1, 2. (1) ¿Imanasqam bautizakuyqa mana pukllay hinallachu? (2) ¿Imakunatam allinta yachanayki manaraq bautizakuchkaspayki?

MOZO-SIPAS, ¿bautizakuytachu munachkanki? Chay ruwayqa ancha kusikunapaqmi. Pasaq yachachikuypi qawamusqanchikman hinam, bautizakuyqa manam pukllay hinallachu. Bautizakuspaykiqa hukkunamanmi qawachichkanki Jehova Diosllapaqña kawsanaykipaq tanteakurusqaykita. Huk rimaypiqa qawachichkankim Diosta wiñaypaq servinaykipaq tanteakusqaykita hinaspa chay ruway imamantapas aswan allin qampaq kasqanta. Manaraq bautizakuchkaspaykim allinta musyakunayki allin yuyayniyuqña kasqaykita, Diosta kuyasqaykirayku bautizakuy munasqaykita hinaspapas allintam entiendenayki Diosllapaqña kawsanapaq tanteakuy ima ninan kasqanta.

² Ichapas qamqa manaraq bautizakunaykipaq hina kasqaykita piensachkanki. Utaq bautizakuytaña munachkanki, ichaqa tayta-mamaykim nisunki suyayraq wiñanaykikama hinaspa allin yuyayniyuq kanaykikama nispa. Ichaqa ama hukmanyaychu,  hinalla kallpanchakuy bautizakunaykipaq hinaña kanaykikama. Kay yachachikuymi yanapasunki: Iñisqaykipi mana iskayrayanaykipaq, ruwasqaykikunapi astawan kallpanchakunaykipaq hinaspa Jehova Diosta kuyayniki astawan wiñananpaq.

3, 4. ¿Imatam mozo-sipaskuna Timoteomanta yachanmanku?

³ Kaykunata tapukuy: “¿Imanasqam mana iskayrayanichu Dios kasqanmanta? ¿Imanasqam mana iskayrayanichu bibliaqa Diospa yanapakuyninwan qillqasqa kasqanmanta? ¿Imanasqam Diospa kamachikuyninkunata astawan kasukuni runakunapamantaqa?”, nispa. Kaykunata tapukuynikim yanapasunki apostol Pablopa kayna nisqanta kasukunaykipaq, nirqam: “Chaynapim allintapuni yachankichik Diospa munayninta, Diospa munayninqa allinpunim, mana pantaqmi hinaspapas munasqanman hinam”, nispa (Rom. 12:2, NM). Kaywanqa niytam munachkan, Diospa nisqanta ruway imanasqa allinnikipaq kasqanta kikikipuni yachanaykipaqmi. ¿Imanasqam kikikipuni chayta yachanayki?

⁴ Yuyaymanay Timoteopa ruwasqanpi: Payqa Diospa palabrantam allinta yacharqa mamanwan abuelan yachachisqanrayku. Ichaqa Pablom nirqa: “Qamyá ichaqa qaqa hina sayaspa yachasqaykikunata umaykiman churay, qamqariki yachankim pikunam yachachisusqaykitaqa”, nispa (2 Tim. 3:14, 15). Pabloqa kaywanmi nichkarqa Timoteoqa yachasqankunamanta mana iskayrayasqanta. ¿Imanasqataq mana iskayrayarqachu? ¿Mamanwan abuelan chiqapmi kay yachasqaykikunaqa nispa niptillanchu? Manam. Kikin Timoteom yachasqankunapi yuyaymanarqa, chaymi chiqap kasqanmanta mana iskayrayarqachu (leey Romanos 12:1).

5, 6. ¿Imanasqam ancha allin mozo-sipasllaraq kasqaykimanta yuyaynikita allinta servichikuynikiqa?

⁵ ¿Imatam Timoteomanta yachawaq? Qampas yaqapaschá bibliamanta yacharqanki warmachallaraq kasqaykimanta. Chayna kaptinqa, Timoteo hina bibliamanta yachasqaykikunapi imanasqa iñisqaykipi yuyaymanay. Yachasqaykikunamanta mana iskayrayaspaykiqa iñiynikipim aswan allin takyasqa kanki. Chaymi estudiaqmasikikunapa nitaq huk runakunapa nisqankunataqa mana ruwankichu, manataqmi sunquykipa munasqantaqa ruwankichu.

⁶ Ancha allinmi kunanmantapacha yuyaynikita allinta servichikuynikiqa utaq kikiki allinta yuyaymanaynikiqa. ¿Imanasqa? Chaynata ruwaspaykim estudiaqmasikunapa kayna tapususqaykikunata kutichiyta atinki: “¿Imanasqam mana iskayrayankichu Dios kasqanmanta? ¿Imanasqataq Diosqa kuyakuq kachkaspan saqin mana allinkuna kananta? Dios tukuy imata unanchaq kaptinqa, ¿pitaq Diostaqa unancharqa?”, nispa. Yuyaynikita allinta  servichikuspaykiqa manam iskayrayankichu iñiynikimanta tapukuykunata pipas ruwasuptikiqa. Aswanmi kallpanchasunki bibliata astawan estudianaykipaq.

7-9. ¿Ima ruwaytaq yanapasunki iñiynikipi allinta takyanaykipaq?

⁷ Bibliata allinta estudiaspaykiqa tapukuykunatam kutichinki hinaspapas manañam imamantapas iskayrayankichu (Hech. 17:11). Chaypaqmi Jehova Diospa llaqtanpi achka qillqakuna yanapasunki. Achka mozo-sipaskunatam yanaparqa El origen de la vida hinaspa ¿Existe un Creador que se interese por nosotros?, nisqa qillqakuna.

⁸ Qamqa bibliata estudiasqaykiraykum, yachankiña bibliamanta wakin yachachikuykunataqa. Ichaqa, ¿chiqappaqchu hapinki chay yachasqaykikunata? Iskayrayaspaykiqa kikikipuni qillqanchikkunata estudiay iñiynikipi allinta takyanaykipaq. Chay ruwaynikiqa yanapasunkitaqmi huk runakunamanpas iñiynikimanta allinta willakunaykipaq.

⁹ Kikikipunim mana iskayrayanaykichu bibliamanta yachasqaykikunaqa chiqap kasqanmanta. Chaymi yanapasunki bautizakunaykipaq. Huk sipas iñiqmasinchikmi nirqa: “Manaraq bautizakunaypaq tanteachkaspaymi, allinta estudiarqani chiqap religion kasqanmanta mana iskayrayanaykama. Punchawkuna pasasqanman hinam astawan mana iskayrayanichu chayna kasqanmanta”, nispa.

10. ¿Imanasqam lliw bautizasqa kaqkunaqa iñiyninchikta ruwayninchikwan qawachinanchik?

¹⁰ Bibliaqa ninmi: “Pipapas iñiyninqa wañusqa hinam kachkan ruwaynin mana kaptinqa”, nispa (Sant. 2:17, NM). Chaymi iñiyniki kaptinqa hinaspa yachasqaykikunamanta mana iskayrayaptikiqa, ruwasqaykikunapi sutilla qawakunqa. Bibliapa nisqanman hinam, chuyay-chuyay kawsakunki hinaspapas Diosta serviq kasqaykitam ruwasqaykikunawan  qawachinki (leey 2 Pedro 3:11).

11. ¿Ima ninantaq chuyay-chuyay kawsakuyqa?

¹¹ ¿Ima ninantaq chuyay-chuyay kawsakuyqa? Huchakunaman mana wichiykunapaq kallpanchakuymi. Yuyariy suqta killa pasayta ima ruwasqaykita. Imatapas tanteaspaykiqa, ¿atirqankichu imam allin utaq mana allin kasqanta yachayta? (Heb. 5:14). ¿Yuyachkankichu estudiaqmasikikuna mana allinta ruwanaykipaq hikutasuptiki atipasqaykita? ¿Imaynataq estudiaqmasikikunawan kanki? ¿Qatipakunapaq hinachu kanki? ¿Jehova Diospa nisqantachu ruwanki, icha estudiaqmasikikunapa nisqantachu ruwanki asikusunaykimanta manchakuspayki? (1 Ped. 4:3, 4). Arí, llapanchikmá pantaq runakuna kanchik. Wakinkuqa achka watakunaña Jehova Diosta servispankupas yaqapaschá manchakunmanku paypa testigon kasqankuta willakuytaqa. Ichaqa Diosta servinanchikpaq tanteakuruspanchikqa kusisqam tarikunanchik Jehova Diospa testigon kasqanchikmantaqa, chaytam qawachinanchik chuya kawsakuspanchik.

12. (1) ¿Imaynatam Diosta serviq kasqaykita ruwasqaykikunawan qawachiwaq? (2) ¿Imaynatam chayta ruwanayki?

¹² ¿Imaynatam Diosta serviq kasqaykita ruwasqaykikunawan qawachiwaq? Iñiqmasikikunawan huñunakuyman rispaykim hinaspa paykunawan Diosmanta willakuspaykim. Chaynataq sapayki Diosta mañakuspayki hinaspa bibliata estudiaspaykim. Jehova Diosta servinanpaq tanteakuqqa kusisqam kaykunata ruwan, manam hikutasqa hinachu. David hinam tarikun, paymi nirqa: ‘Diosnilláy, munachkanim munallasqaykiman hina ruwallayta. Diosnilláy, sunqullaypim waqaychani qampa yachachisqaykita’, nispa (Sal. 40:8).

13, 14. (1) ¿Imataq yanapasunkiman Diosta serviq kasqaykita ruwasqaykikunawan qawachinaykipaq? (2) ¿Imaynatam mozo-sipaskunapaq qillqa wakinkuta yanaparqa?

¹³ ¿Imataq yanapasunkiman Diosta serviq kasqaykita ruwasqaykikunawan qawachinaykipaq? Chaypaqmi yanapasunki Los jóvenes preguntan, volumen 2 libropa 308, 309 paginankuna. Chaypim kay tapukuykunata kutichiwaq: “¿Tukuy sunquykiwanchu Diosta mañakunki imam munasqaykita? ¿Sutillachu mañakuptiki qawakun Diosta kuyasqayki?” “¿Ima qillqatam sapaykipi estudianki?” “¿Rinkichu Diosmanta willakuq tayta-mamayki mana riptinkupas?”, nispa. Chay qillqapitaqmi qillqawaq Diosta mañakuyniki, sapaykipi bibliata estudiayniki hinaspa Diosmanta willakuyniki aswan allin kananpaq imakunata ruwanaykimanta.

¹⁴ Achka bautizasqa mozo-sipaskunam ninku chay qillqapi yachachikuykuna anchata yanapasqanmanta. Tilda sutiyuq sipasmi nin chay qillqapi tapukuykuna Diospa llaqtanpi ñawparinanpaq yanapasqanmanta. Paymi nin: “Pisi-pisimantam ñawparirqani hinaspa huk watamantaqa bautizakurqaniña”, nispa. Patrick sutiyuq mozopas yaqa chaynatam nin: “Diospa llaqtanpi ñawpariyta tanteaptiypas, chay qillqapi qillqasqaymi astawan yanapawarqa kallpanchakunaypaq”, nispa.

15. ¿Imanasqam qamlla atiwaq Jehova Diosta servinaykipaq tanteakuytaqa?

¹⁵ Los jóvenes preguntan niq qillqapiqa kachkantaqmi kay tapukuypas: “Tayta-mamayki utaq amistadnikikuna Dios serviyta  saqiruptinkuqa, ¿hinallachu Jehova Diosta serviwaq?”, nispa. Jehova Diosllataña servinaykipaq tanteakuruspa bautizakuruspaykiqa, paypa amistadninmi kanki hinaspapas imapas ruwasqaykimantam Diosman cuentata qunki. Manam tayta-mamaykichu nitaq huk runakunachu qampa rantikipiqa Diosta servinqaku. Kunan chuyay-chuyay kawsanaykipaq kallpanchakuspaykiqa hinaspa Diosta serviq kasqaykita ruwasqaykiwan qawachispaykiqa, chiqap religionpi kasqaykimanta mana iskayrayasqaykitam qawachichkanki hinaspapas Diospa kamachisqankunatam kasukuchkanki. Chaynata ruwaspaykiqa bautizakunaykipaq hinañam kachkanki.

16, 17. (1) Pipas bautizakuyta munaspanqa, ¿imanasqam chayta ruwanan? (2) ¿Ima rikchanachiymi qawachiwanchik Jehova Diosta agradecekunanchikpaq?

¹⁶ Huk kutipim, Moisespa kamachikuy chaskisqanta allinta yachaq runakuna Jesusta tapurqa mayqan kamachikuy aswan allin kasqanta. Hinaptinmi Jesusqa nirqa: ‘Diosnikitam kuyanki tukuy sunquykiwan, tukuy vidaykiwan hinaspa tukuy yuyaynikiwan’, nispa (Mat. 22:35-37). Qawasqanchikman  hinaqa, pipas bautizakuyta munaspanqa Jehova Diosta kuyasqanraykum chayta ruwanan. ¿Imaynatam astawan Jehova Diosta tukuy sunquykiwan kuyawaq? Ñuqanchikrayku wañunanpaq Jesusta Dios kay pachaman kachamusqanpi yuyaymanaspam (leey 2 Corintios 5:14, 15; 1 Juan 4:9, 19). Diospa chay hatun kuyakuyninpi yuyaymananaykipaq tiempochakuspaykiqa, astawanmi agradecekuyta munanki.

¹⁷ Kaypi yuyaymanay: Yakupi qiqipachkaptiki pipas yanapaykusuptikiqa, ¿imatam ruwawaq? ¿Yanapasuqnikita mana agradecekuspachu pachaykita cambiakunaykipaq wasikiman riwaq? Manamá, aswanqa ancha-ancha agradecesqachá tarikuwaq. Ñuqanchikpas yaqa yakupi qiqipachkaq hinam tarikunchik huchawan hinaspa wañuywan. Ichaqa Jehova Dioswan Jesusmi chaymanta librawarqanchik anchata kuyawasqanchikrayku. Chayraykum sumaq huertapi wiñaypaq kawsakuyta atisunchik. ¡Maynatam paykunata agradecekunchik!

18, 19. (1) ¿Imanasqam mana manchakunaykichu Jehova Diosta servinaykipaq tanteakuytaqa? (2) ¿Imanasqam nichwan bautizakuspaykiqa aswan kusisqa kawsakunaykimanta?

¹⁸ ¿Agradecesqachu tarikunki qamrayku Jehova Diospa ruwasqanwan? Hinaptinqa allinmi kanman Jehova Diosta servinaykipaq tanteakuyniki hinaspa bautizakuyniki. Yachasqaykiman hinam, Jehova Diosta servinaykipaq tanteakuspaqa paypa munayninta haykapipas ruwanayki. Ichaqa manam manchakunaykichu chayta ruwanaykipaq Diosman niytaqa. ¿Imanasqa? Jehova Diosqa munanmi qampa allinnikita, chaymi kasukuptikiqa wiñay kawsayta qusunki (Heb. 11:6). Jehova Diosta servinaykipaq tanteakuspayki bautizakuspaykiqa, aswan kusisqam kawsakunki. 24 watanpi iñiqmasinchikmi warmachallaraq kachkaspan bautizakusqanmanta nin: “Iskay-kimsa watata suyaspayqa, aswan allintachá entiendeyman karqa ima ruwasqayta. Ichaqa bautizakuymi yanapawarqa satanaspa tuqllankunaman mana wichiykunaypaq”, nispa.

¹⁹ Jehova Diosqa qampa allinnikitam munan. Satanasmi ichaqa kikillanpaq munaq kasqanrayku mana chaytaqa munanchu. Satanaspa munasqanta ruwaptikiqa manam imatapas allin kaqtaqa qusunkichu. ¿Imaynataq allin kaqtaqa qusunkiman, allin kaqninkuna mana kachkaptinqa? Satanaspaqa manam sumaq willakuyninkunaqa nitaq wiñay kawsayta runakunaman qunanpaqqa kanchu, paypas mana wiñaypaq kawsananpaq suyakuyniyuq kasqanrayku (Apoc. 20:10).

20. ¿Imataq yanapasunki Jehova Diosta servinaykipaq tanteakuspayki bautizakunaykipaq? (Qaway “Dioswan amistadninchik aswan allin kananpaq yanapakuykuna” nisqa yachachikuyta).

²⁰ Jehova Diosta servinapaq tanteayqa imamantapas aswan allinmi. ¿Ñachu chayta ruwanaykipaq hinaña kachkanki? Chayna kaptinqa, ama manchakuychu. Manaraq chayta ruwanaykipaq hina kaspaykiqa, kay yachachikuypi nisqankunata ruwanaykipaq kallpanchakuy. Apostol Pablopas Filipos llaqtapi iñiqmasinkunatam nirqa hinalla ñawparinankupaq (Filip. 3:16, NM). Chayna nisqanta kasukuspaykiqa, Jehova Diosta servinaykipaq tanteakuspa bautizakuytam atinki.