1-3. (1) ¿Imanasqam nichwan Evodiawan Sintique piñanakurusqankuta? (Qaway 15 paginapi kaq dibujota). (2) ¿Imam yanapawasun iñiqmasinchikkunawan hawka kawsakunapaq?

ÑUQANCHIKQA anchatam bibliata kuyanchik Diospa palabran kasqanrayku. Bibliaqa yanapawanchikmi achka sasachakuykunapi mana tarikunapaq hinaspapas yanapawanchikmi mana allin ruwaykunata saqinapaq. ¿Yanapachikuchkanchikchu chay yanapakuykunawan? Rimarisun hanaq pachapaq suyakuyniyuq Evodia hinaspa Sintique sutiyuq warmikunamanta. Paykunam piñanakururqaku, ichaqa bibliapiqa manam niwanchikchu imanasqa piñanakurusqankumantaqa.

² Evodiaqa ichapas wakin iñiqmasinkunata wasinman qayaykurqa kuska mikunankupaq. Ichaqa Sintique iñiqmasintam mana qayaykurqachu, miskillataña mikusqankumanta wakin iñiqmasinkuna willakuptinkum Sintiqueqa piñakururqa. Ichapas Sintiqueqa kaynata nirqa: “Ñuqaqa allin amistadniychiki nirqanim. ¡Imaynanpitaq manaqa qayaykuwarqachu!”, nispa.  Sintiqueqa piensarqam paypa amistadnin kayta Evodia mana munasqanta. Chaymi paypas hina chay iñiqmasinkunallata wasinman mikunankupaq qayaykurqa, ichaqa manam Evodiataqa qayaykurqachu. Chayta ruwasqankuwanmi iñiqmasinkunaqa manaña huk sunqullañachu karqaku. Bibliam nin paykunata Pablo allinyanakunankupaq kallpanchasqanmanta. Paykunaqa Pablota uyarispankuchá Jehova Diosta hinalla kusisqa yupaycharqaku (Filip. 4:2, 3).

³ Kunanpas iñiqmasinchikkunawanqa wakinpim piñanakuruchwan. Ichaqa bibliam yanapawanchik chay sasachakuyta allichanapaq hinaspa iñiqmasinchikkunawan hawka kawsakunapaq. Bibliata Diospa chiqap palabranta hina qawaspanchikqa nisqankunataqa kasukusunchikmi (Sal. 27:11).

4, 5. ¿Imatam biblia yachachiwanchik pipas piñachiwaptinchik hawkalla kaymanta?

⁴ Wakinpiqa llakisqam utaq piñasqam tarikuchwan pipas pinqaypi churawaptinchik utaq yanqamanta imatapas niykuwaptinchik. Ichapas chaynata niwanchik huk law llaqtayuq kasqanchikrayku utaq imayna ayriyuq kasqanchikrayku. Chaynata iñiqmasinchik niwaptinchikqa astawanraqmi sunqunchikta nanachinman. ¿Bibliapa ima nisqantaq yanapawanchikman?

⁵ Jehova Diosqa yachanmi piñakuruspa imatapas rimaspanchik utaq ruwaspanchik pesapakunanchikmanta. Chaymi Jehova Diosqa bibliapi yachachiwanchik pipas piñachiwaptinchik hawkalla kanapaq. Bibliam nin: “Ama chaylla piñakuruq kaychu”, nispa. Chayna nisqanta kasukuspaqa manam sasachakuykunapiqa tarikusunchu (leey Eclesiastes 7:9; Proverbios 16:32). Bibliaqa yachachiwanchiktaqmi runamasinchikkunata pampachanapaq. Chaymi Jesuspas nirqa hukkunata mana pampachaptinchikqa Jehova Diospas mana pampachawananchikmanta (Mat. 6:14, 15). ¿Kallpanchakunaykiraqchu aswan pacienciakuq kanaykipaq hinaspa pampachakuq kanaykipaqpas?

6. ¿Imanasqam mana chaylla piñakuruq kananchik?

⁶ Chaylla piñakuruq kaspanchikqa hinaspa mana pampachakuq kaspanchikqa, pitapas chiqniytam qallaykuchwan. Chay chiqnisqanchik iñiqmasinchikmanta mana allinta rimaptinchikmi wakin iñiqmasinchikpas payta chiqniyta qallaykunmanku. Piñakusqanchikta utaq chiqnisqanchikta pakayta munaptinchikpas wakinkuqa chayllam musyarunqaku. Hinaptinmi iñiqmasinchikkunapas ñuqanchikmanta karunchakurunmanku (Prov. 26:24-26). Iñiqkunapi punta apaqkunam bibliawan yanapawasun chiqnikuq hinaspa piñakuq kasqanchikta saqinanchikpaq hinaspa hukkunata pampachananchikpaq (Lev. 19:17, 18; Rom. 3:11-18). Chaynata bibliawan yanapawaptinchikqa, ¿kasukusunchu bibliapa nisqanta?

7, 8. (1) ¿Imaynatam Jehova Diosqa yupaychaqninkunata pusan? (2) ¿Imakunata ruwanapaqmi biblia niwanchik hinaspa imanasqam kasukunanchik?

⁷ Jehova Diosmi kay pachapi yupaychaqninkunata pusawachkanchik hinaspam yachachiwachkanchik. ¿Imaynata? Jesustam  “iñiqkunapa uman” kananpaq churarun, Jesusñataqmi ‘allin ruwaq yuyayniyuq sirvienteta’ churarun Diospa llaqtanta pusananpaq hinaspa yachachinanpaq (Efes. 5:23; Mat. 24:45-47). Ñawpaq tiempopi hinam kunanpas Diospa llaqtanpi punta apaqkunaqa Diospa palabranta kasukunku (leey 1 Tesalonicenses 2:13). ¿Mayqankunataq bibliapi wakin yachachikuykunaqa?

⁸ Bibliam niwanchik huñunakuyman riyta mana saqinanchikpaq (Heb. 10:24, 25). Niwanchiktaqmi iñiqmasinchikkunawan huk sunqulla hinaspa huk pensamientolla kananchikpaq (1 Cor. 1:10). Chaymantapas niwanchikmi ‘Diospa munaychakuyninta hinalla puntata maskanapaq’ (Mat. 6:33). Bibliaqa nintaqmi wasin-wasin, achka runakunapa kasqanpi hinaspa maypipas Diosmanta willakunanchikpaq (Mat. 28:19, 20; Hech. 5:42; 17:17; 20:20). Iñiqkunapi punta apaqkunatapas nintaqmi huchallikuqkunata yanapanankupaq hinaspa mana wanakuqkunata qarqunankupaq (1 Cor. 5:1-5, 13; 1 Tim. 5:19-21). Niwanchiktaqmi cuerponchikpi, yuyayninchikpi hinaspa kawsakuyninchikpi chuya kananchikpaq (2 Cor. 7:1).

9. ¿Pitam Jesusqa Diospa palabranta entiendenapaq servichikuchkan?

⁹ Wakin runakunam ninku pipas mana yachachichkaptillan bibliata entiendenankumanta. Ichaqa 1919 watamantam Jesusqa ‘allin ruwaq yuyayniyuq sirvienteta’ servichikuchkan bibliata Diospa yupaychaqninkunaman entiendechiwananchikpaq. Bibliapa nisqanta kasukuspanchikmi yanapakuchkanchik Diospa llaqtan chuya, hawkalla hinaspa huk sunqulla kananpaq. Chaymi tapukunanchik: “¿Tukuy sunquywanchu Jesustawan ‘allin ruwaq yuyayniyuq sirvienteta’ kasukusaq?”, nispa.

10. ¿Imatam nin Ezequiel qillqapi hanaq pachapi angelkunamanta?

¹⁰ Bibliam niwanchik hanaq pachapi angelkuna Diosta imayna yupaychasqankumanta. Huk kutipim Ezequiel musquypi hina qawarqa Jehova Dios lliw angelninkunata imayna pusasqanta (Ezeq. 1:4-28). Qawarqataqmi lliw angelkuna Jehova Diosta chaylla kasukusqanta. Yachasqanchikman hinam Diosqa kay pachapi yupaychaqninkunatapas chuya espiritunwan pusachkan munayninta ruwanankupaq. Yuyaymanay pasaq chunka watakunapi imakunata Diospa llaqtanpi ruwasqankumanta. Chaymi mana iskayrayananchikchu Jehova Dios llaqtanta pusasqanmantaqa. Jesuswan angelkunaqa ñam chinkachinqakuña kay pachapi tukuy mana allinkunata. Manañam pipas Jehova Diospa sutintaqa pinqaypiqa churanqañachu nitaq allin kamachiq kasqantapas iskayrayachinqañachu.

11, 12. ¿Imakunatam kay tukupay punchawkunapi Diospa llaqtanpi ruwarqaku?

¹¹ Qawasun kay tukupay punchawkunapi Diospa llaqtanpi imakunata ruwasqankumanta. Pachaknintin iñiqmasinchikkunam yanapakurqaku Estados Unidos nacionpi hatun betel wasita Warwick lawpiña hatarichinankupaq. Enteron pachapi waranqantin iñiqmasinchikkunañataqmi huñunakuna wasikunatawan betel wasikunatapas hatarichiypi yanapakuchkanku mana qullqillapaq. Tukuy chaykuna  ruwakunanpaqqa Estados Unidos betel wasimantam cuentallikunku. Anchatam agradecekunchik tukuy sunqunkuwan yanapakuq iñiqmasinchikkunataqa. Maypi kaspanchikpas sunqumanta qullqi qusqanchikwanmi yanapakuchkanchik tukuy chay sumaq wasikunata ruwanankupaq. Jehova Diosmi yupaychaqninkunata hinalla yanapachkan mana hatunchakuspa payman sunqu kasqankurayku (Luc. 21:1-4).

¹² Jehova Diosqa llaqtanpi kaqkunatam allinta yachachiwanchik (Is. 2:2, 3). Kachkanmi Precursorkunata yanapaq escuela, Diospa gobiernonmanta willakuqkunapaq escuela, Galaad escuela, betelpi llamkaqkunapaq escuela, llaqtan-llaqtan watukuq ancianokunapaqwan señorankupaq escuela, Ancianokunapaq escuela, Ancianokunapaq hinaspa siervo ministerialkunapaq escuela hinaspa betel wasipi cuentallikuqkunapaqwan señorankupaq escuela. Internetpi jw.org nisqapipas pachaknintin rimaypim bibliatawan qillqanchikkunata tarinchik. Kay internetpiqa kachkantaqmi warmachakunapaq hinaspa tayta-mamakunapaq achka yachachikuykuna. Tarinkitaqmi castellano  rimaypi iñiqmasinchikkunamanta willakuykunatapas. ¿Servichikuchkanchikchu jw.org nisqanta Diosmanta willakuspanchik hinaspa ayllunchikwan Diosta yupaychaspanchik?

13. Diospa llaqtanpi kasqanchikrayku, ¿imatam ruwananchik?

¹³ Mayna kusisqam tarikunchik Jehova Diospa llaqtanpi kasqanchikrayku. Diospa kamachikuyninkunata yachasqanchikraykum kasukunanchik hinaspa allin kaqta ruwananchik. Achka runakuna mana allin kaqkunata ruwaptinkupas, ñuqanchikqa Jehova Dios hinam ‘chiqninanchik mana allin’ kaqkunata (Sal. 97:10). Bibliam nin “mana allinta allinmi niqkuna” utaq ‘allin kaqta mana allinmi niqkunata’ mana qatipakunanchikpaq (Is. 5:20). Jehova Diosta kusichiyta munasqanchikraykum cuerponchikpi, kawsakuyninchikpi hinaspa Diosta yupaychayninchikpi chuya kananchik (1 Cor. 6:9-11). Bibliapi Diospa niwasqanchikkunaqa allinninchikpaqmi. Ñuqanchikqa Diosta kuyasqanchikraykum payman sunqu kayta munanchik, chayraykum wasinchikpi, llamkayninchikpi, estudiasqanchikpi, iñiqmasinchikkunawan hinaspa maypi kaspanchikpas Diosta kasukunanchik (Prov. 15:3). ¿Imakunapim Diosta kasukunanchik?

14. ¿Imata ruwaspankum tayta-mamakuna Jehova Diosta kasukunku?

¹⁴ Imaynatam warmanchikkunata yachachinchik. Jehova Diosqa tayta-mamakunatam bibliapi yachachin warmankuta imayna uywanankupaq. Manam yachasqanchik lawpi runakunapa imayna piensasqankuwanqa intuchikunanchikchu (Efes. 2:2). Wakin llaqtakunapi taytakunaqa ichapas ninmanku: “Kaypiqa warmikunam warmankumanqa yachachinanku”, nispa. Ichaqa bibliam tayta-mamakunata kamachin iskayninku Diosmanta yachachinankupaq (Efes. 6:4). Jehova Diosta kuyaq tayta-mamakunaqa munankum Samuel hina uchuychankumanta warmanku Diospa amistadnin kanankuta (1 Sam. 3:19).

15. ¿Imatam ruwananchik Jehova Diospa munasqanman hina imatapas tanteananchikpaq?

¹⁵ Imaynatam imatapas tanteakunchik. Manaraq imatapas tanteachkaspanchikmi yachananchik imata Jehova Dios piensasqanmanta, chaynapi imatapas munasqanman hina ruwananchikpaq. Chaypaqqa Diospa palabranwan llaqtanmi yanapawachwan. Wakin tayta-mamakunaqa karu llaqtamanmi ripukurqaku qullqita huñunankurayku, ichaqa warmanku naceruptinmi llaqtankuman kutichinku ayllunkunaña uywanankupaq. Ichaqa chayta manaraq ruwachkaspankum kaynata tapukunanku: “¿Ima ninqataq Jehova Diosqa kayna tanteasqaykumanta?”, nispa (leey Romanos 14:12). Ayllunchikpaq hinaspa llamkananchikpaq manaraq imatapas tanteachkaspam bibliapa ima nisqanpiraq puntata yuyaymanananchik. Bibliapa nisqanman hina yachaywan imatapas tanteananchikpaqqa, Jehova Diospa yanapakuynintam maskananchik (Jer. 10:23).

16. ¿Imatam huk warmi tanteanan karqa wawachan naceruptin? ¿Imataq yanaparqa allinta tanteakunanpaq?

¹⁶ Huk warmipa wawachanmi huk law nacionpi nacerurqa, chaymi qusanwan  tantearurqaku nacionninkuman kutichiptinku abuelonkunaña uywanankupaq. Ichaqa chay warmim Jehova Diospa testigonkunawan biblia estudiayta qallaykurqa. Chay estudiasqanpim yacharurqa warmanman Jehova Diosmanta kikin yachachinanmanta (Sal. 127:3; Prov. 22:6). Bibliapa nisqanman hinam chay warmiqa allinta tanteakunanpaq Jehova Diosta mañakurqa (Sal. 62:7, 8). Chaymantapas bibliamanta yachachiqnin iñiqmasinchikwanmi chaynataq wakin iñiqmasinchikkunawanmi rimarqa. Warmachanta abuelonkunaman kutichinanpaq wakin amistadninkuna hinaspa ayllunkuna hinalla hikutaptinkupas, musyakururqam chayna ruwayqa mana allin kasqanta. Qusanpas sutillatam musyarqa warmichantawan warmankuta iñiqmasinchikkuna anchata yanapasqankumanta. Chayta qawasqanmi kallpancharqa biblia estudiayta qallaykunanpaq hinaspa ayllunwan kuska huñunakuykunaman rinanpaq. Mayna kusisqachá warmichanqa tarikurqa Jehova Dios mañakusqanta uyariykusqanmanta musyakuspan.

17. ¿Imatam ruwananchik pimanpas bibliamanta yachachispanchik?

¹⁷ Imaynatam kamachiwasqanchikkunata kasukunchik. Diosman sunqu kaspanchikqa llaqtanpi niwasqanchikkunatam kasukusunchik. ¿Imatapunim Bibliaqa yachachin? niq qillqawan pimanpas estudiachiyta qallaykuspanchikqa, sapa watukusqanchikpim Jehova Diospa llaqtanta riqsinanpaq yanapananchik. Chaypaqmi servichikuchwan ¿Imaynataq huñunakuyniykuqa? niq videowan hinaspa ¿Pikunataq Jehová Diospa munayninta kay tiempopi rurachkan? niq qillqawanpas. Diospa llaqtanpiqa niwanchiktaqmi ¿Imatapunim Bibliaqa yachachin? niq qillqawan estudiachiyta tukuruspa ‘Diospa kuyakuyninpiyá takyasunchik’ niq qillqawanña yachachinanchikpaq, yachachisqanchik runa bautizasqaña kaptinpas. Chayta ruwaspanchikmi yanapasunchik Diosman ‘iñiyninpi aswan-aswan allin takyananpaq’ (Col. 2:7). ¿Kasukuchkanchikchu Jehova Diospa llaqtanpi niwasqanchikkunata?

18, 19. ¿Imanasqataq Jehova Diosta agradecekunanchik?

¹⁸ Tukuy imamantam Jehova Diostaqa agradecekunanchik. “Pay kaptinmi kawsanchik, purinchik hinaspa kay pachapipas kachkanchik” (Hech. 17:27, 28). Paytaqmi bibliatapas quwarqanchik. Tesalonica llaqtapi Diospi iñiqkuna hinam ñuqanchikpas bibliataqa “Diospa palabranta” hina chaskinchik hinaspa kasukunchik (1 Tes. 2:13).

¹⁹ Bibliata estudiasqanchikmi yanapawarqanchik Jehova Diosman asuykunapaq, payñataqmi ñuqanchikman asuykuwanchik (Sant. 4:8). Anchatam taytanchik Jehova Diosta agradecekunchik llaqtanpi kananchikpaq yanapawasqanchikmanta. Salmo qillqaq hinam tarikunchik, paymi nirqa: ‘Allin kasqanraykuyá [Jehova] Diosman graciasta quychik. Wiñaypaq kuyapayakuq kasqanraykuyá [Jehova] Diosman graciasta quychik’, nispa (Sal. 136:1). Salmo 136 capitulopa sapa versiculonpim Jehova Diosta nin ‘wiñaypaq kuyapayakuq kasqanmanta’. Jehova Diosman sunqu kaptinchikqa hinaspa llaqtanpi tukuy ima niwasqanchikkunata kasukuptinchikqa, wiñay kawsaytam quwasunchik hinaspapas wiñaypaqmi kuyawasunchik.