1, 2. (1) Jehova Diosta yupaychaqkunaqa ¿ima premiotam suyachkanchik? (2) ¿Imatam ruwananchik Diospa bendicionninkunata chaskinanchikpaq? (Qaway kay paginapi dibujota).

APOSTOL Pablo hinam kunanpas hanaq pachapaq akllasqa iñiqmasinchikkuna suyachkanku “hanaq pacha premiota” chaskiyta (Filip. 3:14). Munachkankum Jesuswan kamachiyta hinaspa kay pachapi runakunata mana pantaqña kanankupaq yanapaytapas (Apoc. 20:6). Chay suyakuytam Jehova Diosqa paykunaman qurqa. Wakiqninchikñataqmi suyachkanchik kay pachapi wiña-wiñaypaq kawsakuyta (2 Ped. 3:13).

² Hanaq pachapaq akllasqakuna Diosman sunqu hinalla kanankupaq hinaspa premiota chaskinankupaqmi Pablo nirqa: “Piensaychikqa hanaq pachapi kaqkunallapiyá”, nispa (Col. 3:2). Arí, paykunaqa chaypim sapa kuti yuyaymanananku karqa (Col. 1:4, 5). Hanaq pachapi utaq kay pachapi kawsakuyta suyaspapas, Jehova Dios tukuy ima quwananchikpim  yuyaymanananchik, chaymi yanapawasun Diospa bendicionninkunata chaskinanchikpaq (1 Cor. 9:24).

3. ¿Imakunatam Pablo yuyarichirqa Colosas llaqtapi iñiqmasinkunaman?

³ Pabloqa yuyarichirqataqmi imakunata ruwasqanku premio chaskinankuta yanqacharunanmanta. Colosas llaqtapi iñiqmasinkunamanmi Pablo qillqarqa, hinaspam nirqa Jesusta qatiq tukuqkuna Jesuspi iñinankumantaqa Moisespa chaskisqan kamachikuyllata kasukusqankumanta (Col. 2:16-18). Nirqataqmi huchapakuyta munapayay, iñiqkunawan hinaspa ayllupi sasachakuykunapas premio chaskinankuta yanqacharunanmanta. Kay sasachakuykunaqa kunanpas qawakunmi, chaymi Pablopa nisqanqa kunanpas anchata yanapawanchikman. Chaynaqa, Colosas llaqtapi iñiqmasinkunaman Pablopa qillqasqanmanta yachasunchik.

4. ¿Imanasqataq huchapakuyta munayqa Dioswan kuyachikusqanchikta yanqacharunman?

⁴ Sumaq suyakuyniyuq kasqankumanta iñiqmasinkunata yuyarichispanmi Pablo kaynataraq qillqarqa: “Cuerpoykichikpa mana allin ruway munayninkunatayá chinkachiychik, chinkachiychikyá: Huchapakuyta, millakuypaq ruwaykunata, qariwan utaq warmiwan puñuy munapayayta, mana allin ruway munayta hinaspa imatapas llumpayta munapayayta”, nispa (Col. 3:5). Huchapakuyta munayqa llumpaytam inturuwachwan, chaymi Dioswan mana kuyachikuspa wiñaypaq kawsayta suyasqanchiktapas chinkarachichwan. Chaynam karqa huk iñiqmasinchikwan, paymi mana allinkunata munaruspan huchapakururqa. Qipa punchawkunata Diospa llaqtanman kutimuspanmi nirqa: “Mana allinkuna ruway munasqaymi inturuwarqa, chaytam mana chayllachu musyakurqani”, nispa.

5. ¿Imakunatam ruwananchik huchaman mana wichiykunapaq?

⁵ Mana allinkunaman mana wichinapaqqa allin tanteoyuqmi kananchik. Qariwan warmi riqsinakuspankuqa chayllam rimananku sapallanku mana kanankupaq, hinaspa imakunata ruwanankumanta utaq mana ruwanankumantapas (Prov. 22:3). Diosta yupaychaqkunaqa huchamanmi wichiykunmanku llamkasqankurayku karu llaqtapi sapallanku kaspanku, utaq llamkaqmasin warmi utaq qari kaptinqa (Prov. 2:10-12, 16). Chaynapi tarikuspaqa chayllam riqsichikunanchik Jehova Diospa testigon kasqanchikta, hinaspapas chaytam qawachinanchik imapas ruwasqanchikwan. Chaymantapas yuyaymanananchikmi qarikunawan utaq warmikunawan asikachaspaqa mana allinpi tukunanchikmanta. Astawanraqmi qawan-qawanlla kananchik llumpay llakisqa kaspanchikqa utaq mana pipa kuyasqan kasqanchikta piensaspanchikqa. Chayna tarikuspaqa ichapas munasun pipas asuykuwananchikta hinaspa kuyaykuwananchikta, chaynapim sunqunchiktapas suwarachikuchwan Diosta mana yupaychaq runakunawan. Chaymi llakisqa tarikuspaqa chaylla Diospa hinaspa iñiqmasinchikkunapa yanapakuyninta mañakunanchik, chayta ruwaspaqa manam Diospa niwasqanchik premionchiktaqa yanqacharusunchu (qaway Salmo 34:18; Proverbios 13:20).

6. ¿Imaynatam kusirikuykunata akllananchik?

⁶ Huchapakuypi mana piensanapaqqa, chaykunamanta rimaq kusirikuykunawanqa  manam kusirikunanchikchu. Kay tiempopi kusirikuykunaqa yuyarichiwanchikmi ñawpaq tiempopi Sodoma hinaspa Gomorra llaqtakunata (Jud. 7). Kusirikuykunata rikurichiq runakunaqa huchapakuytam allinpaq hina qawachinku. Chaymi qawan-qawanlla kananchik hinaspa tukuy chaykunataqa qipanchananchik. Kusirikuykunata mana allinta akllaspanchikqa, wiñay kawsakuy suyasqanchiktam yanqacharuchwan (Prov. 4:23).

7. ¿Imam iñiqmasinchikkunawan hawkalla kasqanchikta yanqacharunman?

⁷ Kusisqam tarikunchik Diospa llaqtanpi kasqanchikwan. Huñunakuykunapim Diospa palabranmanta yachanchik hinaspa iñiqmasinchikkunawan kallpanchanakunchik. Chaykuna ruwasqanchikmi yanapawanchik Diospa niwasqanchikkunata kusikuywan suyanapaq. Ichaqa wakinpim yanqamanta iñiqmasinchikkunawan sientenarachikuchwan. Chayta mana allicharuspaqa iñiqmasinchikkunawanmi piñasqa tarikuchwan (qaway 1 Pedro 3:8, 9).

8, 9. (1) ¿Imayna kayninchikmi yanapawasun Diospa bendicionninkunata chaskinanchikpaq? (2) ¿Imataq yanapawasun iñiqmasinchik sienterachiwaptinchik paywan hawkalla kananchikpaq?

⁸ Diospa bendicionninkunata chaskinanchikpaqqa manam iñiqmasinchikkunawan piñasqaqa kananchikchu. Apostol Pablom Colosas llaqtapi iñiqkunata nirqa: “Kuyasqallaykuna, qamkunaqa kankichik Diospaq akllasqa runakunam, chaynaqa pachawan churakuchkaq hinayá kaykunawan pachakuychik: Tukuy sunqumanta llakipayakuqllaña kaywan, sumaq sunqu kaywan, mana hatun tukuq kaywan, llampu sunqu kaywan hinaspa pacienciakuywan. Chaymantapas piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik. Imaynam Jehova Diospas tukuy sunqunmanta pampachaykusunkichik, chaynayá qamkunapas pampachanakuychik. Chayna kaspaykichikpas kuyakuywanyá pachakuychik, kuyakuyqa tukuy imapi huklla kanapaqmi yanapawanchik”, nispa (Col. 3:12-14).

⁹ Kuyakuywan sumaq sunqu kaymi yanapawasun iñiqmasinchikkunawan pampachanakunanchikpaq. Pipas rimasqanwan utaq ruwasqanwan sienterachiwaptinchikqa, yuyarinanchikmi ñuqanchikpas rimasqanchikwan utaq ruwasqanchikwan pitapas sienterachisqanchikta. Anchatam agradecekunchik pantaptinchik iñiqmasinchikkuna kuyakuywan hinaspa sumaq sunquyuq kaspanku pampachaykuwasqanchikmanta (qaway Eclesiastes 7:21, 22). Jesustapas anchatam agradecekunchik sumaq sunqu kaspan llapanchikta huñuykuwasqanchikmanta (Col. 3:15). Llapanchikmi huk Diosllata kuyanchik, hina kaqllamanta willakunchik hinaspa sasachakuyninchikpas yaqa chaynallam. Iñiqmasinchikkunata kuyaspanchikqa, sumaq sunqu kaspanchikqa hinaspa pampachakuykuq kaspanchikqa yanapakusunmi huk sunqulla kananchikpaq, hinaspapas Diospa bendicionninkunata chaskinanchikpaqmi kallpanchakusun.

10, 11. (1) ¿Imanasqataq mana envidianakunanchikchu? (2) ¿Imakunatam ruwananchik mana envidianakunanchikpaq?

¹⁰ Envidianakuq kaypas harkawanchikmanmi Diospa bendicionninkunata chaskiymanta. Chaymantapas bibliam nin chayna  runakuna imapi tukusqankumanta. Rimarisun Cainmanta, payqa wawqin Abeltam envidiakuspan wañurachirqa. Core, Datan, hinaspa Abirampas envidiakuspankum Moisespa contranpi hatarirqaku. Kamachiq Saulpas Davidtam envidiakurqa allinkunata ruwasqanmanta, chaymi wañurachiyta munarqa. Chayraykum bibliaqa sutillata nin: “Maypim envidianakuykunapas hinaspa kikillanpaq imapas munaykunapa kasqanpiqa, kachkanraqmi chaqwakuykuna hinaspa tukuy mana allin ruwaykuna”, nispa (Sant. 3:16, Chuya Qellqa 2012).

¹¹ Sunqumanta kuyakuq hinaspa sumaq sunqu kaspanchikqa manam envidianakusunchu. Bibliam nin: “Pipas kuyakuyniyuqqa pacienciakuqmi, allin sunquyuqmi, mana envidiakuqmi”, nispa (1 Cor. 13:4). Envidiakuq mana kanapaqqa Jehova Dios hinam iñiqmasinchikkunataqa qawananchik. Iñiqmasinchikkunaqa huk cuerpopa partenkuna hinam kanku. Chaymi biblia nin: ‘Cuerpopa mayqin partenpas hatunchasqa kaptinqa chay partewan kuskam wakin partenkunapas kusikun’, nispa (1 Cor. 12:16-18, 26). Chaynaqa, pi iñiqmasinchikpas imatapas allinta ruwaruptinqa utaq Diospa llaqtanpi ima llamkaytapas chaskiruptinqa kusikunanchikmi. Rimarisun kamachiq Saulpa churin Jonatanmanta. Payqa manam envidiakurqachu utaq piñakurqachu paypa rantinpi Davidta kamachiq kananpaq Jehova Dios akllaruptinqa. Aswanmi Davidta sunqumanta yanaparqa hinaspa kallpancharqa (1 Sam. 23:16-18). ¿Imaynatam ñuqanchikpas Jonatanta qatipakuchwan?

12. ¿Bibliapa ima nisqanmi ayllunchikta yanapanqa Diospa bendicionninkunata chaskinanchikpaq?

¹² Bibliapa nisqanman hina ayllunchikpi kawsakuspanchikqa hawka hinaspa kusisqam kasunchik, hinaspapas yanapawasunmi  Diospa bendicionninkunata chaskinanchikpaq. Colosas llaqtapi iñiqmasinkunaman cartata apachispanmi Pabloqa ayllukunata nirqa: “Warmikuna, qusaykichiktayá tukuy imapi kasukuychik, chaynam kananku Cristopa qatiqninkunaqa. Qusakuna, warmikichiktayá hinalla kuyaychik, amayá qaqchakachariychikchu. Wawa-churikuna, tukuy imapiyá tayta-mamaykichikta kasukuychik, chayqa señorninchikpa munasqanman hinam. Taytakuna, amayá churikichiktaqa piñachiychikchu, chaynapi sunqunkupi mana hukmanyarunankupaq”, nispa (Col. 3:18-21). Kunanpas Pablopa chayna nisqanqa hinallam qusakunata, warmikunata hinaspa churi-wawakunatapas yanapachkan.

13. ¿Imaynatam warmi iñiqmasinchik Diospi mana iñiq qusanta yanapanman Diosmanta yachananpaq?

¹³ Kaypi yuyaymanasun, ichapas huk iñiqmasinchik ninman Diospi mana iñiq qusan mana kuyakuywan rimasqanmanta. ¿Qusanta qaqchapaspanchu chayna kasqanta allicharunqa? Qusanqa warminpa chayna kasqanta qawaspan, ¿Diosmanta yachaytachu munanqa? Manachusmi. Ichaqa qusanta kuyaspan respetowan imatapas ruwaptinqa allinpim tukunqa. Chaynata ruwaspanqa ayllunpim hawka kanqaku, Jehova Diostapas hatunchanqa hinaspa ichapas qusanqa Diostaña yupaychanqa. Chayna ruwasqanwanmi iskayninku Diospa bendicionninkunata chaskinmanku (qaway 1 Pedro 3:1, 2).

14. ¿Imatam qari iñiqmasinchikqa ruwanan warmin mana respetaptinqa?

¹⁴ Kunanñataq rimarisun qari iñiqmasinchikmanta. Ichapas payqa ninman Diosta mana yupaychaq warmin mana kasukusqanta nitaq respetasqanta. ¿Warminta qaqchapaspanchu respetakuq kananpaq yanapanqa? Manam. Jehova Diosqa munanmi Jesusta qatipakuspanku warminkuta kuyakuywan rimapayanankuta (Efes. 5:23). Jesusqa  iñiqkunapi nanachikuqmi, chaymi kuyakuywan hinaspa pacienciawan paykunata yanapan (Luc. 9:46-48). Qari iñiqmasinchik Jesusta qatipakuspan warminta kuyakuywan rimapayaspanqa, warmintam yanapanqa Diosmanta yachayta munananpaq.

15. ¿Imaynatam iñiqmasinchikqa warmichan kuyasqanta qawachinman?

¹⁵ Bibliam qusakunata nin: “Warmikichiktayá hinalla kuyaychik, amayá qaqchakachariychikchu”, nispa (Col. 3:19). Jehova Diosta yupaychaq qusa warmichanta kuyaspanqa, imapas nisqantam uyarinqa hinaspa chaninchanqa (1 Ped. 3:7). Ichapas mana llapantachu warmichanpa imapas nisqantaqa ruwanqa, ichaqa tapuspanmi allinta imatapas tanteanqa (Prov. 15:22). Warmichanta kuyaq qusaqa manam respetananpaqqa hikutanchu, aswanqa ruwasqanwanmi respetachikun. Iñiqmasinchik warmichanta hinaspa churinkunata kuyaptinqa, kusisqam paykunaqa Jehova Diospa munayninta ruwanqaku hinaspa Diospa bendicionninkunatapas chaskinqaku.

16, 17. Mozo-sipas kaspaqa, ¿imatam ruwawaq tayta-mamayki corregisuptiki mana hukmanyanaykipaq?

¹⁶ Mozo-sipas kaspaykiqa ichapas piensanki Diosta yupaychaq tayta-mamaykiqa munasqaykikunata ruwanaykipaq harkakuqllaña kasqankuta. Ichapas chayrayku piñakuwaq, hinaspa Dios serviytaqa manaña allinnikipaq kasqanta niwaq. Ichaqa, Diosta saqiruspaykiqa manapas unaymantam musyakunki tayta-mamayki hinaspa iñiqmasikikuna hinaqa mana pipas kuyasusqaykita.

¹⁷ Tayta-mamanchikpa corregiwasqanchikqa ancha allinmi. Haykapipas mana corregisuptikiqa, ¿niwaqchu tayta-mamayki kuyasusqaykita? (Heb. 12:8). Ichaqa imayna corregisusqayki mana gustoykipaq kaptinmi piñakuwaq. Piñakunaykimantaqa yuyaymanay imaynanpi tayta-mamayki corregisusqaykipi. Hinaspapas ama chayllaqa piñakuruychu, bibliam nin: ‘Ancha yachayniyuqmi pisilla rimaq runaqa. Mana chaylla hukmanyaruqmi entiendeq runaqa’, nispa (Prov. 17:27). Chaynaqa, kallpanchakuyyá allin yuyayniyuq kanaykipaq, chaynapim pipapas corregisusqaykita allinpaq hapinki mana rimapakuspa (Prov. 1:8). Ancha allinmi Jehova Diosta yupaychaq tayta-mamayuq kaynikiqa. Paykunaqa tukuytam ruwanqaku Diospa bendicionninkunata haypanaykipaq.

18. ¿Imanasqam kallpanchakunayki Diospa bendicionninkunata chaskinaykipaq?

¹⁸ Wakiqninchikmi suyachkanchik hanaq pachapi wiñaypaq kawsakuyta hinaspa wakiqninchikñataq kay pachapi wiñaypaq kawsakuyta. Chay suyasqanchikqa manam yanqallachu. Kikin Jehova Diosmi musuq pachapi kawsakuymanta nin: ‘Enteron kay pachapi runakunam riqsiwanqaku ñuqa [Jehova] Diosta’, nispa (Is. 11:9). Kay pachapi llapallan kawsaqkunaqa Jehova Diospa yachachisqanmi kanqaku. Chaynaqa, kallpanchakusunyá Jehova Diospa bendicionninkunata chaskinanchikpaq. Amayá imawanpas harkachikusunchu.