1. Takikunata qillqaq runapa nisqanman hinaqa, ¿imapaqmi takikunaqa yanapawanchik?

TAKIKUNATA qillqaq riqsisqa runam kaynata nirqa: “Palabrakunaqa piensachiwanchikmi hinaspa takikunañataq sunqunchikman chayan. Takispa yuyaymanasqanchikpas sunqunchikmanmi chayan”, nispa. Takispanchikmi Jehova Dios kuyasqanchikta hinaspa hatunchasqanchikta qawachinchik. Chaytaqmi yanapawanchik Diosman astawan asuykunapaq. Diosta yupaychaqkunapaqqa ancha allinmi paypaq takiyninchik, sapallanchik utaq iñiqmasinchikkunawanpas.

2, 3. (1) ¿Imanasqam wakinkuqa mana munankuchu takiyta? (2) ¿Ima tapukuykunamantam kaypi yachasunchik?

² ¿Kusisqachu huñunakuykunapi takinchik icha pinqapakunchikchu? Wakin llaqtakunapi qarikunaqa pinqakunkum runakunapa qayllanpi takiytaqa. Pinqapakuspa takiptinkuqa wakinkupas chaytam qatipakunmanku, astawanraqmi iñiqkunapi punta apaqkuna chayta  ruwaptinkuqa utaq iñiqmasinku takichkaptinku huk ruwaykunata ruwaptinkuqa (Sal. 30:12).

³ Takispam Jehova Diosta yupaychanchik, chayta yachaymi kallpanchawasun iñiqmasinchikkunawan kuska takinapaq. Chaymi tapukunanchik: “¿Chaninchanichu huñunakuypi takikunata? ¿Imatam ruwayman mana pinqakuspa kusisqa takinaypaq? ¿Imatam ruwayman takikuna sunquyman chayananpaq?”, nispa.

4, 5. ¿Imaynatam yachanchik Israel runakunapaq Jehova Diospaq takiy ancha allin kasqanmanta?

⁴ Jehova Diosta yupaychaqkunaqa achka watakunam takispanku payta hatuncharqaku. Israel runakuna Jehova Diosman sunqu kaspankuqa takispankum payta yupaycharqaku. Kamachiq Davidmi templopi yanapakunankupaq leviy ayllumanta akllarqa 4.000 runakuna tocaspanku Diosta hatunchanankupaq. Paykunamanta 288 runakunañataqmi Jehova “Diosman takinankupaq yachachisqa” karqaku (1 Cron. 23:5; 25:7).

⁵ Templo ruwayta tukuruspankum takirqaku hinaspa tocarqaku. Bibliam nin: ‘Cornetillakunata tocaptinkum llapallanku takispa huk vozlla [Jehova] Diosta alabarqaku hinaspa graciasta qurqaku. Cornetillakunata, platillokunata hinaspa huk rikchaq tocanakunata tocaspankum hinaspa takispankum [Jehova] Diosta alabarqaku. [...] Diospa kanchariyninmi temploman huntarurqa’, nispa. Chayqa anchatachá Israel runakunata iñiyninpi yanaparqa (2 Cron. 5:13, 14; 7:6).

6. ¿Imata ruwanankupaqmi Nehemias kamachirqa Israel runakunata?

⁶ Jerusalen llaqtapa pirqankunata kaqmanta Israel runakuna hatarichiptinkum, Nehemias kamachirqa leviy ayllumanta wakin runakuna takinankupaq hinaspa tocanankupaq. Llaqtapa pirqankuna hatarichiyta tukuruptinkum, takisqankuqa llapankuta yanaparqa aswan kusisqa kanankupaq. Iskayman rakinasqa achkallaña takiqkunam Diosta agradecekurqaku. Sapakamam iskay lawman rirqaku pirqapa hawanta templopa hichpanpi tupanankukama. Paykunapa takisqankutaqa karu llaqtakunamantam uyariqku (Neh. 12:27, 28, 31, 38, 40, 43). Jehova Diosqa anchatachá kusikurqa yupaychaqninkuna kusikuywan takisqankuta uyarispanqa.

7. ¿Imatam Jesus ruwarqa qatiqninkunapas Diosta yupaychanankupaq?

⁷ Jesuspa tiemponpipas, takispam Jehova Diosta yupaycharqaku. Wañukunanpaqña santa cenanta ruwaruspanmi, Jesusqa qatiqninkunawan kuska takirqa (qaway Mateo 26:30).

8. ¿Imatam Jesuspa qatiqninkuna ruwarqaku qatipakunanchikpaq hina?

⁸ Jesuspa wañukusqan qipatapas, qatiqninkunaqa hinallam takispa Diosta yupaycharqaku. Templopi mana huñunakuspankupas wasikunapim huñunakuqku kusisqa takinankupaq. Diospa yanapakuyninwanmi  apostol Pablo iñiqmasinkunata nirqa: “Hinallataqyá yachachinakuychik hinaspa kallpanchanakuychik salmokunawan, Diospaq takikunawan hinaspa graciasta quspa yupaychanapaq takikunawan”, nispa (Col. 3:16). Chaynatam takinanchik Jehova Diospaq takinchikkunata. Chay takikunatapas ‘allin ruwaq yuyayniyuq sirvientem’ tiempollanpi mikuchichkaq hina iñiyninchikpi yanapawananchikpaq quwanchik (Mat. 24:45).

9. (1) ¿Imanasqam wakinkuqa manchakunku huñunakuykunapi kallpawan takiyta? (2) ¿Imaynatam Jehova Diospaq takinanchik hinaspa pikunam qatipakunapaq hina kananku? (Qaway 3 kaq paginapi fotota).

⁹ Wakiqninchikqa ichapas takiyta manchakunchik ayllunchikpi utaq llaqtanchikpi mana haykapipas takisqanchikrayku. Utaq takiyta pinqakunchik radiopi utaq televisionpi takiqkuna hina mana takisqanchikrayku. Ichaqa manam chaywanqa harkachikunanchikchu Jehova Diospaq takinapaqqa. Aswanqa takina qillqanchikta sumaqta hanayniqpi hapispa hinaspa umanchikta huqarispayá sunqumanta takisunchik (Esd. 3:11; qaway Salmo 147:1). Kunanqa achka huñunakunanchik wasikunapim Diospaq takikunata televisionpi churanku. Kaymi yanapawanchik kallpawan takinanchikpaq. Chaymantapas kunanqa punta apaqkunapaq escuelapim Diospaq takinku. Kaymi qawachin punta apaqkunapas qatipakunapaq hina huñunakuykunapi takinankumanta.

10. ¿Imatam yuyarinanchik mana sumaqta takiyta yachaspanchikqa?

 ¹⁰ Wakin iñiqmasinchikkunaqa mana sumaqta takisqankuta piensaspankum upallallamanta takinku. Ichaqa kaypi yuyaymanasun: Rimaspanchikqa ‘llapallanchikmi achkaqpi pantanchik’, ichaqa manam chayraykuchu rimaytaqa saqinchik (Sant. 3:2). Chaynallataqmi sumaqta takiyta mana yachasqanchikraykullaqa, Jehova Diospaq takiytaqa mana saqinanchikchu.

11, 12. ¿Imakuna ruwaymi yanapawanchikman sumaqta takinapaq?

¹¹ Ichapas takiyta manchapakunchik imayna takiyta mana yachasqanchikrayku. Qawasun wakin yanapakuykunata allinta takinanchikpaq.

¹² Kallpawan allinta takinapaqqa yanapawasunmi samayninchikta allinta servichikuy. Imaynam radiopas pilawan takin, chaynam samayninchikpas yanapawanchik takinanchikpaq utaq rimananchikpaq. Takispanchikqa rimasqanchikman hina utaq astawan uyarikunanpaq hinam takinanchik. * Bibliam nin Diosta yupaychaqkuna kusikuymanta qaparispanku takisqankumanta (Sal. 81:1).

13. ¿Imatam ruwananchik mana pinqakuspa takinanchikpaq?

¹³ Ayllunchikwan Diosta yupaychaspa utaq sapallanchik kaspa, kayta ruwasun: Huk kaqnin gustasqanchik takita akllaspa kallpawan mana pinqakuspa ñawinchasun. Chaymantañataq samayta pulmonninchikman huntachispa chayna kallpawan mana samaykuspa ñawinchasun. Hinaspañataq hina chayna kallpawan takisun (Is. 24:14). Chayta ruwaptinchikqa takisqanchikmi allinta uyarikunqa. Chaynaqa, amayá manchakusunchu nitaq pinqakusunchu Diospaq takiytaqa.

14. (1) ¿Imanasqam takispaqa siminchikta astawan kicharinanchik? (Qaway “¿Imaynatam sumaqta takiwaq?” niqta). (2) ¿Imakunatam ruwananchik rimasqanchik llañulla utaq mana uyarikuq kaptinqa?

¹⁴ Kallpawan takinanchikpaqqa, rimasqanchikmantapas astawanmi siminchikta kicharinanchik. Ichaqa, ¿rimasqanchik llañulla utaq mana uyarikuq  kaptinqa? Chay sasachakuyta allichanapaqmi yanapakuykuna kachkan Diosmanta Yachachinapaq Escuelawan Yanapachikuy niq qillqapi, chay qillqapa 184 paginanpim kayna niq yachachikuy kachkan: “Imaynatam kaykunata atipachwan”, nispa.

15. (1) ¿Ima sumaq willakuymi karqa 2016 watapi? (2) ¿Imanasqam kaqmanta ruwarqaku takinanchik qillqata?

¹⁵ 2016 watapa octubre killanpim Estados Unidospi karqa sapa wata Diospa llaqtanpa hatun huñunakuynin, chaypim sumaq willakuy karqa. Diospa llaqtanpi punta apaq Stephen Lett iñiqmasinchikmi, willakurqa musuq takinanchik qillqa lluqsimusqanmanta. Chay qillqapa sutinmi Jehova Diospaqyá kusikuywan takisun niq. Stephen Lett iñiqmasinchikqa nirqataqmi takinanchik qillqata imanasqa kaqmanta ruwasqankumanta, chaytaqa ruwarqaku 2013 watapi lluqsimuq ingles rimaypi Musuq pachapi kawsaqkunapaq Diospa palabran bibliapa nisqanman hina kananpaqmi. Chaymi wakin palabrakunata qichurqaku utaq huktaña churarqaku. Chaymantapas yaparqakum wakin takikunata, chaykunam riman Diosmanta willakunanchikpaq hinaspa Jesuspa  wañukusqanmanta agradecekunapaq. Takispapas Diostam yupaychanchik, chaymi Diospa llaqtanpi punta apaqkunaqa munarqaku chay qillqapa qaranpas bibliapa qaran hina sumaq rikchayniyuq kananta.

16, 17. ¿Imayna ruwasqañam kachkan takinanchik qillqaqa?

¹⁶ Musuq takinanchik qillqaqa mana sasachakuspalla servichikunapaqmi kachkan, imamanta yachachisqanman hinam kachkan. Qallariyninpi 12 takikunam riman Jehova Diosmanta, qatiqninpi 8 takikunañataqmi riman Jesusmanta hinaspa wañukusqanmanta, qatiqnin takikunapas chaynam imamanta yachachisqanman hina rakinasqa kachkan. Takinanchik qillqapa qallariyninpiqa kachkantaqmi imamanta rimasqanman hina yachachikuykuna. Kayqa yanapakunmi takikunata maskanapaq.

¹⁷ Sunqumanta takinanchikpaqmi wakin takikunaqa mana sasachakuspalla entiendenapaq hinaspa takinapaq kachkan. Takispa allinta entiendenanchikpaqmi wakin mana rimasqanchik palabrakunaqa manaña kanchu. Sapa punchaw rimasqanchikman hinam ruwasqa kachkan, chaynapi takiyta mana sasachakunanchikpaq. Wakin takikunatañataqmi yaparunku huñunakuyninchikmanta hinaspa Diosmanta willakuyninchikmanta yachachiqta.

18. ¿Imanasqam allinta riqsinanchik musuq takinanchik qillqata? (Qaway willakuyta).

¹⁸ Jehova Diospaqyá kusikuywan takisun niq qillqapi takikunaqa, Diosta mañakunapaq hinam qillqasqa kachkan. Kaymi yanapawanchik Diosta kuyasqanchikta qawachinapaq. Wakin takikunañataqmi kallpanchawanchik iñiqmasinchikkunata kuyanapaq hinaspa allin kaqkunata ruwanapaq (Heb. 10:24). Chaynaqa, allintam riqsinanchik takinchikkunapa imayna waqasqanta hinaspa ima nisqantapas. Chaypaqqa, uyarinanchikmi internetpi jw.org nisqapi takikunata. Takinchikkunata wasikipi sapa kuti takispaykiqa, mana pinqakuspam sunqumanta takinki. *

19. ¿Imaynatam Jehova Diosta llapanchik yupaychachwan?

¹⁹ Ama qunqaychu, takispapas Diostam yupaychanchik. Takispataqmi Dios kuyasqanchikta hinaspa agradecekusqanchikta qawachinchik (qaway Isaias 12:5). Kusisqa hinaspa kallpawan takispanchikqa hukkunatapas chayta ruwanankupaqmi kallpanchasun. Llapanchikmi mozo-sipasña, yuyaqña utaq chayllaraq bibliata estudiaqña kaspapas takispanchik Diosta yupaychachwan. Chaymi paypaq sunqumanta takinanchik. Kasukunanchiktaqmi bibliapa kamachiwasqanchikta, ninmi: “[Jehova] Diosmanyá qamkunaqa takiychik”, nispa. Chaynaqa, kusikuywanyá Jehova Diospaq takisunchik (Sal. 96:1).