⁶ ¿Atinmanchu mozo-sipaschakuna allin yuyayniyuq kayta? Yuyaymanariy Diosta serviq Danielpa imayna kasqanpi. Payqa yaqachusmi mozochallaraq karqa Babilonia nacionman mana tayta-mamayuqta aparuptinku. Chaypim achka sasachakuypi tarikurqa. Chaypiqa Jehova Diosta mana yupaychaq runakunawanmi yacharqa. Chaymantapas, Babilonia nacionta kamachiq runata servinanpaqmi akllasqa karqa (Dan. 1:3-5, 13). Wakin runakunapaqqa rikchakurqapaschá Danielqa Babilonia nacionpi aswan allin kawsakusqanta.

 ⁷ Danielmi ichaqa chay sasachakuykunata yuyaywan atiparqa. ¿Imaynatam atiparqa? Babilonia runakuna Jehova Diosta mana kasukunanpaq hikutaptinkupas hinallam Diostaqa kasukurqa. Bibliam nin Danielqa Diosta tukuy sunqunwan kasukunanpaq tanteakurusqanta. Huk rimaypiqa, manam imaniraqllatapas hukllawakuyta munarqachu pantay religionwanqa (Dan. 1:8). Chaynata ruwasqanwanmi allin yuyayniyuq kasqanta qawachirqa.

8. ¿Imatam Danielmanta yachawaq?

⁸ ¿Imatam Danielmanta yachawaq? Allin yuyayniyuq mozo-sipas kaspaykiqa sasachakuykuna kaptinpas Jehova Diostam kasukunayki. Manam camaleon urucha hinachu kanayki, chay uruchaqa waqtanpi imapas kaqkunaman hinam colorninta tikran. Sichu qampas huñunakuykunallapi allinta portakunki hinaspañataq estudiaqmasikikunawanqa mana allinta portakunki, hinaspaqa manam allintachu ruwachkanki. Aswanqa Diosman sunqum kanayki ima sasachakuyña kaptinpas (leey Efesios 4:14, 15).

9, 10. (1) ¿Imanasqam yuyarinayki haykapi sasachakuykuna atipasqaykita? (2) Bautizakuspaqa, ¿imatam qawachichkanki?

⁹ Mozo-sipasllaraq utaq yuyaqña kaspanchikpas llapanchikmi pantaq runakuna kanchik (Ecl. 7:20). Bautizakuyta munaspaykiqa tapukunaykim: “¿Munanichu haykapipas Jehova Diosta kasukuyta?”, nispa. Mozo-sipas, ¿hayka unayñam Jehova Diosta kasukuchkanki? Yuyariy haykapim sasachakuykunata atiparqanki. ¿Atirqankichu allin kaqta ruwayta? Ichapas Danielpa sasachakuyninpi hina tarikuchkanki imapas allin ruwaq kasqaykirayku, pipas nisunkimanpaschá chayna yachasqaykiwan qullqisapa kanaykipaq. Chayna sasachakuykunapi tarikuspaykiqa, ¿atiwaqchu Jehova Diospa munasqanman hina ruwayta? (Efes. 5:17).

¹⁰ Ancha allinmi kay tapukuykunata ruwakuynikiqa, kaykunam yanapasunki bautizakuyqa mana pukllay hinalla kasqanta yachanaykipaq. Bautizakuspaqa qawachichkankim tukuy sunquykiwan Jehova Diosta kuyaspa wiñaypaq serviy munasqaykita (Mar. 12:30). Lliw bautizakuqkunam Jehova Diosta servinankupaq nisqankuman hina ruwananku (leey Eclesiastes 5:4, 5).

11, 12. (1) Bautizakuyta munaptikiqa, ¿pitaq tanteanan? (2) ¿Imataq yanapasunki Jehova Dios hina bautizakuyta qawanaykipaq?

¹¹ Bibliam nin Diospa lliw serviqninkuna chaynataq mozo-sipaskunapas kusikuywan servinankumanta (Sal. 110:3). Chaymi bautizakuyta munaspaykiqa kikikipuni  tanteakunayki, astawanraqmi chaytaqa ruwanayki tayta-mamayki Jehova Diosta serviq kaptinqa.

¹² Wiñasqaykiman hinaqa qawarqankichá amistadnikikuna hinaspa wawqi-panikikuna bautizakusqankuta. Ichaqa manam hukkuna bautizakusqankuraykuchu nitaq wiñarusqaykiraykuchu qampas bautizakunaykiqa. ¿Imataq yanapasunki Jehova Dios hina bautizakuyta qawanaykipaq? Tiempochakunaykim imanasqa bautizakuy ancha allin kasqanta yachanaykipaq. Kay yachachikuypi hinaspa qatiqnin yachachikuypim chaymanta yachasunchik.

13. ¿Imaynatam yachawaq Jehova Diosta kuyasqaykirayku bautizakuy munasqaykita?

¹³ ¿Imaynatam yachawaq Jehova Diosta kuyasqaykirayku bautizakuy munasqaykita? Chaypaqqa Diosta mañakuyniki imayna kasqanpim yuyaymananayki. Tapukuy: “¿Sapa kutichu Diosta mañakuni icha wakillanpichu? ¿Sunqumantachu Diosta mañakuni icha hawa sunqullachu?”, nispa. Kaynata tapukuymi yanapasunki sichu Diospa allin amistadnin kasqaykita yachanaykipaq (Sal. 25:4). Yaqa llapanpim Diosqa mañakusqanchikta uyariykuwaspanchik bibliantakama yanapaykuwanchik. Chaymi Diosta kuyasqaykirayku bautizakuyta munasqaykimanta yachanaykipaqqa bibliata estudianayki (Jos. 1:8). Tapukuy: “¿Sapa semanachu bibliata estudiani? ¿Kusikuywanchu suyani aylluywan Diosta yupaychayta?”, nispa. Kay tapukuykunam yanapasunki Diosta tukuy sunquykiwan kuyasqaykirayku bautizakuy munasqaykita yachanaykipaq.

14. ¿Imataq Jehova Diosta servinapaq tanteakuyqa hinaspa bautizakuyqa?

¹⁴ Wakin mozo-sipaskunam ninku Jehova Diosta servinankupaq tantearusqankutaña, ichaqa ninkutaqmi manaraq bautizakunankupaq hina kasqankuta. Chayna piensaq mozo-sipaskunaqa manam yachankuraqchu Jehova Diosta servinapaq tanteakuy hinaspa bautizakuy ima kasqanta. Jehova Diosta servinapaq tanteakuyqa, Diosta mañakuspa tukuy sunquwan wiñaypaq servinapaq niymi. Bautizakuyñataqmi, Jehova Diosta servinapaq tanteakusqanchikta lliw runakuna yachanankupaq qawachiy. Chaymi manaraq bautizakuchkaspayki kaykunataqa allinta yachanayki.

15. ¿Imataq Jehova Diosta servinapaq tanteakuyqa?

¹⁵ Jehova Diosta servinaykipaq tanteakuruspaykiqa, nichkankim Diosllapaqña kawsanaykipaq. Nichkankitaqmi imamantapas puntataqa munayninta ruwanaykipaq (leey Mateo 16:24). Chaymi Jehova Diosta servinapaq tanteakuyqa mana pukllay hinallachu (Mat. 5:33). ¿Imaynatam qawachiwaq Diosllapaqña kawsakusqaykita? (Rom. 14:8).

16, 17. (1) ¿Imaynatam qawachiwaq Diosllapaqña kawsakusqaykita? Willarimuy rikchanachiywan. (2) Diosta servinanpaq pipas tanteakuspanqa, ¿imatam nichkan?

¹⁶ ¿Imaynatam qawachiwaq Diosllapaqña kawsakusqaykita? Kay rikchanachiypi  yuyaymanay: Huk amistadnikim wasinta quykususpayki nisunkiman chaypiña yachakunaykipaq. Ichaqa manam llaventaqa qusunkichu hinaspam nisunkiman paylla punkuta kichananmanta. ¿Niwaqchu chay amistadniki chiqapta wasinta quykususqaykimanta? Icha, ¿hinallaraqchu chay wasiqa paypa kachkan?

¹⁷ Pipas Diosta servinanpaq tanteakuspanqa nichkanmi: “Qamllapaqñam kawsakusaq”, nispa. Jehova Diosqa munanmi chayna nisqanman hina ruwananta. Sichu chay iñiqmasinchik pakallapi Diosta mana serviq runawan riqsinakuyta qallaykunman, utaq llamkayninrayku huñunakuyman mana rinmanchu hinaspa Diosmanta willakuqpas mana lluqsinmanchu, chaynata ruwaspanqa manam Diosllapaqñachu kawsachkan. Chayna runaqa amistadninman wasinta quchkaspan llavenwan qipakuruq runa hinam. Chaymi Jehova Diosta qamllapaqñam kawsasaq nispanchikqa, paypa munasqanman hina kawsananchik sasaña kasukuy kaptinpas. Jesustam qatipakunanchik, paymi nirqa: ‘Hanaq pachamantaqa hamurqani manam munasqallayta ruwanaypaqchu aswanqa kachamuwaqniypa munasqanta ruwanaypaqmi’, nispa (Juan 6:38).

18, 19. (1) ¿Imatam Rosewan Christopher ninku bautizakusqankumanta? (2) ¿Imatam qamqa bautizakuymanta niwaq?

¹⁸ Yachamusqanchikman hinaqa, bautizakuyqa manam pukllay hinallachu. Chaymi Jehova Diosta servinapaq tanteakuspa bautizakuyqa ancha kusikunapaq. Chayta allinta entiendespaykiqa hinaspa Jehova Diosta kuyaspaykiqa mana iskayrayaspam bautizakunki. Manataqmi haykapipas ñakakunkichu bautizakusqaykimantaqa. Rose sutiyuq iñiqmasinchikmi nin: “Anchatam Jehova Diosta kuyani, manam imapas payta serviymanta astawanqa kusichiwanmanchu. Bautizakunaypaq tanteaspayqa manam iskayrayarqanichu imamantapas aswan allin kasqanmantaqa”, nispa.

¹⁹ Kay yachachikuypa qallariyninpi rimamusqanchik Christopher iñiqmasinchikqa 12 watanpi kachkaspallanraqmi bautizakururqa. ¿Imaynam tarikun chayta ruwananpaq tanteasqanmanta? Paymi nin kusisqa tarikusqanmanta. 17 watanpi kachkaspanmi precursor regular karqa, hinaspa 18 watanpiñataq siervo ministerial karqa, kunanñataqmi betel wasipi yanapakuchkan. Christophermi nin: “Manam ñakakunichu bautizakusqaymantaqa. Kunanqa Jehova Diospaqwan llaqtanpaqmi llamkachkani, chaywanmi ancha kusisqa tarikuni”, nispa. Qamqa, ¿piensachkankichu bautizakunaykipaq? Chayna kaptinqa, ¿imataq yanapasunkiman? Qatiqnin yachachikuypim chaymanta yachasunchik.