MANARAQ hanaq pachaman kutichkaspanmi Jesusqa qatiqninkunata nirqa “kay pachapa cantonkama” Diosmanta willakunankupaq (Hech. 1:8). ¿Imaynatam enteron pachapi Diosmanta willakuyta atinmanku karqa?

Ancha riqsisqa huk profesormi nirqa Roma nacionpa kamachisqan tiempopi kawsaq Jesuspa qatiqninkunaqa mana wakin religionkuna hina kasqankuta. ¿Imanasqam chayna karqaku? Maymanpas Diosmanta willakuq risqankuraykum. Chaytam Jesuspas hinaspa chiqap qatiqninkunapas ruwarqaku. Jesuspa qatiqninkunaqa Diospa munaychakusqanmanta sumaq willakuykunatam maypipas willakuqku hinaspam allin sunquyuq runakunaman yachachiqku (Luc. 4:43). Chaymi Diospa palabranqa “apostolkuna” nispa sutichan, imatapas ruwanankupaq kamachisqa kasqankurayku (Mar. 3:14, NM). Jesusmi qatiqninkunata kamachirqa: “Llapallan nacionpi runakunaman rispayá willamuychik qatiqniykunaña kanankupaq”, nispa (Mat. 28:18-20).

Jesuspa 12 apostolninkuna manaña kay allpa pachapi kaptinkupas, paykunapa allin ruwasqankutam kunan tiempopi Diospa serviqninkunaqa qatipakunku. ¿Imaynata? Diosmanta willakuqkunapa mana ancha kasqanman rispankum. Paykunaqa ninkum: ‘Kayqaya ñuqa kaypi kachkani. [...] Ñuqatayá kachaway’, nispa (Is. 6:8). Wakinkuqa karu nacionkunamanmi astakunku. Chaytam ruwarqaku Galaad escuelaman riq waranqantin  iñiqmasinchikkuna. Wakinkuñataqmi nacionninkupi huk law llaqtachakunaman astakunku. Hukkunañataqmi musuq rimaykunata yacharunku huk lawpi yanapakunankupaq. Kay ruwaykuna wakinpaq sasa kaptinpas, Jehova Diosta hinaspa runakunata kuyasqankuraykum chaykunata ruwarqaku. Allinta tanteaspankum tiemponkuta, qullqinkuta hinaspa kallpankuta allinta servichikuchkanku Diosmanta huk lawkunapi willakunankupaq (Luc. 14:28-30). Paykunapa ruwasqankuqa ancha allinpunim.

Manam llapanchikchu atinchik musuq rimay yachaytaqa utaq huk lawman astakuytaqa. Ichaqa llapanchikmi atichwan misionero hina maymi huñunakusqanchikpi astawan yanapakuyta. ¿Imaynatam chayta ruwachwan? Qawasunchikyá.

Punta pachak watapi Diosta serviqkunaqa manam llapankuchu misionerokuna karqaku, chaywanpas llaqtankupim Diosmanta tukuy sunqunkuwan willakuqku. Timoteoman Pablopa kayna nisqantam kasukuqku: “Sumaq willakuymanta willakuy hinaspa Diospa kamachisusqayki llamkayta allintapuni ruway”, nispa (2 Tim. 4:5, NM). Ñuqanchikpas Diosmanta willakunapaq hinaspa yachachinapaq kamachikuytaqa kasukunanchikmi. Atichwanmi misionerokuna hina maymi huñunakusqanchikpi astawan imakunapipas yanapakuyta.

Nacionninmanta huk lawman misionero iñiqmasinchik astakuspanqa, chay nacionpi imayna kawsasqankuman hinam kawsayta yachanan. Ñuqanchikqa ichapas mana chaykuna ruwaytaqa atisunchu. Chaywanpas atichwanmi llaqtanchikpi Diosmanta willakunapaq astawan kallpanchakuyta. 1940 kaq watapim, iñiqmasinchikkuna kallpanchasqa karqaku semanapi huk kutita callekunapi Diosmanta willakunankupaq. Ñuqanchikqa, ¿willakuchkanchikchu callekunapi tupasqanchik runakunaman? ¿Ñachu willakurqanchikña carretapi qillqanchikkunawan?

Allin kaqkunapi piensaspaqa, kusikuywanmi Diosmanta willakusunchik. Huk rimayta yachaq iñiqmasinchikkunaqa huk lawman astakuspankum astawan yanapakunku: Diosmanta willakuypi hinaspa huñunakuykuna ruwaypi. Achka misionerokunam astakusqanku llaqtapi huñunakuykunata ruwanku iñiqmasinku chay ruwayta yachanankukama.  Bautizasqa qari kaspaykiqa, ¿kallpanchakuchkankichu siervo ministerial utaq anciano kanaykipaq? (1 Tim. 3:1).

¿Imakunata ruwaspam astawan iñiqmasinchikkunata yanapachwan? Mozo-sipasña utaq yuyaqña kaspanchikpas llapanchikmi iñiqmasinchikkunataqa yanapachwan hinaspa kallpanchachwan (Col. 4:11).

Iñiqmasinchikkunata yanapanapaqqa allintam paykunata riqsinanchik. Bibliam niwanchik huñunakuykunaman rispaqa, paykunapa imayna tarikusqankupi piensanapaq (Heb. 10:24). Kaywanqa manam nichkanchikchu vidankupi chapukunamantaqa, aswanmi entiendenanchik imayna tarikusqankuta hinaspam chayman hina yanapananchik. Ichapas imallapipas yanapaykunanchikta utaq bibliawan kallpanchaykunanchiktapas munachkanku. Wakin ruwaykunatam ichaqa ancianokunalla utaq siervo ministerialkunalla ruwananku (Gal. 6:1). Chaywanpas llapanchikmi yuyaq hinaspa aylluyuq iñiqmasinchikkunataqa sasachakuyninkupi yanapayta atichwan.

Yuyaymanasun Salvatore sutiyuq iñiqmasinchikta ima pasasqanpi. Payqa hatun sasachakuypim tarikurqa qullqimanta, chaymi negocionta, wasinta hinaspa tukuy kapuqninkunatapas rantikururqa. Chayraykum ayllunta imayna uywananmanta llumpayta llakikurqa. Hinaptinmi huk iñiqmasinchik chay sasachakuyninmanta yacharuspan qullqichanwan yanapaykurqa hinaspapas llamkayta tarinankupaqmi señorantawan yanapaykurqa. Achka punchawkunataqmi paykunata uyarispanku kallpancharqaku. Paykunaqa allin amistadmi kunanqa kanku. Sasachakuykunapi yanapanakusqankutam kusikuywan yuyarinku.

Jehova Diospa serviqninkunaqa maypipas Diosmantam runakunaman willakunchik. Jesus hinam lliw runakunaman willakunanchik Diospa tukuy imakunapas ruwananmanta. Wakinkuqa atinqakupaschá huk lawman astakuspa yanapakuyta, wakinñataq mana. Chaywanpas llapanchikmi atichwan iñiqmasinchikkunata astawan yanapaytaqa (Gal. 6:10). Chaykunata ruwaspaqa kusisqam tarikusunchik hinaspapas ‘allin ruruchkaq sacha hinam tukuy allin kaqkunata’ hinalla ruwasunchik (Col. 1:10; Hech. 20:35).