1. (1) ¿Mayqanmi bibliapi wakin kamachikuykuna? (2) ¿Imaynatam yanapawanchik chaykunata kasukuyqa?

JEHOVA DIOSQA palabranpim kamachikuykunata quwarqanchik. Chaypim niwanchik taytacha-mamachakuna yupaychay, suwakuy, sinkakuy hinaspa manaraq casarakuchkaspa warmi-qari puñuyqa mana allin kasqanta (1 Cor. 6:9, 10). Chaymantapas Jesusmi qatiqninkunata kamachirqa: ‘Llapallan nacionpi runakunaman rispayá willamuychik qatiqniykunaña kanankupaq hinaspayá bautizamuychik taytapa, churipa hinaspa chuya espiritupa sutinpi. Yachachimuychikyá qamkunaman tukuy ima kamachisqayta kasukunankupaq. Sapa punchawmi ñuqaqa qamkunawan kasaq kay pacha puchukanankama’, nispa (Mat. 28:19, 20). Jehova Diospawan churin Jesuspa lliw kamachiwasqanchikqa kikinchikpa allinninchikpaqmi. Jehova Diospa kamachikuyninkunaqa yanapawanchikmi kikinchik hinaspa ayllunchikpas allin kananchikpaq chaynataq mana unquspa kusisqa kawsakunanchikpaqpas. Astawanraqmi Diosmanta willakunanchikpaq kamachikuyta kasukuptinchikqa, payqa ñuqanchikwan kusikun hinaspam tukuy ima imatapas quwanchik.

2, 3. (1) ¿Imanasqataq bibliapiqa mana kanchu tukuy imapaq kamachikuykunaqa? (2) ¿Ima tapukuykunamantam kaypi yachasunchik? (Qaway 15 kaq paginapi dibujota)

 ² Bibliapiqa manam lliwtachu imayna kawsakunapaqqa niwanchik. Manamá niwanchikchu payta yupaychaqkuna imaynata pachakunamantaqa. Chaymi qawachin Jehova Diosqa yachayniyuq kasqanta. ¿Imanasqa? Enteron pachapi runakunaqa manam chaynallatachu pachakunchik hinaspapas tiempopa pasasqanman hinaqa huk rikchaq pachakunañam lluqsimun, chayraykum bibliaqa hinalla yanapawanchik kunankamapas. Bibliapiqa manataqmi imapi llamkanapaq, imayna kusirikunapaq chaynataq imayna hampichikunapaq kamachikuytaqa quwanchikchu. Aswanmi sapakama ayllu ukupi chaynataq kikinchik tanteakunapaq saqiwanchik.

³ Yaqapaschá imatapas tanteananchik kanqa, ichaqa bibliaqa manamá imayna ruwanapaqqa niwasunchu. Chaymi tapukunanchik: “¿Niymanchu imapas tanteasqayta Jehova Dios mana kaqpaqpas hapisqanta? ¿Kusikunqachu Jehova Diosqa imapas ruwasqaykuna bibliapa nisqanman hina mana kaptin? ¿Imaynatataq yachayman tanteasqaywan Jehova Dios kusichisqayta?”, nispa. Kay yachachikuypim kay tapukuykunamanta yachasun.

4, 5. Imayna tanteakusqanchikqa, ¿kikinchiktapas chaynataq hukkunatapas sasachanmanchu?

⁴ Wakin runakunam ninku imatapas munasqankuman hina ruway atisqankuta, ñuqanchikmi ichaqa Jehova Diosta kusichiyta munanchik. Chaymi manaraq imatapas ruwachkaspa bibliapa ima nisqantaraq yuyarinanchik hinaspam kasukunanchik. Bibliapiqa niwanchikmi yawar churachikuymanta Diosninchik ima nisqanta, chayraykum paytaqa kasukunchik (Gen. 9:4; Hech. 15:28, 29). Jehova Diostaqa mañakuchwantaqmi imatapas allinta tanteakuspa ruwanapaq, chaynapi payta kusichinapaq.

⁵ Imapas tanteakusqanchikqa wakinpim llakichiwachwan. Sichum allinta tanteakuspanchikqa astawanmi Jehova Diosman asuykusun, mana chaynata ruwaspaqa karunchakuruchwanmi. Imayna tanteakusqanchikqa hukkunatapas hukmanyachinmanmi. Manamá iñiqmasinchikkuna hukmanyanankutaqa munanchikchu nitaq iñiyninkupi chiriyanankutapas. Manataqmi iñiqmasinchikkunatapas chiqninachiytaqa munanchikchu. Chayraykum ñuqanchikpaqa ancha allin imapipas allinta tanteakuyninchik (leey Romanos 14:19; Galatas 6:7).

6. ¿Munasqanchikman hinachu imatapas tanteaspa ruwana?

⁶ Imayna tanteakunapaq bibliapi mana niwaptinchikqa, ¿imaynatam allinta ruwanapaq tanteakuchwan? Imatapas munasqanchikman hina ruwanamantaqa, allintam yuyaymanananchik hinaspa tanteananchik Jehova Diospa munasqanman hina. Chayta ruwaspanchikqa manam iskayrayasunchu imapipas allinta tanteasqanchikpi yanapawananchikmantaqa (leey Salmo 37:5).

7. Imatapas ruwanapaq kamachikuykuna bibliapi mana kaptinqa, ¿imaynatam yachachwan Jehova Diospa imam munaynin kasqanta?

⁷ ¿Imaynatam yachachwan ruwasqanchikkuna Jehova Diosta kusichisqanta? Efesios  5:17 kaynata niwanchik: “Jehova Diospa imam munaynin kasqanta allinta yachaychik”, nispa. Imatapas ruwanapaq kamachikuykuna bibliapi mana kaptinqa yachananchikmi Jehova Dios ñuqanchikmanta imam munasqanta, ¿imaynatam chayta yachachwan? Chaypaqqa Diostam mañakunanchik hinaspam chuya espiritun yanapawananchikta saqikunanchik.

8. ¿Imaynatam Jesusqa yacharqa taytanpa munasqanman hina imatapas ruwananpaq?

⁸ Jesusqa taytanpa munasqanman hinam imatapas ruwarqa. Bibliapim niwanchik achka runakuna yarqaymanta kasqankuta, hinaptinmi Jesusqa Diosta mañakurqa hinaspa milagrota ruwaspan mikuchirqa iskay kutipi (Mat. 14:17-20; 15:34-37). Ichaqa chunniqpi Jesus yarqaymanta kachkaptinmi Diabloqa Jesusta nirqa rumita tantayarachinanpaq, Jesusmi ichaqa mana munarqachu (Leey Mateo 4:2-4). ¿Imanasqa? Allintapuni taytanta riqsisqanraykum, chaymi yacharqa chuya espirituta kikinpa munasqanman hina servichikunanta taytan mana munasqanta. Payqa manam iskayrayarqachu taytan yanapananmantaqa nitaq imapas munasqanta qunanmantaqa.

9, 10. ¿Imataq yanapawasun allinta tanteanapaq?

⁹ Jehova Dios yanapawananchikmanta mana iskayrayaspaqa, ñuqanchikpas Jesus hinam allin tanteayta atisunchik. Bibliam nin: ‘Diosllapiyá confiakuy tukuy sunquykiwan. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy tayta Diosta. Paymi munasqanman hina kawsachisunki qamta. Amayá ancha yuyayniyuq kasqaykipaqqa hapikuychu. [Jehova] Diosta respetaspaykiyá mana allinmanta asurikuy’, nispa (Prov. 3:5-7). Bibliata estudiaspanchik hinaspa Jehova Diospa ima piensasqanta yachaspanchikqa, entiendesunmi paypa ima munasqanta. Jehova Diospa imayna piensasqanta astawan entiendespanchikqa manam sasachakusunchu paypa munasqanman hina tanteaytaqa. Chayta ruwaspam Jehova Diospa kamachikuyninkunata kasukusunchik (Ezeq. 11:19).

¹⁰ Yuyaymanasun huk casarasqa warmipi: Payqa rantipakuq risqanpim rikurun sumaq zapatokunata. Ichaqa ancha chaninniyuq kasqanraykum tapukun: “¿Imataya qusay ninman chayna qullqita tukuruptiy?”, nispa. Qusan chaypi mana kaptinpas, payqa yachanñam qusanpa ima piensasqanta, payqa unay watakunañam qusantaqa riqsin hinaspapas yachanmi qullqi servichikuymanta ima piensasqanta. Yaqa chaynam, Jehova Diospa ima piensasqanta hinaspa ñawpaq tiempopi imakuna ruwasqanta yachaspanchikqa, entiendesunmi imata ruwananchikta Dios munasqanmanta.

11. ¿Imakunatam tapukuchwan bibliata estudiaspanchik utaq leespanchik? (Qaway “ Bibliata estudiaspayki tapukuy:” niq yachachikuyta).

¹¹ ¿Imaynatam yachachwan Jehova Diospa piensasqanmanta? Chaypaqqa ancha allinmi kanman bibliata sapanchikpi leenanchikpaq tiempochakuyninchik. Chayta ruwaspanchikmi tapukuchwan: “¿Imatam kayqa Jehova Diosmanta yachachiwan? ¿Imanasqam chaynata ruwarqa?”, nispa. Chaymantapas David hinam Jehova Diosta mañakunanchik payta riqsinanchikpaq astawan yanapawananchikpaq. Davidmi kaynata nispan qillqarqa: ‘Dios taytalláy, riqsiykachillawayá munasqallaykiman hina kawsakuytapas.  Yachaykachillawayá munasqallaykiman hina kawsakuytapas. Yachaykachillawayá chiqap kaqnikiman hina pusawaspayki. Salvaykuqniy Diosniymá qamqariki ñuqallaypaq kapullawanki. Hina qampunitaqmá tukuy punchaw confiakunay Diosqa kallanki’, nispa (Sal. 25:4, 5). Jehova Diosmanta yachaspanchikqa, yuyaymanananchikmi chay yachasqanchik imayna yanapawananchikmanta. ¿Yanapawanchikmanchu ayllunchikpi, llamkayninchikpi, estudiasqanchikpi hinaspa Diosmanta willakusqanchikpipas? Huk kaqnin sasachakuypi yuyaymanaptinchikqa manam llumpay sasachu kanqa Jehova Diospa munasqanman hina chay yachasqanchikta servichikuyqa.

12. ¿Imaynatam qillqanchikkunawan huñunakuyninchikkunaqa yanapawanchik?

¹² Jehova Diospa imayna piensasqanta yachanapaqqa, yanapawasuntaqmi Diospa llaqtanpi bibliawan yachachiwasqanchikta kasukuyninchik. Imatapas manaraq tanteachkaspa Jehova Diospa ima piensasqanta yachanapaqmi yanapawanchikman Índice de las publicaciones Watch Tower hinaspa Jehova Diospa testigonkunapa qillqankunapi maskanapaq yanapakuykuna. Yanapachikuchwantaqmi huñunakuyninchikunapi allinta uyarispa  hinaspa chaypi rimarispa chaynataq chaypi yachasqanchikkunapi yuyaymanaspapas. Kaymi yanapawasun Jehova Dios hina piensanapaq. Hinaspaqa atisunmi paypa munasqanman hina tanteayta, chaynata ruwaptinchikqa bendeciwasunmi.

13. Jehova Diospa ima piensasqanmanta yachayqa, ¿imaynatam yanapawanchik allinta tanteanapaq?

¹³ Jehova Diospa ima piensasqanmanta yachaymi yanapawanchik allinta tanteanapaq. Ichapas qamqa 70 horata sapa killa Diosmanta willakuytaña munachkanki. Chayraykum allicharunkiña tukuy ima ruwaynikitapas Diosmanta astawan willakunaykipaq, ichaqa manaraqmi allintaqa yachankichu as qullqillawan hinaspa mana tukuy imayuq kusisqa kanaykimantaqa. Bibliaqa manam ninchu Jehova Diosta yupaychananpaq precursor kanapaqqa, chaywanpas atiwaqmi tukuy sunquykiwan Jehova Diosta yupaychaytaqa. Ichaqa Jesusmi nirqa Jehova Diospa munayninta puntapi churaqkunata bendecinanmanta (leey Lucas 18:29, 30). Bibliaqa nintaqmi Jehova Diosta hatunchanapaq kallpanchakuptinchik pay kusikusqanmanta, payqa munantaqmi yupaychaspanchik kusisqa kananchikta (Sal. 119:108; 2 Cor. 9:7). Kaykunamanta Diosta mañakuspaqa hinaspa chaypi yuyaymanaspaqa, atisunmi kawsakuyninchikpi allinta tanteayta hinaspapas Jehova Diosmi bendeciwasun.

14. ¿Imaynatam yachachwan allichakuymanta Jehova Dios ima piensasqanta?

¹⁴ Kunanñataq kaypi yuyaymanasun: Qanmi pachakuyta munanki wakin iñiqmasikikunata hukmanyachinanpaq hina pachakunawan. Bibliaqa manam imatapas ninchu imayna pachakuymantaqa. Hinaptinqa, ¿imaynatam yachawaq Jehova Diospa ima piensasqantaqa? Bibliapim niwanchik: ‘Warmikunaqa humildadwanyá pachakuchunku chaynapi ama pitapas hukmankunata piensachinankupaq, amataqyá allichapakuchunkuchu llumpayta ñaqchapakuspaqa, amataqyá adornakuchunkuchu qurimanta alhajakunawanpas nitaq perlaskunawanpas nitaq preciopa chanin pachakunawanpas. Aswanqa allin kaqkunata ruwaspayá Diospa agradonpaq kawsaq warmikuna hina riqsichikuchunku’, nispa (1 Tim. 2:9, 10). Kayqa manam warmikunallapaqchu, aswanqa Diosta lliw yupaychaqkunapaqmi. Llampu sunqu kaspanchikqa, yuyaymanasunmi imayna pachakusqanchikta hukkuna imayna qawawananchikmanta. Chaymi iñiqmasinchikkunata kuyasqanchikrayku mana pachakusunchu paykunata hukmanyachinapaq hinaqa (1 Cor. 10:23, 24; Filip. 3:17). Bibliapa nisqanpi hinaspa Jehova Diospa ima piensasqanpi yuyaymanaspaqa, paypa munasqanman hinam allinta tanteasunchik.

15, 16. (1) ¿Imaynataq Jehova Diosqa tarikun mana allinkunallata piensaptinchikqa? (2) Kusirikuykunata akllaspanchikqa, ¿imaynatam yachachwan Jehova Diospa munasqanman hina kasqanta? (3) ¿Imaynatam tanteananchik aswan allin kaqkunata ruwanapaq?

¹⁵ Bibliapim yachanchik runakuna mana allinta ruwaptinku hinaspa mana allinkunapi piensaptinku, Jehova Dios llakisqa tarikusqanmanta (leey Genesis 6:5, 6). Kaywanmi sutillataqa yachanchik huchapakuypi piensananchikta Jehova Dios mana munasqanmanta, chaypi hinalla piensaspaqa chaytam ruwaruchwan. Jehova Diosqa munanmi chuya hinaspa allin kaqkunapi piensananchikta.  Jesuspa qatiqnin Santiagom kaynata nirqa: ‘Diosmanta yachayniyuq kaqkunaqa kawsanku Diosllapaqñam, hawkallam hinaspa llampu sunqullam. Paykunaqa kanku kasukuqkunam, llakipayakuqkunam, allin sunqukunam, pimanpas mana sayapakuqkunam hinaspa chiqap sunqukunam’, nispa (Sant. 3:17). Bibliapa nisqanman hinaqa manam qawananchikchu mana allinkunata piensanapaq hinaspa ruwanapaq kallpanchawaqninchik kusirikuykunataqa. Jehova Dios imakuna chiqnisqanta hinaspa kuyasqanta allinta yachaspanchikqa, manam sasachakusunchu ima qillqata, qawanapaq kaqkunata hinaspa chaypi pukllaykunata akllanapaqqa. Manam suyasunchu hukkunaraq akllaysiwananchiktaqa.

¹⁶ Imatapas allinta tanteananchikpaqqa manam hukllachu hinaspa chaywan Jehova Diosta kusichinapaqpas. Imapas aswan allin kaqta tanteananchikpaqqa tapuchwanmi ancianokunata utaq allin yuyayniyuq wawqi-paninchikkunata allinta yanapawananchikpaq (Tito 2:3-5; Sant. 5:13-15). Ichaqa manam ninanchikchu ñuqanchikpaq tanteanankutaqa. Aswanmi allinta yuyaymanananchik bibliamanta yachasqanchikkunapi hinaspam kikinchik tanteakunanchik (Heb. 5:14). Apostol Pablom nirqa: ‘Ruwasqanchikmantaqa sapakamam Diosman cuentata qusunchik’, nispa (Gal. 6:5).

17. ¿Imaynatam yanapawanchik Jehova Diospa munasqanman hina imatapas tanteayqa?

¹⁷ Jehova Diospa munasqanman hina imatapas allinta tanteaspanchikqa, paymanmi astawan asuykusunchik hinaspapas bendeciwaspanchikmi chaskiwasunchik (Sant. 4:8). Hinaptinmi iñiyninchikpipas allinta takyasunchik. Chaynaqa bibliapi leesqanchikpiyá yuyaymanasun, chaynapi Jehova Diospa ima piensasqanta yachanapaq. Sapa kutim Jehova Diosmantaqa imatapas yachasunchik (Job 26:14). Ichaqa kunanpuni paymanta yachananchikpaq kallpanchakuspanchikqa, allin yuyayniyuqmi kasunchik hinaspapas allintam tanteasunchik (Prov. 2:1-5). Runakunapa imapas tanteasqanwan imapas ruway munasqanqa cambiaqllam, Jehova Diosmi ichaqa mana chaytaqa cambianchu. Salmo qillqaqmi nirqa: “[Jehova] Diospa rimarillasqankunaqa takyan wiña-wiñaypaqñam. [Jehova] Diospa tanteaykullasqankunaqa takyan mana tukuypaqñam”, nispa (Sal. 33:11). Arí, Jehova Dios hina piensaspanchikqa atichwanmi imatapas allinta tanteayta hinaspa paypa munasqanman hina ruwaytapas.