DANIELWAN MÍRIANMI 2000 watapi casarakuruspanku España nacionpi tukuy imayuq kawsakuqku. Danielmi nin: “Llamkasqaykumanta qullqi chaskisqaykuwanmi munasqaykuta mikuq kaniku, huk law nacionkunam riq kaniku hinaspa allin pachakunata rantiq kaniku. Diosmantapas willakuqmi kaniku”, nispa.

Ichaqa 2006 watapi hatun huñunakuypi yachachimusqanku Danielpa sunqunman chayarusqanraykum manaña chaynañachu kawsarqaku. Chay yachachikuypim nirqaku: “¿Tukuytachu ruwachkanchik mana wañunankupaq runakunata yanapanapaq?”, nispa (Prov. 24:11). Nirqakutaqmi Diosmanta willakunapaq kamachisqa kasqanchikmantapas (Hech. 20:26, 27). Danielmi chaypi uyarisqanmanta nin: “Jehova Diospuni rimapayawachkanmanpas hinam karqa”, nispa. Chay yachachikuypiqa willakurqakutaqmi Diosninchikta tukuy sunquwan servinapaq kallpanchakuspaqa aswan kusisqa kananchikmanta. Chaytaqa Danielqa yacharqam warmichan precursora kaspan kusisqallaña kasqanta qawasqanrayku.

Chay huñunakuypi yachachisqankupi yuyaymanaspanmi Danielqa manaña llumpayta llamkasqanrayku precursor kayta qallaykurqa, hinaspam piensarqa Diosmanta huk law llaqtakunapi warmichanwan willakuspan kusisqa kanankuta.

2007 watapim Danielwan Mírianqa llamkayninkuta saqiruspanku Panamá nacionman astakururqaku pusaq killa chaypi qipakuyta munaspanku. Paykunaqa chay naciontaqa riqsirqakuñam. Chay nacionpim lamar quchapi hichpan llaqtachakunapi Diosmanta willakurqaku. Chay llaqtachakunapi yachaq runakunaqa yaqa llapankum nobe castamanta kanku.

Danielwan Mírianmi llaqtachakunata riqku buquewan hinaspa bicicletawan. Huk kutipim bicicletawan rupaypi tukuy wichayta karusuta rirqaku, chaymi Danielqa pisiparuspan yaqalla wañururqa. Ichaqa nobe castayuq riqsisqanku runakunam wasinkuman qayaykuspanku yanaparqaku, chaytam astawanraq ruwaqku Danielwan Míriam rimayninkupi iskay-kimsa rimayllatapas rimapayaptinku. Chaymantaqa 23 runakunamanmi bibliamanta yachachirqaku.

Chaymantam qullqinku tukururqa, ¿imatam ruwarqaku? Danielmi nin: “España nacionniykuman kutispa bibliamanta yachachisqayku runakunata saqinaykuta piensaspaykum llumpayta llakikurqaniku”, nispa. Ichaqa killa pasayllatam ancha kusikunapaq willakuyta willaykurqaku, ¿imataq chayqa karqa? Mírianmi willakun: “Tukuy tiempoykuwan Diosmanta willakunaykupaqmi Diospa llaqtan kamachiwarqaku, chaymi Panamá nacionpi kusisqa qipakurqaniku”, nispa.

2015 watamantam Danieltawan Mírianta Diospa llaqtanqa qullqiwanqa manaña yanaparqañachu. ¿Imatam ruwarqaku? Paykunaqa manam iskayrayarqakuchu Salmo 37:5 nisqanmantaqa, chaypim nin: ‘Qamtaqyá Diosmanqa vidallaykita entregaykuy. Paypiyá confiakuy qamqa. Payqa ruwaykullanqam lliwta’, nispa. Chaypi nisqanman hinam llamkayta tarirurqaku chaynapi precursor kaspa Diosta hinalla servinankupaq. Kunanqa Veraguas (Panamá) lawpim Diospa munasqanta ruwachkanku.

Danielmi nin: “Manaraq España nacionmanta hamuchkaspaykum piensarqaniku tukuy imayuq mana kaspaqa sasachakunaykuta, kunanqa manam tukuy imayuqchu kaniku ichaqa manam imaykupas pisipuwankuchu”, nispa. ¿Imanasqataq paykunaqa astawan kusikunku? Ninkum: “Llampu sunqu runakuta Diosmanta yachachispaykum astawanqa kusikuniku”, nispa.